បារាំង​ ៖ បាតុកម្ម​ប្រឆាំង​ច្បាប់​ការងារ​ ធ្វើ​បារាំង​ជួប​គ្រោះ​ខ្វះ​ប្រេង​ឥន្ធនៈ

ស្ថានីយ៍​ប្រេង​តូតាល់នៅ​ Vertou បិទ​ប្រកាស​អស់​ប្រេង​លក់
ស្ថានីយ៍​ប្រេង​តូតាល់នៅ​ Vertou បិទ​ប្រកាស​អស់​ប្រេង​លក់ © Reuters
ដោយ៖ អៀង សុខម៉ិញ
១២ នាទី

បន្ទាប់​ពី​តំបន់​ភាគ​ខាង​ជើង និង​ខាង​លិច នៅ​ថ្ងៃចន្ទ​នេះ ស្ថានីយ៍​ប្រេង​ឥន្ធនៈ​ មួយ​ភាគ​ធំ​ នៅ​ក្រុង​ប៉ារីស ត្រូវ​បិទ​ទ្វារ​ ជា​បណ្តើរៗ និង​បន្ត​បន្ទាប់ ព្រោះ​​គ្មាន​ប្រេង​​សំរាប់​លក់​ជូន​អតិថិជន​ទៀត​ទេ។ មូលហេតុ​នៃ​កង្វះប្រេង​ឥន្ធនៈ​នេះ បណ្តាល​មក​ពី​​ក្រុម​សហជីព​កម្មករ​នាំ​គ្នា​ធ្វើ​បាតុកម្ម​បិទ​ខ្ទប់​​រោងចក្រ​ប្រេង ដើម្បី​ទាមទារ​ឱ្យ​រដ្ឋាភិបាល​​ដក​គម្រោងធ្វើ​កំណែទម្រង់​ច្បាប់​ការងារ។

ផ្សាយពាណិជ្ជកម្ម

គិតមក​ទល់​នឹង​ល្ងាច​ថ្ងៃ​ចន្ទ​ទី​២៣ ឧសភានេះ មាន​រោងចក្រ​ចម្រាញ់​ប្រេង​៦ ក្នុង​ចំណោម​៨ - ឃ្លាំង​ប្រេង​ចំនួន​៥​ក្នុង​ចំណោម​ឃ្លាំង​ជាង​មួយ​រយ​ ​ ត្រូវ​បិទ​ខ្ទប់​ដោយ​កម្លាំង​បាតុកម្ម​។ ជា​លទ្ធផល​ បន្ទាប់​ពី​តំបន់​ភាគ​ខាង​លិច និង​ខាង​ជើង​ប្រទេស ពេល​នេះ​សូម្បី​តែ​ក្រុង​ប៉ារីស ក៏​បាន​និង​កំពុង​ជួប​វិបត្តិ​ខ្វះ​ប្រេង​ឥន្ធនៈ​ប្រើប្រាស់ដែរ។ ស្ថានីយ៍​នៅក្នុង​និង​ជុំ​វិញ​រដ្ឋធានី​ បាន​បិទ​ទ្វារ​ជាបណ្តើរ​ តាំង​ពី​ព្រឹក​ថ្ងៃ​ចន្ទ​មក។

 
ប៉ុន្តែ​រដ្ឋាភិបាល​អះអាង​ថា នឹង​គ្មាន​បញ្ហា​ខ្វះ​ប្រេង​កើត​ឡើង​ទេ ! ព្រោះ​បារាំង​មាន​ប្រេង​ឥន្ធនៈ​បំរុង​បាន​ដល់​ទៅ​​៩០​ថ្ងៃ។ ស្ថានភាព​នឹង​ប្រសើរ​ឡើង​វិញ​ យ៉ាង​យូរ​នៅ​ថ្ងៃអង្គារ ព្រោះ​អាជ្ញាធរ​បាន​អនុញ្ញាត និង​បង្កើន​បរិមាណ​​រថយន្ត​ដឹក​ប្រេងទៅ​ផ្គត់​ផ្គង់​ស្ថានីយ៍​ មួយ​ទ្វេ​ជា​បី។

ម្យ៉ាង​ទៀត បន្ទាប់​ពី​បាន​ចាត់​ទុក​សកម្មភាព​បិទ​ខ្ទប់​រោងចក្រប្រេង​ថា​ខុស​ច្បាប់ លោកនាយករដ្ឋមន្ត្រី​បារាំង ​បាន​ប្រកាស​​តាំង​ពី​យប់​ថ្ងៃ​អាទិត្យមក ថា​នឹង​ប្រើ​គ្រប់​វិធានការ​ស្រប​ច្បាប់ រាប់​ទាំង​កម្លាំង​បង្ក្រាប​សាធារណៈ​ ឬ​ប៉ូលិស​ផង ទៅ​គាស់​រំលើង​បាតុករ​ រំដោះ​រោងចក្រ​និង​ឃ្លាំង​ប្រេង​វិញ។

សូម​បញ្ជាក់​ថា តាំង​ពី​ថ្ងៃ​អង្គារ​ទី ១៨​ឧសភា​មក ក្រុមសហជីព​កម្មករ​​បាន​នាំ​គ្នា​ ​ប្រើ​មធ្យោបាយ​រារាំង​ដំណើរការ​ដឹកជញ្ជូន​ប្រេង​ ដោយ​បិទ​ខ្ទប់​រោងចក្រ ឬ​ឃ្លាំង​ស្តុក​ប្រេង ដើម្បីប្រឆាំង​នឹង​ច្បាប់​ការងារ​ថ្មី ដែល​រដ្ឋាភិបាល​ ចង់​ធ្វើ​កំណែទម្រង់។ ​ច្បាប់​ការងារ ដែល​ក្រុម​សហជីព​​យល់​ថា​ផ្តល់​ប្រយោជន៍​ឱ្យ​តែ​ក្រុមថៅកែ បាន​ជំរុញ​ឱ្យ​មានបាតុកម្ម​ប្រឆាំង​​ នៅ​គ្រប់​ទិស​ទី​ពេញ​ផ្ទៃ​ប្រទេស ម្តង​ជា​ពីរ​ដង ​ប៉ុន្តែ​លោក​ហ្វ្រង់ស័រ ហូឡង់ បាន​អះអាង​នឹង​មិន​ដក​ថយ​ជា​ដាច់​ខាត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI