អានតួអត្ថបទ

រដូវ​រត់ពន្ធ​អន្តោប្រវេសន៍​តាម​សមុទ្ទមេឌីទែរ៉ាណេ ចាប់​ផ្តើមឡើង​វិញ អ៊ីតាលីជា​​ទិសដៅ​ថ្មី

ទូក​រត់ពន្ធ​ជនភៀស​ខ្លួន​កំពុង​លិច​ តែ​ត្រូវ​ទាហាន​ជើង​ទឹក​អ៊ីតាលី​ឃើញ​ទាន់ពេលវេលា
ទូក​រត់ពន្ធ​ជនភៀស​ខ្លួន​កំពុង​លិច​ តែ​ត្រូវ​ទាហាន​ជើង​ទឹក​អ៊ីតាលី​ឃើញ​ទាន់ពេលវេលា Marina Militare
ដោយ៖ អៀង សុខម៉ិញ
១៤ នាទី

ក្រោយពី​ស្ងប់​ស្ងាត់​អស់​មួយ​រយៈ ចរន្ត​អន្តោប្រវេសន៍​តាម​ទូក​ឆ្លងសមុទ្ទ​មេឌីទែរ៉ាណេ បាន​ចាប់​កំរើក​ឡើង​វិញ។ បើ​តាម​អង្គការ​ទទួល​បន្ទុក​ជន​ភៀស​ខ្លួន​​របស់​អង្គការ​សហប្រជាជាតិ មាន​ជន​អន្តោប្រវេសន៍​ជិត​៧០០​នាក់ ក្នុង​នោះជាង​៤០​នាក់​ជា​ទារក បាន​ស្លាប់​បាត់​បង់​ជីវិត ក្នុង​មហាសាគរ​មេឌីទែរ៉ាណេ ក្នុង​រយៈ​ពេល​សរុប​មួយ​សប្តាហ៍​មក​នេះ។ ជនភៀស​ខ្លួន​ទាំង​នោះ​បាន​រត់​ចេញ​តាម​ច្រក​លីប៊ី​សំដៅ​ត្រើយ​អ៊ីតាលី តាម​ទូក​រខេករខាក និង​គ្មាន​សុវត្ថិភាព​ទាល់​សោះ។

ផ្សាយពាណិជ្ជកម្ម

គ្មាន​នរណា​អាច​ដឹង​​ចំនួនច្បាស់​ ​និង​ស្គាល់​​អត្តសញ្ញាណពិត​ប្រាកដ របស់​អ្នក​ស្លាប់​លង់​ទឹក​សមុទ្ទ​មេឌីទែរ៉ាណេ​​​ ​​បាន​ឡើយ ! នេះ​បើ​តាម​សំដី​សាក្សី​បាន​រួច​ពី​ស្លាប់ ដែល​មាន​សំណាង​បាន​រួច​ជីវិត​និង​មក​តោង​ដល់​ផែ​អ៊ីតាលី​កាលពី​ថ្ងៃ​ព្រហស្បតិ៍ និង​ដែល​បាន​អះអាង​បន្ថែម​ទៀត​ថា មានអន្តោប្រវេសន៍​ប្រមាណ​១១០០​នាក់ផ្សេង​ បាន​ចាក​ចេញ​ពី​ផែ​លីប៊ី កាលពី​ថ្ងៃ​ពុធ តាម​​ទូក​នេសាទពីរ​ផ្ទុក​មនុស្ស​ជាង​៥រយ​នាក់ និង​​អូស​សណ្តោងពោង​មួយ​ផ្ទុក​គ្នា​ជាង​៥រយ​នាក់​ដែរ​។ ទូក​ពោង​ នោះ​បាន​លិច អូស​ដោយ​ទាំង​ទូក​នេសាទ​ទីពីរ​ផង ហើយ​អ្នក​បើក​នាវា​ទី​មួយ ជាតិ​ស៊ូដង់ ​បាន​កាត់​ខ្សែ​សណ្តោង​ដើម្បី​កុំ​ឱ្យ​ជន​ភៀស​ខ្លួន​ហែល​តោង​បាន ឬ​ក៏​ត្រូវ​អារក​សម្លាប់​មនុស្ស​ផង​ក៏​មាន មុននឹង​ត្រូវ​ឃាត់​ខ្លួន​បាន​ពេល​មក​ដល់​ត្រើយ​អ៊ីតាលី។ នេះ​បើ​តាម​សារព័ត៌មាន​អ៊ីតាលី។

គិតជា​សរុប​មួយ​សប្តាហ៍​នេះ មាន​ទូក​រត់​ពន្ធ​អន្តោប្រវេសន៍​យ៉ាង​ហោច​បី​គ្រឿង​បាន​លិច និង​មាន​យ៉ាង​ហោច​ជន​អន្តោប្រវេសន៍​៧០០​នាក់ បាន​ស្លាប់​ក្នុង​មេឌីទែរ៉ាណេ។ នេះ​បើ​តាម​តុល្យការ​របស់​អង្គការ​ទទួល​បន្ទុកជនភៀស​ខ្លួន HCR។ ហើយ​បើ​តាម​ភ្នាក់ងារ​ឆ្មាំ​សមុទ្ទ​អ៊ីតាលី តាំង​ពី​អាកាសធាតុ​ចាប់​ក្តៅ​មេឃ​ល្អ​មក មាន​ទូក​ពោង​ប្រមាណ​៧០​ និង​ទូក​នេសាទ​ប្រមាណ​១០ ត្រូវ​រាប់​ឃើញ​កំពុង​ដឹក​អន្តោប្រវេសន៍​ឆ្លង​មក​អឺរ៉ុប។

 
សូម​បញ្ជាក់​ថា តាំង​ពី​ច្រក​បាល់កង់​ត្រូវ​បិទ និង​មាន​កិច្ចព្រមព្រៀង​​បញ្ជូន​ជនភៀស​ខ្លួន​ពី​ក្រិក​ទៅ​តួកគី​មក អ៊ីតាលី​បាន​ក្លាយ​ជា​ទិស​ដៅ​ថ្មី។ មេ​កើយ​ឈ្មួញ​អន្តោប្រវេសន៍ ជាតិ​ស៊ូដង់​ ឈ្មោះ អ៊ូសាម៉ា បានប្រើ​ផែ​​លីប៊ី​ ដើម្បី​រត់​ពន្ធ​មនុស្សមក​អ៊ីតាលី​​ ក្នុង​តម្លៃ​ម្នាក់​៤០០​អឺរ៉ូ។

ប្រឈម​មុខ​នឹង​សា្ថនការណ៍​បែប​នេះ រដ្ឋមន្ត្រី​ក្រសួង​មហាផ្ទៃ​អ៊ីតាលី បាន​អំពាវនាវ​ឱ្យ​អឺរ៉ុប​ចុះកិច្ចព្រមព្រៀង​ជាមួយ​លីប៊ី និង​បណ្តា​ប្រទេស​នៅអាហ្វ្រិក តាម​គំរូ​កិច្ចព្រមព្រៀង​​តួកគី ​ឱ្យ​បាន​កាន់​តែ​ឆាប់ ដើម្បី​ទប់​ស្កាត់​ចរន្ត​អន្តោប្រវេសន៍​។ នៅ​ថ្ងៃ​អាទិត្យ​នេះប្រធានសភា​អឺរ៉ុប​ ​បាន​ទទួល​ស្គាល់ ថាផែនការ​​​របស់​អ៊ីតាលី​ ជា​សំណើរ​ល្អ​៕
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ