ប្រធានគណៈកម្មការអឺរ៉ុប សម្រេចថា មកកាន់រុស្ស៊ី ទោះបីរុស្ស៊ី ជាប់ក្នុងទណ្ឌកម្មអឺរ៉ុបក្តី

លោក Jean-Claude Junckerនិង​លោក​ Vladimir Poutine នៅ​ទីក្រុង​ម៉ូស្គូ កាលពី​ឆ្នាំ​២០១២
លោក Jean-Claude Junckerនិង​លោក​ Vladimir Poutine នៅ​ទីក្រុង​ម៉ូស្គូ កាលពី​ឆ្នាំ​២០១២ YURI KOCHETKOV / POOL / AFP
ដោយ៖ កែវ ឆាយា
១៦ នាទី

ប្រធានគណៈកម្មការអឺរ៉ុប លោក Jean-Claude Juncker យល់ព្រមទទួល សេចក្តី អញ្ជើញ​របស់​រុស្ស៊ី​ទៅ​ចូលរួម​ក្នុង​វេទិកា​សេដ្ឋកិច្ច​អន្តរជាតិ នៅក្រុង Saint-Petersbourg ដែល​នឹង​បើក​នៅ​ថ្ងៃ​១៦​មិថុនា​ខាងមុខ - ដំណឹងនេះ ត្រូវបាន​ប្រកាស​ម្សិលមិញ ដោយ​ស្ត្រី​អ្នកនាំពាក្យ​ផ្លូវការ នៃ​អង្គការ​អំណាច​នីតិប្រតិបត្តិ​កំពូល​នេះ​របស់​សហភាព​អឺរ៉ុប។

ផ្សាយពាណិជ្ជកម្ម

នេះជាការធ្វើដំណើរជា​លើក​ដំបូង​របស់​លោក​ប្រមុខ​រដ្ឋាភិបាល​សហភាព​អឺរ៉ុប មក​កាន់​ប្រទេស​រុស្ស៊ី តាំងពី​សហព័ន្ធ​រុស្ស៊ី​បាន​ភ្ជាប់​យក​ទឹកដី​គ្រីមេ ដោយ​ផ្តាច់​វា​ចេញ​ពី​អ៊ុយក្រែន កាលពី​ខែ​មីនា​ឆ្នាំ​២០១៤ ហេតុ​ដែល​តម្រូវ​សហភាព​អឺរ៉ុប ឲ្យ​ដាក់​ទណ្ឌកម្ម​សេដ្ឋកិច្ច ប្រឆាំង​ម៉ូស្គូ តាំងពី​ពេល​នោះ​មក ចំពោះ​តួនាទី​រុស្ស៊ី​នៅ​ក្នុង​វិបត្តិ​អ៊ុយក្រែន។

 
ដំណឹងស្តីអំពី​ទស្សនកិច្ច​ថ្ងៃ​មុខ​របស់​លោក Jean-Claude Juncker នៅរុស្ស៊ី បណ្តាល​ឲ្យ​មាន ក្តី​ទោមនស្ស​ភ្លាមភ្លែត ពី​ខាង​ស.រ.អា.និង​ប្រទេស​អឺរ៉ុប​ខ្លះ ដែល​យល់ថា ​គោលដៅ​ទណ្ឌកម្ម គឺ​ខ្ទប់​ប្រទេស​រុស្ស៊ី​ឲ្យ​ស្ថិត​នៅ​ក្នុង​ភាព​ឯកោ។ ពីព្រោះ​បស្ចិមលោក បារម្ភ​ខ្លាចក្រែង ទស្សនកិច្ច​លោក Juncker នៅ​រុស្ស៊ី អាច​ពង្រឹង​គោលជំហរ លោក​ប្រធានាធិបតី រុស្ស៊ី វ៉្លាឌីមៀរ ពូទីន មុនពេល​ដែល​សហភាព​អឺរ៉ុប ត្រូវ​ពិភាក្សា​អំពី​ការពន្យារ​តទៅ​ទៀត ទណ្ឌកម្ម​ប្រឆាំង​រុស្ស៊ី ដែល​ត្រូវ​អស់​សុពលភាព ក្នុង​ពីរ​ខែ​ទៀត គឺ​ថ្ងៃ៣១​កក្កដា។

ចំណែកអ្នកនាំពាក្យផ្លូវការ​របស់​វិមាន​ក្រេមឡាំង លោក ឌ្មីទ្រី ពេស្កូវ បាន​ថ្លែង​សាទរ​ទៅ​ហើយ ចំពោះ​បំណង​លោក​ប្រធាន​គណៈកម្មការ​អឺរ៉ុប ចូលរួម​ក្នុង​វេទិកា​សេដ្ឋកិច្ច​អន្តរជាតិ នៅក្រុង Saint-Petersbourg នៅថ្ងៃមុខ ដោយ​កត់​សម្គាល់​ថា អាជ្ញាធរ​រុស្ស៊ី ក្នុង​អនាគត​គ្រោង​ឈាន​ឲ្យ បាន​ដល់​កម្រិត​ទាល់តែ កែ​បាន​ប្រសើរ​ឡើង​ទំនាក់ទំនង​ទ្វេ​ភាគី ជាមួយ​សហភាព​អឺរ៉ុប ហើយ​ចាត់​ទុក​ទស្សនកិច្ច​លោក Juncker ថា​រំលេច​ឲ្យ​ឃើញពី ភាព​ត្រៀម​ខ្លួន​ធ្វើ​កិច្ចសន្ទនា​ជាមួយ​រុស្ស៊ី។

គេនៅចងចាំ​នៅ​ឡើយ សេចក្តីថ្លែងការណ៍​បង្ក​ជា​បដិវាទកម្ម ធ្វើ​កាលពី​ខែ​តុលា​ឆ្នាំ​មុន ដោយ​លោក Juncker ដែលថា​សហភាព​អឺរ៉ុប គប្បី​ស្តារ​ឡើង​វិញ​ទៅ​ជាមួយ​រុស្ស៊ី “ទំនាក់ទំនង​អនុវត្ត ដែល​នាំ​ជា​គុណប្រយោជន៍​ទៅ​វិញ​ទៅ​មក” ទាំង​អំពាវនាវ​សហភាព​អឺរ៉ុប កុំ​បណ្តោយ​ខ្លួន​ស្ថិត​នៅ​ក្រោម​បង្គាប់​ស.រ.អា.​ឡើយ ក្នុង​ការ​ប្រកាន់​ឥរិយាបថ​ចំពោះ​ក្រុង​ម៉ូស្គូ។ តាមសម្តីគាត់ ការស្តារ​ឡើង​វិញ “ទំនាក់ទំនង​អនុវត្ត ដែល​នាំ​ជា​គុណប្រយោជន៍​ទៅ​វិញ​ទៅ​មក” ជាមួយ​រុស្ស៊ី ជារឿង​មិន​សូវ​ទាក់​ចិត្ត​ទេ ប៉ុន្តែ​អឺរ៉ុប​ត្រូវ​តែ​ហ៊ាន​ធ្វើ កុំ​នៅ​លង់​ខ្លួន ក្នុង​ផ្នត់​គំនិត​នេះ​ទៀត។

វេទិកា​សេដ្ឋកិច្ច​អន្តរជាតិ ដែល​ប្រព្រឹត្ត​ទៅ ជារៀងរាល់​ឆ្នាំ នៅ​ក្រុង Saint-Petersbourg តាំងពី ឆ្នាំ ១៩៩៧​មក ជា​ទីលាន​នៃ​ការពិភាក្សា​បញ្ហា​សេដ្ឋកិច្ច​ពិភពលោក ចូលរួម​ដោយ​អ្នក​ដឹកនាំ ក្រុមហ៊ុន​ធំៗ​បំផុត​ក្នុង​លោក និង​សហគមន៍​ពួក​អ្នក​ជំនាញ។ លើកនេះ ជា​លើក​ទី​២០ វា​នឹង​ប្រព្រឹត្ត​ទៅ​ពី​ថ្ងៃ​១៦ ដល់ ១៨ មិថុនា៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI