ពិភពលោក​ប្រារព្ធ​បុណ្យ​ណូអែល​ សម្តេច​ប៉ាប​ផ្តល់​ក្តី​អាណិត​អាសូរ​ដល់​ក្មេង​ទុរគត

វិហារ​ Nativité ក្រុង​ Bethléem ទីកន្លែង​កំណើត​ព្រះយេស៊ូ ក្នុង​ថ្ងៃ​បុណ្យណូអែល
វិហារ​ Nativité ក្រុង​ Bethléem ទីកន្លែង​កំណើត​ព្រះយេស៊ូ ក្នុង​ថ្ងៃ​បុណ្យណូអែល REUTERS/Mussa Qawasma

ប៉េកាំង ញូវយ៉ក ប៉ារីស បេតេឡែម វ៉ាទីកង់ ... លោក​អូបាម៉ា និង​គ្រួសារ​ប្រារព្វ​ពិធី​បុណ្យ​ណូអែល​ជា​លើក​ចុង​ក្រោយ​នៅសេតវិមាន តាណូអែល ក៏​បាន​ទៅ​ចែក​ចាយ​កាដូរ​នៅ​ប្រទេស​អ៊ីរ៉ាក់​ដែរ បន្ទាប់​ពីបាន​យក​ឈ្នះ​លើ​ពួក​អង្គការ​រដ្ឋ​អ៊ីស្លាម​នៅ​ម៉ូស៊ូល ​... ពិភពលោក​ស្ទើរ​តែ​ទាំង​មូល បាន​ប្រារព្វ​ពិធី​បុណ្យ​ណូអែល ថ្ងៃ​កំណើត​ព្រះ​យេស៊ូ​ ថ្ងៃទី ២៥​ធ្នូ។ ដូច​ជា​រៀង​រាល់​ឆ្នាំ តាម​ទំនៀម​ទម្លាប់​ជា​ប្រពៃណី​គ្រិស្តសាសនា ពិធី​សូត្រ​ធម៌​ប្រព្រឹត្ត​ទៅ​នៅ​យប់​ថ្ងៃ​សៅរ៍​ទី​២៤ ធ្នូ បន្ត​ដោយ​ដោយ​ការ​ប្រសិទ្ធិពរ​របស់​សម្តេច​ប៉ាប នៅថ្ងៃ​នេះ។ ​

ផ្សាយពាណិជ្ជកម្ម

នៅ​ក្នុង​ពិធី​សូត្រ​ធម៌​កណ្តាល​អាធ្រាត្រ សម្តេច​ប៉ាប ហ្វ្រង់ស័រ បាន​ស្នើ​សុំ​ឱ្យ​គ្រិស្តសាសនិកជន​​១២០០​លាន​នាក់ នៅ​ទូទាំង​ពិភពលោក បង្ហាញ​ក្តី​អាណិត​អាសូរ​ដល់​កុមារ​រងគ្រោះ​ក្នុង​សង្គ្រាម ក្នុង​ភាព​ទុរគត និង​ដល់​ជីវិត​ដែល​គេ​មិន​បណ្តោយ​ឱ្យ​កើត។ សម្រាប់​សម្តេច​ប៉ាប ​ណូអែល​ពេល​នេះ​កំពុង​តែ​ឃ្លាត​ចាក​ន័យ​ដើម និង​ក្លាយ​ទៅ​ជា​ចំណាប់​ខ្មាំង​នៃ​ពិភព​​សម្ភារៈ​និយម រហូត​ដល់​ភ្លេច​សេចក្តី​ត្រូវ​ការ​របស់​ជនភៀស​ខ្លួន និង​ជនរងគ្រោះ​ក្នុង​សង្គ្រាម។  

សម្តេច​ប៉ាប​ត្រូវ​ធ្វើ​ពិធី​ប្រសិទ្ធិពរ​ទៅ​កាន់​ក្រុង​និង​ពិភពលោក​ទាំង​មូល នៅ​ចំពោះ​មុខ​គ្រិស្តសាសនិកជន​​ដ៏​ច្រើន​កកកុញ នៅ​ទីលាន​ព្រះ​វិហារ​សាំងព្យ៉ែរ ដែល​មានការ​ការពារ​យ៉ាង​​តឹងរ៉ឹង បណ្តាល​មក​ពី​ការ​វាយ​ប្រហារ​ភេរវកម្ម​ប្រឆាំង​ទីផ្សារ​ណូអែល​ នៅ​ក្រុង​ប៊ែរឡាំង។

ក្នុង​ពេល​ដែល​អឺរ៉ុប​ហាក់​កំពុង​​ប្រារព្វ​ពិធីបុណ្យ​ណូអែល ក្នុង​ភាព​ប្រុងប្រយ័ត្ន​ខ្ពស់ ដោយ​ហេតុ​មាន​ការ​គំរាម​កំហែង​ភេរវកម្ម ឯ​នៅអាស៊ី​ ឥណ្ឌា ​ប៉ាគីស្ថាន ចិន ... ដែល​មាន​ប្រជាជន​ភាគតិច​កាន់​សាសនាគ្រិស្ត​មែន ប៉ុន្តែ​ ណូអែល​បានក្លាយ​ជាពិធី​បុណ្យ ជា​ឱកាស​ជួប​ជុំ​រីករាយ​របស់​ប្រជាពលរដ្ឋ​ទូទៅ​។ លើក​លែង​តែ​ហ្វីលីពីន ដែល​កំពុង​ប្រឈម​នឹង​គ្រោះ​មហន្តរាយ​ព្យុះ​សង្ឃរា។

នៅ​តំបន់​ដើម​បូព៌ា នា​ក្រុង​Bethléem​ ក្រុង​កំណើត​ព្រះ​ ​ពិធីបុណ្យ​ក្នុង​បាន​ប្រព្រឹត្ត​ទៅ​ក្នុង​ទឹក​ចិត្ត​រីករាយ​ និង​ស្ងប់ស្ងាត់ខុស​​ពី​ឆ្នាំ​មុនៗ ដែល​គ្រប​ដណ្តប់​ទៅ​អំពើ​ហិង្សា​រវាង​អ៊ីស្រាអែល​និង​ប៉ាឡេស្ទីន។ ក្រុង​អាឡិប​របស់​ស៊ីរី ក៏​អាច​ដាក់​តាំង​លម្អ​ដើម​សាប៉ាំង បន្ទាប់ពី​​លង់​ក្នុងភ្លើង​​សង្គ្រាម​អស់ជាង​បួន​ឆ្នាំ។ សាសនិកជន​អ៊ីរ៉ាក់​នៅ​មូស៊ូល ទើប​រំដោះ​បាន​ពី​កណ្តាប់​ដៃ​ពួក​អង្គការ​រដ្ឋ​អ៊ីស្លាម​​ក៏​បាន​ស្គាល់​ណូអែល​ជា​ប្រពៃណី​ឡើង​វិញ។

ចំពោះ​សហរដ្ឋ​អាមេរិក​ដែល​តែង​ប្រារព្វ​បុណ្យ​ណូអែល​យ៉ាង​ហ៊ឹកហ៊ាក់​ជាងគេ​នោះ គ្រួសារ​ត្រកូល​អូបាម៉ា បាន​ថ្លែងសារ​អបអរ​និង​ជូន​ពរ​ជា​ចុងក្រោយ ក្នុង​នាម​ជា​ប្រធានាធិបតី។ ជា​សារ​ប្រកប​ដោយ​ភាព​កំប្លុក​កំប្លែង​ ប៉ុន្តែ​លោក​អូបាម៉ា ក៏​បាន​ឆ្លៀត​បង្ហាញនិងការពារ​​សា្នដៃ​ដឹកនាំ​ប្រទេស​រយៈពេល​៨​ឆ្នាំ​ ដោយ​បាន​អះអាង​ថា​អាមេរិក​បច្ចុប្បន្ន​ខ្លាំងជាង​អាមេរិក កាលពី​ឆ្នាំ​២០០៨ ! អាមេរិក​បាន​ទទួល​ការ​គោរព​ខ្លាំង​ពី​ពិភពលោក អាមេរិក​បាន​ធ្វើ​ខ្លួន​ជា​មេ​ដឹកនាំ ការពារ​​ភពផែនដី​​សម្រាប់​ក្មេង​ជំនាន់ក្រោយ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI