រុស្ស៊ី ៖ យន្តហោះយោធាធ្លាក់នៅសមុទ្ទខ្មៅ ស្លាប់មនុស្ស៩២នាក់
ចុះផ្សាយនៅថ្ងៃ៖ កែប្រែថ្ងៃទី៖
ព្រឹកមិញ ក្រោយពីហោះចេញពីអាកាសយានដ្ឋាន ក្រុង Sotchi នៅមាត់សមុទ្រខ្មៅ ទើបបាន៧នាទី យន្តហោះមួយគ្រឿងរបស់ក្រសួងការពារជាតិរុស្ស៊ី ដែលតាមតួលេខ ចុងក្រោយ ផ្ទុកដោយមនុស្សដល់ទៅ៩២នាក់ សំដៅទៅកាន់ប្រទេសស៊ីរី ស្រាប់តែបាត់ដានវាពីកញ្ចក់រ៉ាដា។ ជាលទ្ធផលនៃប្រតិបត្តិការស្វែងរក ចាត់ចែងឡើងជាបន្ទាន់ គេឃើញស្នាមប្រេង និង បំណែកទាំងឡាយ របស់យន្តហោះនោះ នៅមិនឆ្ងាយប៉ុន្មានពីឆ្នេរ ព្រមទាំងសពអ្នកដំណើរ ខ្លះទៅផង។ គ្មានទេ អ្នកដែលថានៅរស់នោះ។ តាមការអះអាងរបស់អាជ្ញាធររុស្ស៊ី ការធ្លាក់នេះ អាចបណ្តាលមកពី មូលហេតុបច្ចេកទេស ឬ កំហុសពីឡុត។ លោករដ្ឋមន្ត្រីការពារជាតិ រាយការណ៍ ជាប់ជានិច្ច ជូនលោកប្រធានាធិបតីពូទីន អំពីដំណើរវិវឌ្ឍន៍នៃព្រឹត្តិការណ៍ដ៏ក្រៀមក្រំនេះ។ លោកពូទីន បានផ្ទុកផ្តាក់ លោកនាយករដ្ឋមន្ត្រី មេដវេដេវ ឲ្យ ដឹកនាំគណៈកម្មការអង្កេត ដើម្បីកំណត់ឲ្យបានពិត មូលហេតុនៃគ្រោះថ្នាក់ធ្លាក់យន្តហោះ ដោយបានសំដែងការរួមមរណទុក្ខ យ៉ាងជ្រាលជ្រៅ ដល់គ្រួសារអ្នកស្លាប់ទាំងអស់។
តើនរណាខ្លះ ដែលបានជិះក្នុងយន្តហោះយោធារុស្ស៊ី អភ័ព្វធ្លាក់ព្រឹកមិញ ក្នុង ទឹក សមុទ្រខ្មៅ នៅមិនឆ្ងាយប៉ុន្មានពី ឆ្នេរនៃទីក្រុង Sochiប៉ែកខាងត្បូងប្រទេសរុស្ស៊ី ?
ក្នុងចំណោមមនុស្ស៩២នាក់ ដែលបានស្ថិតក្នុងយន្តហោះនោះ ធុន Tupolev-154 គឺ មាន ក្រុមអ្នកបើកបរ ៨នាក់ និង ៨៤នាក់ ជាអ្នកដំណើរ ដែលក្នុងនោះ ៦៨នាក់ ជាក្រុមអ្នកច្រៀងជាពួក នៃវង់ភ្លេងក្រសួងការពារជាតិ ហោះទៅសំដែងសិល្បៈក្នុងឱកាសបុណ្យចូលឆ្នាំថ្មី ដើម្បីលើកទឹកចិត្តពួកយោធារុស្ស៊ី ដែល បំពេញបេសកកម្មនៅស៊ីរី ៩នាក់ជាអ្នកយកការណ៍ របស់កាណាល់ទូរទស្សន៍រដ្ឋ “ប៉ុស្តលេខ១” កាណាល់ទូរទស្សន៍ Zvezda ប្រែមកថា “ផ្កាយ” របស់កងទ័ព និង កាណាល់ទូរទស្សន៍ឯកជន NTV ហើយ អភ័ព្វធ្លាក់ខ្លួនស្លាប់ក្នុងគ្រោះថ្នាក់យន្តហោះនេះ ក៏ទាំងវេជ្ជបណ្ឌិតដ៏ល្បីល្បាញខាងសង្គ្រោះកុមារកំព្រា កុមារនៅតាមតំបន់មានសង្គ្រាម កុមារធ្លាក់ខ្លួនឈឺនិងរបួស លោកស្រី Elizaveta Glinka ត្រូវគេហៅយ៉ាងខ្លីថា វេជ្ជបណ្ឌិត Liza ដែលជាស្ថាបនិកនៃមូលនិធិ “ជំនួយយុត្តិធម៌” រហូតពេលថ្មីៗ បានទទួលគ្រឿងឥស្សរិយយស ពីដៃលោកប្រធានាធិបតីពូទីន ទៅផង ក្នុងឋានៈជា ជ័យលាភីរង្វាន់រដ្ឋរុស្ស៊ី។
យន្តហោះធ្លាក់នោះ មុនដំបូង បានហោះពីព្រលាន នៅជាយក្រុងម៉ូស្គូ ហើយក្រោយពីចុះចាក់សាំងបន្ថែមនៅអាកាសយានដ្ឋានក្រុង Sotchi មាត់សមុទ្រខ្មៅ នៅវេលាម៉ោង ៥និង៤០នាទី ក៏បានបន្តដំណើរ ទៅកាន់ក្រុង Lattaquié ប្រទេសស៊ីរី ប៉ុន្តែរំលងតែ៧នាទីសោះ វាស្រាប់តែ បាត់ដានវាពីកញ្ចក់រ៉ាដា ទាំងគ្មានការឲ្យដំណឹងអ្វីណា ពីពីឡុតមក ប៉ុស្តិ៍កុងត្រូលនៅលើដី។
តាមអ្នកនាំពាក្យផ្លូវការនៃក្រសួងការពារជាតិ ឧត្តមសេនីយ Igor Konashenkov ប្រតិបត្តិការ ប្រទាក់ក្រឡាគ្នាស្វែងរក ធ្វើដោយឧទ្ធម្ភាគចក្រ៥គ្រឿង នាវា៤គ្រឿង និងយន្តហោះដ្រូន បានហុចជាលទ្ធផល គឺ រកឃើញសព ៧នាក់ទៅហើយ រីឯបំណែកធំៗរបស់យន្តហោះ គឺធ្លាក់ ទៅនៅជម្រៅ ពី៨០ទៅ ១១០ ម៉ែត្រ នៅចម្ងាយ ៦ គ.ម.ពីឆ្នេរ។
ក្រសួងរុស្ស៊ីខាងស្ថានការណ៍អាសន្ន បានប្រកាសថា បញ្ជូនក្រុមអ្នកមុជទឹកទៅជម្រៅជ្រៅ និង កូនកាណូតមុជទឹក ខាងរាវរកកន្លែងស្ថិតនៅនៃតួខ្លួនយន្តហោះនៅបាតសមុទ្រ។
សមត្ថកិច្ចរុស្ស៊ី បង្ហើបឲ្យដឹងថា ដើម្បីស្រង់យន្តហោះពីជម្រៅនេះ គឺមិនជាការលំបាកទេ តាមមើលទៅ ក្នុង១សប្តាហ៍ប៉ុណ្ណោះ ប្រតិបត្តិការស្រង់នេះ អាចសម្រេចបានដូចចិត្ត។
តើអ្វីជាមូលហេតុធំៗជាគោល នៃមហន្តរាយយន្តហោះរុស្ស៊ីនោះ?
តាមការពន្យល់បំភ្លឺនៃអ្នកជំនាញ របស់ក្រសួងការពារជាតិ យន្តហោះនោះ ដែល អាយុ ៣៣ឆ្នាំហើយ បំពេញការហោះហើរក្នុង១ខែៗ ប្រមាណ២៧ម៉ោង។ វាតែងបានបម្រើ យ៉ាងកក់ក្តៅ មិនដែលខុសទាស់ឡើយ ក្នុងការដឹកជញ្ជូន ពីរុស្ស៊ី ទៅប្រទេសស៊ីរី។ តាមមើលទៅ មូលហេតុចម្បង អាចមានពីរ គឺ ទី១ បញ្ហាបច្ចេកទេស ទី២ កំហុសពីឡុត។
ប៉ុន្តែ ក្នុងសម្ភាសន៍តាមប្រព័ន្ធផ្សព្វផ្សាយប្លែកៗនៃក្រុងម៉ូស្គូ តាំងពីព្រឹកមិញមក អ្នកបើកយន្តហោះផ្សេងៗ បានធ្វើការបកស្រាយទៅតាមការយល់ឃើញរបស់គេ ។ ខ្លះថា បើគុណភាពសាំងដែលចាក់បន្ថែមនៅអាកាសយានដ្ឋានក្រុង Sotchi មិនធានា នោះវាអាចបណ្តាល ឲ្យម៉ូទ័រយន្តហោះគាំងឈប់ដើរ ម៉្លោះហើយបានជាពីឡុត គ្មានពេលនឹងឲ្យសញ្ញាទៅប៉ុស្តិ៍កុងត្រូលលើដី។ ខ្លះថា ប្រសិនបើយន្តហោះនោះស្រាប់តែផ្ទុះក្នុងអាកាស វាក៏ធ្លាក់យ៉ាងគំហុកដែរ។ ទាក់ទងនឹងរឿងនេះ វិទ្យុខ្លះ ថែមទាំងយោង ទៅលើសម្តីកសិណសាក្សី នៅលើដី ដែលថា គេបានឭ សូរផ្ទុះគ្ឌាំងយ៉ាងខ្លាំងក្នុងផ្ទៃមេឃព្រឹកមិញ។ បើជាអំពើភេរវកម្មមែន នោះ គឺអាចញ៉ាំងឲ្យគេនឹកឃើញពី ភេរវកម្មបាញ់សម្លាប់ឯកអគ្គរដ្ឋទូតរុស្ស៊ី នៅតួកគី ទើប៦ថ្ងៃមុនសោះ មកពីអន្តរាគមន៍រុស្ស៊ី នៅស៊ីរីជួយកំទេចពួកដែលប្រឆាំងនឹងលោកប្រធានាធិបតីស៊ីរី អាសាដ ទាល់តែ រំដោះបានភាគខាងកើតទាំងមូល នៃក្រុងអាឡិប ពីពួកនោះ។
ទោះយ៉ាងណាក្តី ក៏ លុះក្រោយពីស្រង់យកបានពីបាតសមុទ្រ នូវរបស់ដែលហៅថា ប្រអប់ខ្មៅ របស់យន្តហោះ ប្រអប់ដែលតាមពិតមានពណ៌លឿងទុំទេតើ ទើបគេអាចសន្និដ្ឋាន អំពីមូលហេតុពិត ដ្បិតថតជាប់ក្នុងប្រអប់នេះ គឺទាំងជីពចរម៉ាស៊ីនយន្តហោះផ្ទាល់ ទាំង សម្តី ពួកពីឡុត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ