សភា​អាមេរិក​អនុម័ត​ទណ្ឌកម្ម​ថ្មី​ប្រឆាំង​រុស្ស៊ី​ ក្រោម​សម្រែក​កំហឹង​អឺរ៉ុប

សភា​អាមេរិក
សភា​អាមេរិក REUTERS/Yuri Gripas

នៅ​យប់​មិញ សភា​អាមេរិក​បាន​អនុម័ត​ ក្នុងសំឡេង​ស្ទើរ​ជា​ឯកច្ឆ័ន្ទ ច្បាប់​ដាក់​ទណ្ឌកម្ម​ជា​ថ្មី​ប្រឆាំង​នឹង​រុស្ស៊ី។ គម្រោង​ដាក់​ទណ្ឌកម្មនេះ បាន​បង្ក​បង្កើត​ឱ្យ​​មាន​ការ​ផ្ទុះ​កំហឹង​យ៉ាង​ខ្លាំង​ពី​សំណាក់​ម៉ូស្គូផង និង​សហភាព​អឺរ៉ុប​ទៀត ព្រោះ​ទណ្ឌកម្ម​អាមេរិក​នេះ​ បាន​ប៉ះពាល់​​ខ្លាំង​ដល់​ក្រុម​ហ៊ុន​អឺរ៉ុប។

ផ្សាយពាណិជ្ជកម្ម

នៅ​ក្នុង​គម្រោង​ច្បាប់​ ដែល​សភា​អាមេរិក​បាន​អនុម័តស្ទើរ​ជា​ឯកច្ឆ័ន្ទ ​ក្នុង​សំឡេង​៤១៩ ទល់​នឹង​បី​សំឡេង​ប្រឆាំង​ ក៏​មាន​បូក​បញ្ជូល​អំពី​ការ​ដាក់ទណ្ឌកម្ម​លើ​អ៊ីរ៉ង់ ពី​បទ​គាំទ្រ​ភេរវនិយម ដាក់​ទណ្ឌកម្ម​លើ​កូរ៉េខាង​ជើង ចំពោះ​ទង្វើ​បាញ់​មីស៊ីល​ ដែរ។ ប៉ុន្តែ​ដើម្បី​​​បង្អាក់​ទំនោរ​បោះ​ដៃ​ទៅ​រក​រស្ស៊ី របស់​លោក​ត្រាំ​ជា​ប្រធានាធិបតី ​គម្រោង​ច្បាប់សភា​នេះ ផ្តោត​ជា​សំខាន់​ទៅ​​ការ​ដាក់​ទណ្ឌកម្ម​លើ​រុស្ស៊ី ពីបទ​បាន​ប៉ុនប៉ង​ជ្រៀត​ជ្រែក​ក្នុង​សម័យ​បោះឆ្នោត​ប្រធានាធិបតី ! ​ ​ទង្វើ​ក្រសោប​យក​គ្រីមេ និងលូកលាន់​កិច្ចការ​អ៊ុយក្រែន របស់​រុស្ស៊ី​ ជា​ដើម​ហេតុ​បន្ទាប់​បន្សំ​នៃ​ទណ្ឌកម្ម​លើក​នេះ​តែ​ប៉ុណ្ណោះ។

មិន​តែ​ប៉ុណ្ណោះ​គម្រោង​ច្បាប់​នេះ​មាន​សំណាង​ច្រើន​នឹង​បាន​ទទួល​ការ​អនុម័ត​ពីព្រឹទ្ធ​សភា។ ហើយ​ថ្វី​​បើ​ប្រធានាធិបតី​អាមេរិក​អាច​ប្រើ​សិទ្ធិ​ប្រឆាំង​មិន​ចុះ​ហត្ថលេខា​ផ្តល់​សុពលភាពក៏​ដោយ ក៏​​​​​គម្រោង​ច្បាប់​នេះអាច​យក​ទៅ​ប្រើ​ប្រាស់​បាន​ដដែល ព្រោះ​​សភា​បោះឆ្នោត​​អនុមសំឡេង​គាំទ្រ​ពីរ​ភាគ​បី។ សភាអាមេរិក​បាន​ថែម​ទាំង​ត្រៀម​យន្តការ​ប្រើ​សិទ្ធិ​ប្រឆាំង​ស្ទាក់​រួច​ជា​ស្រេច​ហើយ ប្រសិន​បើ​លោក​ត្រាំ​សម្រេច​ផ្អាកទណ្ឌកម្មដាក់​​ប្រឆាំងលើ​​រុស្ស៊ី​កាលពី​ពេល​មុន។

ប៉ុន្តែ​ដំណឹង​នេះ មិន​ត្រឹម​តែ​បាន​ធ្វើ​ឱ្យ​រុស្ស៊ី អ្នក​ជាប់​ទណ្ឌកម្ម​ដោយ​ផ្ទាល់​ខឹង​សម្បារ​ទេ សូម្បី​តែ​អឺរ៉ុប ក៏​កំពុង​ច្រឡោត​ខ្លាំង​ដែរ។ សហភាព​អឺរ៉ុប​ទាំង​មូល មិន​ថា​ប៉ារីស បែរឡាំង ឬ​ព្រុចសែលទេ មិន​អាច​ទទួល​យកគម្រោង​ទណ្ឌកម្មជា​ឯកតោភាគី​​​របស់​សភា​អាមេរិក​បាន​ឡើយ។ កន្លង​មក​ រាល់​ទណ្ឌកម្ម​ដែល​ដាក់​លើ​រុស្ស៊ី ត្រូវ​សម្រេចរួម​គ្នា​ដោយភាគី​អាមេរិក​និង​អឺរ៉ុប និង​មិន​ត្រូវ​ប៉ះពាល់​ដល់​ផលប្រយោជន៍​អឺរ៉ុបទេ ជាពិសេស​​ក្នុង​វិស័យ​ថាមពលឧស្ម័ន​ហ្កាស​ឡើយ។ ប៉ុន្តែ​លើក​នេះ​ អាមេរិក​បាន​កន្លង​បន្ទាត់​ហាមឃាត់ ទណ្ឌកម្ម​​អាមេរិក​ប្រឆាំង​នឹងក្រុមហ៊ុន​​រុស្ស៊ី បាន​ក្លាយ​ជា​ទណ្ឌកម្ម​​ប្រឆាំង​ក្រុមហ៊ុន​របស់​អឺរ៉ុបជា​ច្រើន​ ដូច​ជា​ក្រុមហ៊ុន​បារាំង អាល្លឺម៉ង់ អូទ្រីស អង់គ្លេស​ហូឡង់ ...

សមាជិក​សហភាព​អឺរ៉ុប​ទាំង​២៨​ដែល​ត្រូ​វជួប​ប្រជុំ​គ្នា​នៅ​ថ្ងៃ​ពុធ​នេះ​បាន​សន្យា​ថា​នឹង​ចាត់​វិធានការបក​វិញ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI