អានតួអត្ថបទ
អង់គ្លេស

ស្វែង​យល់​ពី​ប្រព័ន្ធបោះឆ្នោត​សភា​នៅ​ក្នុង​ប្រទេស​អង់គ្លេស

លោក David Cameron (រូបស្តាំ) និងលោក Ed Miliband
លោក David Cameron (រូបស្តាំ) និងលោក Ed Miliband REUTERS/Darren Staples/Toby Melville
២៥ នាទី

នៅ​ថ្ងៃ​ព្រហស្បតិ៍ ទី៧ ឧសភា​នេះ ប្រទេស​អង់គ្លេស​បាន​រៀបចំ​បោះឆ្នោត​សភា។ ការិយាល័យ​​បោះឆ្នោត​ប្រមាណ​ជា ៥០ ០០០កន្លែង​បាន​បើក​ទ្វារ​តំាង​ពី​ម៉ោង ៧ព្រឹក ម៉ោង​ក្នុង​ទីក្រុង​ឡុងដ៏​ដើម្បី​ទទួល​អ្នកបោះឆ្នោត​ជាង ៤៥លាននាក់។ លទ្ធផល​នៃ​ការ​ស្ទង់មតិ​ចុង​ក្រោយ​ឲ្យ​ដឹង​ថា គណបក្សធំ​ចំនួន​ពីរ គណបក្ស​អភិរក្សនិយម​របស់​លោក​នាយករដ្ឋមន្រ្តី​ផុតអាណត្តិ​ដេតវីដ កាមេរោន (David Cameron) និង​គណបក្ស​ពលករ​របស់​លោក​អេដ ម៉ីលីបេន (Ed Miliband) ទទួល​បាន​សម្លេង​គំាទ្រ​ប្រកៀកប្រកើយ​គ្នា មាន​ន័យ​ថា ប្រហែល​ជា​គ្មាន​គណបក្ស​ណា​មួយ​អាច​នឹង​ទទួល​បាន​សម្លេង​ភាគច្រើន​ដាច់​ខាត​ដើម្បី​បង្កើត​រដ្ឋាភិបាល​ថ្មី​តែ​ម្នាក់​ឯង​បាន​ទេ។

ផ្សាយពាណិជ្ជកម្ម

ប្រជាជន​អង់គ្លេស​ត្រូវ​ជ្រើសរើស​អ្នកតំណាងរាស្រ្ត​ថ្មី​ចំនួន ៦៥០នាក់​ដែល​មាន​នៅ​ក្នុង​សភា​អង់គ្លេស​បច្ចុប្បន្ន​សម្រាប់​អាណត្តិ​រយៈពេល ៥ឆ្នំា។ ប្រព័ន្ធ​បោះឆ្នោត​អង់គ្លេស ជា​ប្រព័ន្ធ​ឯកនាម​សម្លេង​ភាគច្រើន​ដែល​មាន​តែ​មួយ​ជុំ​ប៉ុណ្ណោះ។ ប្រព័ន្ធ​បោះឆ្នោត​របៀប​នេះ​ត្រូវ​បាន​គេ​ចាត់​ទុក​ជា​ប្រព័ន្ធ​បោះឆ្នោត​ដែល​មាន​លក្ខណៈ​សាមញ្ញ មិន​ពិបាក​យល់ និង​ក៏​មិន​សូវ​ជា​មាន​បញ្ហា​អ្វី​កើត​ឡើង​នៅ​ក្រោយ​ការ​បោះឆ្នោត​ដែរ។ មាន​ន័យ​ថា អ្នក​បោះឆ្នោត​ត្រូវ​ជ្រើសរើស​បេក្ខជន​ម្នាក់​នៅ​ក្នុង​ចំណោម​បេក្ខជន​ឈរ​ឈ្មោះ​ជា​ច្រើន​នាក់​ពី​គណបក្ស​ផ្សេងៗ​នៅ​ក្នុង​មណ្ឌល​របស់​ខ្លួន។ បេក្ខជន​ណា​ដែល​ទទួល​បាន​សម្លេង​គំាទ្រ​ច្រើន​ជាង​គេ​នឹង​ក្លាយ​ជា​អ្នកតំណាងរាស្រ្ត ចំណែក​អ្នក​ផ្សេង​ត្រូវ​ត្រឡប់​ទៅ​ផ្ទះ​វិញ ដោយ​ដៃទទេ។ គឺ​ខុស​ពី​នៅ​ប្រទេស​កម្ពុជា​ដែល​ប្រកាន់​យក​ប្រព័ន្ធ​បោះឆ្នោត​តាម​បែប​សមាមាត្រ។

បច្ចុប្បន្ន​នេះ​នៅ​ក្នុង​ប្រទេស​អង់គ្លេស មាន​តែ​គណបក្ស​ធំ​ចំនួន​ពីរ​ប៉ុណ្ណោះ​ដែល​កំពុង​នំា​មុខ​គេ គឺ​គណបក្សអភិរក្សនិយម​របស់​លោក​នាយករដ្ឋមន្រ្តី​ផុតអាណត្តិ​ដេតវីដ កាមេរោន (David Cameron) និង​គណបក្ស​ពលករ​របស់​លោក​អេដ ម៉ីលីបេន (Ed Miliband)។ ប្រសិន​បើ​គណបក្ស​ណា​មួយ​ក្នុង​ចំណោម​គណបក្ស​ទំាង​ពីរ​ទទួល​បាន​អសនៈ​យ៉ាង​តិច​ពាក់កណ្តាល​នៃ​ចំនួន​អសនៈ​សរុប​ទំាង ៦៥០ នៅ​ក្នុង​សភា អ្វីៗ​នឹង​ត្រូវ​ដោះស្រាយ​ចប់​ភ្លាមៗ​គ្មាន​ឧបសគ្គ​អ្វី​ទំាង​អស់ មាន​ន័យ​ថា ឬ​មួយ​លោក​ដេវីដ កាមេរោន​នឹង​ត្រូវ​ធ្វើ​ជា​នាយករដ្ឋមន្រ្តី​មួយ​អាណត្តិ​ថ្មី​រយៈពេល ៥ឆ្នំា​បន្ថែម​ទៀត ឬ​មួយ​ក៏​លោក​អេដ ម៉ីលីបេន​នឹង​ក្លាយ​ជា​នាយករដ្ឋមន្រ្តី​ថ្មី។

សេណារីយ៉ូ​ខ្លះៗ​​នៅ​ក្នុង​ករណី​ដែល​គ្មាន​គណបក្សណា​មួយ​ទទួល​បាន​សម្លេង​ភាគច្រើន​ដាច់ខាត

លទ្ធផល​នៃ​ការ​ស្ទង់មតិ​ចុង​ក្រោយ​ឲ្យ​ដឹង​ថា គណបក្ស​ធំ​ទំាង​ពីរ​ទទួល​បាន​សម្លេង​ប្រកៀកប្រកើយ​គ្នា ពោល​ប្រហែល​ជា​មិន​អាច​បង្កើត​រដ្ឋាភិបាល​តែ​ម្នាក់​ឯង​បាន​ទេ។ នៅ​ក្នុង​ករណី​នេះ នឹង​អាច​មាន​ពីរ​ដំណាក់កាល គឺ​ការ​ស្វែង​រក​សម្លេងភាគច្រើន​ដាច់ខាត​នៅ​ក្នុង​សភា និង​ការ​បង្កើត​រដ្ឋាភិបាល​ថ្មី។ ករណី​ស្វែង​រក​សម្លេងភាគច្រើនដាច់ខាត ប្រសិន​បើ​គណបក្ស​ណា​មួយ​ទទួល​បាន ៣២៦អសនៈ​ក្នុង​ចំណោម​អសនៈ​ទំាង ៦៥០ ដែល​មាន​នៅ​ក្នុង​សភា គណបក្ស​នោះ​អាច​បង្កើត និង​ដឹកនំា​រដ្ឋាភិបាល​តែ​ម្នាក់​ឯង​ដោយ​មិន​ត្រូវ​ការ​សហការណ៍​ជាមួយ​គណបក្ស​ផ្សេង​ទេ។

ផ្ទុយ​ទៅ​វិញ នឹង​អាច​មាន​សេណារីយ៉ូ​ចំនួន​ពីរ ទី១ គណបក្ស​ដែល​ទទួល​បាន​សម្លេង​ច្រើន​ត្រូវ​រួម​សហការណ៍​ជាមួយ​គណបក្ស​មួយ​ទៀត​ដើម្បី​បង្កើត​រដ្ឋាភិបាល​ចម្រុះ។ លោក​ដេវីដ កាមេរោន​ធ្លាប់​បាន​បាន​អនុវត្តន៍​ករណី​នេះ​ក្នុង​អាណត្តិទី១ ចំនួន ៥ឆ្នំា​កន្លង​ទៅ​ជាមួយ​នឹង​គណបក្ស​សេរី ប្រជាធិបតេយ្យ​របស់​លោក​នីក ក្លេក (Nick Clegg) ដោយ​លោក​ក្លេក​មាន​តួនាទី​ជា​ឧបនាយករដ្ឋមន្រ្តី។

ចំណែក​សេណារីយ៉ូ​ទី២ គណបក្ស​ដែល​ទទួល​បាន​សម្លេង​ច្រើន​អាច​ព្យាយាម​បង្កើត​រដ្ឋាភិបាល​ម្នាក់​ឯង តែ​ចំា​បាច់​ត្រូវ​មាន​ការ​គំាទ្រ​ពី​គណបក្ស​តូចតាច​មួយ ឬ​ច្រើន​នៅ​ពេល​មាន​ការ​អនុម័ត​លើ​គម្រោង​ច្បាប់​ផ្សេងៗ​នៅ​ក្នុង​សភា មាន​ន័យ​ថា គណបក្ស​តូចតាច​ទំាង​នោះ​បន្ត​ស្ថិត​ជា​បក្សប្រឆំាង ដោយ​មិន​ស្ថិត​ក្នុង​រដ្ឋាភិបាល​ទេ តែ​អាច​ផ្តល់​សម្លេង​​គំាទ្រ​របស់​ខ្លួន។ ប្រទេស​អង់គ្លេស​ធ្លាប់​បាន​ជួប​ករណី​នេះ​រយៈពេល​ប៉ុន្មាន​ខែ​ក្នុង​ឆ្នំា ១៩៧៤ និង ១៩៩៧។ នៅ​ក្នុង​សេណារីយ៉ូ​ទី២ នេះ គណបក្ស​អភិរក្សនិយម និង​គណបក្ស​ពលករ​អាច​ធ្វើ​បាន​ដូច​គ្នា តែ​វា​ជា​សេណារីយ៉ូ​ដ៏​គ្រោះថ្នាក់ និង​ផុយស្រួយ។

យ៉ាង​ណា​ក៏​ដោយ​នា​ពេល​នេះ គណបក្ស​នីមួយៗ ពិសេស​គណបក្ស​កំពុង​នំា​មុខ​ទំាង​ពីរ​បាន​ត្រៀម​ខ្លួន​រួច​ជា​ស្រេច​ដើម្បី​បើក​កិច្ចចរចា ចែចូវ​ស្វែង​រក​សម្ព័ន្ធភាព ឬ​អ្នកគំាទ្រ​ចំពោះ​ខ្លួន។ អ្វី​ដែល​បាន​ធ្វើ​ឲ្យ​គ្រប់​គ្នា​ចាប់​អារម្មណ៍​ខ្លំាង​នៅ​ក្នុង​ការ​បោះឆ្នោតជាតិ​អង់គ្លេស​ពេល​នេះ គឺ​ជុំវិញ​លទ្ធផល​ដ៏​ប្រកៀក​គ្នា​រវាង​គណបក្ស​អភិរក្សនិយម និង​គណបក្ស​ពលករ ពិសេស​គឺ​អនាគត​រដ្ឋាភិបាល​ថ្មី​ដែល​គេ​នៅ​មិន​ដឹង​ថា អាច​នឹង​ចេញ​តាម​ច្រក​ណា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ