អានតួអត្ថបទ
ស្វ៊ីស-អ៊ីរ៉ង់-នុយក្លេអ៊ែរ

នុយក្លេអ៊ែរអ៊ីរ៉ង់៖កិច្ចចរចាផ្តាច់ព្រ័តដើម្បីស្វែងរកកិច្ចព្រមព្រៀងមួយនៅមុនថ្ងៃទី៣១ មីនា

ជំនួប​រវាង​លោក​ប្រមុខ​ការទូត​អាមេរិក​ចន ឃ៊ែរី និង​សមភាគី​បារំាង​ Laurent Fabius ក្នុង​ទីក្រុង​ឡូសាន ប្រទេស​ស្វ៊ីស​នា​ឱកាស​កិច្ចប្រជុំ​ស្តីពី​រឿង​នុយក្លេអ៊ែរ​អ៊ីរ៉ង់
ជំនួប​រវាង​លោក​ប្រមុខ​ការទូត​អាមេរិក​ចន ឃ៊ែរី និង​សមភាគី​បារំាង​ Laurent Fabius ក្នុង​ទីក្រុង​ឡូសាន ប្រទេស​ស្វ៊ីស​នា​ឱកាស​កិច្ចប្រជុំ​ស្តីពី​រឿង​នុយក្លេអ៊ែរ​អ៊ីរ៉ង់ Reuters
១៤ នាទី

កិច្ចចរចា ៥ភាគី​បូក១​ស្តីពី​សំណុំរឿង​នុយក្លេអ៊ែរ​អ៊ីរ៉ង់​កំពុង​បន្ត​ធ្វើ​នៅ​ក្នុង​ទីក្រុង​ឡូសាន ប្រទេស​ស្វ៊ីស។ កិច្ចចរចា​នៅ​ថ្ងៃ​សៅរ៍ ទី២៨ មីនា​នេះ គឺ​ជា​កិច្ចចរចា​ផ្តាច់ព្រ័ត​ដើម្បី​ស្វែង​រក​កិច្ចព្រមព្រៀង​មួយ​ឲ្យ​បាន​មុន​​ថ្ងៃទី៣១ មីនា។ តែ​អ្វី​ជា​ការ​កត់សម្គាល់​នៅ​ពេល​នេះ ចំណុច​ខ្វែង​គំនិត​គ្នា​មាន​ច្រើន និង​ដែល​ការ​មិន​ចុះ​សម្រុង​គ្នា​នោះ​មិន​មាន​ត្រឹម​តែ​រវាង​អ៊ីរ៉ង់ និង​៥ភាគី​បូក​១​ប៉ុណ្ណោះ​ទេ តែ​ក៏​មាន​នៅ​ផ្ទៃក្នុង​របស់​បច្ចិមលោក​ដែរ។ លោក​ប្រមុខ​ការទូត​បារំាង Laurent Fabius ដែល​ទើប​ទៅ​ដល់​កន្លែង​ប្រជុំ​បាន​ជួប​សមភាគី​អាមេរិក និង​អាល្លឺម៉ង់។

ផ្សាយពាណិជ្ជកម្ម

លោក Laurent Fabius គឺ​ប្រមុខ​ការទូត​បស្ចិមលោក​ម្នាក់​ក្នុង​ចំណោម​ប្រមុខ​ការទូត​បស្ចិមលោក​ដទៃ​ទៀត​ដែល​បាន​ទៅ​ដល់​ទីកន្លែង​ចរចា​មុន​គេ​នៅ​ថ្ងៃ​សៅរ៍​នេះ ហើយ​វត្តមាន​មុន​គេ​របស់​ប្រមុខ​ការទូត​បារំាង​រូប​នោះ​ក៏​មិនមែន​ជា​រឿង​ចៃដន្យ​ដែរ។ មិន​ចៃដន្យ​ព្រោះ​ថា លោក Laurent Fabius ត្រូវ​ការ​ពិនិត្យ​ផ្ទៀងផ្ទាត់​លើ​ចំណុច​នីមួយៗ​ឲ្យ​បាន​ច្បាស់លាស់​ទាក់ទង​នឹង​គម្រោង​កិច្ចព្រមព្រៀង​ជា​យថាហេតុ​ស្តីពី​នុយក្លេអ៊ែរ​អ៊ីរ៉ង់​មុន​នឹង​អនុម័ត​ជា​ផ្លូវការ។ លោក Laurent Fabius បាន​ជួប​ពិភាក្សា​ជាមួយ​សមភាគី​អាមេរិក​លោក​ចន ឃ៊ែរី និង​សមភាគី​អាល្លឺម៉ង់​លោក Frank Walter Steinmeier។

ភាព​សកម្ម​របស់​លោក​ប្រមុខ​ការទូត​បារំាង Laurent Fabius នា​កិច្ចប្រជុំ​ផ្តាច់ព្រ័ត​ស្តីពី​រឿង​នុយក្លេអ៊ែរ​អ៊ីរ៉ង់​ពេល​នេះ​មក​ពី​លោក​មិន​ចង់​ឃើញ​សេណារីយ៉ូ​ឆ្នំា ២០១៣ កើត​មាន​ជា​ថ្មី​ម្តង​ទៀត។ គឺ​ជា​សេណារីយ៉ូ​ដែល​ភាគី​អាមេរិក និង​អ៊ីរ៉ង់​បាន​ព្រមព្រៀង​គ្នា​លើ​អត្ថបទព្រាង​ចុង​ក្រោយ​មួយ​តែ​ពីរ​នាក់ និង​ដែល​ភាគី​បារំាង​បាន​ច្រាន​ចោល។ កាល​ណោះ ទីក្រុង​ប៉ារីស​បាន​យល់​ឃើញ​ថា អត្ថបទព្រាង​ចុង​ក្រោយ​ដែល​អ៊ីរ៉ង់ និង​អាមេរិក​បាន​ឯកភាព​គ្នា​នោះ​ហាក់​ដូច​ជា​បាន​ធ្វើ​សម្បាន​ច្រើន​ជ្រុល​ឲ្យ​អ៊ីរ៉ង់។ នេះ​ហើយ​ជា​បញ្ហា​ដែល​ភាគី​បារំាង​មិន​ចង់​ឃើញ​កើត​មាន​ជា​ថ្មី​ទេ។

អាមេរិក និង​បារំាង​ដែល​ចង់​បាន​កិច្ចព្រមព្រៀង​ត្រឹមត្រូវ​មួយ​ហាក់​ដូច​ជា​នៅ​មិន​បាន​ឯកភាព​គ្នា​លើ​អត្ថន័យ និង​ខ្លឹមសារ​ដែល​ត្រូវ​កំណត់​នៅ​ក្នុង​កិច្ចព្រមព្រៀង​ត្រឹមត្រូវ​នោះ​ទេ។ ទីក្រុង​វ៉ាស៊ីនតោន​ចង់​បាន​កិច្ចព្រមព្រៀង​មួយ​មិន​តឹងតែងជ្រុល និង​ចង់​ផ្តល់​សម្បទាន​ច្រើន​ឲ្យ​អ៊ីរ៉ង់។ តែ​ទីក្រុង​ប៉ារីស​បន្ត​ប្រកាន់​ជំហរ​តឹងរ៉ឹង និង​ម៉ឹងម៉ាត់​ទល់​នឹង​អ៊ីរ៉ង់។ ដូច្នេះ​ឃើញ​ថា ភាព​មិន​ចុះ​សម្រុង​គ្នា​បែរ​ជា​កំពុង​លេច​ឡើង​នៅ​ក្នុង​ក្រុមអ្នកចរចា​បស្ចិមលោក​ទៅ​វិញ។ ត្រង់​ចំណុច​នេះ​ត្រូវ​បាន​ក្រុម​អ្នក​វិភាគ​មើល​ឃើញថា អ្នក​ដែល​ទាញ​បាន​ផល​ចំណេញ​ច្រើន​ពី​ការ​ខ្វែង​គ្នា​នៅ​ផ្ទៃក្នុង​ក្រុម​ចរចា​បស្ចិមលោក​ពេល​នេះ គឺ​ភាគី​អ៊ីរ៉ង់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ