រុស្ស៊ី-សហរដ្ឋអាមេរិក

លោកពូទីន៖ មិនមែន​ប្រធានាធិបតី​អាមេរិក ឬ​បារាំង ដែល​សម្រេច​ជោគវាសនា​ប្រធានាធិបតី​ប្រទេស​ដទៃ

លោក​ពូទីន និង​លោក​អូបាម៉ា ចាប់ដៃគ្នា ក្នុង​ជំនួប​ទ្វេភាគី​អាមេរិក រុស្ស៊ី កាលពី​ថ្ងៃ​ចន្ទ ទី ២៨ សីហា ក្នុង​ក្រុង​ញូវយ៉ក
លោក​ពូទីន និង​លោក​អូបាម៉ា ចាប់ដៃគ្នា ក្នុង​ជំនួប​ទ្វេភាគី​អាមេរិក រុស្ស៊ី កាលពី​ថ្ងៃ​ចន្ទ ទី ២៨ សីហា ក្នុង​ក្រុង​ញូវយ៉ក érôme CARTILLIER et Max DELANY | AFP

នៅ​ថ្ងៃ​ចន្ទ ទី ២៨ កញ្ញា នៅក្នុង​ជំនួបកំពូល​ទ្វេភាគី រុស្ស៊ី អាមេរិក លោក​ប្រធានាធិបតី​អូបាម៉ា និង​លោក​ប្រធានាធិបតី​ពូទីន​បាន​ព្រមព្រៀង​គ្នា ជា​លើក​ទី ១ ពី​ប្រតិបត្តិការ​យោធា​របស់​ប្រទេស​ទាំង​២ នៅក្នុង​ទឹកដី​ស៊ីរី។ ប៉ុន្តែ មេដឹកនាំ​របស់​មហាអំណាច​ទាំងពីរ រុស្ស៊ី និង​អាមេរិក នៅតែ​និយាយ​មិន​ត្រូវ​គ្នា ពី​រឿង​លោក​បាស្ហា អាល់អាសាដ ប្រធានាធិបតី​ស៊ីរី។ 

ផ្សាយពាណិជ្ជកម្ម

ជំនួបកំពូល​ដើម្បី​ប្រយុទ្ធប្រឆាំង​ភេរវកម្ម ត្រូវ​បើក​ធ្វើ​នៅថ្ងៃ​អង្គារ​ទី ២៩​កញ្ញា នៅ​ទីក្រុង​ញូវយ៉ក។ គឺ​ជា​ជំនួប​កំពូល ដាច់​ដោយឡែក​ពី​មហាសន្និបាត​របស់​អង្គការ​សហប្រជាជាតិ ដែល​មាន​ថ្នាក់ដឹកនាំ​របស់​ប្រទេស​ជាង ១០០​ចូលរួម។ ប្រធានាធិបតី អាមេរិក លោក​បារ៉ាក់​អូបាម៉ា ទំនង​ខំប្រឹង​ប្រមែប្រមូល​ប្រទេស​ដទៃ ឲ្យ​ចូលរួម​គាំទ្រ ប្រតិបត្តិការ​របស់​សម្ព័ន្ធ​អន្តរជាតិ ដែល​អាមេរិក បង្កើត ដឹកនាំ​កាលពី​ខែ​កញ្ញា ឆ្នាំ ២០១៤។ កាលពី​ថ្ងៃ​ចន្ទ លោក​អូបាម៉ា​បាន​និយាយ​ថា អាមេរិក​ត្រៀម​សហការ ជាមួយ​ប្រទេស​ដទៃទៀត រួម​ទាំង រុស្ស៊ី និង​អ៊ីរ៉ង់ ផង ដែល​ជាសម្ព័ន្ធមិត្ត​របស់​រដ្ឋាភិបាល​ស៊ីរី ដើម្បី​បិទបញ្ចប់​ជម្លោះ​សង្រ្គាម​ស៊ីវិល​ស៊ីរី។

 

នៅ​ល្ងាច​ថ្ងៃ​ចន្ទ នៅក្រៅ​ក្របខ័ណ្ឌ​មហាសន្និបាត អង្គការ​សហប្រជាជាតិ ប្រធានាធិបតី​រុស្ស៊ី និង​ប្រធានាធិបតី​អាមេរិក​បាន​ជួប​និយាយ​គ្នា ជាលើក​ទី ១ នៅក្នុង​ជំនួប​កំពូល​ទ្វេភាគី បន្ទាប់​ពី​ប្រទេស​ទាំងពីរ បាន​បែរខ្នង​ដាក់គ្នា ជាង​២​ឆ្នាំ ដោយសារ​វិបត្តិ​អ៊ុយក្រែន។

 
ជំនួបកំពូល​អាមេរិក រុស្ស៊ី រយៈពេល​មួយម៉ោង កន្លះ ផ្តោតសំខាន់​ទៅលើ​វិបត្តិ​ស៊ីរី និង​វិបត្តិ​អ៊ុយក្រែន។ នៅក្រោយ​ជំនួប​កំពូល មេដឹកនាំ​ទាំងពីរ មិន​បានធ្វើ​សន្និសីទ​កាសែត​រួមគ្នាទេ។ នៅក្រោយ​ជំនួប​កំពូល លោកអូបាម៉ា​មិន​បាន​ថ្លែង​អ្វី​ទេ គឺ​ទុកឲ្យ​មន្រ្តី​រដ្ឋាភិបាល​ជាអ្នក​និយាយ​ប្រាប់​អ្នកកាសែត​ពី​ខ្លឹមសារ​ដែល​មេដឹកនាំ​ទាំងពីរ​បាន​លើក​ទៅ​ជជែកគ្នា។

តាមអ្នកទទួល​ខុសត្រូវ​ជាន់ខ្ពស់​អាមេរិក លោកអូបាម៉ា និង​លោក​ពូទីន បាន​យល់ស្របគ្នា លើ​គោលការណ៍ យុទ្ធសាស្រ្ត​យោធា​របស់​ប្រទេស​ទាំងពីរ​នៅ​ក្នុង​ទឹកដី​ស៊ីរី។ ពោលគឺ​ អាមេរិក និង​រុស្ស៊ី យល់ស្របថា នឹង​ទាក់ទង​គ្នា ដើម្បី​ជៀសវាង​កុំឲ្យ​មាន​ការប៉ះទង្គិច​គ្នា​រវាង​យោធា​របស់​ប្រទេស​ទាំងពីរ នៅក្នុង​សមរភូមិ ប្រឆាំង​នឹង​ក្រុមជីហាត អង្គការ​រដ្ឋអ៊ីស្លាម នៅ​ក្នុង​ទឹកដី​ស៊ីរី។ តាម​មន្រ្តី​អាមេរិក​ខាងលើ លោកអូបាម៉ា និង​លោក​ពូទីន​បាន​យល់ស្រប​នឹង​គ្នា ដែរ​ថា គឺមាន​តែ​​ដំណោះស្រាយ​នយោបាយ​ដែល​អាច​ជួយ​ស្រោចស្រង់​ស៊ីរី​ចេញ​ពី​វិបត្តិ សង្រ្គាម​បង្ហូរ​ឈាម សព្វថ្ងៃនេះ។

នៅ​ខាង​រុស្ស៊ីវិញ គឺ​លោក​ប្រធានាធិបតី​ វ្ល៉ាឌីមៀរ ពូទីន​ផ្ទាល់ ដែល​បាន​អះអាង​ប្រាប់​ទៅ​អ្នកកាសែត​ថា ​ជំនួប​របស់លោក​ជាមួយ​លោកអូបាម៉ា បាន​ទទួល​ជោគជ័យ​ច្រើន ហើយ​ថា ទាំង​លោក​និង​លោកអូបាម៉ា គឺ​បាន​និយាយ​គ្នា ត្រង់ទៅ ត្រង់មក ជាពិសេស ពី​ការចូលរួម​របស់​រុស្ស៊ី ក្នុង​ការប្រយុទ្ធ​ប្រឆាំង​នឹង​ក្រុម​ជីហាត អង្គការ​រដ្ឋអ៊ីស្លាម​នៅក្នុង​ទឹកដី​ស៊ីរី។

នៅក្នុង​សុន្ទរកថា ថ្លែង​ទៅកាន់​មហាសន្និបាត​អង្គការ​សហប្រជាជាតិ កាលពី​ថ្ងៃ​ចន្ទ លោក​ប្រធានាធិបតី​រុស្ស៊ី បាន​បញ្ជាក់​ថា រុស្ស៊ី ត្រៀម​ខ្លួន​ចូលរួម​ជាមួយ​កងកម្លាំង​ប្រទេស​លោក​ខាង​លិច​ដើម្បី​ប្រយុទ្ធប្រឆាំង នឹង​ក្រុម​ជីហាត អង្គការ​រដ្ឋអ៊ីស្លាម ប៉ុន្តែ កងកម្លាំង​នោះត្រូវ​ស្ថិតនៅក្រោម​ការគ្រប់គ្រង​របស់​អង្គការ​សហប្រជាជាតិ។

រុស្ស៊ី ដែល​មាន​ជនជាតិ​របស់ខ្លួន ជាច្រើន​រយនាក់ ចូល​ទៅប្រយុទ្ធ​ក្នុង​ក្រុមជីហាត នៅ​ស៊ីរី បាន​ប្រកាស​ធ្វើ​សង្រ្គាម​ប្រឆាំង​នឹង​ក្រុមជីហាត និង​បានអំពាវនាវ​ឲ្យ​ក្រុមប្រឹក្សា​សន្តិសុខ​ប្រកាស​បង្កើត​សម្ព័ន្ធ​អន្តរជាតិ មួយ ដែល​សំខាន់ ដូចកាល​ពេល​គេ​ធ្វើសង្រ្គាម​ប្រឆាំង​នឹង​ក្រុមណាហ្ស៊ី​របស់​ហ៊ីត្លែរ ដើម្បី​បំផ្លាញ​ក្រុមជីហាត នៅស៊ីរី។

ប្រធានាធិបតីបារាំងថ្លែង​នៅ​អង្គការ​សហប្រជាជាតិ​ថា លោកបាស្ហា អាល់អាសាដ​ជា​មេបញ្ហា បង្ក​ឲ្យ​មាន​ក្រុមភេរវនិយម ជីហាត​អង្គការ​រដ្ឋអ៊ីស្លាម
ប្រធានាធិបតីបារាំងថ្លែង​នៅ​អង្គការ​សហប្រជាជាតិ​ថា លោកបាស្ហា អាល់អាសាដ​ជា​មេបញ្ហា បង្ក​ឲ្យ​មាន​ក្រុមភេរវនិយម ជីហាត​អង្គការ​រដ្ឋអ៊ីស្លាម REUTERS/Mike Segar

លោកហ្រ្វង់ស័រ ហូឡង់៖ លោក​អាសាដ​មិនមែន​ជាដំណោះស្រាយ ប៉ុន្តែ ជា​មេបង្ក​បញ្ហា​បង្កើតឲ្យ​មាន​ក្រុមជីហាត អង្គការ​រដ្ឋអ៊ីស្លាម
លោក​ប្រធានាធិបតី​អាមេរិក អូបាម៉ា និង​លោក​ពូទីន ប្រធានាធិបតី​រុស៊្សី និយាយ​ត្រូវរ៉ូវ​គ្នា​ច្រើន​ពីរឿង​ចង់​រួមគ្នា វាយប្រយុទ្ធប្រឆាំង​ក្រុមជីហាត​នៅ​ស៊ីរី។ ប៉ុន្តែ មេដឹកនាំ​របស់​ប្រទេស​មហាអំណាច​ទាំងពីរ​នៅ​តែ​និយាយ​មិនត្រូវ​គ្នា ពី​ជោគវាសនា​របស់​លោក​ប្រធានាធិបតី​ស៊ីរី បាស្ហា អាល់អាសាដ។ អាមេរិក និង​ប្រទេស​លោកខាងលិច ចង់​ឲ្យ​លោក​អាសាដ ចុះចេញ​ពី​តំណែង ​ប៉ុន្តែ រុស្ស៊ី របស់​លោក​ពូទីន​វិញ ថា គេ​ត្រូវ​តែគាំទ្រ លោក​អាសាដ បើសិន​គេ​ចង់​យក​ឈ្នះ ក្រុមជីហាត។

តាំងពី​មុន​បើក​ជំនួប​ទ្វេភាគី​ជាមួយ​គ្នាម្ល៉េះ លោក​ប្រធានាធិបតី​អាមេរិក និង​ប្រធានាធិបតី​រុស្ស៊ី បាន​បង្ហាញ​ឲ្យ​ឃើញ​ពី​ជំហរ​ខ្វែងគ្នា នៅក្នុង​ពេល​ថ្លែង ទៅកាន់​អង្គ​មហាសន្និបាត ស្តីពី​វិបត្តិ​ស៊ីរី។ លោក​អូបាម៉ា មិន​បាន​និយាយ ដោយ​ចំហរ ទាមទារ​ឲ្យ​លោកប្រធានាធិបតី​ស៊ីរី​ចុះចេញពីតំណែងទេ ប៉ុន្តែ លោក​ថា ដំណោះស្រាយ​នយោបាយ​សម្រាប់​វិបត្តិ​ស៊ីរី អាច​ធ្វើទៅបាន បើសិន​គ្មាន​លោក​បាស្ហា អាល់អាសាដ ជា​មេដឹកនាំ​រដ្ឋាភិបាល​ស៊ីរី ដែល​លោក​អូបាម៉ា ផ្ទាល់​ចាត់ទុក​ជា​មេឃាតករ។

តាម​សេតវិមាន នៅក្នុង​ជំនួប​ជាមួយ​លោកពូទីន លោកអូបាម៉ា នៅ​បញ្ជាក់​ជំហរ​ដដែល ដែល​ថា ស៊ីរី នឹង​គ្មាន​ស្ថិរភាព​នយោបាយ​ទេ ដរាបណា លោក​បាស្ហា អាល់អាសាដ នៅ​ជា​ប្រធានាធិបតី​ស៊ីរី​នោះ។

ជំហរ​របស់​ប្រធានាធិបតី​អាមេរិក​បាន​ទទួល​ការគាំទ្រ​បន្ថែម​ពីប្រធានាធិបតី​បារាំង លោក​ហ្វ្រង់ស័រ ហូឡង់។ នៅពេល​ឡើង​ថ្លែង​ទៅកាន់​អង្គ​មហាសន្និបាត លោកប្រធានាធិបតី​បារាំង​បាន​និយាយ​សង្កត់ធ្ងន់ថា ដើម្បី​ដោះស្រាយ​វិបត្តិ​ស៊ីរី គេ​មិនអាច​ធ្វើការ​ជាមួយ​ប្រធានាធិបតី​ស៊ីរី ដែល​តាម​ជា​មេភ្លើង ប្រភព​ធ្វើ​ឲ្យ​កកើតចេញ​ជា​ក្រុមជីហាត អង្គការ​រដ្ឋអ៊ីស្លាម​នោះទេ។ តាម​លោក​ហ្វ្រង់ស័រ ហូឡង់ គឺ​ការបង្រ្កាប​ដ៏បង្ហូរឈាម របស់​រដ្ឋាភិបាល​អាសាដ ទៅលើ​ក្រុមអ្នកប្រឆាំង ដែល​ញ៉ាំង​ឲ្យ​មាន​ក្រុមសកម្ម​ប្រយុទ្ធ ហើយ​ដែលក្រោយមក ក៏​កើតចេញ​មាន​ក្រុមជីហាត អង្គការ​រដ្ឋអ៊ីស្លាម នៅស៊ីរី ដែល​គ្រោះថ្នាក់​មិនត្រឹម​សម្រាប់​តំបន់​ដើមបូព៌ា ប៉ុន្តែ កំពុង​គំរាមកំហែង​ដល់​សន្តិសុខ​ពិភពលោក​ទាំងមូល។

នៅក្រោយ​ជំនួប​ជាមួយ​លោកអូបាម៉ា លោក​ប្រធានាធិបតី​រុស្ស៊ី​បាន​ឆ្លើយទៅវិញ របៀប​បែបចំអកថា លោកមាន​ការគោរព​ដល់​លោកប្រធានាធិបតី​បារាំង និង​រុស្ស៊ី ប៉ុន្តែ មិនមែន ប្រធានាធិបតី​បារាំង ឬ​អាមេរិក​ទេ ដែល​ជាអ្នកសម្រេច​ជោគវាសនា​របស់​ប្រធានាធិបតី​របស់​ប្រទេស​ដទៃនោះ។ តាម​លោកពូទីន គឺ​ជនជាតិ​ស៊ីរី ដែល​ជា​អ្នកសម្រេច ថា​អ្នកណា​ជា​អ្នកដឹកនាំ​រដ្ឋាភិបាល​ស៊ីរី។

សម្រាប់​ប្រធានាធិបតី​រុស្ស៊ី វាជា​កំហុស ឬ​ការគិតខុស ដ៏ធ្ងន់ធ្ងរ ដែល​គេ​មិន​ចាត់ទុក​លោក​បាស្ហា អាល់អាសាដ​ថា ជា​ភាគី​មួយ​ដែរ នៅក្នុងសម្ព័ន្ធ​ប្រយុទ្ធប្រឆាំង​នឹង​ក្រុមជីហាត នៃអង្គការ​រដ្ឋអ៊ីស្លាម។ តាម​លោក​ពូទីន គឺ​មាន​តែ​កងទ័ព​របស់លោក​អាសាដ ទេ ដែល​អាច​ប្រយុទ្ធ​យកឈ្នះ​លើ​ក្រុមជីហាត​នៃអង្គការ​រដ្ឋអ៊ីស្លាម។

នៅក្រោយ​ជំនួបកំពូល​ជាមួយលោក​អូបាម៉ា លោក​ប្រធានាធិបតី​រុស្ស៊ី អះអាង​ថា រុស្ស៊ី​បាន​ពិចារណា​ពី​មធ្យោបាយ​ដើម្បី​គាំទ្រ រដ្ឋាភិបាល​ស៊ីរី ហើយ​និង​កម្លាំងទាហាន​គួដ ដែល​កំពុង​ប្រយុទ្ធប្រឆាំង​នឹង​ក្រុមជីហាត។ លោក​ប្រធានាធិបតី​រុស្ស៊ី អាច​និយាយ​ត្រូវម្យ៉ាង​ដែល​ថា គឺ​ប្រជាជន​ស៊ីរី ដែល​ជាអ្នកសម្រេច​ជោគវាសនា​របស់​អនាគត​ស៊ីរី។ ប៉ុន្តែ គេមិនត្រូវ​ភ្លេចទេ ប្រជាជន​ស៊ីរី​ដែលអាច​សម្រេច​ជោគវាសនា​មិនមែន​មាន​តែ​រដ្ឋាភិបាល​របស់​ប្រធានាធិបតី​បាស្ហា អាល់អាសាដ​នោះទេ គឺ​មាន​ផងដែរ ក្រុមប្រឆាំង​ស៊ីរី​សេរី ដែល​ពេល​កំពុង​ប្រយុទ្ធប្រឆាំង​នឹង​ទាហាន​រដ្ឋាភិបាល​ផង និង​ក្រុមជីហាត អង្គការ​រដ្ឋអ៊ីស្លាមផង។ ដូច​ប្រធានាធិបតី​បារាំង និយាយ​អ៊ីចឹង គេ​មិនអាច​ដាក់​ជនរងគ្រោះ (ក្រុមប្រឆាំង) និង​មេពេជ្ឈឃាត (លោកអាសាដ) ឲ្យ​ធ្វើការ​ជាមួយគ្នា ដើម្បី​រកដំណោះស្រាយ​ឲ្យ​វិបត្តិស៊ីរីទេ។ ផ្លូវមាន​តែ​មួយ គឺ​រដ្ឋាភិបាល​អន្តរកាល ដែល​គ្មាន​ដឹកនាំ​ដោយ​លោក​បាស្ហា អាល់អាសាដ។ លោក​អាល់អាសាដ​មិនមែន​ជា​ដំណោះស្រាយ ដូច​លោក​ពូទីន ប៉ុន្តែ ជា​ឆ្អឹង​ទទឹងក ទៅ​វិញ។ នេះ​បើតាម​លោក​ប្រធានាធិបតី​បារាំង។
 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI