អានតួអត្ថបទ
ទស្សនៈព្រឹត្តិការណ៍ពិភពលោក

ផ្នត់​គំនិត​អ្នកស្រុករុស្ស៊ី វិវឌ្ឍ​ល្អ ចំពោះ​កងទ័ពខ្លួន ក្នុង​ផ្ទៃ​នៃ ភាពតានតឹង​ជាមួយ បស្ចិមលោក

សំឡេង ០៥:៤៤
ការតាំង​ពិព័រណ៌​សព្វាវុធ​រុស្ស៊ី នៅក្រៅ​ក្រុង​ម៉ូស្គូ
ការតាំង​ពិព័រណ៌​សព្វាវុធ​រុស្ស៊ី នៅក្រៅ​ក្រុង​ម៉ូស្គូ ©REUTERS/Sergei Karpukhin
ដោយ៖ កែវ ឆាយា
៣១ នាទី

គឺមួយថ្ងៃ​ក្រោយ​ពី​ក្រសួង​ការពារ​ជាតិ​អាមេរិក បានប្រកាស​អំពី​យុទ្ធសាស្ត្រ​យោធា នៃ​សន្តិសុខ​ជាតិ​អាមេរិកាំង ដែលចាត់ទុក​រុស្ស៊ី ជា”រដ្ឋសើរើនិយម” បំពានច្បាប់​អន្តរជាតិ មិនគោរព​អធិបតេយ្យ​រដ្ឋអ៊ុយក្រែន ហើយពាំនាំជា អសន្តិសុខ​ដល់ប្រទេស​ជិតខាង លុះ ទាល់តែ​តម្រូវ​ឲ្យស.រ.អា. ត្រៀមប្រឈម​នឹងរុស្ស៊ី ប្រព័ន្ធ​ផ្សព្វផ្សាយ​ក្រុងម៉ូស្គូ ថ្ងៃទី២កក្កដា បាន ចេញលទ្ធផល នៃការស្ទង់មតិ​ប្រជាពលរដ្ឋ​រុស្ស៊ី ដែលយល់ថា អាមេរិកជា គ្រោះថ្នាក់​ដល់​រុស្ស៊ី ចំណែក​បស្ចិមលោក បានតាក់តែង​ទៅហើយជា សេណារីយ៉ូ នៃ​សង្គ្រាមទល់​នឹង​រុស្ស៊ី។ 

ផ្សាយពាណិជ្ជកម្ម

ស្របនឹង​លទ្ធផលនៃ​ការស្ទង់មតិ ធ្វើដោយ​អង្គការ​សង្គមសាស្ត្រ​រុស្ស៊ី Levada-Center ប្រជាពលរដ្ឋ​រុស្ស៊ី ដល់ទៅជាង ៨០% ប្រកាន់​ឥរិយាបថ​អវិជ្ជមាន ចំពោះសហរដ្ឋអាមេរិក ដូច្នេះ បើគិត​ក្នុងមួយឆ្នាំ​កន្លងទៅ តាំងពី រុស្ស៊ី និង អាមេរិក ប្រឈមមុខ​ដាក់គ្នា ដោយមក​ពី​វិបត្តិ​នៅ អ៊ុយក្រែន តួលេខ​អវិជ្ជមាននេះ បានកើន​ឡើងទ្វេដង ឯណោះ។

 
ពិតជាយោង​លើលទ្ធផល​នៃការស្ទង់មតិ​នេះ ដែល កាសែត​អាមេរិកាំង The Washington Times សង្កេតឃើញ​ថា ទឹកចិត្តប្រឆាំង​នៅរុស្ស៊ី ទល់នឹងស.រ.អា. មិនដែលមាន​កម្រិត​ខ្ពស់​យ៉ាងនេះ ឡើយ តាំងពី​សហភាពសូវៀត រលំរលាយទៅក្នុង ឆ្នាំ១៩៩១។ ម៉្លោះហើយបានជា ប្រជាជន​រុស្ស៊ី យល់ដឹង​ក្នុងចិត្តពីសារសំខាន់​នៃការពឹងផ្អែក លើកងទ័ព ក្នុង​លក្ខណៈកាល​ដែល​ទំនាក់ទំនង អន្តរជាតិ ចេះតែ​តានតឹងឡើង។

តាមមតិ កាសែត​អាមេរិកាំង ទំនោរ​ប្រឆាំងអាមេរិក បានចាប់​ពន្លក គឺតាំងពី ចុងឆ្នាំ២០១១​ម៉្លេះ ពេល​ដែលលោកប្រធានាធិបតី រុស្ស៊ី វ៉្លាឌីមៀរ ពូទីន បានចោទស.រ.អា.ជាសាធារណៈតែម្តង ថា ជាប្រទេស ស្ថិតនៅពីក្រោយ រលកតវ៉ា​យ៉ាងខ្លាំងក្លា ក្នុង​ក្រុងម៉ូស្គូ គឺតវ៉ា​ទល់នឹង លទ្ធផលនៃ ការបោះឆ្នោតសភា​ឌូម៉ា ថ្ងៃទី៤ធ្នូឆ្នាំ២០១១ ដែល​ពួកបាតុករ នាំគ្នា​ចាត់ទុកថា ក្លែងបន្លំ​ទេតើ។

អ្វីដែលគួរ​ឲ្យកត់​សម្គាល់ គឺថា នៅស.រ.អា .ទឹកចិត្តប្រឆាំង​ទល់នឹង​រុស្ស៊ី ក៏មាន​កម្រិតខ្ពស់​ដែរ។ ស្របនឹង លទ្ធផលនៃ​ការស្ទាបស្ទង់ធ្វើ​ដោយអង្គការ​សង្គម​សាស្ត្រអាមេរិក Gallup មាន បណ្តាជន អាមេរិកដល់ទៅ ៧០% ដែលប្រកាន់​ឥរិយាបថ​អវិជ្ជមាន ចំពោះប្រទេសរុស្ស៊ី។

ទាក់ទងនឹង​ហានិភ័យផ្ទុះឡើងជា សង្គ្រាមក្តៅ​មែនពិត បើអង្គការ​សង្គមសាស្ត្ររុស្ស៊ី Levada-Center ចុះផ្សាយថា ពីក្នុងចំណោម​ពលរដ្ឋរុស្ស៊ី ៣នាក់ មានម្នាក់ទៅហើយ ដែលយល់ថា អាមេរិក​ត្រៀមវាយលុក ចូលប្រទេស​រុស្ស៊ី នោះ​កាសែត​បស្ចិមលោក ឈ្មោះ State ដែល ចេញផ្សាយ នៅអឺរ៉ុបផង នៅអាមេរិកផង ថែមទាំងកត់សម្គាល់​ថា សូម្បី នៅសហរដ្ឋអាមេរិក ក៏​គេ​ប្រមាណ ថា សង្គ្រាមបែបនេះ អាចកើត​មានមែន ហើយគេថែម​ទាំងមិន​បដិសេធឡើយ ថា វាអា​ចជ្រុល ដល់ សង្គ្រាមបរមាណូ ទៅផង។

ជាសក្ខីកម្ម គឺឯកសារ​ចេញផ្សាយ ដោយ” សន្និសីទ​សមាគម​កងទ័ពស.រ.អា.” កាលពីខែតុលា ឆ្នាំ២០១៤ ដែល​បានលើកយក​ទៅពិនិត្យ​ល សេណារីយ៉ូ ខ្លះ​នៃ​សង្គ្រាម ជាមួយរុស្ស៊ី ព្រម​ទាំង​ជាមួយ ចិន និង អ៊ីរ៉ង់។

ចំណែក​ប្រព័ន្ធផ្សព្វផ្សាយ​តាមបណ្តាញ​អ៊ិនធ័រណែត ឈ្មោះ Vox  បង្ហើបឲ្យដឹងថា អាចក្លាយ​ជា កន្លែងដែល​ផ្ទុះឆេះ ជាសង្គ្រាមនេះ គឺទឹកដី​អេស្តូនី។ ដោយហេតុថា ប្រទេសនេះ  ជា​សមាជិក បក្ស​សម្ព័ន្ធ​អូតង់ ក្នុងករណី​មានអំពើ​ឈ្លានពាន​ពី ខាងរុស្ស៊ី នោះ អេស្តូនី នឹង​ត្រូវការពារ​ដោយ ប្រទេស ឯទៀត ជា​សមាជិក​អូតង់ដែរ។ សង្គ្រាម​លោកលើកទី៣ ពិតជា មិនអាចចៀសផុត ពី ការប្រើ​អាវុធបរមាណូ។ ក្នុងករណី​នេះ មធ្យោបាយ​ឃោសនា​មហាជនអាមេរិកាំង ព្យាករ ថា ព្រឹត្តិការណ៍ អាចវិវឌ្ឍទៅ តាម សេណារីយ៉ូ ៤ ដូចតទៅ ៖
ទី១ - ដោយខ្លាច​ធ្លាក់ខ្លួន​ដូចគ្នា ក្នុង​វិនាសកម្ម វិបត្តិនឹងរៀបរយ ដោយសន្តិវិធី។
ទី២- សង្គ្រាម ដែលផ្តាច់ជីវិត​មនុស្សអស់រាប់​លាននាក់ នឹងចប់ទៅ ដោយជ័យជំនះ ស.រ.អា.។
ទី៣- សង្គ្រាម​ដែលបណ្តាល​ឲ្យមានមនុស្សស្លាប់​អស់ជាច្រើន​លាននាក់ នឹងចប់ទៅ ដោយ ជ័យជំនះ រុស្ស៊ី ដែលនឹងតាំង​ឧត្តមភាព លើទ្វីបអឺរ៉ុប​ទាំងមូល។
ទី៤-ក្រោយពីម្ខាងៗ ស្លាប់ទៅទាំង​លានៗនាក សង្គ្រាមនឹងចប់​ទៅដោយឯងៗ ហើយអ្វីដែល នៅ សល់ពីសង្គ្រាមនោះ គឺ ពិភពលោក ធ្លាក់ក្នុងវិនាសកម្ម មើល​លែងស្គាល់។

ដោយយល់ដឹងអំពី ផលវិបាកជាយថាហេតុ​នេះ ក្នុងសង្គមរុស្ស៊ី ដែលក្រោយ​ពី​ប្រកាន់ ឥរិយាបថ​អវិជ្ជមាន អស់យូរឆ្នាំមក ចំពោះ​កងកម្លាំងប្រដាប់អាវុធ​របស់​ប្រទេស ស្រាប់​តែ​កើត មានឡើងជា​របត់​ជាក់ស្តែង គឺគេនាំគ្នា​គាំទ្រ​កងទ័ព ហើយចំនួន​អ្នកដែល​ចង់ចូល​បម្រើ កងទ័ព ឡើង ដល់កម្រិតខ្ពស់​មិនធ្លាប់មាន។ តាមកាសែតដ៏ធំ​នៃ​ក្រុងម៉ូស្គូឈ្មោះ Vedomosti លេខថ្ងៃទី ២កក្កដា​ចុះផ្សាយ យោងទៅលើ លទ្ធផល​នៃការស្ទង់មតិ ធ្វើដោយ​អង្គការ​សង្គមសាស្ត្រ​រុស្ស៊ី ឈ្មោះ “សាធារណៈមតិ”  ៖ ប្រជាពលរដ្ឋរុស្ស៊ីដល់ទៅ ៨៦% ជឿជាក់​ថា ក្នុងករណី មានសង្គ្រាម ផ្ទុះឡើង កងទ័ព​ប្រទេស ពិតជា​អាចការពារ​សុវត្ថិភាព​របស់គេ។ ជាការប្រៀបធៀប តួលេខ បែបនេះ បាន មានកម្រិតទាប​បំផុត គឺក្នុង​ឆ្នាំ២០០៣ ដែលត្រឹមតែ ៣៨%ប៉ុណ្ណោះ។ ពេលមាន សង្គ្រាម ឆាបឆេះនៅហ្ស័កហ្ស៊ី ក្នុងឆ្នាំ២០០៨ ជំនឿ​របស់បណ្តាជនរុស្ស៊ី​លើកងទ័ព​ខ្លួន បាន ឡើងដល់ ៧៤%ទៅហើយ។

លទ្ធផលនៃ​ការស្ទង់មតិនោះ ក៏បង្ហាញឲ្យឃើញ​ថា បើក្នុងឆ្នាំ២០០៤ មានអ្នកស្រុករុស្ស៊ី ដល់ទៅ ៧៧% មិនចង់ឃើញ​សាច់ញាតិគេ ចូលបម្រើ​ក្នុងកងទ័ពឡើយ នោះចាប់ពី ឆ្នាំ២០១០មក ផ្នត់គំនិតគេ ចំពោះកងទ័ព បានវិវឌ្ឍល្អ​ឡើង ដោយនៅដើមឡើយ មាន៣៦% ប្រាថ្នាឃើញ បងប្អូនគេ ធ្វើការបរិច្ចាគ​កិច្ចយោធា ក្នុងកងទ័ព ហើយក្នុងឆ្នាំ២០១២ តួលេខនេះ ឡើងដល់ ៥២%។ បន្ទាប់ពីបស្ចិមលោក ក្នុងឆ្នាំ២០១៤ ចាប់ផ្តើមប្រកាន់​ឥរិយាបថ អមិត្តត្រង់ៗ ចំពោះ ប្រទេសរុស្ស៊ី ដោយ​មកពី​ស្ថានការណ៍ នៅអ៊ុយក្រែន ស្រប​នឹងការស្ទង់មតិក្នុង ខែមិថុនា ឆ្នាំ ២០១៥នេះ មានអ្នកស្រុក​រុស្ស៊ី ដល់ទៅ៥៩% ឯណោះ ដែលចង់​ឲ្យសាច់ញាតិ​គេ ចូលបម្រើ ក្នុងកងទ័ព។

ជាបញ្ចប់ គួរនិយាយថា ក្នុងឆ្នាំ១៩៩២ ក្រោយពីសហភាពសូវៀត​រលំទៅ ប្រទេសរុស្សី បាន​មានកងទ័ពចំនួន​២លាន៩សែននាក់ ហើយក្នុងឆ្នាំ២០០៨ ជាលទ្ធផលនៃកំណែទម្រង់ គឺចុះមកនៅ ២លាននាក់ រួចចាប់ពីឆ្នាំ២០១៣មក ក្រោយពី​បន្ថយបរិមាណយកគុណភាព គឺសម្រាំងនៅសល់​ត្រឹម៧សែន៧ម៉ឺននាក់ បូកទាំងបុគ្គលិកបម្រើការផង គឺមានចំនួន ១លាន ២សែន៥ម៉ឺន​នាក់៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ