អានតួអត្ថបទ
រុស្ស៊ី

ម៉ូស្គូ​ទិតៀន​ក្រុង​វ៉ាស៊ីនតោន ចំពោះ​ការ​លូកដៃ​ចូល​ក្នុង ពិភព​កីឡាបាល់ទាត់

លោក​ប្រធានាធិបតី​រុស្ស៊ីពូទីន
លោក​ប្រធានាធិបតី​រុស្ស៊ីពូទីន ©REUTERS/Sergei Ilnitsky
ដោយ៖ កែវ ឆាយា
១៣ នាទី

លោក​ប្រធានាធិបតី​រុស្ស៊ី ថ្ងៃ​ព្រហស្បតិ៍ ទី២៨ ឧសភា បាន​ចោទ​យុត្តាធិការ​អាមេរិក ថា​ជ្រៀតជ្រែក ចូល​ក្នុង​កិច្ចការ​អ្នកដទៃ ដោយ​តម្រូវ​ឲ្យ​អាជ្ញាធរ​ស្វីស ចាប់​មន្ត្រី​ទទួលខុសត្រូវ ៧នាក់​របស់ សហព័ន្ធ​បាល់ទាត់​ពិភពលោក FIFA។

ផ្សាយពាណិជ្ជកម្ម

ថ្លែង​ទាំង​ច្រឡោត ទៅ​ពួក​អ្នកកាសែត រសៀល​ម្សិលមិញ លោក​ប្រធានាធិបតី​រុស្ស៊ី ក្នុង​ឋានៈ​ជា​អ្នក​មាន​សញ្ញាប័ត្រជាន់ខ្ពស់​ខាង​ច្បាប់ មិន​ញញើត ​នឹង​ចាត់​ទុក​ជា​រឿងចម្លែក ការ​ចាប់​ពួក​មន្ត្រី​របស់ FIFA នា​ថ្ងៃពុធ ទី២៧ ឧសភា នៅ​ប្រទេស​ស្វីស ក្នុង​បរិបទ នៃ ការស៊ើបអង្កេត អំពី​ក្តី​សង្ស័យ ក្នុង​អំពើ​ពុករលួយ​របស់​ពួក​គេ។ ការ​ចាប់​នេះ​ដែល​ប្រព្រឹត្ត​ទៅ តាម​សំណើ​អាមេរិក ដែល​វាត​សុពលភាព​ច្បាប់​ក្នុង​ស្រុក​របស់​ខ្លួន ទាំង​ទៅ​លើ​រដ្ឋបរទេស តាម​មតិ​លោកពូទីន គឺ ខុសច្បាប់​ទេ​តើ ហើយ​វា​រំលេច​ឲ្យ​ឃើញ​ពី ចេតនា​ជាក់ស្តែង របស់ អាមេរិក​ ដើម្បី​ក្នុង​ការ​បោះឆ្នោត​ដែល​គ្រោង​ធ្វើ​នៅ​ថ្ងៃសុក្រ ទី២៩ ឧសភា គឺ​រាំងរា​កុំ​ឲ្យ​ប្រធាន FIFA លោក Joseph Blatter ដែល​ត្រូវ​គេ​ស្គាល់​ថា ជំនិត​នឹង​ម៉ូស្គូ អាច​ជាប់​ឆ្នោត​ជា​ថ្មី សម្រាប់​អាណត្តិ ទី៥។

ប្រាកដ​ណាស់ ដែល​រុស្ស៊ី កាល​ពី​ឆ្នាំ២០១០ ត្រូវ​បាន FIFA ប្រគល់​សិទ្ធិ ឲ្យ​ធ្វើ​ជា​ម្ចាស់ផ្ទះ ទទួល World Cup ឆ្នាំ ២០១៨ ចេញ​មុខ​គាំទ្រ​ដល់​បេក្ខភាព​លោក Blatter ទោះ​បី​គាត់​អាយុ ៧៩ឆ្នាំ ទៅ​ហើយ​ក្តី ឲ្យ​ជាប់​ជា​ប្រធាន FIFA មួយ​អាណត្តិ​ទៀត។ លោក​ពូទីន​បាន​លើក​ឡើង ពី​ជំហរ​ជា​គោលការណ៍ ដែល​រមែង​ប្រកាន់​ខ្ជាប់ ដោយ​លោក​ប្រធាន FIFA សព្វថ្ងៃ គឺ​ថា កីឡា មិន​ត្រូវ​លាយ​ឡំ​នឹង នយោបាយ​ឡើយ។ តាម​លោក Blatter កីឡា​ត្រូវ​តែ​ជះ​ចំហាយ ជា វិជ្ជមាន​ទៅ​លើ នយោបាយ ហើយ​បម្រើ​ជា​វេទិកា សម្រាប់​កិច្ចសន្ទនា ដើម្បី​រក​ដំណោះស្រាយ តាម​វិធី​ផ្សះផ្សា។ តាម​ប្រសាសន៍​លោកពូទីន គាត់​ចាត់​ទុក គោលជំហរ​បែប​នេះ គឺ ត្រឹមត្រូវ។

លោក​ប្រមុខ​រដ្ឋ​រុស្ស៊ី សង្កត់​ធ្ងន់​ថា មូស្គូ​ឃើញ​ជ្រងោង​មែន គំនាប ដែល​បន្ត​ប្រព្រឹត្ត​ទៅ លើ រូប​លោក Blatter ដើម្បី​កុំ​ឲ្យ ការ​ប្រកួត​ជើងឯក​ពិភពលោក​ខាង​កីឡាបាល់ទាត់ World Cup ឆ្នាំ ២០១៨ ប្រព្រឹត្ត​ទៅ​កើត ក្នុង​ប្រទេស​រុស្ស៊ី។ លោក​ពូទីន​បញ្ចប់​សេចក្តី​ថា គួរ​ឲ្យ​អភ័ព្វ ដែល​ពួក​ដៃគូ​អាមេរិកាំង​របស់​យើង ប្រើ​វិធី​បែប​នេះ ដើម្បី​បម្រើ គោលដៅ​ដែល​គិត​តែ​ប្រយោជន៍​របស់​ខ្លួន​ផ្ទាល់ ហើយ​ធ្វើ​ទុកបុកម្នេញ អ្នកដទៃ ដោយ​ខុស​ច្បាប់​សោះ អាច​ទាំង​ក្នុង​ករណី FIFA៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ