អានតួអត្ថបទ
អាមេរិក

Facebook និង Microsoft បង្ហាញពី​ទិន្នន័យ​ដែល​រដ្ឋាភិបាល​អាមេរិក​ស្នើសុំ

Facebook ជា​ក្រុមហ៊ុន​មួយ ដែល​ជាប់​រឿង​អាស្រូវ ជុំវិញ​ការ​ផ្តល់​ព័ត៌មាន​ផ្ទាល់​ខ្លួន​របស់​អ្នក​ប្រើប្រាស់ ទៅ​ឲ្យ​ភ្នាក់ងារ​ចារកិច្ច​អាមេរិក
Facebook ជា​ក្រុមហ៊ុន​មួយ ដែល​ជាប់​រឿង​អាស្រូវ ជុំវិញ​ការ​ផ្តល់​ព័ត៌មាន​ផ្ទាល់​ខ្លួន​របស់​អ្នក​ប្រើប្រាស់ ទៅ​ឲ្យ​ភ្នាក់ងារ​ចារកិច្ច​អាមេរិក REUTERS/Dado Ruvic/Files
ដោយ៖ សេង ឌីណា
3 នាទី

ចាប់តាំង​ពី​មាន​ផ្ទុះ​រឿង​អាស្រូវ​ ស្តីពី​ការ​ដែល​​ប៉ូលិស និង​ភ្នាក់ងារ​ចារកិច្ច​អាមេរិក​ចូល​យក​ព័ត៌មាន​ផ្ទាល់ខ្លួន​របស់​អ្នក​ប្រើប្រាស់​អ៊ីនធ័រនែត ក្រុមហ៊ុន​អ៊ីនធ័រនែត​អាមេរិក ដែល​ជាប់ឈ្មោះ​ក្នុង​រឿង​អាស្រូវ​នេះ ត្រូវ​ប្រឈមមុខ​នឹង​ការ​រិះគន់ និង​ការ​បាត់បង់​ទំនុកចិត្ត​ពី​អ្នក​ប្រើប្រាស់។ ដើម្បី​ការពារខ្លួន​ពី​រឿង​អាស្រូវ​នេះ​ កាលពីថ្ងៃ​សុក្រ ក្រុមហ៊ុន Microsoft និង Facebook បានចេញ​មុខ​ពន្យល់​បកស្រាយ​ជុំវិញ​ការ​បញ្ជូន​ព័ត៌មាន​ផ្ទាល់​ខ្លួន​របស់​អ្នក​ប្រើប្រាស់ ទៅ​ឲ្យ​អាជ្ញាធរ​អាមេរិក​នេះ។

ផ្សាយពាណិជ្ជកម្ម

 

“តម្លាភាព” គឺ​ជាគន្លឹះ​ ​ដែល​ក្រុមហ៊ុន​​អ៊ីនធ័រនែត​អាមេរិក​ចង់​យក​មក​ធ្វើ​ជា​យុទ្ធសាស្រ្ត ដើម្បី​ស្តារ​កេរ្តិ៍ឈ្មោះ និង​ទំនុកចិត្ត​ពី​អ្នក​ប្រើប្រាស់​ឡើងវិញ។ ទំនុកចិត្ត ដែល​ត្រូវ​បាត់បង់ ដោយ​រឿងអាស្រូវ​ ដែល​ថា ក្រុមហ៊ុន​ទាំងនេះ​អនុញ្ញាត​ឲ្យ​ប៉ូលិស និង​ភ្នាក់ងារ​ចារកិច្ច​អាមេរិក ចូល​ទៅ​​យក​ព័ត៌មាន​ផ្ទាល់ខ្លួន​របស់​អ្ន​កប្រើប្រាស់​សេវាកម្ម​អ៊ីនធ័រនែត​របស់ពួកគេ។

ទាំង Facebook ទាំង Microsoft ព្រមទាំង​ក្រុមហ៊ុន​មួយចំនួន​ផ្សេងទៀត ដែល​ជាប់ពាក់ព័ន្ធ​នឹង​រឿង​អាស្រូវនេះ សុទ្ធតែ​បាន​បដិសេធ​ថា ពួកគេ​មិនដែល​បើក​ដៃ​ឲ្យ​អាជ្ញាធរ​អាមេរិក​ចូល​យក​ព័ត៌មាន​ផ្ទាល់​ខ្លួនរ​បស់​អ្នក​ប្រើប្រាស់​តាមតែ​អំពើ​ចិត្ត​នោះទេ។ ការផ្តល់​ព័ត៌មាន​ផ្ទាល់ខ្លួន​របស់​អ្នក​ប្រើប្រាស់ គឺ​ធ្វើ​ទៅ​លើ​អ្នក​ប្រើប្រាស់​មួយ​ចំនួន​តូច ហើយ​ធ្វើ​ទៅតាម​សំណើ​ជាក់លាក់​របស់​អាជ្ញាធរ។

ក្រុមហ៊ុន Facebook បាន​ឲ្យដឹង​ថា កាល​ពី​ឆ្នាំ​២០១២​កន្លងទៅនេះ អាជ្ញាធរ​អាមេរិក​បាន​ដាក់​សំណើ​​ចំនួន ប្រមាណ​ពី ៩ពាន់ ទៅ​១ម៉ឺន​សំណើ ទាមទារ​ឲ្យ​ Facebook ផ្តល់​ព័ត៌មាន​ផ្ទាល់​ខ្លួន​របស់​អ្នក​ប្រើប្រាស់​ចំនួន​ប្រមាណ ពី ១ម៉ឺន ៨ពាន់ ទៅ ១ម៉ឺន ៩ពាន់​​គណនី (Accounts)។

ក្រុមហ៊ុន Microsoft វិញ បាន​អះអាង​ថា ខ្លួន​បាន​ទទួល​សំណើ​ពី​អាជ្ញាធរ​អាមេរិក ចន្លោះ​ពី ៦ពាន់ ទៅ ៧ពាន់​សំណើ ពាក់ពន្ធ​នឹង​គណនី​​អតិថិជន​​របស់ Microsoft ប្រមាណ​ពី ៣ម៉ឺន ១ពាន់ ទៅ ៣ម៉ឺន ២ពាន់។

Facebook ក៏​បាន​បញ្ជាក់​បន្ថែម​ផងដែរ​ថា បើ​ធៀប​ទៅនឹង​ចំនួន​អ្នកប្រើប្រាស់​សរុប នៅ​ទូទាំង​ពិភពលោក ដែល​មាន​រហូតដល់​ទៅ​ជាង ១ពាន់ ១រយលាន​នាក់​នោះ ព័ត៌មាន​ ដែល​ Facebook បញ្ជូន​ទៅ​ឲ្យ​អាជ្ញាធរ​អាមេរិក ពាក់ព័ន្ធ​នឹង​អ្នក​ប្រើប្រាស់​តែ​មួយ​ចំនួន​តូច​ប៉ុណ្ណោះ។ លើសពីនេះ​ទៅទៀត Facebook ក៏​មិនបានឆ្លើយតបទៅ​គ្រប់​សំណើ​របស់​អាជ្ញាធរ​អាមេរិក​នោះដែរ។

ក៏ប៉ុន្តែ Facebook មិនបាន​បញ្ជាក់​ឲ្យ​បាន​ច្បាស់លាស់​ទេ​ថា តើ​ក្នុង​ចំណោម​សំណើ​សុំ​របស់​អាជ្ញាធរ​អាមេរិក ទាំង ប្រមាណ​ជា ១ម៉ឺន​សំណើ​នេះ Facebook អនុវត្ត​តាម​​ប៉ុន្មាន​​លើក ហើយ​តើ​ព័ត៌មាន​ផ្ទាល់ខ្លួន​បែបណា​ខ្លះ ដែល​ខ្លួន​បញ្ជូន​ទៅ​ឲ្យ​អាជ្ញាធរ​អាមេរិក?

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ