កម្ពុជា

ឱសថ​ក្លែង​ក្លាយ​នៅ​កម្ពុជា​មាន​ការ​ថយចុះ​

Reuters

ឱសថ​ក្លែងក្លាយ​គឺជា​បញ្ហា​ចំបង​មួយ ដែល​ផ្ដល់​គ្រោះថ្នាក់​ដល់​សុខភាព​ប្រជាជន​កម្ពុជា។ ប៉ុន្មាន​ឆ្នាំកន្លងមក​ ឱសថ​ក្លែងក្លាយបាន​​ចរាចរ​យ៉ាង​អាណាធិបតេយ្យ​ នៅក្នុង​ទីផ្សារ​ឱសថ​ទូទាំង​រាជធានី ក្រុង ខេត្ត។ យ៉ាងណាក៏ដោយ ដោយសារតែ​ការទប់ស្កាត់ និងការ​ព​ង្រឹង​ច្បាប់​ពី​សំណាក់​ក្រសួងសុខាភិបាល ការ​ចរាចរ​ណ៍​ឱសថ​ក្លែងក្លាយ ក្នុង​ឆ្នាំ២០១៣ នេះ​មានការ​ថយចុះ​គួរ​ឲ្យ​កត់សម្គាល់។

ផ្សាយពាណិជ្ជកម្ម

ឱសថ​ក្លែងក្លាយ​ដែល​ចរាចរ​នៅក្នុង​ទីផ្សារ​ឱសថ ក្នុងប្រទេស​កម្ពុជា​ បាន​ថយចុះ​ពី​ប្រមាណ ៦% ក្នុងឆ្នាំមុនៗ មក​ត្រឹម ០,១៣% ប៉ុណ្ណោះ ​ក្នុង​ឆ្នាំ ២០១៣។ នេះ​បើតាម លោក ជូ យិន​ស៊ីម រដ្ឋលេខាធិការ​ក្រសួងសុខាភិបាល។

នៅក្នុង​សន្និសីទ​អន្តរជាតិ ជីវសាស្ត្រ និង​ឱសថ​សាស្ត្រ ដែល​ប្រារព្ធ​ឡើង​ នា​ថ្ងៃ​ចន្ទ ទី២១ តុលា នៅ​ភ្នំពេញ លោក ជូ យិន​ស៊ីម បញ្ជាក់ថា ការថយចុះ​នៃ​លំហូរ​ចូល​ឱសថ​ក្លែងក្លាយ​នេះ​ដោយសារតែ​ក្រសួងសុខាភិបាល​បាន​បង្កើត​គណៈកម្មាធិកា​រ​អន្តរក្រសួង និង​គណៈ​កម្មាធិការ​​អន្តរមន្ទីរ​គ្រប់​ខេត្ត​-ក្រុង ​ដើម្បី​ទប់ស្កាត់​ការ​ចរាចរ​ឱសថ​ក្លែងក្លាយ និង​ជាពិសេស​ការ​លុបបំបាត់​ផ្ទះ​លក់​ឱសថ និង​កន្លែង​ពិនិត្យ​ព្យាបាល​ជម្ងឺ​គ្មាន​ច្បាប់។

មិន​ត្រឹមតែ​ប៉ុណ្ណោះ ការកាត់បន្ថយ​ឱសថ​ក្លែងក្លាយ​ធ្វើទៅបាន​ប្រកបដោយ​ប្រសិទ្ធភាព​ខ្ពស់​ដោយសារតែ​នគរបាល​យុត្តិធម៌បានចុះត្រួតពិនិត្យកន្លែងលក់ឱសថនានា និង​មាន​សិទ្ធិ​រឹបអូស​​​ឱសថ​ក្លែងក្លាយ​គ្រប់​ប្រភេទ ​ដែល​ចរាចរ​នៅក្នុង​ទីផ្សារទាំងនោះ។

លោក​បន្ថែមថា ភាគច្រើន​ប្រភព​នៃ​ឱសថ​ក្លែងក្លាយ​ទាំងនេះ ​គឺ​មក​ពី​ប្រទេសជិតខាង​កម្ពុជា​តែម្ដង។ ហើយ​ថា ផលប៉ះពាល់​សម្រាប់​អ្នកប្រើប្រាស់​ឱសថ​ក្លែងក្លាយ​ទាំងនោះ មិនមែន​ត្រឹមតែ​ធ្វើ​ឲ្យ​គ្រោះថ្នាក់​ដល់​សុខភាព​ប៉ុណ្ណោះ​ទេ វា​ថែមទាំង​អាច​បណ្ដា​ឲ្យ​អ្នក​ជម្ងឺ​បាត់បង់​ជីវិត​ទៀតផង។ លោក បាន​លើ​ឧទាហរណ៍​ពី​ជម្ងឺគ្រុនចាញ់​ ដែលជា​ជម្ងឺ​មួយ​ដែល​ត្រូវការ​ការព្យាបាល​ឲ្យ​ទាន់ពេលវេលា ហើយ​បើ​អ្នក​ជម្ងឺ​ប្រើប្រាស់​ចំ​ថ្នាំ​ក្លែងក្លាយ​គ្មាន​ប្រសិទ្ធភាព ស្ថានភាព​អ្នក​ជម្ងឺ​អាច​អូសបន្លាយ​រហូតដល់​ស្លា​ប់​បាន។

សូមបញ្ជាក់​ ដើម្បី​ចៀសវាង​ការទិញ​ប៉ះចំ​ឱសថ​ក្លែងក្លាយ ប្រជាពលរដ្ឋ​ទាំងអស់​គួរតែ​ទិញ​ឱសថ​នៅក្នុង​ឱសថស្ថាន​ស្របច្បាប់ និង​ទិញ​តែ​ឱសថ​ណា​ដែលមាន​បិទ​បណ្ណ​ស្របច្បាប់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI