កម្ពុជា-អាមេរិក

កូនស្រី​លោកគ្លីនតុន​កំពុង​ទស្សនកិច្ច​កម្ពុជា​ស្តីពី​ការប្រយុទ្ធ​នឹង​ជំងឺអេដស៏

កូនស្រី​លោកគ្លីនតុន​កំពុង​ទស្សនកិច្ច​កម្ពុជា​ស្តីពី​ការប្រយុទ្ធ​នឹង​ជំងឺអេដស៏
កូនស្រី​លោកគ្លីនតុន​កំពុង​ទស្សនកិច្ច​កម្ពុជា​ស្តីពី​ការប្រយុទ្ធ​នឹង​ជំងឺអេដស៏

លោកស្រី ឆែ​ល​ស៊ី គ្លី​ន​តុ​ន (Chelsea Clinton) កូនស្រី​របស់​អតីត​ប្រ​ធានា​ធីប​តី​អាមេរិក ប៊ី​ល គ្លី​ន​តុ​ន កំពុង​បំពេញ​ទស្សនកិច្ច​២ថ្ងៃ​នៅ​កម្ពុជា ក្នុង​​ក្របខណ្ឌ​មូល​និ​ធិ​គ្លី​ន​តុ​ន ដើម្បី​ពិនិត្យ​មើល​សមិទ្ធិផល​នៃ​ការប្រយុទ្ធ​នឹង​ជំងឺអេដស៏​​នៅ​ក្នុង​ប្រទេស​នេះ។ តាំង​ពី​ការ​ចុះ​ហត្ថលេខា​លើអនុស្សារណៈយោគយល់​ស្តី​ពី​ការ​ជួយ​កម្ពុជាក្នុង​ឆ្នាំ​២០០៦​ក្នុង​ការ​ប្រយុទ្ធ​នឹង​ជំងឺ​អេដស៏ កម្ពុជា​ទទួល​ថវិកា​ប្រមាណ៥សែន​ដុល្លារ​ជា​រៀងរាល់​ឆ្នាំ​ពី​មូលនិធិ​គ្លីនតុន។  

ផ្សាយពាណិជ្ជកម្ម

លោកស្រីឆែល​ស៊ី គ្លីនតុន ជា​កូន​ស្រី​របស់​អតីត​ប្រធានាធិបតី​អាមេរិក ប៊ីល គ្លីនតុន បាន​មកដល់​កម្ពុជា​នៅ​ថ្ងៃ​ទី​២៩​ឧសភានេះ ដើម្បី​ធ្វើទស្សនកិច្ច​ពិនិត្យ​មើល​ការ​ងារ​ប្រយុទ្ធ​ប្រឆាំង​នឹង​ជំងឺ​អេដស៏​នៅ​កម្ពុជានេះ។ ក្នុង​រយៈ២ថ្ងៃ​នៃ​ទស្សនកិច្ច​នេះ លោកស្រី ឆែលស៊ី​ គ្លីនតុន​ ត្រូវ​ចូលរួម​ក្នុង​ព្រឹត្តិការណ៍​មួយ​ជាមួយ​មជ្ឈមណ្ឌល​ជាតិ​ប្រយុទ្ធ​នឹង​ជំងឺអេដស៍ ស្តីពី​ការកាត់បន្ថយ​អាត្រា​ឆ្លង​ពី​ម្តាយ​ទៅ​កូន និង​បន្ទាប់មក នៅ​ថ្ងៃទី​៣០​ឧសភា លោកស្រី​នឹង​ទស្សនកិច្ច​មន្ទីរពេទ្យបង្អែក​អ្នក​លឿងខេត្តព្រៃវែង។ តាម​ពិត​ ទស្សនកិច្ច​របស់​លោក​ស្រី ឆែលស៊ី​ គ្លីនតុន​ត្រូវបាន​ធ្វើឡើង​ក្នុង​ក្របខណ្ឌ​នៃ​មូលនិធិ​គ្លីនតុន។

ប្រធាន​មជ្ឈមណ្ឌល​ជាតិ​ប្រយុទ្ធនឹង​ជំងឺអេដស៏ សើស្បែក និង​កាមរោគ នៃ​ក្រសួង​សុខាភិបាល​ លោកមាន ជីវុន​បាន​ថ្លែង​ប្រាប់​វិទ្យុ​បារាំង​អន្តរជាតិ​នៅ​ថ្ងៃ​នេះថា លោក​ស្រី​ឆែលស៊ី គ្លីនតុន គឺ​ជា​សមាជិក​ក្រុមប្រឹក្សា​ភិបាល​នៃ​មូលនិធិគ្លីនតុន​ដែល​បាន​ផ្តល់​ជំនួយ​មក​អោយ​កម្ពុជា​តាំងពី​ឆ្នាំ​២០០៦ ក្នុង​វិស័យ​ប្រយុទ្ធ​នឹង​ជំងឺ​អេដស៏ និង​គ្រុនចាញ់។ លោក​វេជ្ជបណ្ឌិត​មាន​ ជីវុន​បាន​បញ្ជាក់ថា ចាប់តាំងពី​ការ​ចុះហត្ថលេខា​លើ​អនុស្សារណៈ​យោគយល់​​រវាង​លោក​ប៊ីល គ្លីនតុន ដែល​ជាប្រធាន​មូលនិធី និង​លោក​នាយករដ្ឋមន្ត្រី​ហ៊ុន សែន​នៅ​ឆ្នាំ​២០០៦មក មូលនិធិ​គ្លីនតុនបាន​ផ្តល់ជំនួយ​ដែល​មាន​តម្លៃ​ប្រមាណ​៥​សែន​ដុល្លារ​ជារៀងរាល់​ឆ្នាំ ហើយ​ជំនួយ​នេះ​នឹង​បន្ត​រហូត​ដល់​ឆ្នាំ​២០១៥។

បើតាម​ការ​អះអាង​របស់​លោក​មាន ជីវុន ជំនួយ​របស់​មូលនិធី​គ្លីនតុន​​​ត្រូវបាន​ប្រើប្រាស់​នៅ​ក្នុង​ស្រុក​មួយ​ចំនួន​នៅ​ក្នុង​ខេត្ត​ព្រៃវែង និង​ខេត្ត​សៀមរាប។ ជំនួយ​របស់​មូលនិធិ​គ្លីនតុន​ត្រូវបាន​ផ្តល់​អោយ​កម្ពុជា​តាម​រយៈ​៤​មធ្យោបាយ​រួមមាន ជំនួយ​បច្ចេកទេស ថវិកា​សម្រាប់​ប្រតិបត្តិការ សម្ភារៈ និង​ការ​ជួសជុល​បន្ទប់ពិសោធន៍។

កម្ពុជា​ត្រូវបាន​ទទួលស្គាល់​ដោយ​អង្គការ​សហប្រជាជាតិ​ថា ជា​ប្រទេសឈាន​មុខ​ក្នុង​ការ​ប្រយុទ្ធ​នឹង​ជំងឺអេដស៏​ ហើយ​បាន​ទទួលរង្វាន់​ពី​អង្គការ​ពិភពលោ​កនេះ​ទៀត​ផង​កាល​ពី​ឆ្នាំ​២០១០។ កម្ពុជា​ត្រូវការ​ថវិកា​ប្រមាណ​៥០​លាន​ដុល្លារ​ជារៀងរាល់​ឆ្នាំ​ដើម្បី​ធ្វើកិច្ចការងារ​ប្រឆាំង​នឹងការ​ឆ្លងរាលដាល​ជំងឺ​អេដស៏​នេះ។ ក្នុង​ចំណោម​ពលរដ្ឋ​ជាង​៦ម៉ឺននាក់​ដែល​ផ្ទុក​មេរោគអេដស៏ ជាង​៥ម៉ឺន​នាក់​បាន​ទទួល​ថ្នាំ​ពន្យា​​ជីវិត។

សូម​រម្លឹកថា បើ​ទោះជា​កម្ពុជា​បាន​ក្លាយជា​កូនសិស្ស​ល្អ​នៅ​ក្នុង​ការងារ​ប្រយុទ្ធ​នឹង​ជំងឺ​នេះ​ក៏​ដោយ ប៉ុន្តែ​កម្ពុជា​ក៏​កំពុង​បារម្ភ​ចំពោះ​រលកថ្មី​នៃ​ការ​ផ្ទុះ​មេរោគ​អេដស៏​ដែល​អាច​កើតចេញ​ពី​មនុស្ស​៣​ក្រុម។ ពួកគេ​ទាំងនោះ​រួមមាន ក្រុម​មនុស្ស​ស្រឡាញ់​ភេទដូចគ្នា ក្រុម​ស្រ្តី​ធ្វើការ​កន្លែងកំសាន្ត និង​ក្រុម​អ្នកប្រើប្រាស់គ្រឿងញៀន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI