កម្ពុជា

ទឹក​ជំនន់​ឆ្នាំ​នេះ​សម្លាប់​មនុស្ស​យ៉ាង​ហោច​៣៩​នាក់​ និង​​បំផ្លាញ​ទ្រព្យ​សម្បត្តិ​ជា​ច្រើន​

ទិដ្ឋភាពទឹកជំនន់នៅភូមិដើមស្លែង សង្កាត់ច្បារអំពៅ២ ខណ្ឌមានជ័យ
ទិដ្ឋភាពទឹកជំនន់នៅភូមិដើមស្លែង សង្កាត់ច្បារអំពៅ២ ខណ្ឌមានជ័យ RFI/Siv Channa

ដូច​ជារាល់ឆ្នាំ​ដែរ​ ទឹកជំនន់​តែងតែ​វាយប្រហារ​បណ្ដា​ខេត្ដ ក្រុង មួយចំនួន ក្នុងប្រទេស​កម្ពុជា​នៅក្នុង​រដូវរ​ស្សា ជាពិសេស​ក្នុងកំឡុងពេល​បុណ្យ​ភ្ជុំបិណ្ឌ។ តួយ៉ាង​នៅក្នុង​ឆ្នាំនេះ ​ទឹកជំនន់​បាន​ឆក់យក​ជីវិត​មនុស្ស​ជាច្រើន បំផ្លិចបំផ្លាញ​ទ្រព្យសម្បត្តិ​ប្រជាពលរដ្ឋ និង​បង្អាក់ដំណើរ​ដល់​សាលារៀន មន្ទីរពេទ្យ មណ្ឌល​សុខភាព និង​វត្ត​អារាម​ជាដើម។

ផ្សាយពាណិជ្ជកម្ម

យ៉ាងហោច​មនុស្ស ៣៩ នាក់ នៅក្នុង​ខេត្ត​ចំនួន៩ បាន​ស្លាប់​ដោយសារ​គ្រោះទឹកជំនន់ ​ក្នុង​ឆ្នាំ ២០១៣ នេះ។ លោក កែវ វី នាយខុទ្ទកាល័យ​នៃ​គណៈកម្មាធិការ​ជាតិ​គ្រប់គ្រង​គ្រោះ​មហន្តរាយ​ ​បាន​ប្រាប់​វិទ្យុ​បារាំង​អន្តរជាតិ​អោយដឹងថា ​ក្នុងចំណោម​អ្នកស្លាប់​ទាំងអស់ មាន​១៨នាក់​​នៅក្នុង​ខេត្តកំពង់ចាម, ៥នាក់​នៅក្នុង​ខេត្តព្រៃវែង ៤នាក់​នៅ​ក្រចេះ ៤នាក់​នៅ​រតនៈគិរី ៣នាក់​នៅ​ខេត្តកណ្តាល ២នាក់​នៅ​ឧ​ត្ត​រ​មានជ័យ ម្នាក់​នៅ​ស្ទឹងត្រែង ម្នាក់​នៅ​ព្រះវិហារ និង ម្នាក់ទៀត​ នៅ​បន្ទាយមានជ័យ។

ក្រៅពី​ការសម្លាប់​ជីវិត​មនុស្ស គ្រោះទឹកជំនន់​នេះ ក៏បាន​ធ្វើអោយប៉ះពាល់​ផ្ទះសម្បែង ចំនួន ៨ម៉ឺន១ពាន់៣៥៧ខ្នង គ្រួសារ​ចំនួន ៩.៥០៩ ត្រូវបាន​ជម្លៀស សាលារៀន​ចំនួន ៥៤០ ត្រូវបាន​បិទ មន្ទីរពេទ្យ​និង​មណ្ឌល​សុខភាព ចំនួន ១១ ផ្អាក​ដំណើរការ និង​ផ្ទៃ​ដីស្រែ​ចំនួន ៧៥.០០០ ហិកតា ត្រូវបាន​ជន់​លិច។ នេះ​បើ​យោងតាម​សេចក្តីប្រកាស​ព័ត៌មាន​របស់​អង្គការ គណៈកម្មាធិការ​សហប្រតិបត្តិ​ការ​ដើម្បី​កម្ពុជា ហៅ​កាត់​ថា CCC នៅ​ថ្ងៃទី២ ខែតុលា​ម្សិលមិញ។

បើតាម​របាយការណ៍រ​បស់​គណៈ​កម្មាធិការ​ជាតិ​គ្រប់គ្រង​គ្រោះមហន្តរាយ វត្ត​អារាម​ប្រមាណ ២៤៥កន្លែង កំពុង​រង​ការលិចលង់។ ការលិចលង់​ដែល​កំពុងផ្ដល់​លក្ខណៈ​លំបាក​ដល់​ដល់​ព្រះសង្ឃ និង​ពុទ្ធបរិស័ទ​ក្នុងការ​ប្រារព្ធ​ពិធីបុណ្យ​ភ្ជុំបិណ្ឌ​ ឆ្នាំ២០១៣ នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI