រុស្ស៊ី-អាមេរិក

មហា​អយ្យកា​រុស្ស៊ី បើក​ប្រតិបត្តិការ​ផ្ទៀងផ្ទាត់ សកម្មភាព​នៃ​មូលនិធិ​អាមេរិកាំង

ភោជនីយដ្ឋាន​​​ម៉ាក់ដូណាល់ នៅក្រុងមូស្គូ ត្រូវ​អជ្ញាធរ​រុស្ស៊ី​បិទ​ទ្វារ
ភោជនីយដ្ឋាន​​​ម៉ាក់ដូណាល់ នៅក្រុងមូស្គូ ត្រូវ​អជ្ញាធរ​រុស្ស៊ី​បិទ​ទ្វារ

មូលនិធិ​អាមេរិកាំង​ដែល​ដំណើរការ​នៅ​រុស្ស៊ី ក្រោម​ឈ្មោះ​ថា Ronald McDonald ត្រូវ​អាជ្ញាធរ​រុស្ស៊ី​សង្ស័យ​ថា គៃ​បន្លំ​លុយ​ដែល​ទុក​សម្រាប់​ឧបត្ថម្ភ​ដល់​សេចក្តី​ត្រូវការ​របស់ កុមារ។ ប៉ុន្តែ អគ្គនាយិកា​មូលនិធិ បាន​ថ្លែង​កាល​ពី​ល្ងាច​ថ្ងៃ​អង្គារ ទៅ​ពួក​អ្នក​កាសែត ដោយ​បាន​ច្រាន​ចោល រាល់​តែ​ការ​ចោទ​ប្រកាន់​ទាំង​អស់។

ផ្សាយពាណិជ្ជកម្ម

កាល​ពី​ថ្ងៃ​៧តុលា រដ្ឋអាជ្ញា​ក្រុងម៉ូស្គូ បាន​ទាមទារ​ពី​យើង ឲ្យ​បង្ហាញ​ក្រដាស​ស្នាម ដែល​បញ្ជាក់​ពី លក្ខន្តិកៈ​មូលនិធី” គ្រឹះស្ថាន Ronald McDonald “ និង​ពី សកម្មភាព​ហិរញ្ញវត្ថុ របស់​អង្គការ​នេះ សម្រាប់​ឆ្នាំ​២០១៣-២០១៤ “។ សេចក្តី​នេះ​ថ្លែង​ទៅ AFP ដោយ​លោក​ស្រី ស្វេតឡាណា ប៉ូលែកូវ៉ា នាយិកា​នៃ​គ្រឹះស្ថាន​ដែល​បាន​បើក​ទ្វារ​ខ្លួន ដំណើរការ​នៅ​រុស្ស៊ី កាល​ពី​ឆ្នាំ​១៩៩៥។ មូលនិធិ Ronald McDonald ដែល​ទទួល​ហិរញ្ញប្បទាន ពី បណ្តាញ​ភោជនីយដ្ឋាន​ពិភពលោក ខាង​ផលិត​អាហារ​លឿន​រហ័ស ហៅថា McDonald’s តែង​ជាប់ដៃ​រវល់​នឹង អំពើ​ផ្តល់​កុសល ដែល​ជា​ញឹកញយ គឺ​ជួយ​ដល់​កុមារ។

 
តាម​ប្រព័ន្ធ​ផ្សព្វផ្សាយ​​រុស្ស៊ី ការ​ធ្វើ​អធិការកិច្ច​ផ្ទៀងផ្ទាត់​ដោយ​មហាអយ្យការ​នោះ គឺ​ប្រព្រឹត្ត​ទៅ ស្រប​នឹង​សំណូមពរ តំណាងរាស្ត្រ​ម្នាក់​ ខាង​បក្ស ”ប្រទេស​រុស្ស៊ី​យុត្តិធម៏” ដែល​មាន ៥៦ អាសនៈ លើ​អាសនៈ​សរុប​ចំនួន​៤៥០ នៃ​សភា​ឌូម៉ា គឺ លោក អង់ដ្រេ គ្រូតូវ ដែល​សង្ស័យ​ថា មូលនិធិ​អាមេរិកាំង​នេះ ចេះ​តែ​គៃ​បន្លំ​ធនធាន​ដែល​ទទួល​បាន។

ក្នុង​សម្ភាសន៍​ទៅ​វិទ្យុ​រុស្ស៊ី Echo de Moscou លោក​តំណាង​រាស្ត្រ ពន្យល់​បំភ្លឺ​ថា ធនធាន​ដែល​ប្រមូល​បាន​នោះ​ មិន​ស្ទើរ​ទេ​ក្នុង​១ឆ្នាំៗ ម្តុំ​៣លាន​ដុល្លារ ដូច្នេះ​ក្នុង​១៥ឆ្នាំ​ចុងក្រោយ គឺ​ឡើង​ដល់ ទំហំ​ពី​២០​ទៅ​៣០លាន​ដុល្លារ។ រីឯ​ការ​ចំណាយ ដែល​យើង​ចេះ​ស្រង់​បាន​ពី​គេហទំព័រ​មូលនិធិគឺ​វា​មិន​ស៊ី​គ្នា​ នឹង​ខ្ទង់​ចំណាយ​ដែល​មាន​ជាក់​ស្តែង។

លោក​ស្រី​អគ្គនាយិកា​មូលនិធិ​បាន​លំអិត​ថា “រាល់​ក្រដាស​ស្នាម​ដែល​ត្រូវការ​ជា​ចាំ​បាច់”  ខាង​លោកស្រី​បាន​ប្រគល់​ទៅ​មហាអយ្យកា​រុស្ស៊ី​ទៅ​ហើយ   រួច​គាត់​សូម​ប្រកាស​ច្រានចោល រាល់តែ​ការ​ចោទ​ប្រកាន់ ដែល”គ្មាន​អ្វី​ជា​សំអាង” ឡើយ។ តាម​ប្រសាសន៍​លោកស្រី មូលនិធិ Ronald McDonald ក្នុង​ការងារ​ខ្លួន​នៅ​រុស្ស៊ី​អស់​ជិត​២០​ឆ្នាំ​កន្លង​ទៅ បាន​ជួយ​ដល់​កុមារ​រុស្ស៊ី​ រាប់ពាន់​នាក់​ និង​គ្រួសារ​គេ ដែល​ស្ថិត​ក្នុង​ស្ថានភាព​លំបាក។

ជា​ការ​កត់​សម្គាល់ ក្នុង​ផ្ទៃ​នៃ​ទណ្ឌកម្ម​ពី​ខាង​អាមេរិក​និង​បស្ចិម​លោក​ ទល់​នឹង​រុស្ស៊ី ដោយ​មក​ពី​ស្ថានការណ៍​នៅ​អ៊ុយក្រែន អស់​ប៉ុន្មាន​សប្តាហ៍​ជាប់​មក​ហើយ អាជ្ញាធរ​រុស្ស៊ី វាត​ប្រតិបត្តិការ​ ឆែកឆេរ​ផ្ទៀងផ្ទាត់​មើល សកម្មភាព​ភោជនីយដ្ឋាន McDonald’s ក្នុង​ប្រទេស រុស្ស៊ី។ ពី​ក្នុង​ចំណោម​ភោជនីយដ្ឋាន​នេះ ចំនួន ៤៣៥ កន្លែង​នៅ​រុស្ស៊ី ប្រមាណ​១០០ ត្រូវ​បាន​ប្រកាស ឲ្យ​បិទ​ទ្វារ​មួយរយៈ​ពេល​សិន ក្រោម​លេស​ថា ការងារ​វា​មិន​ឆ្លើយ​ស្រប នឹង​បទដ្ឋាន​អនាម័យ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI