អង្គការអូតង់-រុស្ស៊ី

អង្គការ​អូតង់​បារម្ភ​ពី​វត្តមាន​កងទ័ព​រុស្ស៊ី​នៅ​​​ភាគ​​ខាងកើត​​អ៊ុយក្រែន​

ជនប្រដាប់​អាវុធ​ដែល​គេគិត​ថា ជា​សកម្មជនរុស្ស៊ី នៅ​គ្រីមេ ថ្ងៃ​២៣មីនា។
ជនប្រដាប់​អាវុធ​ដែល​គេគិត​ថា ជា​សកម្មជនរុស្ស៊ី នៅ​គ្រីមេ ថ្ងៃ​២៣មីនា។ REUTERS/Shamil Zhumatov

នៅថ្ងៃ​អាទិត្យ​នេះ លោក​ ហ្វីលីព ប្រ៊ីតឡវ Philip Breedlove ជា​មេបញ្ជាការ​កងកម្លាំង​អង្គការ​អូតង់​នៅ​អឺរ៉ុប ​បាន​សំដែង​ការ​ព្រួយបារម្ភ​​ ​ចំពោះ​វត្តមាន​កងទ័ព​រុស្ស៊ី​សន្ធឹកសន្ធាប់​នៅ​​​ព្រំដែន​ភាគ​ខាងកើត​អ៊ុយក្រែន ដែលអាច​នឹងគំរាម​កំហែង​តំបន់​ត្រង់ស្ន៊ីសទ្រី Transnistrie ជាតំបន់​ផ្តាច់ទឹកដី​​ ​ពី​ប្រទេស​ម៉ុលដាវី នៅក្បែរនោះ។

ផ្សាយពាណិជ្ជកម្ម

នៅថ្ងៃ​អាទិត្យ​នេះ លោក​ ហ្វីលីព ប្រ៊ីតឡវ Philip Breedlove ជា​មេបញ្ជាការ​ទ័ពអង្គការ​អូតង់​នៅ​អឺរ៉ុប បាន​សំដែង​ការ​​ព្រួយបារម្ភចំពោះវត្តមាន​កងកម្លាំង​រុស្ស៊ី​នៅ​ព្រំដែន​ភាគខាងកើត​​អ៊ុយក្រែន។ អង្គការ​អូតង់​យល់ថា ទង្វើ​នេះ​​អាច​គំរាម​កំហែង​​​​តំបន់​ត្រង់ស្ន៊ីសទ្រី Transnistrie ជាតំបន់​ផ្តាច់ទឹកដី​​ពី​ប្រទេស​ម៉ុលដាវី ដែល​​ស្ថិត​នៅ​ក្បែរ​ព្រំដែន​​​​អ៊ុយក្រែន​នោះ។ មេបញ្ជាការ​អង្គការ​អូតង់​Philip Breedlove​ សង្ស័យ​ថា​រុស្ស៊ី​អាច​ប្រើ​​មធ្យោបាយ​​ដូច​នៅ​គ្រីមេ ដើម្បី​ធ្វើការ​​​លុកលុយ​​​​​​​តំបន់​​ចន្លោះ​ព្រំដែន​​រវាង​អ៊ុយក្រែន និង​ម៉ុលដាវី​នោះ បាន​រហ័ស​បំផុត។ ជាង១០ថ្ងៃ​មកនេះ កងកាំភ្លើង​ធំ​រុស្ស៊ី​បាន​ធ្វើ​​ការ​ហ្វឹកហាត់​​ដោយមាន​ទាហាន​ទាហាន​ចូលរួម​៨ពាន់៥រយនាក់។

ដោយឡែក​ ក្រុងម៉ូស្គូ​បាន​បដិសេធ​​ថា ​​រុស្ស៊ី​មិនបាន​ប្រមូល​ផ្តុំទ័ព​នៅ​ព្រំដែន​អ៊ុយក្រែន​នោះទេ។ ក្រសួងការពារ​ជាតិ​​រុស្ស៊ី​បាន​អះអាង​ថា ​​រុស្ស៊ី​អនុលោម​ស្រប​តាម​កិច្ចព្រមព្រៀង​អន្តរជាតិ​នានា​ ដែល​តំរូវ​​អោយ​ដាក់កម្រិត​កំណត់​​ចំនួន​កងទ័ព ​នៅ​តាម​តំបន់​​ព្រំដែន​​ជាប់​ជាមួយ​​អ៊ុយក្រែន។ ក្រសួងការពារ​ជាតិ​រុស្ស៊ីបន្ថែម​​ថា ​​មួយខែមក​​នេះ ​ក្រុម​សង្កេតការណ៍​​អន្តរជាតិ​ចំនួន​៨ បាន​​ចុះទៅ​រុស្ស៊ី​ ពិនិត្យ​​ទីកន្លែង​​​តាម​ព្រំដែន​ទាំងនេះ ហើយ​បាន​សន្និដ្ឋាន​ថា​ គ្មាន​ការគំរាម​កំហែង​អ្វី​នោះទេ។

គួររំលឹក​ថា ​តំបន់​ Transnistrie ​បាន​​ផ្តាច់ទឹកដី​​ ​និង​បាន​ទទួល​ឯករាជ្យ​ចេញ​ពី​ប្រទេស​ម៉ុលដាវី កាលពីឆ្នាំ​១៩៩០។ តំបន់​នេះ​ចង់ភ្ជាប់​ខ្លួន​ចូល​ក្នុង​សហព័ន្ធ​រុស្ស៊ី។ កាលពី​ថ្ងៃ​អង្គារ​សប្តាហ៍​មុន ​លោក​មីខាអែល បួរឡា ជា​ប្រធាន​សភា​តំបន់​​ Transnistrie បាន​សុំ អោយ​​សភា​​ជាន់ខ្ពស់​​​​រុស្ស៊ី​​​ ​រៀបចំ​បែបបទ​​ ដើម្បី​ភ្ជាប់​តំបន់​ Transnistrie ចូលក្នុងទឹកដី​​រុស្ស៊ី។ ប្រធាន​សភា​ ​​តំបន់​​ Transnistrie រំលឹក​រុស្ស៊ី​ពីលទ្ធផល​នៃ​​ការ​បោះឆ្នោត​ប្រជាមតិ​កាលពី​ឆ្នាំ​២០០៦ នៅ​តំបន់នេះ​​ ជាលទ្ធផល​បង្ហាញ​ថា ប្រជាជន​៩៧ភាគរយ នៅ​​Transnistrie ចង់ភ្ជាប់​តំបន់​​ចូលក្នុង​ទឹកដី​រុស្ស៊ី។ គួររំលឹក​ដែរ​ថា ​កាលណោះ​​ សហភាព​អឺរ៉ុប​មិន​បាន​ទទួល​ស្គាល់​​ការធ្វើ​ប្រជាមតិ​នៅ​ Transnistrie​ទេ៕ ​

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI