ទស្សនៈព្រឹត្តិការណ៍ខ្មែរ

មរតក​នយោបាយ​ផ្សះ​ផ្សារ​ជាតិ​នៃ​អង្គ​សម្តេច​ឳ​នៅ​ឆ្ងាយ​ពី​កូន​ចៅ?

សំឡេង ០៥:១២
សម្តេច​ឳ ​នរោត្តម ​សីហនុ ​អតីត​ព្រះមហាវីរក្សត្រ​ របស់​កម្ពុជា​។
សម្តេច​ឳ ​នរោត្តម ​សីហនុ ​អតីត​ព្រះមហាវីរក្សត្រ​ របស់​កម្ពុជា​។

នយោបាយ​ផ្សះ​ផ្សារ​ជាតិ ត្រូវ​បាន​គេ​ចាត់​ទុក​ជា​មរតក​ដ៏​មាន​តម្លៃ​មួយ​ក្នុង​ចំណោម​មរតកជា​ច្រើន​ទៀត​ដែល​ព្រះ​អង្គ​បាន​បន្សល់​ទុក​សម្រាប់​កូន​ចៅ​ជំនាន់​ក្រោយ​។ក៏ប៉ុន្តែ កូន​ចៅ​របស់​ព្រះ​អង្គ​ជា​ពិសេស​អ្នក​នយោបាយ​ដែល​សុទ្ធ​តែ​បាន​អះ​អាង​ថា ដង្ហែ​តាម​ព្រះ​រាជ​តម្រិះ​របស់​ព្រះ​អង្គ​នោះ​មិន​ទាន់​បាន​ធ្វើ​មរតក​ដ៏​មាន​តម្លៃ​នេះ​ក្លាយ​ជា​ការ​ពិត​នៅ​ឡើយ​ទេ។ បច្ចុប្បន្ន បើទោះ​បី​ជា​គណ​បក្ស​ជាប់​ឆ្នោត​ទាំង​ពីរ​បាន​ស្រុះ​ស្រួល​គ្នា​ក៏​ដោយ ក៏​នយោបាយ​ផ្សះ​ផ្សារ​ជាតិ​ហាក់​នៅ​ឆ្ងាយ​ពី​ការ​ពិត​នៅ​ឡើយ។ ដូច្នេះ ខួប​នៃ​ការ​សោយ​ទិវង្គត​របស់​សម្តេចឪ​គួរតែ​ជា​ឱកាស​ដែល​អ្នក​នយោបាយ​គិត​គូរ​ឡើង​វិញ​អំពី​បញ្ហា​នេះ។

ផ្សាយពាណិជ្ជកម្ម

នយោបាយ​ផ្សះផ្សា​បង្រួប​បង្រួម​ជាតិ គឺជា​មរតក​ដែល​គេ​បាន​លើក​យកមក​និយាយ​ញឹក​ញាប់​ជាង​គេ ចាប់​តាំង​ពី​ការ​សោយ​ទិវង្គត​របស់​សម្តេច​ព្រះ​នរោត្តម សីហនុ​កាល​ពី​ថ្ងៃ​ទី​១៥​តុលា​មក។ អ្វី​ដែល​ពល​រដ្ឋ​ខ្មែរ​នៅ​ចង​ចាំ​មិន​អាច​បំភ្លេច​បាន​នោះ គឺ​សមិទ្ធផល​ទាំង​ឡាយ​ដែល​ប្រទេស​កម្ពុជា​សម្រេច​បាន​កាល​ពី​ក្នុង​សម័យ​សង្គម​រាស្ត្រ​និយម។ មិន​ត្រឹម​តែ​សមិទ្ធ​ផល​ប៉ុណ្ណោះ​ទេ ប៉ុន្តែ ព្រះ​រាជ​ការ​វិការ​ទន់​ភ្លន់ និង​ស្និទ្ធ​ស្នាល​ជា​មួយ​ប្រជា​រាស្ត្រ​គឺ​ជា​បរតក​ដ៏​មាន​តម្លៃ​មួយ​ទៀត​ដែល​អ្នក​នយោបាយ​ជំនាន់​ក្រោយ​គួរ​រៀន​សូត្រ​ពី​ព្រះ​អង្គ​។

 
ម្យ៉ាង​ទៀត ព្រះ​មហា​វីរ​ក្សត្រ​ក៏​បាន​បំពេញ​ព្រះ​រាជ​តួនាទី​ដ៏​សំខាន់​ក្នុង​ការ​ផ្សះ​ផ្សារ​អ្នក​នយោបាយ​នៅ​ក្នុង​កាលៈទេសៈ​ដ៏​តាន​តឹង​ជា​ច្រើន​រាប់​ចាប់​តាំង​ពី​កិច្ច​ព្រម​ព្រៀង​សន្តិ​ភាព​ក្រុង​ប៉ារីស រហូត​ដល់​ការ​ដោះ​ស្រាយ​វិបត្តិ​នយោបាយ​ក្រោយ​ការ​បោះ​ឆ្នោត​ជា​បន្ត​បន្ទាប់​ចាប់​តាំង​ពី​ឆ្នាំ ១៩៩៣ មក។ មុន​ការ​សោយ​ទិវង្គត់ សម្តេច​ឳ សម្តេច​តា របស់​ប្រជា​រាស្ត្រ​ខ្មែរ ក៏​បាន​ផ្តែ​ផ្តាំ​ឲ្យ​ខ្មែរ​ចេះ​សាមគ្គី​គ្នា និង​រួប​រួម​គ្នា​ដើម្បី​លើក​ស្ទួយ​កិត្យា​នុភាព​របស់​ប្រទេស​នៅ​លើ​ឆាក​អន្តរ​ជាតិ​ផង​ដែរ​។

មរតក​ទាំង​អស់​នេះ​ហើយ​ដែល​បាន​ធ្វើ​ឲ្យ អ្នក​នយោបាយ សង្គម​ស៊ីវិល ឬ​មហាជន​ខ្មែរ​ទូទៅ តែង​និយាយ​គ្រប់​មាត់​ថា សកម្មភាព និង​ព្រះ​រាជ​បណ្តាំ​របស់​ព្រះ​បរម​រត​កោដ្ឋ​ស្តី​ពី​គោល​នយោបាយ​ផ្សះ​ផ្សា​បង្រួប​បង្រួម​ជាតិ ពិត​ជា​មាន​តម្លៃ​ខ្លាំង​ណាស់​សម្រាប់​ប្រទេស​កម្ពុជា ជា​ពិសេស​ក្នុង​ស្ថាន​ភាព ដែល​ប្រទេស​ជាតិ​កំពុង​ជួប​វិបត្តិ​នយោបាយ និង​ការ​បែក​បាក់​ជាតិ​យ៉ាង​ធ្ងន់​ធ្ងរ​ដូច​ជា​បច្ចុប្បន្ន ។

ប៉ុន្តែ មរតក​ដែល​បន្សល់​ទុក​ដោយ​អង្គ​សម្តេច​ឳ​មិន​អាច​ក្លាយ​ជា​ការ​ពិត​ជាក់​ស្តែង បាន​ទេ​ប្រសិន​បើ​គេ​គ្រាន់​តែ​និយាយ​ចេញពី​បបូរ​មាត់ តែ​ខ្វះ​សុឆន្ទៈ​ពិត​ប្រាកដ​ក្នុង​ការ​យក​គំរូ​តាម​ព្រះអង្គ​នោះ។ មាន​កត្តាចាំបាច់​មួយចំនួន​ដែល​អាចធ្វើ​ឲ្យ​ការ​ផ្សះ​ផ្សារ​ជាតិ​សម្រេច​គោល​ដៅ​បាន​។ ទី១៖ ត្រូវ​មាន​ឆន្ទៈ​ពិតប្រាកដ​ចង់​ឲ្យ​ប្រទេសជាតិ​និង​ប្រជា​ពល​រដ្ឋ​ខ្មែរ​ស្គាល់​ភាព​សុខ​ដុម​រមនា​និង​ការ​អភិវឌ្ឍន៍​ប្រកប​ដោយ​និរន្តរភាព។

ទី២៖ ត្រូវ​បំបាត់​ចោល​វប្បធម៌​មិន​ទុក​ចិត្ត​គ្នា​និង​ជំនួស​វិញ​ដោយ​វប្បធម៌​ស្មោះ​ត្រង់​និង​គោរព​គ្នា​ទៅ​វិញ​ទៅ​មក។ និង​ទី៣៖ ត្រូវ​ផ្តល់​តម្លៃ និង​ការគោរព​ដ៏​ពិត​ប្រាកដ​មួយ​ចំពោះ​មរតក​នយោបាយ​របស់​ព្រះ​មហាវីរ​ក្សត្រ​។

ប៉ុន្តែ​ប្រសិ​​ន​​បើ​​គេ​​ក្រឡេក​​ទៅ​​មើល​​ជម្លោះ​​នយោបាយ​​បច្ចុប្បន្ន​ គេ​​អាច​​មើល​​ឃើញ​​ថា ​លក្ខ​ខណ្ឌ​​ចាំ​បាច់​​ដើម្បី​​សម្រេច​​គោល​​នយោ​បាយ​​ផ្សះ​​ផ្សារ​​ជាតិ​​នៅ​​មិន​ត្រូវ​​ទាន់​​បំពេញ​​បាន​​នៅ​​ឡើយ​​ទេ​។ ភាគី​​ទាំង​​ពីរ​​គឺ​​បក្ស​​ប្រឆាំង​​និង​​បក្ស​​កាន់​​អំ​ណាច​​នៅ​​តែ​​សម្លឹង​​មើល​​មុខ​​គ្នា​ ​ក្នុង​​ក្រសែ​​ភ្នែក​​ប្រកប​​ដោយ​​ល្បិច​​កល​​នៅ​​ឡើយ​ ហើយ​​តែង​​ស្តី​​បន្ទោស​​គ្នា​​ទៅ​​វិញ​​ទៅ​​មក​។ ម្យ៉ាង​​ទៀត​ ការ​​ពោល​​ពាក្យ​​ថា​​ចង់​​ផ្សះ​​ផ្សារ​​បង្រួប​​បង្រួម​​ជាតិ​ ជួន​​កាល​​វា​​គ្រាន់​​តែ​​ជា​​ការ​​សម្តែង​​ប៉ុណ្ណោះ ​ប៉ុន្តែ ​វា​​មិន​​បាន​​ផុស​​ចេញ​​ពី​​ទឹក​​ចិត្ត​​ឡើយ​​។

យ៉ាង​​ណា​​ក៏​​ដោយ ​ខួប​​នៃ​​ការ​​យាង​​ចូល​​ទី​វង្គត​​របស់​​សម្តេច​​ឳ ជា​​កាលៈ​ទេសៈ​​ដ៏​អំ​ណោយ​ផល​​ម្តង​ទៀត​​សម្រាប់​​អ្នក​នយោបាយ​​ក្នុង​ការ​​ធ្វើ​​ឲ្យ​​សម្រេច​​នយោបាយ​​ផ្សះ​ផ្សារ​​ជាតិ​ នេះ​​ប្រសិន​បើ​​ពួក​គេ​​ពិត​ជា​​ចង់​បង្ហាញ​​ពី​​ការ​គោរ​ព​ព្រះ​​វិ​ញ្ញាណក្ខន្ធ​​របស់​​ព្រះ​អង្គ ​ក៏​ដូ​​​ច​ជា​​ដើម្បី​​ស្វែង​រក​​ភាព​សុខ​សាន្ត​​ក្នុង​​ឆាក​នយោបាយ​​ប្រទេស​​កម្ពុជា​​មែន​​នោះ​។ កាលៈ​ទេសៈ​​នេះ​​ក៏​​ជា​​ឱកាស​ល្អ​​មួយ​​ដែរ​​សម្រាប់​​អ្នក​នយោបាយ​​ក្នុង​ការ​​បំភ្លេច​ចោល​នូវ​រឿង​អាក្រក់​ៗ​ជា
​មួយ​គ្នា​​កាល​ពី ​ពេល​​កន្លង​​ទៅ​ដោយ​​ចាប់​ផ្តើម​​បន្ទន់​ឥរិយាបថ​​ដាក់​គ្នា​​ឡើង​វិញ​។​

ពិត​​ហើយ​​ថា នយោបាយ​​ផ្សះ​ផ្សារ​​ជាតិ​​មិន​មែន​ជា​​ឧបសគ្គ​​ក្នុង​ការ​​អនុវត្ត ​ប្រជា​ធិប​តេយ្យ​​សេរី​​ពហុ​បក្ស​​នៅ​​កម្ពុជា​​នោះទេ ​ពោលគឺ​​​មិន​មែន​​មាន​ន័យ​ថា ប្រសិន​បើ​​គណបក្ស​ប្រឆាំង ​និង​បក្ស​​កាន់​អំណាច​​ស្រុះ​ស្រួល​​គ្នា ប្រ​ជា​ធិប​តេយ្យ​​នឹង​មិន​​ដើរ​​ទៅ​មុខ​​នោះ​ឡើយ​។ របប​​នយោបាយ​​សេរី​​ពហុបក្ស​​នៅ​តែ​មាន​​ដដែល ​គ្រាន់តែ​​ថា ​ការ​ប្រឆាំង​​គ្នា​​គួរ​​ស្ថិត​ក្នុង​​ក្រប​ខ័ណ្ឌ​​ច្បាប់​ និង​​ការ​គោរព​​គ្នា​​ទៅ​វិញ​ទៅ​មក​​ឲ្យ​​បាន​​ច្រើន​​ដើម្បី​​ចៀស​វាង​​ជម្លោះ​​និង​ ការ​បែក​បាក់​​ធ្ងន់​ធ្ងរ​។

ដូច្នេះ ​វា​គួរ​តែ​​ដល់​ពេ​ល​​ហើយ​​ដែល​​អ្នក​នយោបាយ​​បង្ហាញ​​ស្នា​ដៃ​​អំពី​​ការ​ផ្សះ​ផ្សារ​​បង្រួប​បង្រួម​​ជាតិ​​ប្រសិន​បើ​​ពួក​គេ​​ពិត​ជា​​ចង់​​ធ្វើ​​នយោបាយ​​ដើម្បី​​បម្រើ​​ប្រយោជន៍​​ជាតិ ​និង​​ប្រជាជ​ន​ក៏​ដូច​ជា​​ចង់​​បន្សល់​ទុក​​កេរ​​មរតក​ដ៏​​ល្អ​​សម្រាប់​​មនុស្ស​​ជំនាន់​​ក្រោយ​​ដែល​​មិន​ចេះ​​សាប​សូន្យ​៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI