កម្ពុជា

មនុស្ស​៤នាក់​ត្រូវ​បាន​ចាប់​បញ្ជូន​ទៅ​តុលាការ ក្រោយ​ការបង្ក្រាប នៅ​ខេត្ត​ក្រចេះ

©ADHOC

សមត្ថកិច្ច​បាន​ចាប់​ខ្លួន​បុរស​៤​នាក់​ដែល​ត្រូវ​បាន​គេចាត់​ទុក​ថា ជា​ក្រុម​មេខ្លោង ធ្វើ​សកម្មភាព​ប្រឆាំង​រដ្ឋធម្មនុញ្ញ ដោយ​មាន​ចេតនា​បង្កើត​តំបន់​អបគមន៍។ តំបន់​រង​ការបង្រ្កាប កំពុង​ស្ថិតនៅ​ក្រោម​ការការពារ​យ៉ាង​តឹងរ៉ឹង​ពី​កំលាំង​រដ្ឋាភិបាល។ ស្ថានទូត​អាមេរិក​អំពាវនាវ​អោយ​រដ្ឋាភិបាល​ស៊ើបអង្កេត​ស្វែង​រក​ចាប់​ខ្លួន​អ្នកទទួល​ខុសត្រូវ​លើ​ការ​ស្លាប់​របស់​កុមារី​ហេង ចាន់ថា។

ផ្សាយពាណិជ្ជកម្ម

 

សមត្ថកិច្ច​កំពុង​កសាង​សំណុំរឿង​ដើម្បី​បញ្ជូន​បុរស​៤​នាក់​ទៅ​តុលាការ​ខេត្ត​ក្រចេះ បុរស​៤​នាក់​ដែល​សមត្ថកិច្ច​ចាប់​បាន កាល​ពី​ថ្ងៃ​ពុធ​ម្សិលមិញ​ក្នុង​ព្រឹត្តិការណ៍​បង្ក្រាប​ការចាប់​យក​ដី​ខុសច្បាប់ នៅក្នុង​ឃុំ កំពង់ដំរី​ ខេត្ត​ក្រចេះ។

អ្នកនាំពាក្យ​ក្រសួង​មហាផ្ទៃ​លោក​ឧត្តមសេនីយ៍ឯក ខៀវ សុភ័គ​បាន​ថ្លែង​ប្រាប់​វិទ្យុ​បារាំង​អន្តរជាតិ​នៅ​រសៀល​ថ្ងៃ​នេះ​ថា បុរស​ទាំង​៤​នោះ​រួមមាន ២នាក់​គឺ​ជា​អ្នកកាន់កាប់​បារ៉ាស់​មិន​អោយ​អាជ្ញាធរ​ចូល​ក្នុង​តំបន់​ពួកគេ ម្នាក់​ប្រើប្រាស់​អាវុធ​កែច្នៃ និង​ម្នាក់​ទៀត​ជា​សកម្មជន។ មន្ត្រី​ជាន់ខ្ពស់​ក្រសួង​មហាផ្ទៃ​ដដែល​បញ្ជាក់​ថា ពួកគេ​ទាំង​៤​នាក់ គឺ​ជា​សមាជិក​ក្នុង​ក្រុម​មេខ្លោង​ដែល​ដឹកនាំ​ដោយ​ប៊ុន រដ្ឋា។

ក្រោយ​ការបង្ក្រាប​ក្រុម​មនុស្ស ដែល​រដ្ឋាភិបាល​ចាត់ទុកថា ជា​ក្រុម​ដែល​មាន​ចេតនា​ចង់​បង្កើត​តំបន់​អបគមន៍​នោះ ក្រសួង​មហាផ្ទៃ​បាន​ប្រកាស​ស្វែងរក​ចាប់​ខ្លួន​បុរស​៥​នាក់​ទៀត​ព្រម​ទាំង​ឈ្មោះ​ប៊ុន រដ្ឋា​ដែល​សមត្ថកិច្ច​រដ្ឋាភិបាល​ចាត់ទុកថា​ជា​មេខ្លោង។

នៅ​ក្នុង​ឃុំ​កំពង់​ដំរី​ឯណោះ​វិញ លោក​ចាន់ សូវេត មន្ត្រី​ស៊ើបអង្កេត​របស់​សមាគម​ការពារ​សិទ្ធិមនុស្ស​អាដហុក​ដែល​បាន​ទៅ​ដល់​កន្លែង​កើតហេតុ​នោះ បាន​រៀបរាប់​អោយ​ដឹង​ថា តំបន់​នោះ​ត្រូវ​បាន​ការពារ​ដោយ​កំលាំង​យោធា​រដ្ឋាភិបាល​យ៉ាង​តឹងរឹង ហើយ​មិន​អោយ​មន្ត្រី​សិទ្ធិ​មនុស្ស​ចេញចូល​ក្រៅ​ពី​ប្រជាពលរដ្ឋ​ចាស់​ក្នុង​តំបន់​នោះ​ឡើយ។ លោក​ចាន់ សូវេត​បន្ត​ថា ប្រជាពលរដ្ឋ​ដែល​ទើប​ទៅ​ដល់​ថ្មី​បាន​រត់​ចាកចេញ​ពី​តំបន់​នោះ​ជាច្រើន​ដោយ​សារ​ការ​ភ័យខ្លាច។

នៅ​ថ្ងៃនេះ ស្ថានទូត​សហរដ្ឋ​អាមេរិក​បាន​ចេញ​ផ្សាយ​សេចក្តីថ្លែងការណ៍​មួយ​ដើម្បី​រំលែកទុក្ខ​ជាមួយ​ក្រុម​គ្រួសារ និង​មិត្តភក្តិ​របស់​កុមរី​ហេង ចាន់ថា​ដែល​បាន​ស្លាប់​ដោយសារគ្រាប់​កាំភ្លើង​ប៉ូលិស នៅ​ក្នុង​តតាំង​គ្នា​រវាង​កំលាំង​រដ្ឋាភិបាល និង​ក្រុម​អ្នកតវ៉ា កាល​ពី​ព្រឹក​ថ្ងៃ​ពុធ​ម្សិលមិញ​នេះ។ ទន្ទឹមគ្នា​នេះ សហរដ្ឋ​អាមេរិក​ក៏​បាន​ថ្លែង​កង្វល់ និង​ការព្រួយ​បារម្ភ​របស់​ខ្លួន ចំពោះ​ករណី​ជម្លោះ​ដីធ្លី​នៅកម្ពុជា ដែលសហរដ្ឋ​អាមេរិក​កត់សម្គាល់​ឃើញ​ថា មាន​កាន់​តែ​ច្រើន​ឡើង ហើយ​ការតវ៉ា​ដោយ​ហឹង្សា ក៏​ងាយ​នឹង​កើត​មាន​ដែរ។ នៅ​ក្នុង​សេចក្តីថ្លែងការណ៍​នោះ សហរដ្ឋ​អាមេរិក​មិន​បាន​ភ្លេច​សាទរ​សេចក្តីសម្រេច​ចុងក្រោយ​របស់​ប្រមុខ​រដ្ឋាភិបាល​ក្នុង​ការផ្អាក​ការ​ផ្តល់​សម្បទាន​ដី​សេដ្ឋកិច្ច​នោះ​ឡើយ ប៉ុន្តែ​សហរដ្ឋ​អាមេរិក​អត្ថាធិប្បាយ​ថា ហេតុការណ៍​ដ៏​ក្រៀមក្រំ កាល​ពី​ថ្ងៃ​ពុធ​ក្នុង​ខេត្តក្រចេះ វា​បាន​បង្ហាញ​អំពី​សារៈសំខាន់​នៃ​សិទ្ធិ​លើ​ទ្រព្យ​សម្បតិ្ត និង​ប្រព័ន្ធ​នៃ​ការដោះស្រាយ​ជម្លោះ​មួយ​ដែល​ឯករាជ្យ និង​ប្រកប​ដោយ​តម្លាភាព៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI