អានតួអត្ថបទ
ទស្សនៈព្រឹត្តិការណ៍ពិភពលោក

តើ​នឹង​មាន​អ្វី​កើត​ឡើង​ ប្រសិន​បើ​បារាំង​មិន​គោរព​បញ្ជា​សហភាព​អឺរ៉ុប ផ្នែក​ថវិកា?

សំឡេង ០៤:១០
រដ្ឋមន្ត្រី​បង្ហាញ​គម្រោង​ថវិកា​បារាំង​ឆ្នាំ​២០១៥​ ទៅ​កាន់​អ្នក​សារព័ត៌មាន
រដ្ឋមន្ត្រី​បង្ហាញ​គម្រោង​ថវិកា​បារាំង​ឆ្នាំ​២០១៥​ ទៅ​កាន់​អ្នក​សារព័ត៌មាន Reuters/Philippe Wojazer
ដោយ៖ អៀង សុខម៉ិញ
៣១ នាទី

រដ្ឋាភិបាល​បារាំង​បាន​បង្ហាញ​ជា​សាធារណៈ កាលពី​សប្តាហ៍មុន​ ​​គម្រោង​ថវិកា​ជាតិ​សម្រាប់​ឆ្នាំ​២០១៥។ គម្រោង​ថវិកានេះ​ដែល​បាន​បញ្ជូន​ទៅ​ដល់​សភា​បារាំង​ហើយ​កាលពី​ថ្ងៃ​ទី ១៤តុលា ​ក៏​ត្រូវ​ ដាក់​ជូន​ទៅ​គណៈកម្មការ​អឺរ៉ុប​ឱ្យ​បាន​មុន​ថ្ងៃទី ១៥​តុលា​២០១៤​នេះដែរ។ ជា​គម្រោង​ថវិកា​ ដែល​ ទំនង​ជា​មិន​ឆ្លើយ​តប​បាន​ទៅ​នឹង​លក្ខខណ្ឌរបស់​គណៈកម្មការ​អឺរ៉ុបឡើយ។ អឺរ៉ុប​ចង់ឃើញ​បារាំង​ប្រឹង​កាត់​បន្ថយ​ឱនភាព​ថវិកា​ ឱ្យ​បាន​ច្រើន បើ​ពុំ​នោះ​ទេ​នឹង​អាច​រង​ទណ្ឌកម្ម។ ប៉ុន្តែ​អ្នកនាំ​ពាក្យ​រដ្ឋាភិបាល​ និង​រដ្ឋ​មន្ត្រី​ក្រសួង​ហិរញ្ញវត្ថុ​​​បារាំង អះអាង​នឹង​មិន​ធ្វើ​ការ​កែប្រែ​អ្វី​ទាំង​អស់ តាម​​​អឺរ៉ុប​ទេ។ហេតុអ្វី​បាន​ជា​គណៈកម្មការ​អឺរ៉ុប​​មិន​ពេញ​ចិត្ត​គម្រោង​ថវិកាបារាំង​​នេះ ? ចុះ​ប្រសិន​បើ​បារាំង​មិន​គោរព​តាម​ការ​លក្ខណ្ឌ​​របស់​អឺរ៉ុប តើ​នឹង​មាន​អ្វី​កើត​ឡើង ?!

ផ្សាយពាណិជ្ជកម្ម

បន្ទាត់​នយោបាយ​ផ្លូវការ​របស់​រដ្ឋាភិបាល​បារាំង​ពេល​នេះ គឺ​ដាច់​ខាត​មិន​ត្រូវ​ការ​ប្តូរ​ផ្លាស់​អ្វី​ទេ ទុក​ឱ្យ​សភា​ជា​អ្នក​ពិចារណា​និង​សម្រេចទៅ​ចុះ បើ​ទោះ​បី​ជាត្រូវ​​ដៃគូ​អឺរ៉ុប​ចិញ្ចាំ​ ឬ​គណៈកម្មការ​អឺរ៉ុប​បន្ទោស​យ៉ាង​ណា​ក៏ដោយ។ សម្រាប់​បារាំង​ការ​បដិសេធ​មិន​ធ្វើ​ការ​កែប្រែ​គម្រោង​ថវិកា​ឆ្នាំ​២០១៥ ក៏​ព្រោះ​តែ​រដ្ឋាភិបាល​​បាន​បញ្ជូន​គម្រោង​ថវិកា​ ​ទៅ​ឱ្យ​គណៈកម្មការ​អឺរ៉ុប​ ទន្ទឹម​ពេល​នឹង​បញ្ជូន​ទៅ​កាន់​សភា ដោយ​មាន​ទាំង​របាយការណ៍​សេដ្ឋកិច្ច សង្គម​ ហិរញ្ញវត្ថុ​ និង​ឯកសារ​ភ្ជាប់​ចំនួន​បីរយ​ទំព័រ​ពន្យល់​លម្អិត​ទៅ​តាម​ការ​ទាមទារ​របស់​គណៈកម្មការ​អឺរ៉ុប។

 
គម្រោង​ថវិកា​បារាំង​ឆ្នាំ​២០១៥ រង​សម្ពាធ​ខ្លាំង ទាំង​ក្នុង​និង​មក​ពី​ក្រៅ​ប្រទេស ព្រោះ​គ្រប់​គ្នា​មើល​ឃើញ​ថា​គ្មាន​លំនឹង​។ ​​​រដ្ឋាភិបាល​ ​អាច​សន្សំ​​ថវិកា​បាន​១១​ពាន់​លាន ​​ដោយសារ​តែ​ការ​​បញ្ចុះ ​​ចំណាយ​រដ្ឋ​ និង​ចំណាយ​ឧបត្ថម្ភ​តំបន់។​ ជា​សរុប​ បើ​តាម​គម្រោង​ រដ្ឋាភិបាល​អាចកាត់​បន្ថយ​ឱនភាព​សាធារណៈ​ត្រឹម​តែ ៤,៣%​ប៉ុណ្ណោះ នៅ​ឆ្នាំ​ក្រោយ។ ​ឯកម្មវត្ថុ​ដែល​បារាំង​ធ្លាប់​សន្យា​ជាមួយ​គណៈកម្មការ​អឺរ៉ុប ត្រូវ​លើក​ទៅ​ឆ្នាំ​២០១៧។​ តាម​វិន័យ​ ក្នុង​នាម​ជា​សមាជិក​សហភាព​អឺរ៉ុប នៃ​តំបន់​ចាយ​ប្រាក់​អឺរ៉ូ បារាំង​ត្រូវ​មាន​កាតព្វកិច្ច​ កាត់​បន្ថយ​ឱនភាព​ថវិកា​ឱ្យ​ធ្លាក់​មក​ត្រឹម​៣% នៅ​ឆ្នាំ ២០១៥​។ ដូច្នេះ​មាន​ន័យ​ថា​បារាំង​មិនគោរព​ពាក្យ​សន្យា​របស់​ខ្លួន។

មិន​កាន់​ពាក្យ​សន្យា​ហើយ បារាំង​ថែម​ធ្លាក់​មធ្យមភាគ​ទៀត។ សូម​បញ្ជាក់​ថា​នៅ​ក្នុង​ឆ្នាំ​២០១៣ អត្រា​ឱនភាព​ថវិកា​នៃ​បណ្តា​ប្រទេស​ចាយ​ប្រាក់​អឺរ៉ូ​ មាន​កំរិត​៣%។ ពោល​គឺ​ធ្វើ​បានប្រសើរ​ជា​ង​ឆ្នាំ​មុនៗ (៣,៧% ឆ្នាំ​២០១២និង​៤,១% ឆ្នាំ២០១១)។ ប៉ុន្តែ​មិន​មែន​មាន​តែ​បារាំង​ឡើយ ដែល​គោរព​មិន​បាន​វិន័យ​មាស ៣%​ ចែង​តាំង​ពី​ច្បាប់​លំនឹងនិង​កំណើន​សេដ្ឋកិច្ច​ឆ្នាំ​១៩៩៧​នោះ។ មាន​រដ្ឋ​ផ្សេង​ទៀត​ជា​ច្រើន​ដូចជា​អ៊ីតាលី អេស្ប៉ាញ ព័រទុយហ្កាល់ អៀរឡង់ ក្រិក ស្លូវេនី ... ក៏​មានឱនភាព​លើស​ពី​៣%​នៃ​ប្រាក់​ចំណូល​សរុប​របស់​ជាតិ​ដែរ។ កាលពី​ឆ្នាំ​២០០៩ បារាំង​ជាប់​ឈ្មោះ​ថា​មាន​ឱនភាព​ជាតិ​ជ្រុល​ហួសហេតុ។ ​នៅ​ឆ្នាំ​២០១២ មាន​ប្រទេស​១៥​ក្នុង​ចំណោម​១៧​ចាយ​ប្រាក់​អឺរ៉ូ​មាន​ឱនភាព​ជ្រុល​។ ឥលូវ​នៅ​សល់​ឈ្មោះ​តែ​៧​ប្រទេស​ ក្នុង​នោះ​មាន​រាប់​បារាំង​មួយ​ដែរ។

គណៈកម្មការ​អឺរ៉ុប​ដែល​ហាក់​ដូច​សំលក់​សំឡឹង​បារាំង​ខ្លាំង​ជាង​គេ​ក៏​ព្រោះ​តែ​បារាំង​នេះ បាន​ធ្លាប់​សន្យា​កាលពី​ពីរ​ឆ្នាំ​មុន​ ធ្លាប់​បាន​សន្យា​ថា​នឹង​ធ្វើ​កំណែទម្រង់​ ដើម្បី​ឱ្យ​មាន​ស្ថានភាព​ប្រសើរ​ឡើង។ ជា​ថ្នូរ​តប​មក​វិញ អឺរ៉ុប​បាន​ពន្យារ​ពេល​ពីរ​ឆ្នាំ​បន្ថែម​ទៀត​ឱ្យ​បារាំង​មាន​ឱកាស​ធ្វើ​កំណែទម្រង់ ដែល​អាច​នាំ​បារាំង​ឱ្យ​ទម្លាក់​ឱនភាព​ជាតិ​មក​ត្រឹម​៣%។ វិធានការ​ពីរបី និង​ ​បន្ថយ​ចំណាយ​ គឺ​ពិត​ជា​មិនអាច​សម្រេច​កិច្ចព្រមព្រៀងបារាំង​ជាមួយ​គណៈកម្មការ​អឺរ៉ុប​នោះ​បាន​ឡើយ។

សម្រាប់​​បារាំង​ គេ​មិន​អាចគិត​តែ​​រឹត​ត្បិត​ថវិកា​ ដើម្បី​កាត់​បន្ថយ​ឱនភាព​ឡើយ បារាំង​ត្រូវ​ការ​ចំណាយ​ដើម្បី​ធ្វើ​ឱ្យ​មាន​កំណើន​សេដ្ឋកិច្ច​ឡើង​វិញ។ ដូច្នេះ​សួរ​ថា​តើ​នឹង​មាន​រឿង​អ្វី​កើត​ឡើង​ បើ​បារាំង​មិន​គោរព​តាម​លក្ខខណ្ឌ​តម្រូវ​របស់​អឺរ៉ុប ?!

ដើម្បី​ធ្វើ​ឱ្យ​ប្រទេសក្នុង​តំបន់​អឺរ៉ូ​​ជា​សមាជិក​គោរព​វិន័យ​ថវិកា គណៈកម្មការ​អឺរ៉ុប​ មាន​វិធានការ​បួន​កំរិត។ ជា​បឋម​ គណៈកម្មការ​អាច​ចេញ​របាយការណ៍​មួយ (ស្រប​តាម​មាត្រ​១២៦ កថាខណ្ឌ​៣ នៃ​សន្ធិសញ្ញា​សហភាពអឺរ៉ុប) ស្តីពី​ការ​វិវឌ្ឍន៍ស្ថានភាព​ថវិការ និង​បំណុល​សាធារណៈ​​ ក្នុង​រយៈ​ពេល​ខ្លីជា​មធ្យម​។ កំរិត​ពីរ ៖ ក្រុមប្រឹក្សា​អឺរ៉ុប​ ដោយ​មាន​អនុសាសន៍​ពី​គណៈកម្មការ​ ត្រូវ​សម្រេច​ថា​ប្រទេស​នោះ​មាន​ ឬ​អត់ ឱនភាព​ថវិកា​ជ្រុល​ហួសហេតុ។ ប្រទេស​ពាក់ព័ន្ធ​មាន​ពេល​៦​ខែ​សម្រាប់​ការពារ​ និង​លើកស្ទួយ​ប្រទេស​ឡើង​វិញ។ ប្រសិន​បើ​មិន​ធ្វើ ក្រុមប្រឹក្សា​នឹង​ចេញ​អនុសាសន៍​ជា​សាធារណៈ។ ដំណាក់កាល​ទីបី​ ក្រុម​ប្រឹក្សា​អឺរ៉ុប អាច​នឹង​តម្រូវ​ឱ្យ​មាន​វិធានការ​ កាត់​បន្ថយ​ឱនភាព​។ ហើយ​ជា​ចុងក្រោយ គឺ​ការ​ដាក់​ទណ្ឌកម្ម។ ទណ្ឌកម្ម​ដែល​គ្មានអ្វី​ក្រៅ​ការ​ផាក​ឱ្យ​បង់​ពិន័យ​ ដែល​អាច​ឈាន​ដល់​០,២%​នៃ​ផលិតផល​សរុប​ក្នុង​ស្រុក និង​យ៉ាង​ខ្ពស់​​បំផុត​ត្រឹម​០,៥%។

ប៉ុន្តែ​ រហូត​មកទល់​នឹង​ពេល​នេះ គណៈកម្មការ​អឺរ៉ុប​មិន​ទាន់​ដែល​​បាន​អំណាច​របស់​ខ្លួន​ដាក់​ប្រឆាំង​នឹង​រដ្ឋ​ជា​សមាជិក​ណា​មួយ​ទេ។ យោល​តាម​ច្បាប់​ គណៈកម្មការ​អាច​មាន​សិទ្ធ​ដាក់​ទោស​លើ​ប្រទេស​មិន​គោរព​វិន័យ​ ជា​ការ​ផាក​ពិន័យ​ ក្នុង​កំរិត​ ០,២%​ នៃ​ផលិតផល​សរុប​ក្នុងស្រុក។

ចំពោះ​​ករណី​ប្រទេស​បារាំង ក្នុង​រយៈ​ពេល​ដំបូង​នេះ បើ​តាម​ភ្នាក់ងារ​សារព័ត៌មាន​Reuters គណៈកម្មការ​ទំនង​ជា​នឹង​តម្រូវ​ឱ្យ​ប៉ារីស​សរសេរ​ជា​លាយ​លក្ខណ៍​អក្សរ ដំណើរ​ការ​ដែល​បារាំង​ត្រូវ​ធ្វើ​ មុន​នឹង​ព្រមព្រៀងទុក​​​ពេល​វេលា​ថ្មី​បន្ថែម​ទៀត​សម្រាប់​សម្រេច​កម្មវត្ថុ​កាត់​បន្ថយ​ឱនភាព។ ប៉ុន្តែ​សម្រាប់​បារាំង​ខ្លួន​ឯង ដែល​មិនអាច​គោរព​ពាក្យ​សន្យា មិន​អាច​បញ្ចុះ​ឱនភាព​ថវិកា​បាន រដ្ឋាភិបាល​ត្រូវប្រឹង​​ពុះ​ពារ​​បញ្ចុះ​បញ្ចូល​ គ្រប់​ជ្រុង​ទាំង​អស់ មិន​ថា​​ថ្នាក់​ជាតិ ឬ​ថ្នាក់​អឺរ៉ុបឡើយ ប្រសិន​បើ​ចង់​ឃើញ​​​សភាព្រម​​អនុម័ត​ និង​​​ដៃគូសុខ​ចិត្ត​ទទួល​យក​គម្រោង​​ថវិកា​​​ឆ្នាំ​២០១៥​នេះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ