អានតួអត្ថបទ
បារាំង

អង្គការ​សហប្រជាជាតិ​នឹង​ពិចារណា​ដាក់​ក្រុម​ជីហាត​ក្នុង​ប្រទេស​លីប៊ី ក្នុង​បញ្ជី​ភេរវករ

កិច្ចប្រជុំ​របស់​ក្រុមប្រឹក្សាសន្តិសុខ​អង្គការ​សហប្រជាជាតិ​នៅទីក្រុង​ញុវយ៉ក
កិច្ចប្រជុំ​របស់​ក្រុមប្រឹក្សាសន្តិសុខ​អង្គការ​សហប្រជាជាតិ​នៅទីក្រុង​ញុវយ៉ក
ដោយ៖ ប្រាក់ ធីតា
1 នាទី

បារាំង អង់គ្លេស និងសហរដ្ឋអាមេរិក កាលពី​ថ្ងៃ​អង្គារ ទី ៤ តុលា បាន​សុំ​ឲ្យ​ក្រុមប្រឹក្សា​សន្តិសុខ​អង្គការសហប្រជាជាតិ ដាក់​បញ្ចូល​ក្រុមអ៊ីស្លាម​លីប៊ី Ansar al-Sharia ក្នុង​បញ្ជី​ភេរវករ​របស់​អង្គការសហប្រជាជាតិ ពី​បទមាន​ទំនាក់ទំនង ជាមួយនឹង​ក្រុមឧទ្ទាម​អាល់កៃដា។

ផ្សាយពាណិជ្ជកម្ម

 

ក្រុមឧទ្ទាមAnsar al-Sharia ស្ថិតនៅក្នុង​បញ្ជី​ភេរវករ​របស់​អាមេរិក​រួចហើយ បន្ទាប់​ពី​ក្រុមនេះ បាន​វាយប្រហារ​ទៅលើ​គណៈប្រតិភូ​អាមេរិក នៅក្នុង​តំបន់Benghazi ដែល​បាន​សម្លាប់ ឯកអគ្គរដ្ឋទូត​អាមេរិក​ម្នាក់ ហើយ​នឹង​ជនជាតិ​អាមេរិក ៣នាក់​ផ្សេង​ទៀត។

ការដាក់​បញ្ជូល​ក្រុមឧទ្ទាមAnsar al-Sharia ទៅក្នុង​បញ្ជី​ភេរវករ​របស់​អង្គការ​សហប្រជាជាតិ មាន​ន័យ​ថា រាល់​សមាជិក​នៃ​ក្រុមនេះ គឺ​នឹង​ត្រូវ​ហាមឃាត់ មិន​បាន​ទទួល​ទិដ្ឋាករ ត្រូវ​គេ​បង្កក​ទ្រព្យសម្បត្តិ រឹបអូស​អាវុធ​ទាំងអស់ ហើយ​នឹង​កាត់ផ្តាច់​ក្រុមនេះ ពី​ការធ្វើ​នយោបាយ​នានា។

រដ្ឋមន្ត្រី​ការបរទេស​បារាំង លោក Laurent Fabius បាន​ប្រាប់​ដល់​ភាគី​របស់ខ្លួន នៅក្នុង​កិច្ចប្រជុំ​ជាន់ខ្ពស់​អង្គការ​សហប្រជាតិ កាល​ពី​ខែ កញ្ញា​ថា ក្រុមឧទ្ធាមAnsar al-Sharia គួរ​តែ​ប្រឈមនឹង ការដាក់​ទណ្ឌកម្ម​សេដ្ឋកិច្ច ដែល​ជា​ផ្នែក​មួយ ជួយ​ការពារ​ប្រទេស​លីប៊ី ពី​ការធ្លាក់​ចូល​ទៅ​ក្នុង​អំពើ​ហិង្សា ជាបន្តទៀត។

នៅក្នុង​សំណើ​ដាក់​ទៅ​ក្រុមប្រឹក្សា​សន្តិសុខ​អង្គការ​សហប្រជាជាតិ ប្រទេស​ទាំងបី បាន​សុំ​ឲ្យ​ដាក់ ក្រុមឧទ្ធាម Ansar al-Sharia នៅ Benghazi និង​នៅDerna ចូល​ទៅក្នុងបញ្ជី​ខ្មៅ ដោយសារ​តែក្រុមទាំងពីរ​មាន​ទំនាក់ទំនង ជាមួយ​នឹង​ក្រុម​ឧទ្ទាម​អាល់កៃដា ហើយ​និង​ក្រុមអ៊ីស្លាមជ្រុល​និយម​ផ្សេងទៀត។

ចាប់តាំង​ពី​ឆ្នាំ ២០១២មក ក្រុមឧទ្ធាមAnsar al-ShariaBenghazi បាន​បើកជំរំ​បណ្តុះបណ្តាល​ភេវកម្ម ជាច្រើន​កន្លែង ដើម្បី​ជួយ​ដល់​ក្រុម​ប្រដាប់អាវុធ នៅអ៊ីរ៉ាក់ និង​ស៊ីរ៉ី ហើយ​និង​ពង្រីក​ទៅកាន់​ប្រទេស​ម៉ាលី។ នៅក្នុង​សំណើ​របស់​ប្រទេស​ទាំងបី គេ​បាន​បន្ថែម​ទៀតថា នៅ​ពេលថ្មីៗនេះ ក្រុម​ឧទ្ធាមនេះ បាន​វាយប្រហារ ជាច្រើនដង ទៅលើ​កងកម្លាំង​សន្តិសុខ​លីប៊ី។

នៅក្នុង​ខែនេះ​ដែរ ក្រុមឧទ្ធាមAnsar al-Sharia Derna ក៏​បាន​បញ្ជាក់​ថា ខ្លួន​នឹង​ដើរ​តាម​អង្គការ​រដ្ឋអ៊ីស្លាម​ជីហាត ដែល​បាន​គ្រប់គ្រង​ទឹកដី មួយ​ផ្នែក​នៅ​អ៊ីរ៉ាក់ និង​ស៊ីរីផង​ដែរ។

ក្រុម​ប្រឹក្សា​សន្តិសុខ​អង្គការ​សហប្រជាតិ មាន​ពេល​រហូត​ដល់ ថ្ងៃទី ១៩ វិច្ឆិកា​ខាងមុខ ដើម្បី​សម្រេច​លើ​សំណើ​សុំ​របស់​ប្រទេសបារាំង អង់គ្លេស និងអាមេរិកនេះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ