បារាំង

អ្នកស្រី​Marine Le Pen នៃ​គណបក្ស​រណសិរ្ស​ជាតិ​F.N. ឈ្នះ​នៅ​គ្រប់​ករណី

អ្នកស្រី​ Marine Le Pen ប្រធាន​​គណបក្ស​រណសិរ្ស​ជាតិ
អ្នកស្រី​ Marine Le Pen ប្រធាន​​គណបក្ស​រណសិរ្ស​ជាតិ REUTERS

ក្នុង​ចន្លោះ​ពេល​១៤​ខែ​ទៀត​ពី​ការបោះ​ឆ្នោត​ជ្រើស​រើស​ប្រធានាធិបតី​ នៅ​ឆ្នាំ​២០១២​​ អ្នក​ស្រី​Marine​ Le​ Pen​ នៃ​គណបក្ស​ស្តាំនិយម​ជ្រុល​រណ​សិរ្ស​ជាតិ​F.N.​ ឈ្នះ​គេ​នៅ​គ្រប់​ករណី​ នៅ​វគ្គ​ទី១​នៃ​ការបោះ​ឆ្នោត​។​លោក​Nicolas​ Sarkozy​ នឹង​ត្រូវ​ជម្រុះ​ចោល​តាំង​ពី​វគ្គ​ទី១​នេះ​ម៉្លេះ​។​នេះ​បើ​យោង​តាម​ ការស្ទង់​មតិ​របស់​វិជ្ជាឋាន​Harris​ Interactive​ ចុះ​ផ្សាយ​ក្នុង​កាសែត​Le​ Parisien​ ចេញ​នៅ​ថ្ងៃ​អង្គារ​៨មីនា​នេះ​។

ផ្សាយពាណិជ្ជកម្ម

សេចក្តីរាយការណ៍​របស់ វីនស្តុន រតនា

ស្រប​តាម​ការស្ទង់​មតិ​របស់​វិជ្ជាឋាន​Harris​ Interactive​ ចុះ​ផ្សាយ​ក្នុង​កាសែត​Le​ Parisien​ ចេញ​នៅ​ថ្ងៃ​អង្គារ​៨​មីនា​នេះ​ ​ នៅ​ថ្ងៃ​សៅរ៍​៥មីនា​ ក្នុង​ករណី​ទី១​គឺ​អ្នក​ស្រី​Marine​ Le​ Pen​នៃ​គណបក្ស​ស្តាំនិយម​ជ្រុល​រណសិរ្ស​ជាតិ​F.N​បាន​ទទួល​សំឡេង​គាំទ្រ​២៣%​ឈ្នះ​លើ​លោក​Nicolas​ Sarkozy​នៃ​គណបក្ស​ស្តាំនិយម​UMP​និង​អ្នក​ស្រី​Martine​ Aubry​នៃ​គណបក្ស​សង្គមនិយម​PS​ដែល​បាន​ទទួល​សំឡេង​គាំទ្រ​ស្មើ​គ្នា​ ២១%​ ​ នៅ​វគ្គ​ទី១​នៃ​ការបោះ​ឆ្នោត​ឆ្នាំ​២០១២​។

ក្នុង​ករណី​ទី២​នៃ​ការស្ទង់​មតិ​នៅ​ល្ងាច​ថ្ងៃ​ចន្ទ​ម្សិល​មិញ​ ​ សំរាប់​វគ្គទី១​នៃ​ការបោះ​ឆ្នោត​ឆ្នាំ​២០១២​ ​ អ្នក​ស្រី​Marine​ Le​ Pen​បាន​ទទួល​សំឡេង​គាំទ្រ​២៤%​ឈ្នះ​លើ​លោក​Dominique​ Strauss-Kahn​នៃ​គណបក្ស​PS.​ បាន​២៣%​និង​លោក​Nicolas​ Sarkozy​នៃ​គណបក្ស​UMP​បាន​២១%​។

ក្នុង​ករណី​ទី៣​ សំរាប់​ការបោះ​ឆ្នោត​វគ្គ​ទី១​ឆ្នាំ​២០១២​ ​ អ្នក​ស្រី​Marine​ Le​ Pen​បាន​ទទួល​សំឡេង​គាំទ្រ​២៤%​ឈ្នះ​លើ​លោក​Nicolas​ Sarkozy​នៃ​គណបក្ស​UMP​បាន​២១%​និង​លោក​François​ Hollande​នៃ​គណបក្ស​PS.​ បាន​២០%។
 

តាម​យោបល់​លោក​ប្រធាន​វិជ្ជាឋាន​Cap​ Stéphane​ Rozès​ ​ ជ័យជំនះ​របស់​អ្នក​ស្រី​Marine​ Le​ Pen​ នៅ​គ្រប់​ករណី​ បង្ហាញ​ឱ្យ​ឃើញ​ អសមត្ថភាព​របស់​លោក​Nicolas​ Sarkozy​ ក្នុង​ការបំពេញ​មុខងារ​ជា​ប្រធានាធិបតី​និង​អសមត្ថភាព​របស់​គណបក្ស​PS.​ ក្នុង​ការធ្វើ​ឱ្យ​ប្រជាជន​ជឿ​ទុក​ចិត្ត​ក្នុង​ការជំនួស​គណបក្ស​UMP​វិញ​ក្នុង​ការដឹក​នាំ​ប្រទេស​ជាតិ​។

សំរាប់​លោក​Frqnçois​ Fillon​ ​ ការឡើង​ដៃ​របស់​បេក្ខនារី​នៃ​រណសិរ្ស​ជាតិ​FN.​ បណ្តាល​មក​ពី​គណបក្ស​PS.​ ជា​រៀង​រាល់​ថ្ងៃ​ ចាប់​ពី​៤ឆ្នាំ​មក​ហើយ​ និយាយ​បង្កាច់​បន្តុះ​បង្អាប់​ខ្លាំង​ណាស់​លោក​ប្រធានាធិបតី​Sarkozy​ ។

សំរាប់​អ្នក​ស្រី​អតីត​បេក្ខនារី​ប្រធានាធិបតី​នៃ​គណបក្ស​PS​ ​ Ségolène​ Royal​ ការស្ទង់​មតិ​នេះ​គឺ​ជា​ភាគ​មួយ​នៃ​ស្នៀត​បោក​ប្រាស់​ជះ​ឥទ្ធិពល​ទៅ​លើ​មតិ​សាធារណជន​ក្នុង​ចន្លោះ​ពេល​១៤​ខែ​ទៀត​ពី​ការបោះ​ឆ្នោត​ជ្រើស​រើស​ប្រធានាធិបតី​នៅ​ឆ្នាំ​២០១២៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI