កម្ពុជា

គណបក្ស​ហ៊្វុនស៊ិនប៉ិច​កំណត់​ថ្ងៃទី២​ខែ​មេសា​ធ្វើ​សមាជ​វិសាមញ្ញ

​ថ្នាក់ដឹកនាំ​គណបក្ស​​ហ្វ៊ុនស៊ិនប៉ិច​
​ថ្នាក់ដឹកនាំ​គណបក្ស​​ហ្វ៊ុនស៊ិនប៉ិច​

លោក កែវ ពុធរស្មី ប្រធាន​គណបក្សហ៊្វុនស៊ិនប៉ិច​បាន​បញ្ជាក់​នៅ​ថ្ងៃ​អាទិត្យ​នេះ​ថា អង្គ​សមាជ​វិសាមញ្ញ​ នៅថ្ងៃ​ទី២ មេសា​ខាងមុខ​នេះ​នឹង​​ជំរុញ​ការ​កែ​លម្អ​ការងារ​គណបក្ស​ សម្រាប់​ការ​បោះឆ្នោត​នៅពេល​​ខាង​មុខ។ មិន​ត្រឹមតែ​ប៉ុណ្ណោះ ក្រោយ​សមាជ​នេះ គណបក្សហ៊្វុនស៊ិនប៉ិច​នឹង​រិះ​រក​មធ្យោបាយ​បង្រួបបង្រួម​ជា​មួយ​គណបក្ស​នរោត្តម​រណឫទ្ធិ។

ផ្សាយពាណិជ្ជកម្ម

សេចក្តី​រាយការណ៍​របស់​ គី សុខលីម ពី​ភ្នំពេញ

អង្គ​សមាជ​វិសាមញ្ញ​របស់​គណបក្សហ៊្វុនស៊ិនប៉ិច​នឹង​កំណត់​ធ្វើ​ឡើង​ជា​ផ្លូវការ​ហើយ​នៅ​ថ្ងៃ​ទី​២​ខែ​មេសា​ខាង​មុខ​នេះ។ នេះ​គឺ​ជា​អង្គ​សមាជ​ធំ​លើក​ទី​មួយ​ បន្ទាប់​ពី​អង្គ​សមាជ​នៅ​ឆ្នាំ​២០០៦​ ទម្លាក់​ព្រះអង្គម្ចាស់ នរោត្តម រណឫទ្ធិ ចេញ​ពី​តំណែង​ព្រះ​ប្រធាន​គណបក្ស​ហ៊្វុនស៊ិនប៉ិច។

លោក កែវ ពុធរស្មី ប្រធាន​គណបក្សហ៊្វុនស៊ិនប៉ិច​បាន​បញ្ជាក់​ នៅ​ថ្ងៃ​អាទិត្យ​នេះ​ថា អង្គ​សមាជ​នៅ​ថ្ងៃ​ទី​២​ខែ​មេសា​ខាង​មុខ​នេះ​មាន​របៀបវារៈ​ចំនួន​បី​ធំ​ៗ។ ទីមួយ ពិនិត្យ​និង​កែលម្អ​លក្ខន្តិកៈ​និង​បទ​បញ្ជា​ផ្ទៃ​ក្នុង​គណបក្ស​ឡើង​វិញ។ ទីពីរ ជ្រើសរើស​ក្រុម​ប្រឹក្សា​ជាតិ​របស់​គណបក្ស​ឡើង​វិញ ​និង​របៀបវារៈ​​ទីបី​ គឺ​កា​បោះឆ្នោត​ជ្រើសរើស​មេ​ដឹកនាំ​គណបក្ស​ឡើងវិញ។

លើស​ពី​នេះ​ទៅ​ទៀត លោក កែវ ពុធរស្មី បាន​បន្ត​ទៀត​ថា អង្គ​សមាជ​លើក​នេះ​នឹង​ជជែកគ្នា​ អំពី​ការ​បែងចែក​ការងារ​និង​ការ​ទទួល​ខុស​ត្រូវ​ ក្នុង​គណបក្ស​អោយ​បាន​ល្អ​ជាង​មុន​ ក្នុង​គោលដៅ​ធ្វើ​យ៉ាង​ដូចម្តេច​ ដើម្បី​ទទួល​បាន​ជ័យ​ជំនះ​ក្នុង​ការ​បោះឆ្នោត​នា​ឆ្នាំ​ខាង​មុខ​នេះ។

នៅ​ឆ្នាំ​២០១២​ខាងមុខនេះ ប្រទេស​កម្ពុជា​នឹង​រៀបចំ​ការ​បោះឆ្នោត​ឃុំ​-សង្កាត់​ផង ​និង​ការបោះឆ្នោត​ជ្រើសរើស​សមាជិក​ព្រឹទ្ធសភា​ផង។ រីឯ​នៅ​ឆ្នាំ​២០១៣ ប្រទេស​កម្ពុជា​នឹង​បោះឆ្នោត​ជ្រើសរើស​តំណាងរាស្ត្រ​អាណត្តិ​ទី​៥។
ឆ្លើយ​តប​នឹង​​​សំណួរ​ អំពី​​នយោបាយ​បង្រួបបង្រួម​ជាមួយ​គណបក្ស​នរោត្តម​រណឫទ្ធិ​ ​ លោក កែវ ពុធរស្មី ប្រធាន​គណបក្សហ៊្វុនស៊ិនប៉ិច​បាន​បញ្ជាក់​ថា ក្រោយ​អង្គ​សមាជ​នេះ​ទៅ លោក​នឹង​រិះរក​មធ្យោបាយ​យ៉ាងណា​អោយ​មាន​ការ​បង្រួបបង្រួម​គណបក្ស​បងប្អូន​សត្រូវ​នឹង​គ្នា​ទាំងពីរ​នេះ​ឡើង​វិញ។ លោក កែវ ពុធរស្មី សង្ឃឹមថា ការ​រួបរួម​អាច​នឹង​ប្រព្រឹត្ត​ទៅ​បាន​នៅ​ពេល​ខាង​មុខ។

លោក ប៉ែន សង្ហា អ្នកនាំពាក្យ​គណបក្ស​នរោត្តម​រណឫទ្ធិ​បាន​បញ្ជាក់​នៅ​ថ្ងៃ​អាទិត្យ​នេះ​ថា គណបក្ស​នរោត្តម​រណឫទ្ធិ​តែងតែ​ចង់​អោយ​មាន​ការ​រួបរួម ​ប៉ុន្តែ​គណបក្សហ៊្វុនស៊ិនប៉ិច​ទេ​តើ​ដែល​ជា​អ្នក​ពន្យារ​ពេល​នោះ។ លោក សង្ហា បាន​បន្ត​ទៀត​ថា ឥឡូវនេះ​គណបក្ស​នរោត្តម​រណឫទ្ធិ​មិន​ចង់​ខាត​ពេល​វេលា​ទៀត​ឡើយ ហើយ​រថភ្លើង​គណបក្ស​នរោត្តម​រណឫទ្ធិ​បាន​ចេញ​ដំណើរ​ទៅ​មុខ​ហើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI