អានតួអត្ថបទ
កម្ពុជា

រដ្ឋាភិបាល​បន្ត​ឧបត្ថម្ភធន​លើ​ប្រេង​ឥន្ធនៈ​ជាង​១៦០​លាន​ដុល្លារ

នៅ​ស្ថានីយ​ចាក់សាំង​ក្នុង​ប្រទេស​កម្ពុជា ប្រេងសាំង​នៅ​តែ​ឡើងថ្លៃ​បើទោះ​ជា​រដ្ឋ​មិន​បាន​ដំឡើង​ពន្ធ​ក្តី
នៅ​ស្ថានីយ​ចាក់សាំង​ក្នុង​ប្រទេស​កម្ពុជា ប្រេងសាំង​នៅ​តែ​ឡើងថ្លៃ​បើទោះ​ជា​រដ្ឋ​មិន​បាន​ដំឡើង​ពន្ធ​ក្តី ©សុវណ្ណារ៉ា
ដោយ៖ គី សុខលីម
២០ នាទី

រដ្ឋាភិបាល​បន្ត​ឧបត្ថម្ភធន​លើ​ប្រេង​ឥន្ធនៈ​ជាង​១៦០​លាន​ដុល្លារ​សម្រាប់​៧ ​ខែ​ដើម​ឆ្នាំ​២០១០​នេះ។ បើ​ទោះ​បី​ជា​រដ្ឋាភិបាល​ខិតខំ​បន្ត​ឧបត្ថម្ភធន​យ៉ាងនេះ​ក្តី ប៉ុន្តែ​គណបក្ស​ប្រឆាំង​និយាយ​ថា ការឧបត្ថម្ភធន​របស់​រដ្ឋាភិបាល គឺ​ជា​គ្រាន់តែ​ជា​យុទ្ធសាស្ត្រ​នយោបាយ​ប៉ុណ្ណោះ។

ផ្សាយពាណិជ្ជកម្ម

 

សេចក្តី​រាយការណ៍​របស់​គី សុខលីម​ពី​ទីក្រុង​ភ្នំពេញ

ក្រសួងសេដ្ឋកិច្ច និង​ហិរញ្ញវត្ថុ​បាន​ប្រកាស នៅក្នុង​គេហទំព័រ​របស់​ខ្លួន​ថា រដ្ឋាភិបាល​បាន​ឧបត្ថម្ភធន​ស្ងៀមស្ងាត់​ក្នុង​ទឹកប្រាក់​ចំនួន​២២​លាន​ដុល្លារ​អាមេរិក​សម្រាប់​ការនាំចូល​ប្រេងឥន្ធនៈ​ក្នុង​កក្កដា​កន្លងមក។ ប្រសិនបើ​គេ​គិត​ចាប់តាំង​ពី​ខែ​មករា​មក​ដល់​ខែ​កក្កដា​កន្លងមក​នេះ រដ្ឋាភិបាល​បាន​ឧបត្ថម្ភធន​ស្ងៀមស្ងាត់​អស់​ទឹកប្រាក់​ជាង​១៦០​លាន​ដុល្លារ​អាមេរិក។ ការឧបត្ថម្ភធន​ស្ងៀមស្ងាត់​របស់​រដ្ឋាភិបាល គឺ​មានន័យ​ថា​រដ្ឋាភិបាល​មិន​បាន​ដំឡើង​អត្រាពន្ធ​លើ​ការនាំចូល​ប្រេងឥន្ធនៈ​ទេ បើ​ទោះ​បី​ជា​តម្លៃ​ប្រេង​នៅ​លើ​ទីផ្សារ​មាន​ការកើន​ឡើង​យ៉ាង​ណា​ក៏​ដោយ។

នៅ​ថ្ងៃ​អាទិត្យ​នេះ​ប្រេងសាំង​នៅ​តាម​ស្ថានីយ​ប្រេងឥន្ធនៈ នៅក្នុង​ប្រទេស​កម្ពុជា​​មាន​តម្លៃ​៤៩០០​រៀល​ពោល គឺ​ស្មើ​នឹង​១​ដុល្លារ​២កាក់​កន្លះ។ ប្រេងឥន្ធនៈ​នៅក្នុង​ប្រទេស​កម្ពុជា​ត្រូវ​បាន​មតិ​ជាតិ​និង​អន្តរជាតិ​រិះគន់​ថា មាន​តម្លៃ​ខ្ពស់​ជាងគេ​នៅ​ក្នុង​តំបន់។

តម្លៃ​ប្រេងសាំង​ខ្ពស់​នៅ​កម្ពុជា គឺជា​ឧបសគ្គ​មួយ​ក្នុង​ចំណោម​ឧបសគ្គ​ដទៃ​ទៀត​ដែល​រារាំង​មិន​អោយ​អ្នកវិនិយោគ​បរទេស​ចូល​មក​វិនិយោគ​ច្រើន​នៅក្នុង​ប្រទេស​កម្ពុជា។ ម្យ៉ាងវិញទៀត តម្លៃ​ប្រេងសាំង​ថ្លៃ​នេះ​បាន​ធ្វើអោយ​ផលិតផល​របស់​ប្រទេស​កម្ពុជា​មិនអាច​ប្រកួត​ប្រជែង​នឹងង​ផលិតផល​នាំចូល​ពី​បរទេស​បាន។

អង្គការ​សង្គម​ស៊ីវិល​នៅក្នុង​ប្រទេស​កម្ពុជា​តែងតែ​ចោទ​ប្រកាន់​ក្រុមហ៊ុន​ប្រេងសាំង នៅក្នុង​ប្រទេស​កម្ពុជា​ថា បាន​ដំឡើងថ្លៃ​លឿន​ជាង​ទីផ្សារ​អន្តរជាតិ ប៉ុន្តែ​ពេល​ចុះថ្លៃ​វិញ គឺ​យឺត​ជាង​ទីផ្សារ​អន្តរជាតិ។

លោក យឹម សុវណ្ណ តំណាងរាស្ត្រ និង​ជា​អ្នកនាំពាក្យ​គណបក្ស​សម​រង្ស៊ី​បាន​ពន្យល់​ថា ប្រេងឥន្ធនៈ​មាន​តម្លៃ​ខ្ពស់ នៅក្នុង​ប្រទេស​កម្ពុជា​មាន​ហេតុផល​ពីរ​យ៉ាង។ ទីមួយ គឺ​ដោយសារ​ក្រុមហ៊ុន​នាំចូល​ប្រេងសាំង​យក​ចំណេញ​ច្រើន​ពេក និង​ទីពីរ ​គឺ​ដោយសារ​តម្លៃ​ពន្ធ​លើ​ប្រេងសាំង​មាន​ចំនួន​ខ្ពស់។ បើ​យោង​តាម​លោក យឹម សុវណ្ណ រដ្ឋាភិបាល​គួរតែ​លុបចោល​ពន្ធ​លើ​ប្រេងសាំង​តែម្តង​ទៅ ដើម្បី​អោយ​ប្រេងសាំង​ចុះថោក​បន្តិច។ ហើយ​នៅ​ពេល​នោះ ប្រជាជន​ក្រីក្រ​ភាគច្រើន និង​អាជីវករ​នានា​ជា​អ្នក​ទទួល​បាន​ផលប្រយោជន៍​ពី​ការធ្លាក់​ថ្លៃ​នៃ​ប្រេងសាំង។

ការអំពាវនាវ​អោយ​លុបចោល​ពន្ធ​លើ​ប្រេងឥន្ធនៈ​របស់​អ្នកនាំពាក្យ​គណបក្ស​សម​រង្ស៊ី គឺ​ធ្វើ​ឡើង​ដើម្បី​អោយ​ប្រជាជន​ទូទៅ​ទទួល​បាន​ផលប្រយោជន៍ ប៉ុន្តែ​បញ្ហា​ម្យ៉ាងទៀត គឺ​ដោយសារ​រដ្ឋាភិបាល​មិនអាច​លុបបំបាត់​ការរត់ពន្ធ​ប្រេងសាំង​របស់​ឈ្មួញ​មាន​អំណាច​បាន។ លោក យឹម សុវណ្ណ បាន​បន្ត​ចោទ​ប្រកាន់​ថា នយោបាយ​ឧបត្ថម្ភធន​ស្ងៀមស្ងាត់​របស់​រដ្ឋាភិបាល​លើ​ប្រេងឥន្ធនៈ នា​ពេល​កន្លងមក គឺ​ជា​ពាក្យពេចន៍​នយោបាយ​តែ​ប៉ុណ្ណោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ