អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

ប្រមុខការទូតអឺរ៉ុប​ទៅតំបន់​ហ្កាហ្សា​

សំឡេង ០៤:៤៤
លោក​ស្រី​ប្រមុខ​ការទូត​អឺរ៉ុប​​ Catherine Ashton ​និង​​​លោក​នាយក​រដ្ឋមន្ត្រី​​ប៉ាលេស្ទីន​​Salam Fayyad ​នៅរ៉ាម៉ាឡាហ៍​
លោក​ស្រី​ប្រមុខ​ការទូត​អឺរ៉ុប​​ Catherine Ashton ​និង​​​លោក​នាយក​រដ្ឋមន្ត្រី​​ប៉ាលេស្ទីន​​Salam Fayyad ​នៅរ៉ាម៉ាឡាហ៍​ ©REUTERS/Mohamad Torokman
ដោយ៖ សៀក សារិន

លោក​ស្រី​ប្រមុខ​ការទូត​អឺរ៉ុប​ Catherine Ashton អញ្ជើញ​ទៅ​តំបន់​ហ្កាហ្សា​នៅ​ថ្ងៃ​អាទិត្យ​ទី១៨​កក្កដា​នេះ​ជាលើក​ទីពីរ​ នារយៈ​ពេល​បួនខែ​ចុងក្រោយ​នេះ។​ ទស្សនកិច្ច​នេះ​ធ្វើឡើង​ដើម្បី​ពិនិត្យ​​មើល​ថា​ តើ​ការ​កាត់​បន្ថយ​ខ្ទប់បិទ​នៅ​ពេល​ថ្មីៗ​នេះ​របស់​អ៊ីស្រាអែល​ទៅលើ​តំបន់​ ហ្កាហ្សា​ បាន​ទទួល​លទ្ធផល​អ្វីទៅ?​ហើយនិង​ដើម្បី​ឲ្យ​ដឹងថា​ តើ​សហភាព​អឺរ៉ុប​អាច​ធ្វើ​អ្វី​ខ្លះ​ជា​ជំនួយ​ដល់​ការ​ជួយ​បើក​ច្រក​ឲ្យ​មាន ​ការ​ចេញចូល​ត្រឹម​ត្រូវ​នៅ​តំបន់​ហ្កាហ្សា? 

ផ្សាយពាណិជ្ជកម្ម

ជាលើក​ទីមួយ​ដែល​លោក​ស្រី​ប្រមុខ​ការទូត​អឺរ៉ុប​Catherine Ashton​អញ្ជើញ​ទៅ​តំបន់​ហ្កាហ្សា ​ចាប់​តាំងពី​មាន​ការ​កាត់​បន្ថយ​ខ្ទប់បិទ​នៅ​ពេល​ថ្មីៗ​នេះ​របស់​អ៊ីស្រាអែល​ទៅលើ​តំបន់​ហ្កាហ្សា​រួចមក។​ នៅ​តំបន់​ហ្កាហ្សា​ លោក​ស្រី​Catherine Ashton​ច្បាស់​ជា​នឹង​ឃើញ​ថា​ គ្រឿង​ពស្តុភារ​មាន​ការ​ហូរ​ចូល​ស្រួល​ជាង​ពេល​មុន​ ពោលគឺ​បាន​កើន​ឡើង​ជា​៥០%​បើ​ប្រៀប​ផ្ទឹម​ទៅនឹង​សប្តាហ៍​មុនៗ។​ ក៏​ប៉ុន្តែ​ប្រជាជន​នៅ​តំបន់​ហ្កាហ្សា​នៅ​តែ​បាន​ត្រូវ​គេ​ហាម​ឃាត់​ពុំ​អនុញ្ញាត​ឲ្យ​ធ្វើ​ដំណើរ​ចេញ​ចូល​ទៅ​កាន់​តំបន់​Cisjordanie និង​តំបន់​Ramallah។

 
នៅ​ពេល​អញ្ជើញ​ទៅ​តំបន់​រ៉ាម៉ាឡាហ៍​កាលពី​ថ្ងៃ​សៅរ៍​ម្សិលមិញ​ លោក​ស្រី​ប្រមុខ​ការទូត​អឺរ៉ុប​ Catherine Ashton​បាន​ថ្លែង​ទាមទារ​ឲ្យ​មាន​ការ​បើក​ចំហ​ច្រក​ចេញចូល​នៅ​តំបន់​ហ្កាហ្សា​ឲ្យ​បាន​ទាំង​ស្រុង​ ពោលគឺ​បើក​ចំហ​ឲ្យ​ប្រជាជន​ហ្កាហ្សា​អាច​ធ្វើ​ដំណើរ​ចេញ​ចូល​បាន​ដោយ​សេរី​ ហើយ​និង​គ្រឿង​ពស្តុភារ​អាច​ហូរ​ចេញ​ចូល​បាន​ទាំង​សងខាង​នៅ​តាម​រាល់​ច្រក​ចេញ​ចូល​រវាង​តំបន់​ហ្កាហ្សា​នឹង​ប្រទេស​ដទៃ​ទៀត។​ លោក​ស្រី​ Catherine Ashton​បាន​ធ្វើ​សេចក្តី​ប្រកាស​នេះ​នៅ​មុខ​អ្នក​កាសែត​ ក្រោយ​ពី​មាន​ជំនួប​ជាមួយ​លោក​នាយក​រដ្ឋមន្ត្រី​ប៉ាលេស្ទីន​Salam Fayyad នៅរ៉ាម៉ាឡាហ៍។

លោក​ស្រី​ប្រមុខ​ការទូត​អឺរ៉ុប​ Catherine Ashton​បាន​ប្រកាស​បញ្ជាក់​ទៀតថា​ ធ្វើ​យ៉ាង​នេះ​ដើម្បី​ឲ្យ​ប្រជាជន​នៅ​តំបន់​ហ្កាហ្សា​អាច​មាន​ជីវភាព​រស់​នៅ​សម​ស្រប​តាម​ប្រក្រតី។​ គួរកត់​សម្គាល់​ថា​ តំបន់​ហ្កាហ្សា​បាន​ឋិត​នៅ​ក្រោម​ការ​គ្រប់គ្រង​របស់​ពួក​ប៉ាលេស្ទីន​ហាម៉ាស់​តាំងពី​​ខែ​មិថុនា​ឆ្នាំ២០០៧។

លោក​ស្រី​ Catherine Ashton​ដែល​បាន​ស្នើ​ឲ្យ​អ្នក​ការទូត​អឺរ៉ុប​មាន​តួ​នាទី​នៅក្នុង​ការ​ត្រួត​ពិនិត្យ​នៅ​តាម​ច្រក​ចេញចូល​នៅ​តំបន់​ហ្កាហ្សា​ ក៏​នឹង​ត្រូវ​មាន​ជំនួប​ពិភាក្សា​ជាមួយ​លោក​នាយក​រដ្ឋមន្ត្រី​អ៊ីស្រាអែល​នេតានយ៉ាហ៊ូ​ហើយនិង​លោក​ប្រធាន​រដ្ឋ​អំណាច​ប៉ាលេស្ទីន​Mahmoud Abbas​ផងដែរ។​ ប៉ុន្តែ​លោក​ស្រី​Catherine Ashton​ពុំ​ជួប​ពិភាក្សា​ឡើយ​ជាមួយ​មេដឹកនាំ​ប៉ាលេស្ទីន​ហាម៉ាស់​ហើយនិង​អ្នក​ដឹក​នាំ​អ៊ីស្លាម​និយម​ឡើយ។

មូលហេតុ​ដែល​ជំរុញ​ឲ្យ​លោក​ស្រី​ប្រមុខ​ការទូត​អឺរ៉ុប​ Catherine Ashton​ ពុំ​ព្រម​ជួប​មេដឹកនាំ​ប៉ាលេស្ទីន​ហាម៉ាស់​ហើយនិង​អ្នក​ដឹក​នាំ​អ៊ីស្លាម​និយម​ឯទៀតៗ​ បណ្តាល​មក​ពី​លោក​ស្រី​ពុំ​ចង់​ឲ្យ​គេ​ចោទ​ថា​ សហភាព​អឺរ៉ុប​មាន​ទំនាក់​ទំនង​ ហើយ​និង​គាំទ្រ​ពួក​ប៉ាលេស្ទីន​ហាម៉ាស់​និង​ពួក​អ្នក​អ៊ីស្លាម​ជ្រុល​និយម។​

ទន្ទឹម​គ្នា​នេះ​អ្នក​ការទូត​អាមេរិក​ក៏​មាន​សកម្មភាព​យ៉ាង​ខ្លាំង​ក្លា។​ កាលពី​ថ្ងៃ​ទី១៧​កក្កដា​ម្សិល​មិញ​ លោក​ប្រធាន​រដ្ឋ​អំណាច​ប៉ាលេស្ទីន​Mahmoud Abbas​បាន​មាន​ជំនួប​ពិភាក្សា​ជាមួយ​បេសកជន​ពិសេស​អាមេរិក​លោក​George Mitchell​ ក៏​ប៉ុន្តែ​គ្មាន​ទទួល​បាន​លទ្ធផល​អ្វី​ឡើយ។​ មិនតែ​ប៉ុណ្ណោះ​ លោក​ Mahmoud Abbas​បាន​ទាំង​សម្ដែង​កាលពី​ម្សិល​មិញ​ឲ្យ​ដឹង​ពី​ការ​រួញរា​របស់​លោក​ក្នុង​កិច្ច​ចរចា​ជាមួយ​អ៊ីស្រាអែល​ទៀតផង។

លោក​ប្រធាន​រដ្ឋ​អំណាច​ប៉ាលេស្ទីន​Mahmoud Abbas​យល់​ថា​ “​សហរដ្ឋ​អាមេរិក​នៅតែ​ពុំ​ទាន់​ធ្វើការ​ឆ្លើយតប​ទៅនឹង​ក្តីបារម្ភ​របស់​ប៉ាលេស្ទីន​នៅឡើយ​ពាក់ព័ន្ធ​នឹង​បញ្ហា​អាណានិគមកិច្ច​របស់​អ៊ី​ស្រា​អែល​​​ បញ្ហា​Jérusalem​​ និង​បញ្ហា​ព្រំដែន​នៃ​ឆ្នាំ១៩៦៧​ដែល​ត្រូវ​គេ​យក​មក​ធ្វើជាមូលដ្ឋាននៃកិច្ចចរចា​”។​ ហើយ​លោក​ Mahmoud Abbas​រឹងរិត​តែ​រួញរា​ទៅ​ទៀត​ នៅ​ពេល​ដែល​ពួក​ប៉ាលេស្ទីន​ហាម៉ាស់​បាន​ប្រកាស​ឲ្យ​ដឹង​ថា​ ពួកគេ​ប្រឆាំង​នឹង​ការ​ចាប់​ចរចា​ឡើងវិញ​ដោយ​ចំពោះ​ជាមួយ​ប្រទេស​អ៊ីស្រាអែល៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ