អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

វ៉ាស៊ីនតោននិងសេអ៊ូលធ្វើសមយុទ្ធគំរាមព្យុង

សំឡេង ០៤:៥៩
សមយុទ្ធនៃ​កងកម្លាំងយោធាកូរ៉េ​ខាង​ត្បូង​
សមយុទ្ធនៃ​កងកម្លាំងយោធាកូរ៉េ​ខាង​ត្បូង​ © Reuters
ដោយ៖ សៀក សារិន
២៥ នាទី

នៅតាម​ខ្សែស្រប​ទី៣៨​និង​នៅពី​លើ​ផ្ទៃ​សមុទ្រ​លឿង​ដែល​ប្រទេស​កូរ៉េ​ទាំងពីរ​ឈ្លោះ​ដណ្តើម​គ្នា​ថា​ជាដែន​សមុទ្រ​របស់​ខ្លួន​ កាលពី​ថ្ងៃចន្ទ​កន្លងទៅ​ទាហាន​កូរ៉េ​ខាងត្បូង​មាន​ការ​ភ្ញាក់​ផ្អើល​ នៅខណៈ​ដែល​គេ​ងើយមើល​ទៅលើ​មេឃ​ ស្រាប់តែ​ឃើញ​មាន​យន្តហោះ​យកការណ៍​ដែល​គ្មាន​អ្នកបើក​របស់​កូរ៉េ​ខាងជើង​ហោះ​នៅ​ក្នុង​ផ្ទៃ​អាកាស។​ការ​សំញែង​បង្ហាញ​បច្ចេកវិទ្យា​ទំនើប​របស់​កូរ៉េ​ខាងជើង​នេះ​ ធ្លាក់​ចំជួន​ពេល​ដែល​ទីក្រុង​វ៉ាស៊ីនតោន​និង​ទីក្រុង​សេអ៊ូល​ចាប់​ធ្វើ​សមយុទ្ធ។ 

ផ្សាយពាណិជ្ជកម្ម

ក្នុងរយៈពេល​១០ថ្ងៃ​ទាហាន​កូរ៉េ​ខាងត្បូង​៥៦ ០០០នាក់​និង​ទាហាន​អាមេរិកាំង​ប្រមាណ​៣០ ០០០នាក់​រួម​គ្នា​ធ្វើ​សមយុទ្ធ​នៅ​សមុទ្រ​លឿង​ឋិត​នៅ​ខាងលិច​នៃ​ប្រទេស​កូរ៉េ​ទាំងពីរ។

កម្មវត្ថុ​នៃ​សមយុទ្ធ​រួមគ្នា​អាមេរិក-កូរ៉េ​ខាង​ត្បូង​នេះ​គឺ​ធ្វើឡើង៖
-ទី១ ​ដើម្បី​ការពារ​និង​ប្រយុទ្ធ​ប្រឆាំង​នឹង​អំពើ​ភេរវកម្ម​ដែល​អាច​កើត​មាន​នា​ឱកាស​ជំនួប​កំពូល​G20​នៅ​ទីក្រុង​សេអ៊ូល​នៅ​ខែវិច្ឆិកា​ខាងមុខនេះ។
-ទី២ ​ដើម្បី​សម្ដែង​បង្ហាញ​ឲ្យ​ទីក្រុង​ព្យុងយ៉ាង​ឃើញ​ពី​អានុភាព​នៃ​កម្លាំងយោធា​របស់​សហរដ្ឋ​អាមេរិក​និង​ប្រទេស​កូរ៉េ​ខាងត្បូង។​ ហើយ​ជា​ពិសេស​គំរាម​ដល់​កូរ៉េ​ខាងជើង​កុំ​ឲ្យ​ហ៊ាន​ធ្វើការ​វាយ​ប្រហារ​ដូច​កាល​ខ្លួន​បាន​ធ្វើ​ទៅលើ​នាវា​Choenan​របស់​កូរ៉េ​ខាងត្បូង​ដែល​បាន​បណ្តាល​ឲ្យ​មាន​នាវិក​កូរ៉េ​ខាងត្បូង​ស្លាប់​៤៦នាក់​កាលពី​ខែមីនា​កន្លងទៅ។

សមយុទ្ធ​រួមគ្នា​រវាង​សហរដ្ឋ​អាមេរិក​និង​កូរ៉េ​ខាងត្បូង​នេះ​បាន​ត្រូវ​កង​កម្លាំង​យោធា​កូរ៉េ​ខាង​ជើង​​បរិហារ​ថា​ ជា​បេសកកម្ម​ឈ្លានពាន​ដែល​យោធា​កូរ៉េ​ខាងជើង​នឹង​ធ្វើការ​តបត​ ហើយនិង​ធ្វើ​ទណ្ឌកម្ម​យ៉ាង​ធ្ងន់ធ្ងរ​ទៅលើ​កងកម្លាំង​ចក្រពត្រ​និយម។​ ម្យ៉ាងទៀត​កាលពី​ខែមុន​ទីក្រុង​ព្យុងយ៉ាង​ធ្លាប់បាន​គំរាម​ថា​នឹង​ប្រើ​អាវុធ​នុយ​ក្លេអ៊ែរ​របស់​ខ្លួន​ ហើយនិង​ធ្លាប់បាន​គំរាមថា​នឹង​ធ្វើ​ឲ្យ​ទីក្រុង​សេអ៊ូល​ក្លាយទៅជា​សមុទ្រ​ភ្លើង​សង្គ្រាម។​ ប៉ុន្តែ​ការ​គំរាម​ទាំងនេះ​វា​ក្លាយ​ទៅ​ជា​ទម្លាប់​មួយ​របស់​ប្រទេស​កូរ៉េ​ខាង​ជើង​ទៅហើយ។

អ្នក​យុទ្ធសាស្ត្រ​អាមេរិក​មាន​ការ​ប្រុង​ប្រយ័ត្ន​យ៉ាង​ម័តធ្យ័ត​ដោយ​គេ​យល់ថា​ ការ​វាយ​ប្រហារ​ទៅលើ​នាវា​Choenan​របស់​កូរ៉េ​ខាងត្បូង​គឺ​ពិត​ជា​បើក​បង្ហាញ​ឲ្យ​ឃើញ​នូវ​វគ្គថ្មី​មួយ​នៃ​អស្ថិរភាព​ដែល​អាច​ជាប់​ទាក់​ទង​ទៅនឹង​ការ​រៀបចំ​ឲ្យ​កូនប្រុស​នៃ​ប្រមុខ​ដឹកនាំ​កូរ៉េ​ខាងជើង​ឡើង​មក​កាន់​​មុខ​តំណែង​ជំនួស​ឪពុក។

រដ្ឋបាល​របស់​លោក​អូបាម៉ា​ខ្លាច​ក្រែង​មាន​ការ​រករឿង​បង្ក​ហេតុ​ពី​សំណាក់​ទីក្រុង​ព្យុងយ៉ាង​ នាឱកាស​សាងផ្ទេរ​អំណាច​ពី​គីម​ ចុងអ៊ីល​មក​កូន​ប្រុស​ទីបី​ឈ្មោះ​គីម​ ចុង​អ៊ុន។

ប្រមុខ​ដឹកនាំ​នៃ​មន្ទីរ​ប៉ង់តាហ្គោន​ខ្លាចក្រែង​ការ​វាយ​ប្រហារ​ទៅលើ​នាវា​កូរ៉េ​ខាងត្បូង​Choenan​ជា​ការ​វាយ​ប្រហារ​série​ទីមួយ​ ហើយ​អាច​កើតមាន​ការ​វាយ​ប្រហារ​បន្ត​បន្ទាប់​មក​ទៀត។​ ដោយ​ហេតុ​ថា​ នៅ​ខែ​ក្រោយ​របប​ផ្តាច់​ការ​កូរ៉េ​ខាងជើង​នឹង​កោះហៅ​ឲ្យ​មាន​កិច្ច​ប្រជុំ​ពិសេស​មួយ​ដើម្បី​ធ្វើការ​ជ្រើស​តាំង​អ្នក​ដឹកនាំ​ថ្មី។​ នៅ​ឱកាស​នោះ​កូនប្រុស​ទីបី​របស់​គីម​ ចុងអ៊ីល​ឈ្មោះ​គីម​ ចុងអ៊ុន​ដែល​មាន​អាយុ​២៧ឆ្នាំ​ប្រហែល​ជា​នឹង​ត្រូវ​ប្រកាស​ជា​ផ្លូវការ​ឲ្យ​ឡើង​មក​កាន់​កាប់​តំណែង​ជំនួស​លោក​គីម​ ចុងអ៊ីល​ជា​ឪពុក។

ទាំងនេះ​បាន​ធ្វើឲ្យ​រដ្ឋបាល​លោក​អូបាម៉ា​យល់ថា​ ទីក្រុង​ព្យុងយ៉ាង​គ្មាន​បំណង​នឹង​បើក​កិច្ច​ចរចា​ឡើយ​ពាក់ព័ន្ធ​នឹង​បញ្ហា​នុយក្លេអ៊ែរ​របស់​ខ្លួន។​ ហេតុ​ដូច្នេះ​ហើយ​បាន​ជា​រដ្ឋបាល​អាមេរិក​យល់ថា​ គេ​ត្រូវតែ​បន្ត​ដាក់​សម្ពាធ​ទាំង​វិស័យ​យោធា​និង​ទាំង​វិស័យ​ហិរញ្ញវត្ថុ​ទៅលើ​កូរ៉េ​ខាង​ជើង។

ហើយ​កងកម្លាំង​យោធា​អាមេរិក​រៀបចំ​ធ្វើ​សមយុទ្ធ​ថ្មី​មួយ​ទៀត​ប្រឆាំង​នឹង​នាវា​មុជទឹក​ជា​មួយ​កងកម្លាំង​យោធា​កូរ៉េ​ខាងត្បូង​នៅ​ដើម​ខែ​កញ្ញា​ខាងមុខនេះ​ ដើម្បី​បញ្ជាក់​ឲ្យ​កូរ៉េ​ខាងជើង​ដឹង​ថា​ទីក្រុង​វ៉ាស៊ីនតោន​បាន​ផ្តេជ្ញា​ចិត្ត​យ៉ាង​មោះមុត​ក្នុង​កិច្ច​ការពារ​ប្រទេស​កូរ៉េ​ខាងត្បូង។

ចំពោះ​មុខ​ស្ថានការណ៍​បែបនេះ​ ប្រទេស​ចិន​ដែល​ជា​សម្ពន្ធមិត្ត​របស់​ទីក្រុង​ព្យុងយ៉ាង​បារម្ភ​ខ្លាចក្រែង​ប្រទេស​កូរ៉េ​ខាងជើង​ស្គាល់​អស្ថិរភាព។​ ហើយ​សភាព​ឃ្លេងឃ្លោង​នៃ​របប​កុម្មុយនិស្ត​កូរ៉េ​ខាងជើង​អាច​បណ្តាល​ឲ្យ​មាន​ជន​ភៀស​ខ្លួន​កូរ៉េ​ខាងជើង​រត់​ភ្លូក​ទឹក​ភ្លូកដី​មក​រក​ទីជម្រក​នៅ​ព្រំដែន​ចិន-កូរ៉េ។

សូមគូស​បញ្ជាក់ថា​ ការ​ពុំ​ចុះ​សម្រុង​នឹង​គ្នា​រវាង​សហរដ្ឋ​អាមេរិក​នឹង​ប្រទេស​ចិន​ពាក់ព័ន្ធ​នឹង​បញ្ហ​កូរ៉េ​ខាងជើង​ពុំ​ដែល​មាន​សភាព​ធំធេង​ដូច​នៅ​ពេល​នេះ​ឡើយ។​ ហើយ​រដ្ឋបាល​អូបាម៉ា​ប្រហែល​ជា​ចង់​សម្ដែង​ប្រាប់​ទីក្រុង​ប៉េកាំង​ឲ្យ​ដឹង​ថា​ សហរដ្ឋ​អាមេរិក​ពុំ​បោះបង់​ចោល​ឡើយ​តំបន់​អាស៊ី​ចុង​បូព៌ា៕.

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ