អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

កូរ៉េខាងត្បូង​បន្ត​ដំឡើង​សាច់ដុំ​ដាក់​កូរ៉េខាងជើង

សំឡេង ០៨:២១
នាវា​ចម្បំាង​កូរ៉េខាងត្បូង​នា​ពេល​សមយុទ្ធ​ថ្ងៃ​ទី៦ ធ្នូ ឆ្នំា ២០១០
នាវា​ចម្បំាង​កូរ៉េខាងត្បូង​នា​ពេល​សមយុទ្ធ​ថ្ងៃ​ទី៦ ធ្នូ ឆ្នំា ២០១០ ©Reuters
៤៤ នាទី

ចាប់​ពី​ថ្ងៃ​ច័ន្ទ ទី៦ ធ្នូ​នេះ និង​មាន​រយៈពេល ៥ថ្ងៃ កងទ័ព​កូរ៉េខាងត្បូង​បាន​ចាប់​​ផ្តើម​ធ្វើ​សមយុទ្ធ​តែ​ឯង។ ជា​សមយុទ្ធ​មួយ​ដែល​បាន​ធ្វើ​ឡើង បន្ទាប់​ពី​សមយុទ្ធរួម​អាមេរិក កូរ៉េខាងត្បូង និង​សមយុទ្ធរួម​អាមេរិក ជប៉ុន និង​ចំ​ពេល​ដែល​ភាព​តានតឹង​កំពុង​បន្ត​គ្របដណ្តប់​លើ​ឧបទ្វីបកូរ៉េ។ ទន្ទឹម ​គ្នា​នេះ​នៅ​សហរដ្ឋអាមេរិក​ឯណោះ អាមេរិក កូរ៉េខាងត្បូង និង​ជប៉ុន​ផ្តើម​កិច្ចប្រជុំ​រួម​ដើម្បី​ស្វែង​រក​យុទ្ធសាស្រ្ត​ថ្មី​ប្រឈម​ ទប់ទល់​នឹង​ទង្វើ​របស់​កូរ៉េខាងជើង។

ផ្សាយពាណិជ្ជកម្ម

សមយុទ្ធ​កូរ៉េខាងត្បូង​តែ​ឯង​បាន​ធ្វើ​ឡើង​នៅ​ក្រោម​រូបភាព​យ៉ាង​ធំធេង​ ក្នុង​បំណង​បង្ហាញ​សាច់ដុំ​ដាក់​កូរ៉េខាងជើង។ សមយុទ្ធ​តែ​ឯង​រយៈពេល ៥ថ្ងៃ​ត្រូវ​បាន​រៀបចំ​ឡើង​នៅ​ទីតំាង​ចំនួន ២៩​កន្លែង​ខុស​គ្នា​ស្ថិត​ក្នុង​សមុទ្រ​លឿង ដូច​ដែល​សមយុទ្ធ​រវាង​កូរ៉េខាងត្បូង និង​អាមេរិក​បាន​ធ្វើ​កន្លង​មក។ គឺ​នៅ​ម្តុំ​នោះ​ហើយ​ដែល​ភាព​តានតឹង​បាន​ឡើង​ដល់​កំពូល​រវាង​បងប្អូន​បង្កើត ​គូសត្រូវ​ទំាង​ពីរ ពិសេស តំាង​ពី​ក្រោយ​កូរ៉េខាងជើង​បាន​បាញ់​ផ្លោង​គ្រាប់​កំាភ្លើងធំ​ចូល​កោះ Yeonpyeong ដែល​បណ្តាល​ឲ្យ​ស្លាប់​ទាហាន​កូរ៉េខាងត្បូង​ពីរនាក់ និង​ជនស៊ីវិល​ពីរនាក់​កាល​ពី​ថ្ងៃទី ២៣ វិច្ឆិកា។

ខណៈ​នេះ សមយុទ្ធ​របស់​កូរ៉េខាងត្បូង​បាន​ធ្វើ​ឡើង​នៅ​ក្បែរ​កោះ​ជា​ច្រើន​ក្នុង​ សមុទ្រ​លឿង​ស្ថិត​នៅ​តាម​បណ្តោយ​ព្រំដែន​សមុទ្រ​ដែល​កូរ៉េខាងត្បូង​កំពុង​ មាន​ជម្លោះ​ជា​មួយ​កូរ៉េខាងជើង។ លំហាត់សឹក​ផ្លូវអាកាស និង​ផ្លូវទឹក​ត្រូវ​បាន​គេ​យក​មក​អនុវត្ត​នៅ​ក្នុង​សមយុទ្ធ​នោះ ពិសេស គឺ​ការ​បាញ់​គ្រាប់​កំាភ្លើង​មែនទែន ​ចេញ​ពី​នាវាចម្បំាង។

ទន្ទឹម​គ្នា​នេះ មាន​កោះ​ចំនួន ៥​ដែល​កូរ៉េខាងខាងត្បូង​បាន​ពង្រឹង​ប្រព័ន្ធ​ការពារ ដោយ​ដឹកជញ្ជូន​ទាហាន កំាភ្លើងធំ និង​គ្រាប់​មីស្ស៊ីល​ប្រឆំាង​មីស្ស៊ីល​ទៅ​ដាក់​តំាង​​នៅ​លើ​កោះ​ទំាង ៥ ហើយ​ក្នុង​ចំណោម​កោះ​ទំាង ៥នោះ ក៏​មាន​កោះ Yeonpyeong ផង​ដែរ។

យ៉ាង​ណា​ក៏​ដោយ និង​ដើម្បី​ជៀសវាង​ការ​ផ្ចាញ់ផ្ចាល​ដោយ​ផ្ទាល់​ដាក់​កូរ៉េខាងជើង កូរ៉េខាងត្បូង​មិន​បាន​បាញ់​គ្រាប់​មែនទែន​ចេញ​ពី​នាវា​ចម្បំាង​នៅ​ក្បែរ​ កោះ​យ៉ុងព្យុង (Yeonpyeong) នោះ​ទេ តែ​បាន​បាញ់​ចេញ​ពី​ក្បែរ​កោះ Daecheong ដែល​មាន​ចម្ងាយ ៨០​គីឡូមែត្រ​ស្ថិត​ប៉ែក​ខាង​លិច​កោះ​យ៉ុងព្យុង។

អ្វី​ដែល​គេ​មិន​ទាន់​អាច​ដឹង​បាន​នោះ​គឺ​ថា តើ​ការ​បាញ់​ចេញ​ពី​នាវា​ចម្បំាង​របស់​កូរ៉េខាងត្បូង​ពេល​នេះ បាន​ធ្វើ​ឡើង​នៅ​លើ​ដែនទឹក​ដែល​កូរ៉េខាងជើង​បាន​ទាមទារ​ជា​កម្មសិទ្ធិ​របស់​ គេ ឬ​អត់ ព្រោះ​សូម​ជម្រាបជូន​ថា តំាង​ពី​សង្រ្គាម​កូរ៉េ​ចន្លោះ​ឆ្នំា ១៩៥០-១៩៥៣​បាន​បិទ​បញ្ចប់​មក របបក្រុង​ព្យុងយ៉ាង​មិន​ដែល​ទទួល​ស្គាល់​ខ្សែព្រំដែនសមុទ្រ​ដែល​គូសវាស​ដោយ​ អង្គការសហប្រជាជាតិ​ទេ។

កងទាហាន​កូរ៉េខាងត្បូង
កងទាហាន​កូរ៉េខាងត្បូង ©Reuters

កូរ៉េខាងត្បូង​បញ្ជាក់​ពី​ជំហរ​មិន​ចុះ​ញ៉ម​របស់​ខ្លួន

ក្រោយ​ពី​សង្គ្រាម​កូរ៉េ​បាន​បិទ​បញ្ចប់​ជាង​កន្លះ​សតវត្សរ៍​មក គ្មាន​សន្ធិសញ្ញា​សន្តិភាព​ណា​មួយ​ដែល​បងប្អូន​បង្កើត​ជា​គូសត្រូវ​ទំាង​ពីរ ​បាន​ចុះ​ហត្ថលេខា​រួម​គ្នា​ទេ។ បើ​និយាយ​ក្នុង​លក្ខណៈ​បច្ចេកទេស កូរ៉េខាងជើង និង​ខាងត្បូង​បន្ត​ស្ថិត​ក្នុង​ស្ថានភាព​សង្រ្គាម​ដដែល។

តាម​ពិត​ទៅ សមយុទ្ធ​របស់​កូរ៉េខាងត្បូង​ពេល​នេះ​ត្រូវ​បាន​គ្រោង​ទុក​ជា​យូរ​មក​ហើយ តែ​ដោយ​មាន​ព្រឹត្តិការណ៍​ប្លែកៗ​បាន​កើត​មាន​ជា​បន្តបន្ទាប់​មក កូរ៉េខាងត្បូង​ក៏​បាន​ពន្យា​សមយុទ្ធ​របស់​ខ្លួន​មក​ទល់​ថ្ងៃ​នេះ។ ចំណុច​មួយ​ទៀត និង​អ្វី​ដែល​កូរ៉េខាងត្បូង​បាន​និង​កំពុង​ធ្វើ​នេះ គឺ​ទីក្រុង​សេអ៊ូល​ចង់​បញ្ជូនសារ​​ប្រាប់​ទីក្រុង​ព្យុងយ៉ាង​ថា បើ​កាន់​តែ​គំរាម កាន់​តែ​ធ្វើ។

ជា​ការ​ពិត កូរ៉េខាងត្បូង​មិន​បាន​ធ្វើ​សមយុទ្ធ​នៅ​ក្បែរ​កោះ​យ៉ុងព្យុង​នោះ​ទេ ព្រោះ​ដើម្បី​ចៀសវាង​ការ​យក​ប្រេង​ទៅ​ចាក់​បន្ថែម​លើ​ពំនូកភ្លើង​​ដែល​កំពុង ​មាន​ផ្សែង តែ​នេះ​មិន​មាន​ន័យ​ថា កូរ៉េខាងត្បូង​ខ្លាច​ការ​សម្លុត​គំរាម​របស់​កូរ៉េខាងជើង​ទេ។ ផ្ទុយ​ទៅ​វិញ លោក​រដ្ឋមន្ត្រី​ថ្មី​នៃ​ក្រសួង​ការពារជាតិ​កូរ៉េខាងត្បូង​ដែល​មាន​ជំហរ​ ម៉ឹងម៉ាត់​បាន​ប្រកាស​ព្រមាន​រួច​ហើយ​ថា បើ​កូរ៉េខាងជើង​ហ៊ាន​បាញ់​ផ្លោង​គ្រាប់​កំាភ្លើងធំ​ជា​ថ្មី​ទៀត លោក​នឹង​បញ្ជា​ឲ្យ​បើក​ការ​វាយប្រហារ​តាម​ផ្លូវអាកាស។

លោកស្រី Hillary Clinton ប្រមុខការទូតអាមេរិក
លោកស្រី Hillary Clinton ប្រមុខការទូតអាមេរិក

ជំនួប​រវាង​អាមេរិកកូរ៉េខាងត្បូងជប៉ុនតែ​គ្មាន​វត្តមាន​ប្រទេស​ចិន

កិច្ចប្រជុំ​ត្រីភាគី អាមេរិក កូរ៉េខាងត្បូង និង​ជប៉ុន​ពេល​នេះ​បាន​បង្ហាញ​យ៉ាង​ច្បាស់ អំពី​សម្ព័ន្ធមិត្ត​មិន​អាច​កាត់​ផ្តាច់​ចេញ​ពី​​គ្នា​បាន និង​ការ​ប្តេជ្ញាចិត្ត​ក្នុង​ការ​ធានា​សន្តិសុខ​នៅ​ក្នុង​ឧបទ្វីប​កូរ៉េ និង​នៅ​ក្នុង​តំបន់​ទំាង​មូល ពិសេស ស្វែង​រក​យុទ្ធសាស្រ្ត​ថ្មី​ដើម្បី​និយាយ​ជា​មួយ​ចិន​នៅ​ក្នុង​បញ្ហា​ ឧបទ្វីបកូរ៉េ។ ដូច្នេះ បើ​គេ​ត្រូវ​ការ​ស្វែង​រក​យុទ្ធសាស្រ្ត​ថ្មី​ដើម្បី​ងាយស្រួល​ធ្វើ​ការ​ ជាមួយ​ចិន អវត្តមាន​ចិន​នៅ​ក្នុង​កិច្ចប្រជុំ គឺ​ជា​រឿង​មួយ​ធម្មតា។ នៅ​មាន​ហេតុផល​មួយ​ទៀត អវត្តមាន​ចិន​នៅ​ក្នុង​កិច្ចប្រជុំ​ពេល​នេះ គឺ​ជា​សញ្ញា​មួយ​ដែល​អាមេរិក កូរ៉េខាងត្បូង និង​ជប៉ុន​ចង់​ប្រាប់​ចិន​ថា គេ​មិន​សប្បាយចិត្ត​ទេ ​ចំពោះ​ជំហរ​របស់​ទីក្រុង​ប៉េកំាង​នៅ​ក្នុង​បញ្ហា​ កូរ៉េ​ ជា​ពិសេស ជំហរ​របស់​ចិន​​​ចំពោះ​ទង្វើ​របស់​កូរ៉េខាងជើង​កន្លង​មក។

នរណា​ក៏​ដឹង​ដែរ​ថា ចិន​គឺ​ជា​សម្ព័ន្ធមិត្ត​ចាក់ទឹក​មិន​លិច​របស់​កូរ៉េខាងជើង ចិន​ជា​ប្រទេស​មួយ​ដែល​មាន​ទឹកមាត់​ប្រៃ​អាច​និយាយ​ជាមួយ​កូរ៉េខាងជើង​បាន។ តែ​គេ​ក៏​មិន​ត្រូវ​ភ្លេច​ទេ​ថា ចិន​ក៏​បាន​ចេញ​មុខ​ការពារ​កូរ៉េខាងជើង និង​ពេល​ខ្លះ មិន​និយាយ​អ្វី​ទំាង​អស់​នៅ​ក្នុង​ទង្វើ​កូរ៉េខាងជើង​មួយ​ចំនួន​ដែល​សហគមន៍​ អន្តរជាតិ​មិន​សប្បាយចិត្ត។ ថ្មីៗ​នេះ ពិសេស​ក្រោយ​ពេល​ដែល​កូរ៉េខាងជើង​បាន​បាញ់ផ្លោង​គ្រាប់​កំាភ្លើងធំ​ ទៅលើ​​កោះ Yeonpyeong ដែល​បណ្តាល​ឲ្យ​ស្លាប់​ទាហាន​កូរ៉េខាងត្បូង​ពីរនាក់ និង​ជនស៊ីវិល​ពីរនាក់​កាល​ពី​ថ្ងៃទី ២៣ វិច្ឆិកា​កន្លង​មក ចិន​ក៏​បាន​នៅ​ស្ងៀម​ឈឹង​មិន​មាត់ ក អ្វី​ទំាង​អស់។

ជំនួប​រវាង​លោក​ប្រធានាធិបតី​អាមេរិកBarack Obama និង​លោក​ប្រធានាធិបតី​ចិនHu Jintao នៅ​ទីក្រុង​សេអ៊ូល​កាល​ពី​ថ្ងៃទី១១ វិច្ឆិកា ២០១០
ជំនួប​រវាង​លោក​ប្រធានាធិបតី​អាមេរិកBarack Obama និង​លោក​ប្រធានាធិបតី​ចិនHu Jintao នៅ​ទីក្រុង​សេអ៊ូល​កាល​ពី​ថ្ងៃទី១១ វិច្ឆិកា ២០១០ ©REUTERS/Jim Young

លោក​ហ៊ូជិនតាវ៖ « អាមេរិក និង​ចិន​ត្រូវ​បង្កើន​ការ​ទុកចិត្ត​រវាង​គ្នា »

ពិត​មែន​តែ​ចិន​មិន​ត្រូវ​បាន​គេ​អញ្ជើញ​ឲ្យ​ចូល​រួម​ក្នុង​កិច្ចប្រជុំ​ ត្រីភាគី កូរ៉េខាងត្បូង ជប៉ុន និង​អាមេរិក​នៅ​ថ្ងៃ​នេះ​ក៏​ដោយ ក៏​នៅ​យប់មិញ លោកប្រធានាធិបតី​អាមេរិក បារ៉ាក់ អូបាម៉ា​បាន​ទូរស័ព្ទ​ទៅ​និយាយ​ជាមួយ​លោក​ប្រធានាធិបតី​ចិន ហ៊ូ ជិនតាវ អស់​ជា​ច្រើន​ម៉ោង។ នៅ​ក្នុង​កិច្ចសន្ទនា​នោះ លោក​ហ៊ូ ជិនតាវ​បាន​សម្តែង​ក្តីបារម្ភ​របស់​ខ្លួន​ចំពោះ​ស្ថានការណ៍​នៅ​ឧបទ្វីប​ កូរ៉េ។ លោក​ប្រមុខរដ្ឋ​ចិន​បាន​និយាយ​ប្រាប់​លោក​ប្រមុខរដ្ឋអាមេរិក​ថា ស្ថានការណ៍​ដែល​បាន​និង​កំពុង​កើត​មាន​នៅ​ឧបទ្វីប​កូរ៉េ​នា​ពេល​នេះ នឹង​អាច​ក្លាយ​ទៅ​ជា​ស្ថានការណ៍​ដ៏​គ្រោះថ្នាក់​មួយ​ដែល​គ្មាន​នរណា​អាច​ ក្តាប់​បាន។ យោង​តាម​លោក​ហ៊ូ ជិនតាវ គេ​ត្រូវ​តែ​ប្រញិបប្រញាប់​ដោះស្រាយ​បញ្ហា​នេះ​ដោយ​ស្ងៀមស្ងាត់ និង​ដោយ​សន្តិវិធី។ ទន្ទឹម​គ្នា​នេះ លោក​ប្រធានាធិបតី​ចិន​ក៏​បាន​បញ្ជាក់​ពី​ភាព​ចំា​បាច់​ដែល​ចិន និង​អាមេរិក​ត្រូវ​បង្កើន​ការ​ទុកចិត្ត​រវាង​គ្នា និង​កិច្ចសន្ទនា​រួម​គ្នា​ក្នុង​ការ​ដោះស្រាយ​បញ្ហា​ពិភពលោក​ជា​ច្រើន​ដ៏​ រសើប។

ជា​ចម្លើយ​តប​វិញ លោក​ប្រធានាធិបតី​អាមេរិក អូបាម៉ា​បាន​លើក​ឡើង​ពី​ផលប្រយោជន៍​រួម ដែល​អាមេរិក និង​ចិន​ត្រូវ​ពួតដៃគ្នា​ដើម្បី​ធានា​ស្ថិរភាព​នៅ​អាស៊ី​ឦសាន និង​ការ​បំបាត់​នុយក្លេអ៊ែរ​ពី​របបកម្មុយនិស្ត​កូរ៉េខាងជើង។ ទន្ទឹម​គ្នា​នេះ លោក​អូបាម៉ា​ក៏​បាន​បញ្ជាក់​ពី​ភាព​ចំាបាច់​ដែល​កូរ៉េខាងជើង​ត្រូវ​បញ្ឈប់​ កាយវិការ​បង្ករឿង​ ហេតុ​ដែល​នំា​ទៅ​រក​ការ​ផ្ទុះ​សង្រ្គាម​ជា​ថ្មី​នៅ​ ឧបទ្វីបកូរ៉េ។

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ