អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អគ្គនាយក​មូលនិធិរូបិយវត្ថុ​អន្តរជាតិ​បង្ហាញ​ខ្លួន​នៅ​តុលាការ​ក្រុងញូវយ៉ក

សំឡេង ០៨:៤៦
ក្រុម​នគរបាល​អាមេរិក​កំពុង​នំា​ខ្លួនលោកដូមីនិក ស្រ្តូសកាន់ ដៃជាប់ខ្នោះ
ក្រុម​នគរបាល​អាមេរិក​កំពុង​នំា​ខ្លួនលោកដូមីនិក ស្រ្តូសកាន់ ដៃជាប់ខ្នោះ REUTERS/Mike Segar
៤០ នាទី

នៅ​ថ្ងៃច័ន្ទ ទី១៦ ឧសភា​នេះ លោក​ដូមីនិក ស្រ្តូសកាន់ (Dominique Strauss-Kahn) អគ្គនាយក​មូលនិធិរូបិយវត្ថុ​អន្តរជាតិ​ត្រូវ​បង្ហាញ​ខ្លួន​នៅ​ចំពោះ​តុលាការ​ក្នុង​ទីក្រុង​ញូយ៉ក។ នៅ​ថ្ងៃ​អាទិត្យ ទី១៥ ឧសភា​ម្សិលមិញ អគ្គនាយក​មូលនិធិរូបិយវត្ថុ​អន្តរជាតិ​រូប​នេះ​ត្រូវ​បាន​រដ្ឋអាជ្ញា​ក្រុង​ញូវយ៉ក​ធ្វើ​ការ​ចោទប្រកាន់​ក្នុង​បទល្មើស​ចំនួន​បី៖ ការ​បំពារបំពាន​​ផ្លូវភេទ ការប៉ុនប៉ង​រំលោភ​សេពសន្ថវៈ និង​ការ​ឃុំខ្លួន​មនុស្ស​ដោយ​ខុសច្បាប់។ លោក ដូមីនិក ស្រ្តូសកាន់​បាន​ប្រកាស​ច្រានចោល​នូវ​គ្រប់​ការ​ចោទប្រកាន់​ទំាង​អស់។

ផ្សាយពាណិជ្ជកម្ម

តាម​ច្បាប់​អាមេរិកំាង លោក​ដូមីនិក ស្រ្តូសកាន់ ដែល​ជនជាតិ​បារំាង​នំា​គ្នា​ហៅ​កាត់​ថា DSK ត្រូវ​បង្ហាញ​ខ្លួន​ជា​ផ្លូវការ​នៅ​ថ្ងៃ​អាទិត្យ ទី១៥ ឧសភា​ម្សិលមិញ ពោល​គឺ ២៤ម៉ោង បន្ទាប់​ពី​រដ្ឋអាជ្ញា​ក្រុង​ញូវយ៉ក​បាន​ធ្វើ​ការ​ចោទ​ប្រកាន់ ជាផ្លូវការ។ នៅ​ទីបំផុត ការ​បង្ហាញ​ខ្លួន​របស់​លោក DSK ត្រូវ​បាន​ពន្យារ​ពេល​មក​ដល់​ថ្ងៃច័ន្ទ ទី១៦ ឧសភា​​នេះ។ ការ​ពន្យារ​ពេល​ដោយ​លោក DSK បាន​យល់​ព្រម​ឲ្យ​ក្រុម​នគរបាល​បន្ត​ស្វែង​រក​ភស្តុតាង​មួយ​ចំនួន​ទៀត ដូច​យ៉ាង​ពិនិត្យ​លើ​ខ្លួន​ប្រាណ​របស់​លោក​ដើម្បី​ចង់​ដឹង​ថា តើ​អាច​មាន​ស្លាកស្នាម​​ក្រចក ឬ​អ្វី​ផ្សេង ដែល​ស្រ្តី​បម្រើ​ក្នុង​សណ្ឋាគារ Sofitel New York បាន​ប៉ះពាល់​លើ​រូប​លោក DSK ឬ​អត់ ? និង​ពិនិត្យ​លើ​សម្លៀកបំពាក់​របស់​លោក DSK ដែល​អាច​មាន​ជាប់​ស្នាម ADN។

សូម​ជម្រាប​ជូន​ថា ប្រព័ន្ធ​តុលាការ​របស់​ប្រទេស​បារំាង និង​សហរដ្ឋអាមេរិក​មាន​លក្ខណៈ​ផ្ទុយ​គ្នា​ស្រឡះ។ នៅ​ក្នុង​ប្រព័ន្ធ​តុលាការ​បារំាង គេ​ត្រូវ​បើក​ការ​ស៊ើបអង្កេត​ឲ្យ​បាន​ស៊ីជម្រៅ ដែល​ពេល​ខ្លះ ប្រើ​ពេល​យូរអង្វែង​ដើម្បី​ប្រមូល​ភស្តុតាង​គ្រប់គ្រាន់​ជា​មុន​សិន មុន​នឹង​ចៅក្រម​ស៊ើបអង្កេត​សម្រេច​ធ្វើការ​ចោទប្រកាន់ និង​សម្រេច ឬ​មិន​សម្រេច​បញ្ជូន​សំណុំរឿង​របស់​ជនជាប់ចោទ​ទៅ​ឲ្យ​តុលាការ​ដើម្បី​ជំនុំជម្រះ។ តែ​ប្រព័ន្ធ​តុលាការ​នៅ​សហរដ្ឋអាមេរិក រដ្ឋអាជ្ញា​ជា​អ្នក​ចេញ​មុខ​ប្រមូល​គ្រប់​ភស្តុតាង​ទំាង​អស់ ដើម្បី​បង្ហាញ​ពី​ពិរុទ្ធភាព​ជា​យថាហេតុ​របស់​ជនជាប់ចោទ និង​កសាង​សំណុំរឿង​បញ្ជូន​ទៅ​តុលាការ​ភ្លាមៗ។ បន្ទាប់​មក គឺ​ក្រុមមេធាវី​របស់​ជនជាប់ចោទ ជា​អ្នក​ចេញ​មុខ​ការពារ​កូនក្តី និង​លើក​ភស្តុតាង​ទៅ​បង្ហាញ​ថា អ្វី​ដែល​រដ្ឋអាជ្ញា​បាន​ចោទ​លើ​កូនក្តី ជា​រឿង​មិន​ពិត។

លោក DSK អាចនឹងទទួលទោសជាប់ពន្ធនាគារ​យ៉ាង​តិច ២០ឆ្នំា

តំាង​ពី​ថ្ងៃ​អាទិត្យ ទី១៥ ឧសភា​ម្សិលមិញ​មក មេធាវី​ម្នាក់​របស់​លោក DSK បាន​ប្រាប់​ឲ្យ​ដឹង​​ថា កូនក្តី​របស់​លោក​បាន​ប្រកាស​ច្រានចោល​គ្រប់​ការ​ចោទ​ប្រកាន់​ទំាងអស់​របស់​រដ្ឋអាជ្ញា​ក្រុង​ញូវយ៉ក និង​ថា ខ្លួន​លោក​គ្មាន​កំហុស​អ្វី​ទេ។ ក៏​ប៉ុន្តែ ប្រសិន​លោក DSK ប្រកាស​ទទួល​ស្គាល់​កំហុស​របស់​ខ្លួន ឬ​មួយ​ក៏​តុលាការ​បាន​រក​ឃើញ​ភស្តុតាង​គ្រប់គ្រាន់ ដូច​ការ​ចោទ​ប្រកាន់​របស់​រដ្ឋអាជ្ញា លោក DSK នឹង​ត្រូវ​ទទួល​ទោស​ជាប់​ក្នុង​ពន្ធនាគារ​ចន្លោះ​ពី ២០ ទៅ ២៥ឆ្នំា។

យ៉ាង​ណា​ក៏​ដោយ វត្តមាន​របស់​លោក DSK នៅ​ចំពោះ​មុខ​តុលាការ​ក្នុង​ថ្ងៃ​នេះ គ្រាន់​តែ​ជា​ជំហាន​ដំបូង​នៃ​ដំណើរការ​កាត់ទោស​លោក DSK ដែល​នឹង​ត្រូវ​ប្រើ​ពេល​យូរ​អង្វែង រហូត​ដល់​រាប់​ខែ។ នៅ​ក្នុង​សវនាការ​ថ្ងៃ​នេះ
ព្រះរាជអាជ្ញា​នឹង​ធ្វើ​ការ​អាន​បទចោទ​ប្រកាន់​ទំាង ៣​លើ​រូប​លោក DSK រួម​មាន៖ ការ​បំពារបំពាន​​ផ្លូវភេទ ការប៉ុនប៉ង​រំលោភ​សេពសន្ថវៈ និង​ការ​ឃុំខ្លួន​មនុស្ស​ដោយ​ខុសច្បាប់។ បន្ទាប់​មក ចៅក្រម​នឹង​ធ្វើ​ការ​សម្រេច​ចិត្ត​ថា តើ​ត្រូវ​បន្ត​ឃុំ​ខ្លួន​លោក DSK ជា​បណ្តោះអាសន្ន ឬ​មួយ​ក៏​ត្រូវ​ដោះលែង​លោក DSK ឲ្យ​មាន​សេរីភាព​បណ្តោះអាសន្ន បន្ទាប់​ពី​លោក​បាន​យល់ព្រម​បង់ប្រាក់​តម្កល់។ តាម​មើល​ទៅ លោក DSK អាច​ជ្រើសរើស​យក​ដំណោះស្រាយ​ទី២ គឺ​យល់​ព្រម​បង់ប្រាក់​តម្កល់ ប្តូរ​យក​សេរីភាព​បណ្តោះអាសន្ន។ ក្នុង​ន័យ​នេះ ចៅក្រម​ច្បាស់​ជា​ធ្វើ​ការ​សិក្សា​យ៉ាង​ប្រយ័ត្នប្រយែង​បំផុត ពិសេស អំពី​ចំនួន​ទឹកប្រាក់​ដែល​ត្រូវ​តម្កល់ និង​អំពី​លក្ខខណ្ឌ​នៃ​សេរីភាព​បណ្តោះអាសន្ន​ដែល​លោក DSK ត្រូវ​មាន។ សំណួរ​ដែល​តុលាការ​អាមេរិកំាង​កំពុង​ចោទ​ជា​ពិសេស គឺ​ថា តើ​គេ​គួរ​ឲ្យ​លោក DSK មាន​សិទ្ធិសេរីភាព​​ក្នុង​ការ​ធ្វើ​ដំណើរ​ចេញ​ពី​សហរដ្ឋអាមេរិក ឬ​ទេ ? បើ​ឲ្យ​លោក DSK អាច​ធ្វើ​ដំណើរ​ដោយ​សេរី​បាន តើ​គេ​ប្រាកដ​ថា លោក DSK នឹង​ត្រលប់​ទៅ​បង្ហាញ​ខ្លួន​ជា​ថ្មី តាម​ការ​កោះ​ហៅ​របស់​តុលាការ ឬ​ទេ ?។

ក្នុង​នាម​លោក DSK ជា​ជនជាតិ​បារំាង ចៅក្រម​អាច​នឹង​ពិនិត្យ​មើល​អំពី​កិច្ចព្រមព្រៀង​ធ្វើ​បត្យាប័ន​រវាង​បារំាង និង​អាមេរិក។ ប្រសិន​បើ​លោក DSK ជា​ពលរដ្ឋ​សាមញ្ញ​ម្នាក់​នោះ គឺ​មិន​ចំណោទ​ទេ ចៅក្រម​ប្រាកដ​ជា​ដក​លិខិតឆ្លងដែន​តែ​ម្តង តែ​ដោយ​លោក DSK ជា​អគ្គនាយក​មូលនិធិរូបិយវត្ថុ​អន្តរជាតិ និង​ក៏​ជា​ឥស្សរជន​នយោបាយ​បារំាង​ម្នាក់​ដ៏​ល្បី​ផង តើ​គេ​អាច​បិទ​សេរីភាព​ក្នុង​ការ​ដើរហើរ​ដោយ​សេរី​របស់​លោក DSK ឬ​ទេ ?

ប៉ុន្តែ ការ​ដែល​លោក DSK បាន​ចាកចេញ​ពី​សណ្ឋាគារ​យ៉ាង​ប្រញាប់ប្រញាល់ រហូត​ដល់​ភ្លេច​ទូរស័ព្ទ​ដៃ និង​សម្ភារៈផ្ទាល់ខ្លួន​មួយ​ចំនួន​ក្នុង​សណ្ឋាគារ អាច​ជា​សក្ខីភាព​មួយ​ដែល​បញ្ជាក់​ថា លោក DSK ពិត​ជា​បាន​ប្រព្រឹត្ត​​កំហុសឆ្គង​អ្វី​មួយ។ ដូច្នេះ ចៅក្រម​អាច​លើក​ហេតុផល​នេះ ដើម្បី​ដក​លិខិត​ឆ្លងដែន​ពី​លោក DSK មិន​ឲ្យ​ចាក​ចេញ​ពី​ទឹកដី​អាមេរិកំាង។

តួនាទី​របស់​លោក DSK ឈានដល់ទីបញ្ចប់

សំណុំរឿង​របស់​លោក DSK ពេល​នេះ មិន​ត្រឹម​តែ​ធ្វើ​ឲ្យ​អាម៉ាស់​មុខ​លោក DSK និង​ក្រុមគ្រួសារ​របស់​លោក​ប៉ុណ្ណោះ​ទេ តែ​បាន​ធ្វើ​ឲ្យ​អាប់ឱន​កិត្តិយស​ប្រទេស​បារំាង​យ៉ាង​ខ្លំាង ពិសេស​គណបក្ស​សង្គមនិយម ដែល​ជា​គណបក្ស​ប្រឆាំង ព្រោះ​ថា លោក DSK គឺ​ជា​អ្នក​នយោបាយ​ដែល​មាន​ប្រជាប្រិយភាព​ខ្ពស់​ជាង​គេ​បំផុត និង​ដែល​អាច​ប្រជែង​យក​តំណែង​ប្រធានាធិបតី​បារាំង ក្នុង​ការ​បោះឆ្នោត នៅឆ្នាំ​២០១២​ខាងមុខ។

ជាមួយ​គ្នា​នេះ តួនាទី​របស់​លោក DSK ក្នុង​នាម​ជា​អគ្គនាយក​មូលនិធិរូបិយវត្ថុ​អន្តរជាតិ​ត្រូវ​ចប់ ពីព្រោះ​លោក DSK មិន​អាច​ទទួល​បាន​អភ័យឯកសិទ្ធិទូត​ទេ ហើយ​លក្ខន្តិកៈ​​របស់​មូលនិធិរូបិយវត្ថុ​អន្តរជាតិ IMF ក៏​មិន​បាន​ចែង​អំពី​អភ័យឯកសិទ្ធិ​​សម្រាប់​បុគ្គលិក​របស់​ខ្លួន។ នៅ​ពេល​នេះ ឥស្សរជន​ដែល​នឹង​អាច​ស្នង​តំណែង​បន្ត​ពី​លោក DSK មាន​ច្រើន ពិសេស ឥស្សរជន​ចេញ​មក​ពី​បណ្តា​ប្រទេស​ដែល​កំពុង​មាន​សេដ្ឋកិច្ច​ជឿនលឿន ដូច​ជា​លោក Trévor Manuel ​អតីត​រដ្ឋមន្រ្តី​ក្រសួង​ហិរញ្ញវត្ថុ​អាហ្រ្វិកខាងត្បូង ថ្នាក់ដឹកនំាជាន់ខ្ពស់​មក​ពី​ប្រទេស​ឥណ្ឌា ឬ​មួយ​ក៏​ជនជាតិចិន លោក Zhu Min ទីប្រឹក្សាពិសេស​របស់​លោក DSK ដែល​ទើប​តែងតំាង​កាល​ពី​១ឆ្នំា​មុន។

តួនាទី​របស់​លោក DSK​ឈាន​ចូល​ទីបញ្ចប់ តែ​អង្គការ IMF នៅ​មាន​សំណុំរឿង​សេដ្ឋកិច្ច​​ពិភពលោក​ជា​ច្រើន​ទៀត​ដែល​ត្រូវ​ដោះស្រាយ ពិសេស ផែនការ​ជួយ​សង្រ្គោះ​វិបត្តិសេដ្ឋកិច្ច​នៅ​ក្នុង​ប្រទេស​អឺរ៉ុប​មួយ​ចំនួន ដូចយ៉ាង​ប្រទេស​ក្រិក អៀរឡង់ និង​ប្រទេស​ព័រទុយហ្កាល។ នៅ​ថ្ងៃ​នេះ IMF​ត្រូវ​បើក​កិច្ចប្រជុំ​ជាមួយ​បណ្តា​រដ្ឋមន្រ្តី​សេដ្ឋកិច្ច​ក្នុង​តំបន់​អឺរ៉ូ ដើម្បី​អនុម័ត​​ផែនការ​ទី២​ក្នុង​ការ​ជួយ​ស្រោចស្រង់​វិបត្តិសេដ្ឋកិច្ច​ក្នុង​ប្រទេស​ក្រិក។ តែ​អវត្តមាន​របស់​លោក DSK ពី​អង្គការ​មូលនិធិរូបិយវត្ថុ​អន្តរជាតិ នឹង​ច្បាស់​ជា​ធ្វើ​ឲ្យ​អឺរ៉ុប​បាត់បង់​នូវ​មនុស្ស​ម្នាក់​ដ៏​សំខាន់​ប្រចំា​នៅ​ទីក្រុង​វ៉ាស៊ីនតោន។ ទីក្រុង​វ៉ាស៊ីនតោន​ដែល​ចង់​ឃើញ​ IMF ចាត់​វិធានការ​ជួយ​ស្រោចស្រង់​ប្រទេស​ផ្សេង​ទៀត ក្រៅ​ពី​ប្រទេស​ក្នុង​ទ្វីប​អឺរ៉ុប៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ