អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

អូតង់​មិនចូល​ធ្វើអន្តរាគមន៍​នៅប្រទេស​ស៊ីរីទេ ​ទោះបីជា​មានដីកា​របស់​អ.ស.ប.​

សំឡេង ០៥:៥៧
​លោក​ Anders Fogh Rasmussen ​អគ្គលេខាធិការ​នៃ​បក្សសម្ព័ន្ធ​អូតង់
​លោក​ Anders Fogh Rasmussen ​អគ្គលេខាធិការ​នៃ​បក្សសម្ព័ន្ធ​អូតង់ Reuters / Sebastien Pirlet
ដោយ៖ សៀក សារិន
៣១ នាទី

រដ្ឋធានី​ដាម៉ាស់​និងទីក្រុង​អាឡេព​ដែលជា​ទីក្រុង​សំខាន់​ទីពីរ​របស់​ស៊ីរី​បាន​ស្គាល់​ការរំជើប​រំជួល​នៅ​ថ្ងៃសុក្រ​ម្សិលមិញ​ ​ ដោយ​មាន​បាតុករ​ស៊ីរី​រាប់​ម៉ឺននាក់​បាន​នាំគ្នា​ចុះថ្នល់​ស្រែក​ទាមទារ​ឲ្យ​ផ្តួល​រំលំ​របប​ផ្តាច់ការ​បាស្ហារ​អាល-អាស្សាដ។​ ហើយ​ទាហាន​របស់​អាស្សាដ​បាន​បាញ់ប្រហារ​ប្រជាជន​ស្លាប់​២៧នាក់​។​ ទន្ទឹមគ្នានេះ​ អគ្គលេខាធិការ​នៃ​បក្សសម្ព័ន្ធ​អូតង់​បាន​ប្រកាស​ឲ្យដឹងថា​ ​ អូតង់​នឹងពុំ​ចូល​ធ្វើ​អន្តរាគមន៍​នៅ​ប្រទេស​ស៊ីរី​ទេ​ ទោះបីជា​មាន​ដីកា​របស់​អ.ស.ប.​ក៏ដោយ។  

ផ្សាយពាណិជ្ជកម្ម

នាឱកាស​កិច្ច​សម្ភាសន៍​ជាមួយ​ភ្នាក់ងារ​ព័ត៌មាន​ Reuters ​លោក​ Anders Fogh Rasmussen ​អគ្គលេខាធិការ​នៃ​បក្សសម្ព័ន្ធ​អូតង់​ថ្លែង​ប្រកាស​ឲ្យដឹងថា​ ​ ​ អូតង់​នឹងពុំ​ចូល​ធ្វើ​អន្តរាគមន៍​នៅ​ប្រទេស​ស៊ីរី​ ទោះបីជា​មាន​ដីកា​របស់​អ.ស.ប.​ក៏ដោយ។​ មូលហេតុ​គឺមកពី​ បក្សសម្ព័ន្ធ​អូតង់​យល់​ឃើញថា​ ​ រចនា​សម្ព័ន្ធ​នៃ​សង្គម​ស៊ីរី​មាន​លក្ខណៈ​សែន​ស្មុគស្មាញ​ ​ ខុសពី​រចនា​សម្ព័ន្ធ​នៃ​សង្គម​លីប៊ី​ ​ ទាំងក្នុង​វិស័យ​ជាតិពន្ធុ​ ​ នយោបាយ​ ​ និង​សាសនា​។​ ទាំងនេះហើយ​ដែលនាំឲ្យ​លោក​ Anders Fogh Rasmussen ​អគ្គលេខាធិការ​នៃ​បក្សសម្ព័ន្ធ​អូតង់​ថ្លែង​សង្កត់​បញ្ជាក់ថា​ ​ ដំណោះស្រាយ​ឲ្យ​វិបត្តិ​ស៊ីរី​ត្រូវ​រិះរក​ក្នុង​រង្វង់​ “ដំណោះស្រាយ​តំបន់”។​ ហើយម្យ៉ាងទៀត​ “ក្រុមប្រទេស​មិត្ត​របស់​ស៊ីរី”​ក៏​នឹង​ត្រូវ​ជួបប្រជុំ​គ្នា​នៅថ្ងៃទី​២៤កុម្ភៈ​ខាងមុខនេះ​នៅទីក្រុង​ទុយនីស​នៃ​ប្រទេស​ទុយនីស៊ី​ដើម្បី​រិះរក​មធ្យោបាយ​សម្រាប់​បិទបញ្ចប់​ការវាយ​បង្ក្រាប​ដ៏ហិង្សា​និង​សែនឃោរឃៅ​ដោយ​ទាហាន​របស់​បាស្ហារ​អាល-អាស្សាដ​ទៅលើ​ក្រុមបាតុករ​ស៊ីរី​ដែលបាន​នាំគ្នា​រាប់ម៉ឺននាក់​ចុះថ្នល់​ស្រែកទាមទារ​អស់រយៈពេល​១១ខែ​មកហើយ​ឲ្យ​ប្រមុខ​ដឹកនាំ​ផ្តាច់ការ​ស៊ីរី​បាស្ហារ​អាល-អាស្សាដ​ចាកចេញ​ពីមុខតំណែង។

 
គួរកត់​សម្គាល់ថា​ ​ កងកម្លាំង​យោធា​នៃ​បក្សសម្ព័ន្ធ​អូតង់​ធ្លាប់បាន​ចូល​ធ្វើ​អន្តរាគមន៍​នៅ​ប្រទេស​លីប៊ី​ កាលពី​ឆ្នាំទៅ​ដោយមាន​ដីកា​របស់​អង្គការ​សហប្រជាជាតិ​។​ ក៏​ប៉ុន្តែ​លើកនេះ​ ​ ទោះបីជា​គ្មាន​វេតូ​របស់​ប្រទេស​ចិន​និង​ប្រទេស​រុស្ស៊ី​ក៏​ដោយ​ ​ អូតង់​នឹងពុំ​ចូល​ធ្វើ​អន្តរាគមន៍​នៅ​ប្រទេស​ស៊ីរី​ដែរ​ ទោះបីជា​មាន​ដីកា​របស់​អ.ស.ប.​ក៏ដោយ។​ នេះ​ជាការថ្លែង​បញ្ជាក់​របស់​លោក​ Anders Fogh Rasmussen ។

នៅ​ចំពោះមុខ​ស្ថានការណ៍​ស៊ីរី​នេះ ​ ប្រទេសចិន​បាន​បញ្ជូន​អនុរដ្ឋមន្ត្រី​ក្រសួង​ការបរទេស​របស់គេ​ឲ្យ​ទៅ​ទីក្រុង​ដាម៉ាស់​ជួប​ពិភាក្សា​ជាមួយ​សមភាគី​ស៊ីរី​នៅ​ល្ងាចថ្ងៃសុក្រ​ម្សិលមិញ​ ​ ដើម្បី​រិះរក​មធ្យោបាយ​សម្រាប់​ “ពង្រឹង​សហប្រតិបត្តិការ”​ ក្នុងការ​ស្វែងរក​ដំណោះស្រាយ​ឲ្យ​វិបត្តិ​ស៊ីរី​ដ៏​សែន​ហិង្សានេះ។

នាឱកាស​ជំនួប​ពិភាក្សានោះ​ ​ លោក​ ចៃ​ ជុន​ អនុរដ្ឋមន្ត្រី​ក្រសួង​ការបរទេស​ចិន​គូស​បញ្ជាក់ថា​ “​អធិបតេយ្យ​ ​ ឯកភាព​ ​ ឯករាជ្យ​ ​ និង​បូរណភាព​ដែនដី​របស់​ប្រទេស​ស៊ីរី​ ​ ត្រូវតែ​គោរព​ដោយ​រាល់ភាគី​ពាក់ព័ន្ធ​ហើយនិង​ដោយ​សហគមន៍​អន្តរជាតិ​”​ ។​ ទីក្រុង​ប៉េកាំង​សង្ឃឹមថា​ ​ កិច្ចចរចា​ថ្នាក់ជាតិ​និង​កំណែ​ទម្រង់​នៅ​ស៊ីរី​អាច​ជួយ​ជំរុញ​ឲ្យ​ការរិះរក​ដំណោះ​ស្រាយ​ឈាន​ទៅមុខ។

គួរកត់​សម្គាល់ថា​ ​ កាលពី​ថ្ងៃទី​៤កុម្ភៈ​កន្លង​ទៅនេះ​ ​ ប្រទេស​រុស្ស៊ី​និង​ប្រទេសចិន​បាន​ប្រើ​សិទ្ធិវេតូ​របស់​ខ្លួន​ប្រឆាំង​ទល់នឹង​គម្រោង​សេចក្តី​សម្រេច​ចិត្ត​របស់​អ.ស.ប.​ថ្កោលទោស​ទៅលើ​ទង្វើ​វាយ​បង្ក្រាប​ដ៏​សែន​ហិង្សា​ឃោរឃៅ​របស់​កងកម្លាំង​យោធា​នៃ​របប​គ្រប់គ្រង​បាស្ហារ​អាល-អាស្សាដ​ទៅលើ​ប្រជាជន​ស៊ីរី​ដែល​បាន​នាំគ្នា​រាប់ម៉ឺននាក់​ចុះថ្នល់​ស្រែក​ទាមទារ​ឲ្យ​បាស្ហារ​អាល-អាស្សាដ​ចុះចេញ​ពី​មុខតំណែង​។

អ្វីដែល​គួរឲ្យ​ចម្លែក​គឺ​ប្រទេសចិន​ ​ ដែល​តាមធម្មតា​តែង​មាន​ជំហរ​ស្រដៀង​គ្នា​នឹង​ជំហរ​របស់​ក្រុម​ប្រទេស​សម្ព័ន្ធ​អារ៉ាប់​ ​ ម្តងនេះ​ទីក្រុង​ប៉េកាំង​លែង​គាំទ្រ​សេចក្តី​សម្រេច​ចិត្ត​របស់​ក្រុម​ប្រទេស​សម្ព័ន្ធ​អារ៉ាប់​ដែល​គ្រោង​ផ្តល់​ជំនួយ​នយោបាយ​និង​ជំនួយ​សម្ភារៈ​ឲ្យ​ទៅ​ក្រុមប្រឆាំង​ស៊ីរី​ ​ ហើយនិង​បង្កើត​ឲ្យមាន​កងកម្លាំង​ អ.ស.ប.-អារ៉ាប់​ រួមគ្នា​មួយ​ដើម្បី​បិទ​បញ្ចប់​ទង្វើ​ហិង្សា​នៅ​ប្រទេស​ស៊ីរី។

រីឯ​លោកស្រី​រដ្ឋមន្ត្រី​ក្រសួង​ការបរទេស​អាមេរិក​ ហ៊ីឡារី​គ្លីនតុន​ បាន​ថ្លែង​នៅ​ថ្ងៃសុក្រ​ម្សិលមិញថា​ “ការបោះឆ្នោត​គាំទ្រ​ដោយ​មហាសន្និបាត​នៃ​អ.ស.ប.​ថ្កោលទោស​ទៅលើ​ទង្វើ​ហិង្សា​ដ៏​ឃោរឃៅ​នៃ របប​គ្រប់គ្រង​បាស្ហារ​អាល-អាស្សាដ​បង្ហាញ​ឲ្យ​ឃើញនូវ​ “​ consensus ​អន្តរជាតិ​មួយ​ដែលមាន​ទ្រង់ទ្រាយធំ”​ សម្រាប់​បង្ខំ​ឲ្យ​របប​បាស្ហារ​អាល-អាស្សាដ​បញ្ឈប់​អំពើ​ហិង្សា​ដ៏​សែន​ឃោរឃៅ​របស់​ខ្លួន។

លោក​ប្រធានាធិបតី​បារាំង​សាកូហ្ស៊ី​និង​លោក​នាយករដ្ឋមន្ត្រី​អង់គ្លេស​ David Cameron ​វិញ​ ​ បាន​នាំគ្នា​បរិហារ​នៅ​ថ្ងៃសុក្រ​ម្សិលមិញ​នាឱកាស​សន្និសីទ​កាសែត​នៅ​ទីក្រុង​ប៉ារីស​ពី​អំពើ​ហិង្សា​ដ៏​អមនុស្សធម៌​របស់​ប្រមុខ​ដឹកនាំ​ស៊ីរី​បាស្ហារ​អាល-អាស្សាដ​ ​ ហើយនិង​សង្កត់​បញ្ជាក់​ពី​ការចាំបាច់​ក្នុង​ការ​ជួយ​រៀបចំ​ក្រុម​អ្នក​ប្រឆាំង​ស៊ីរី​ ​ ហើយនិង​ការ​ពង្រឹង​ដាក់​ទណ្ឌកម្ម​ទៅលើ​របប​ផ្តាច់ការ​ស៊ីរី។

សូមបញ្ជាក់ថា​ ​ មានយន្តហោះ​យោធា​គ្មាន​មនុស្ស​បើក​ជាច្រើន​គ្រឿង​ហើយនិង​អ្នកយកការណ៍​​សម្ងាត់​អាមេរិកាំង​បាន​ទៅបំពេញ​បេសកកម្ម​នៅ​ប្រទេស​ស៊ីរី​ដើម្បី​តាមដាន​ការវាយ​ប្រហារ​របស់​ទាហាន​ស៊ីរី​ទៅលើ​ក្រុម​អ្នកប្រឆាំង​និង​ប្រជាជន​ស៊ីវិល​។​​ នេះ​បើយោងតាម​ការផ្សាយ​ឲ្យដឹង​នៅ​ថ្ងៃសៅរ៍​នេះ​ដោយ​ទូរទស្សន៍​អាមេរិក​ NBC ​។​ ដោយទីក្រុង​វ៉ាស៊ីនតោន​សង្ឃឹម​យក​ការតាម​ឃ្លាំមើល​តាមផ្លូវ​អាកាសនេះ​ ​ ទៅធ្វើជា​ទឡ្ហីករណ៍​ឬ​សេចក្តី​សំអាង​ប្រឆាំង​ទល់​នឹង​ទង្វើ​ដ៏​ហិង្សា​ឃោរឃៅ​របស់​ទាហាន​បាស្ហារ​អាល-អាស្សាដ​ ​ ហើយនិង​ដើម្បី​ធ្វើការ​ឃាត់ស្ទាក់​ទូរគមនាគមន៍​រវាង​រដ្ឋាភិបាល​ស៊ីរី​និង​យោធា​របស់​ខ្លួន​ផងដែរ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ