អានតួអត្ថបទ
កូវីដ១៩ កងទ័ពមួកខៀវ

កូវីដ១៩៖ អ.ស.ប. បារម្ភពី​សុខភាព​​កងទ័ព​មួកខៀវ​ផង ខ្លាច​ប្រទេស​សមាជិក​ដកទ័ព​ចេញ​វិញផង

កងទ័ពមួកខៀវ កំពុងចុះល្បាតនៅតំបន់ Goma ភាគ​ខាងកើត​​សាធារណរដ្ឋ​ប្រជាធិបតេយ្យ​​កុងហ្គោ ថ្ងៃទី​​១៩ មិនា​ ២០២០
កងទ័ពមួកខៀវ កំពុងចុះល្បាតនៅតំបន់ Goma ភាគ​ខាងកើត​​សាធារណរដ្ឋ​ប្រជាធិបតេយ្យ​​កុងហ្គោ ថ្ងៃទី​​១៩ មិនា​ ២០២០ REUTERS - OLIVIA ACLAND
ដោយ៖ ម៉ម ពិសី
១៦ នាទី

ការឆ្លងរាលដាល នូវមេរោគកូវីដ១៩ កំពុងបង្កឲ្យមានការបារម្ភទៅដល់អង្គការសហប្រជាជាតិ ទាក់ទិនទៅនឹងប្រតិបត្តិការ​រក្សាសន្តិុភាព របស់កងទ័ពមួយខៀវ នៅតាមបណ្តាប្រទេសមួយ ចំនួន។ អង្គការសហប្រជាជាតិ មានការបារម្ភចំពោះសុខភាព​របស់កងទ័ពមួយខៀវ ហើយទន្ទឹមនឹងនេះ អង្គការសហប្រជាជាតិក៏បារម្ភផងដែរ ខ្លាចប្រទេសសមាជិក ដកកងកម្លាំងទ័ពរបស់គេទៅវិញ ដើម្បីបង្កាការឆ្លងមេរោគ។ ក្នុងករណីមានការដាកទ័ព នោះផែនការរក្សាសន្តិភាពនៅតាមតំបន់ខ្លះ អាចនឹងត្រូវបរាជ័យ។

ផ្សាយពាណិជ្ជកម្ម

មន្ត្រីទូតអង្គការសហប្រជាជាតិម្នាក់ ដោយសុំមិនបញ្ចេញឈ្មោះ បានលើកឡើងថា ការពារសុខភាព​​របស់កងទ័ពមួយខៀវ គឺជាអាទិភាព​របស់អង្គការសហប្រជាជាតិ។​ តែទន្ទឹមនឹងនេះ អង្គការសហប្រជាជាតិ ក៏មានការបារម្ភដែរ ព្រោះប្រទេសសមាជិក អាចស្នើសុំបញ្ជូនកងទ័ពមួកខៀវរបស់គេ ឲ្យត្រលប់ចូលស្រុកវិញ ព្រោះគេគិតថាកងទ័ពគេ អាចប្រឈមនឹងការឆ្លងរាលដាលមេរោគកូវីដ​១៩​ នៅតាម​ទីតាំងណាមួយ។

គួរបញ្ជាក់ថា បច្ចុប្បន្ននេះ មានកងទ័ពមួកខៀវចំរុះជាតិសាសន៍ ប្រមាណ១១ម៉ឺននាក់ ដែល​កំពុងបំពេញបេសកកម្មរក្សាសន្តិភាព នៅតាមប្រទេសជាង១០ ភាគច្រើនគឺនៅទ្វីបអាហ្វ្រិក។ ដើម្បី​ការពារ​សុខភាព បង្ការការឆ្លងរាលដាល  អង្គការសហប្រជាជាតិ បានដាក់ចេញនូវវិធាន​​ការ​មួយចំនួន ដូចជា​បានសម្រេចព្យួរការផ្លាស់ប្តូរវេន កងកម្លាំងមួយខៀវនៅតាមប្រទេសទាំងអស់ រហូតដល់ថ្ងៃ​៣០​មិថុនា។

នៅតាមមូលដ្ឋានកងទ័ពមួកខៀវ គេបានរៀបចំឲ្យមានការដាក់ឲ្យនៅដាច់ដោយឡែក និងតាមដាន​សុខភាព ប្រសិនបើមានកងកម្លាំងណាម្នាក់ មានអាការៈជំងឺកូវីដ១៩។​ វិធានការផ្សេងទៀត ក៏ត្រូវបានអនុវត្តផងដែរ ចំពោះបេសកកម្ម​ចុះល្បាតរបស់កងទ័ពមួយខៀវ ធ្វើយ៉ាងណា ចៀសវាងការឆ្លងរាលដាលមេរោគ ក្នុងចំណោមកងកម្លាំង និងចៀសវាងការឆ្លងរាលដាល ក្នុងពេលប៉ះពាល់​ ប្រាស្រ័យជាមួយប្រជាជនមូលដ្ឋាន។ ធ្លាប់មានបទពិសោធន៍មិនល្អរួចមកហើយ កាលពីឆ្នាំ២០១០ នៅប្រទេសហៃទី ដែលកងទ័ពមួកខៀវមកពីប្រទេសណេប៉ាល់ ជាផ្នែកមួយនៃភ្នាក់ងារ​ចម្លងជម្ងឺអាសន្នរោគ ទៅកាន់ប្រជាជនហៃទី បណ្តាលឲ្យស្លាប់មនុស្សប្រមាណ១ម៉ឺននាក់។

គួរកត់សំគាល់ផងដែរថា ទ្វីបអាហ្វ្រិកត្រូវគេរំពឹងថា អាចនឹងរងគ្រោះខ្លាំងដោយការឆ្លងរាលដាល​នូវមេរោគកូវីដ១៩ ក្នុងពេលដ៏ខ្លីខាងមុខ។ គឺទីនោះហើយ ដែលសំបូរប្រតិបត្តិការរក្សាសន្តិភាព​ របស់អង្គការ​សហប្រជាជាតិ។ មន្ត្រីទូតម្នាក់ បានទទួលស្គាល់ថា វិធានការបង្ការការឆ្លងមេរោគកូវីដ​១៩ បានធ្វើឲ្យប៉ះពាល់ ដល់ប្រសិទ្ធិភាពនៃប្រតិបត្តិការរបស់កងទ័ពមួកខៀវ បន្ថែមពីនេះ ប្រទេសខ្លះអាចសម្រេចដកទ័ពចេញថែមទៀត។ គឺក្រោមហេតុផលនេះហើយ បានជាលោកអគ្គលេខាធិការអង្គការសហប្រជាជាតិ បានអំពាវនាវកាលពីថ្ងៃ​២៣​មិនា ឲ្យគូវិវាទទាំងអស់ ទំលាក់អាវុធ ផ្អាកការប្រយុទ្ធ។

ដោយឡែកមន្ត្រីទូតខ្លះលើកឡើងថា ទ្វីបអាហ្វ្រិកក្រីក្រ មានប្រព័ន្ធសុខាភិបាលអន់ថយមែនពិត តែគេមិនគួរមើលស្រាលប្រជាជនអាហ្វ្រិកទេ។ ខុសពី​ប្រជាជនអឺរ៉ុប ដែលធ្លាប់តែស្រណុកមិនធ្លាប់​លំបាក ប្រជាជនអាហ្វ្រិកបានឆ្លងកាត់ មេរោគអេបូឡា មេរោគហ្ស៊ីកា មេរោគប៉េស្ត និងជំងឺអាសន្នរោគ។ ដូច្នេះប្រជាជនអាហ្វ្រិកអាចមានស្មារតីរឹងមាំ មិនផ្អើលឈូរឆ ហើយចេះជួយសាមគ្គីគ្នា អាចយកឈ្នះមេរោគកូវីដ១៩ ក៏ថាបាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ