អានតួអត្ថបទ
កម្ពុជា

លោក ហ៊ុន សែន កម្រិត​ការងារ​ឧត្តម​ក្រុមប្រឹក្សា​ពិគ្រោះ និង​ផ្ដល់​យោបល់ ទាក់ទង​វិវាទ​ដីធ្លី

រូបភាព៖ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ នៅ​ក្នុង​ជំនួប​ជាមួ​យលោក ហ៊ុន សែន នា​ពេល​ក​ន្លង​មក
រូបភាព៖ សមាជិកឧត្តមក្រុមប្រឹក្សាពិគ្រោះនិងផ្ដល់យោបល់ នៅ​ក្នុង​ជំនួប​ជាមួ​យលោក ហ៊ុន សែន នា​ពេល​ក​ន្លង​មក @សហការី
ដោយ៖ អេង គីមហុង
1 នាទី

លោកនាយករដ្ឋមន្ត្រី ហ៊ុន សែន ​បាន​​កម្រិត​​លក្ខខណ្ឌ​​ការងារ​មួយ​ចំនួនរបស់​ឧត្តម​ក្រុម​ប្រឹក្សាពិ​គ្រោះ និង​ផ្ដល់​យោបល់​ ទាក់ទង​នឹង​វិវាទ​ដី​ធ្លី ចាប់​ពី​ថ្ងៃ​ទី​១៥​ឧសភា​ត​ទៅ។ សេចក្ដីសម្រេចធ្វើឡើងនៅក្នុងកិច្ចប្រជុំគណៈរដ្ឋមន្ត្រីនៅ​ថ្ងៃ​សុក្រ​ទី​១៥​ឧសភា​ម្សិលមិញ។ 

ផ្សាយពាណិជ្ជកម្ម

រាល់​ទំនាស់​ដីធ្លី​ទាំង​ឡាយ​ណា​ដែល លោក ហ៊ុន សែន បាន​ដោះ​ស្រាយ​បញ្ចប់ និង​មាន​សេចក្ដី​ជូន​ដំណឹង​ស្ដី​ពីការ​ដោះ​ស្រាយ​រួច​រាល់ ពី​ទី​ស្ដី​ការ​គណៈ​រដ្ឋមន្ត្រី​នោះ ឧត្តម​ក្រុម​ប្រឹក្សា​ពិគ្រោះ និង​ផ្ដល់​មិន​មាន​សមត្ថកិច្ច​ដោះស្រាយ​បន្ត​ឡើយ។ ក្នុង​នោះ​ក៏​មិន​អនុញ្ញាត​ឲ្យ​ដោះស្រាយ​រាល់​ទំនាស់​ដីធ្លី​ដែល​កំពុង​ដំណើរ​ការ​តាម​នីតិវិធី​របស់តុលាការ និង​មិន​អនុញ្ញាត​ឲ្យ​ចុះ​ដោះស្រាយ​រាល់​ទំនាស់​ទាំង​ឡាយ​ណា ដែល​បាន​បញ្ចប់​ដោយ​ស្ថាប័ន​តុលាការ ដែល​មាន​សាល​ក្រម ឬ​សាល​ដីកា​ស្ថាពរ។ ដំណាល​គ្នា​នេះ ក៏​មិន​ត្រូវ​បញ្ជូន​សំណុំ​រឿង​វិវាទ​ដីធ្លីរ​វាងបុគ្គល និងបុគ្គល មក​កាន់​លោក​នាយករដ្ឋមន្ត្រី ហ៊ុន សែន  ដើម្បី​ដោះ​ស្រាយ​ដែរ។

អ្វី​ជា​ការ​កត់​សម្គាល់​អន្តរាគមន៍​លោកនាយករដ្ឋមន្ត្រី ហ៊ុន សែន ដែល​កម្រិត​លក្ខខណ្ឌ​ការងារ​មួយ​ចំនួន​របស់ឧត្តម​ក្រុម​ប្រឹក្សា​ពិគ្រោះ និង​ផ្ដល់​យោបល់ ទាក់ទង នឹង​វិវាទ​ដីធ្លី​ធ្វើ​ឡើង​មិន​ដល់​ពីរ​សប្ដាហ៍​ផង​ក្រោយ លោក សុខសុវណ្ណ វឌ្ឍនាសាប៊ុង ត្រូវបាន​បញ្ចប់​ពី​មុខ​តំណែង សមាជិក​នៃ​ឧត្តមក្រុម​ប្រឹក្សា​ពិគ្រោះ និង​ផ្តល់យោបល់ នៅ​ថ្ងៃ​ទី​៤​ខែ​ឧសភា។

មិនមាន​ការ​បញ្ជាក់​ជា​ផ្លូវ​ការ​ណា​មួយ​ឡើយ​ថា ប្រធាន​គណបក្ស​ខ្មែរ​ក្រោក​រូប​នេះ​របូត​តំណែ​ងដោយ​មូល​ហេតុ​អ្វី គេ​គ្រាន់​តែ​សង្ស័យ​ថា អាច​ជាប់​ពាក់ព័ន្ធ​នឹង​បេសកកម្ម នៅ​ក្នុង​តំបន់​ឧទ្យានជាតិ​ព្រះសីហនុ (រាម) ភូមិសាស្ត្រស្រុក​ព្រៃនប់ ខេត្ត​ព្រះសីហនុ កាល​ពី​ថ្ងៃ​ទី​២ ខែ​ឧសភា។ ពេលនោះ​លោក សុខសុវណ្ណ វឌ្ឍនាសាប៊ុង ថា មន្រ្តីបរិស្ថាន បាន​ឃុំ​ខ្លួន​ប្រជាជន និង​ការពារ​ក្រុមហ៊ុន​ឯកជន។ តែ​ការ​លើក​ឡើង​នេះ ត្រូវ​បាន​ក្រសួង​បរិស្ថាន ច្រានចោល​ថា គ្មាន​មូលដ្ឋាន​ភស្តុតាងច្បា​ស់លាស់ និង​មិន​យល់​ពីរ​បៀប​នៃ​ការ​បំពេញ​ការងារ នៅ​ក្នុងក្របខណ្ឌ​ នៃ​ការងារ​រដ្ឋបាល​សាធារណៈ។

សូមជម្រាបជូនថា ៦ខែ​ក្នុង​ឆ្នាំ​២០១៩​កន្លង​មក សមាជិកឧត្តម​ក្រុម​ប្រឹក្សា​ពិគ្រោះ និង​ផ្តល់​យោបល់​ទាំង​១៦គណបក្ស បាន​ធ្វើ​ចុះ​ទៅ​តាម​បណ្តា​ខេត្ត ដើម្បី​ដោះស្រាយ​បញ្ហា​២៩៥លើក​ពិសេស​ជម្លោះ​ដីធ្លី ។ ក្នុងបេសកកម្ម​ជាង ២៥១លើក​បាន​ដាក់​របាយការណ៍​នៃ​ទំនាស់​ដីធ្លី​ជូន​លោក ហ៊ុន សែន ច្រើន​ជាង​គេ។ កាលណោះ ប្រមុខ​រដ្ឋាភិបាល​សម្រេច​ដក​មេ​បញ្ជាការ​យោធាខេត្ត និង​អភិបាល​រង​ខេត្តព្រះសីហនុ​២នាក់​ចេញ​ពីតំណែង​ពាក់ព័ន្ធ​រឿង​ដីធ្លី។ ក្រៅពី​ខេត្ត​ព្រះសីហនុ លោក ពេជ្រ ស្រស់  សមាជិក​ឧត្តម​ក្រុម​ប្រឹក្សា​ពិគ្រោះ និងផ្ដល់យោបល់  កន្លង​មក​ក៏​ធ្លាប់​រក​ឃើញ ករណី​នៃ​ការ​ចាក់​ដី​លុប​ឆ្នេរ​នៅ​ខេត្តកោះកុង​ពី​​​សំណាក់ មន្ត្រីយោធា​ពាក់ផ្កាយ​ពីរ នៅ​សង្កាត់​ស្មាច់​មាន​ជ័យ ក្រុង​ខេមរភូមិន្ទ ខេត្តកោះកុង៕ 

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ