កម្ពុជា

រដ្ឋាភិបាល​ហៅ​វិទ្យុ​អាមេរិក​និយាយ​ភាសា​ខ្មែរ​មក​ដេញ​ដោល

រដ្ឋាភិបាល​ហៅ​វិទ្យុ​អាមេរិក​និយាយ​ភាសា​ខ្មែរ​មក​ដេញ​ដោល
រដ្ឋាភិបាល​ហៅ​វិទ្យុ​អាមេរិក​និយាយ​ភាសា​ខ្មែរ​មក​ដេញ​ដោល
ដោយ៖ លាង ដឺលុច
១៤ នាទី

រដ្ឋាភិបាល​បាន​កោះហៅ​តំណាង​វិទ្យុ​អាមេរិក​និយាយ​ភាសា​ខ្មែរ​ទាំង​ពីរ គឺ​វិទ្យុ​សំឡេង​សហរដ្ឋអាមេរិក និង​វិទ្យុ​អាស៊ីសេរី​មក​ជួប​ក្នុង​កិច្ចប្រជុំ​មួយ​ដែល​រដ្ឋាភិបាល​ពន្យល់​ថា គឺ​ដើម្បី​និយាយ​អំពី​ការ​អនុវត្ត​វិជ្ជាជីវៈ និង​បង្កើន​សហប្រតិបត្តិការ​ជាមួយ​គ្នា។ ផ្ទុយ​ទៅ​វិញ តំណាង​វិទ្យុ​ទាំង​ពីរ​បាន​ចាត់​ទុក​ថា នេះ​គឺ​ជា​ការ​គំរាម​កំហែង​ដល់​សេរីភាព​សារព័ត៌មាន ហើយ​ពួក​គេ​នឹង​បន្ត​បេសកម្ម​តាម​វិជ្ជាជីវៈ​របស់​ខ្លួន​ដើម្បី​បម្រើ​ប្រយោជន៍​ពលរដ្ឋ​កម្ពុជា​ដដែល។

ផ្សាយពាណិជ្ជកម្ម

ព្រឹត្តិការណ៍​មិន​ធ្លាប់​កើត​មាន។ រដ្ឋាភិបាល​បាន​កោះ​ហៅជា​ផ្លូវការ​​តំណាង​វិទ្យុ​សំឡេង​សហរដ្ឋអាមេរិក និង​តំណាង​វិទ្យុ​អាស៊ី​សេរី​ដែល​ផ្សាយ​ជា​ភាសា​ខ្មែរ​មក​ជួប​ក្នុង​កិច្ច​ប្រជុំ​មួយ​កាល​ពី​ព្រឹក​ថ្ងៃ​ពុធ​ម្សិលមិញ ដើម្បី​សួរ​ដេញដោល​អំពី​បេសកកម្ម និង​ការ​អនុវត្ត​វិជ្ជាជីវៈ​សារព័ត៌មាន​របស់​វិទ្យុ​ទាំង​ពីរ។ កិច្ច​ប្រជុំ​ប្រភេទ​នេះ​ដែល​តំណាង​វិទ្យុ​ទាំង​ពីរ​អត្ថាធិប្បាយ​ថា ជា​ការ​គំរាមកំហែង​ពី​សំណាក់​រដ្ឋាភិបាល​ទៅ​លើ​សេរីភាព​សារព័ត៌មាន ហើយ​ថា​ពួក​គេ​នឹង​នៅ​តែ​បន្ត​ការងារ​ផ្តល់​ព័ត៌មាន​តាម​វិជ្ជាជីវៈ​ដដែល។

អ្នកតំណាង​អោយ​វិទ្យុ​មួយ​ដែល​បាន​ចូលរួម​ក្នុង​កិច្ច​ប្រជុំ​ជា​មួយ​មន្ត្រី​រដ្ឋាភិបាល​ជា​ច្រើន​រូប​បាន​ប្រាប់​វិទ្យុ​បារាំង​អន្តរជាតិ​អោយ​ដឹង​ថា មន្ត្រី​រដ្ឋាភិបាល​បាន​សួរ​អំពី​បេសកម្ម​របស់​វិទ្យុ​ទាំង​ពីរ បាន​លើក​ឡើង​អំពី​ការ​ប្រើប្រាស់​ពាក្យពេចន៍​ចំពោះ​ថ្នាក់​ដឹកនាំ និង​ថា​បាន​ព្រមាន​ប្តឹង​ថែម​ទៀត​ផង។

ទីភ្នាក់ងារ​ព័ត៌មាន​បារាំង​AFP បាន​ស្រង់​ប្រសាសន៍​របស់​លោក​ផៃ ស៊ីផាន អ្នកនាំពាក្យ​ទីស្តីការ​គណៈរដ្ឋមន្ត្រី​ដែល​ពន្យល់​ថា គោល​បំណង​នៃ​ការ​ជួប​ជាមួយ​តំណាង​វិទ្យុ​ទាំង​ពីរ​នេះ គឺ​ដើម្បី​ពង្រឹង​គុណភាព​វិជ្ជាជីវៈ​ក្នុង​សេចក្តីរាយការណ៍​របស់​វិទ្យុ​ទាំង​ពីរ និង​លើក​ឡើង​អំពី​ការ​គោរព​ទាក់ទងនឹង​វប្បធម៌​ខ្មែរ​នៅ​ក្នុង​អត្ថបទ​របស់​ពួកគេ។ លោក​ផៃ ស៊ីផាន​បញ្ជាក់ថា សេរីភាព​សារព័ត៌មាន​ត្រូវ​មាន​ការ​ទទួលខុសត្រូវ។

យោង​តាម​ប្រភព​នានា រដ្ឋាភិបាល​ទំនង​ជាមិន​សប្បាយចិត្ត​ខ្លាំង​ចំពោះ​សេចក្តីរាយការណ៍​របស់​វិទ្យុ​អាស៊ីសេរី​ក្នុង​ពេល​កន្លង​មក​​ទាក់ទងនឹង​សំណុំរឿង​របស់​លោក​ម៉ម សូណង់ដូ។ ទីភ្នាក់ងារ​ព័ត៌មាន​AFP ក៏​បាន​ស្រង់​សម្តី​របស់​នាយក​វិទ្យុ​សំឡេង​សហរដ្ឋអាមេរិក​ផង​ដែរ​ដែល​អះអាង​ថា អ្នកកាសែត​របស់​លោក​នឹង​បន្ត​ធ្វើ​សេចក្តីរាយការណ៍​តាម​ស្មារតី​វិជ្ជាជីវៈ​ដដែល។ លោក​ថា អ្នក​ស្តាប់​របស់​វិទ្យុ​សំឡេង​សហរដ្ឋ​អាមេរិក​គឺ​ជា​ប្រជាជន​ដែល​ត្រូវ​ទទួល​បាន​សេចក្តីរាយការណ៍​ដែល​មាន​គុណភាព​ដែល​ពួក​គេ​អាច​ជឿជាក់​បាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI