អានតួអត្ថបទ
កម្ពុជា

រដ្ឋាភិបាល​កំណត់​យក​ថ្ងៃ ២៣ តុលា ដាក់​ជា​ថ្ងៃ​បុណ្យជាតិ​ឲ្យ​មាន​ឈប់​សម្រាក​ឡើង​វិញ

លោក ទិត សុធា
លោក ទិត សុធា © RFI
ដោយ៖ លី ម៉េងហួរ
1 នាទី

ទីបំផុត​ទៅ នៅ​ថ្ងៃ​ខួប​លើកទី​២១ឆ្នាំ ថ្ងៃ២៣ តុលា​នៃ​ថ្ងៃ​ចុះ​កិច្ចព្រមព្រៀង​សន្តិភាព​ទីក្រុង​ប៉ារីស រដ្ឋាភិបាល​កម្ពុជា​បាន​សម្រេច​ប្រកាស​យក​ថ្ងៃ២៣ តុលា ដាក់​ជា​ថ្ងៃបុណ្យជាតិ អនុញ្ញាត​​ឲ្យ​មាន​ការ​ឈប់​​​​​​​​​​​សម្រាក។ ការ​សម្រេច​ដូច្នេះ ត្រូវ​បាន​មន្ត្រី​រដ្ឋាភិបាល​អះអាង​ថា ដើម្បី​ឧទ្ទិស​ដល់​ព្រះវីរភាព​របស់​សម្តេច​ព្រះមហាវីរក្សត្រ សម្តេចព្រះនរោត្តម សីហនុ និង​លោក​នាយក​រដ្ឋមន្ត្រី​ហ៊ុនសែន ដែល​ជា​ស្ថាបនិក​នូវ​សមិទ្ធផល​ដែល​នាំ​ដល់​ការ​ចុះ​កិច្ច​ព្រម​ព្រៀង​សន្តិភាព ទីក្រុងប៉ារីស ថ្ងៃ២៣ តុលា ឆ្នាំ១៩៩១។ ជា​ការ​កត់សម្គាល់ កាល​ពី​អំឡុង​ឆ្នាំ២០០៥ រដ្ឋាភិបាល​កម្ពុជា​បាន​សម្រេច​ដក​ថ្ងៃ​២៣ តុលា​ចេញ​ពី​បុណ្យជាតិ។

ផ្សាយពាណិជ្ជកម្ម

នៅ​ថ្ងៃ២៣ តុលា​ដែល​ជា​ថ្ងៃ​កាន់​ទុក្ខ​ចុង​ក្រោយ​ឧទ្ទិស​ថ្វាយ​ព្រះវិញ្ញាណក្ខន្ធ​សម្តេច​ព្រះមហាវីរក្សត្រ សម្តេចព្រះ នរោត្តម សីហនុ​រយៈពេល ៧ថ្ងៃ គឺ​នៅ​ថ្ងៃ​នេះ រដ្ឋាភិបាល​បាន​ចេញ​សេចក្តីប្រកាស​កំណត់​យក​ថ្ងៃទី២៣ ខែតុលា​ដែល​ជា​ទិវា​ចុះ​ហត្ថលេខា​លើ​កិច្ច​ព្រម​ព្រៀង​​សន្តិភាព ទីក្រុង​ប៉ារីស ដាក់​ចូល​ក្នុង​ប្រតិទិន ជា​ថ្ងៃ​ឈប់​សម្រាក ១ថ្ងៃ​ពី​ការងារ​របស់​​មន្រ្តីរាជការ និយោជិត កម្មករ នៅ​ទូទាំង​ព្រះរាជាណា​ចក្រ​កម្ពុជា ​ចាប់​ពី​ឆ្នាំ២០១៣ ត​ទៅ។ លោក ទិត សុធា អនុប្រធាន​អង្គភាព​ព័ត៌មាន និង​ប្រតិកម្ម​រហ័ស​របស់​ទីស្តីការ​គណៈរដ្ឋ​មន្ត្រី​បាន​មាន​ប្រសាសន៍​ថា ការសម្រេច​របស់​រដ្ឋាភិបាល​ដាក់​ថ្ងៃ២៣ តុលា ក្នុង​ប្រតិទិន​ថ្ងៃ​ឈប់​សម្រាក​​នេះ ជា​ការ​ឆ្លើយតប​ទៅ​នឹង​វីរភាព​នៃ​សមិទ្ធិផល​រួម​របស់​សម្តេចព្រះ នរោត្តម សីហនុ និង​លោក​នាយករដ្ឋមន្ត្រី ហ៊ុន សែន ហើយ​ក៏​ជា​បំណង​ប្រាថ្នា​របស់​ប្រជាពលរដ្ឋ​គ្រប់​រូប​ផង​ដែរ។

លោកទិតសុធា​បាន​គូស​បញ្ជាក់​ថា៖ “ការសម្រេច​នេះ ជា​ឆន្ទៈ​នយោបាយ​របស់​រាជរដ្ឋា​ភិបាល ហើយ​ឆ្លើយតប​ទៅ​នឹង​វីរភាព​របស់​សម្តេចព្រះ នរោត្តម សីហនុ និង​សម្តេចតេជោ ហ៊ុន សែន ដែល​ជា​ស្ថាបនិក​នៃ​កិច្ចព្រមព្រៀង ២៣ តុលា ឆ្នាំ១៩៩១ ដែល​នាំ​ឲ្យ​កម្ពុជា​យើង​សម្រេច​បាន​នូវ​ការបោះឆ្នោត​ មាន​សភាធម្មនុញ្ញ មាន​រដ្ឋធម្មនុញ្ញ ហើយ​រាជរដ្ឋាភិបាល​បាន​ប្រកាន់​យក​របប​ប្រជាធិបតេយ្យ សេរី​ពហុបក្ស ហើយ​បាន​បោះឆ្នោត​យ៉ាង​ទៀង​ទាត់ ធានា​បាន​នូវ​សុខសន្តិភាព ស្ថិរភាព​នយោបាយ និង​ការអភិវឌ្ឍន៍​មក​ដល់​សព្វថ្ងៃ​នេះ”។ លោក ទិត សុធា បាន​បន្ថែម​ថា ការ​សម្រេច​របស់​រាជរដ្ឋាភិបាល ចំពោះ​ថ្ងៃ២៣ តុលា​ ជា​ថ្ងៃ​ឈប់​សម្រាក​មួយថ្ងៃ ដូច្នេះ​មិនមែន​កើត​ឡើង​ពី​ការ​ទាមទារ ឬ​ការ​គាបសង្កត់​របស់​ក្រុម​ប្រឆាំង​នោះ​ទេ។ តែ​នេះ​ជា​ឆន្ទៈ​នយោបាយ​ផ្ទាល់​របស់​រាជរដ្ឋាភិបាល។

សូម​រម្លឹក​ថា នៅថ្ងៃខួប ២១ ឆ្នាំ​នៃ​ថ្ងៃ២៣ តុលា​នេះ មិន​មាន​ពិធី​ជួបជុំ​អ្វី​ធំ​ដុំ​ត្រូវ​បាន​គេ​រៀបចំ​ឡើង​ទេ ព្រោះថា នៅ​ទូទាំង​ប្រទេស មមាញឹក​នឹង​ព្រះរាជ​ពិធីបុណ្យ​កាន់ទុក្ខ​នៃ​ការ​យាង​ចូល​​ព្រះ​ទិវង្គត​របស់​សម្តេច​ព្រះមហាវីរក្សត្រ សម្តេចព្រះ នរោត្តម សីហនុ។ កិច្ចព្រមព្រៀង​សន្តិភាព​ទីក្រុង​ប៉ារីស ថ្ងៃ ២៣ តុលា ឆ្នាំ​១៩៩១ បាន​កើត​ឡើង​​ដោយ​ព្រះរាជ​បូជនីយកិច្ច​របស់​ព្រះករុណា សម្តេច​ព្រះមហាវីរក្សត្រ សម្តេចព្រះ នរោត្តម សីហនុ និង​លោក​នាយករដ្ឋមន្ត្រី ហ៊ុន សែន រួម​ទាំង​ភាគី​ខ្មែរ​ដទៃ​ទៀត ក្រោម​ការ​ជួយ​​ឧបត្ថម្ភ​គាំទ្រ​ពី​បណ្តា​ប្រទេស​ជា​មិត្ត​របស់​កម្ពុជា ពិសេស​បារាំង និង​ឥណ្ឌូនេស៊ី​ដែល​ជា​សហប្រធាន នៃ​សន្និសីទ​រួម ឈាន​ដល់​ការរួបរួម​រវាង​ខ្មែរ និង​ខ្មែរ​ដើម្បី​ចុះហត្ថលេខា​លើ​បទ​ឈប់​​បាញ់​៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ