អេហ្ស៊ីប

បាតុករ​អេហ្ស៊ីប នៅ​តែ​បន្ត​​ទាមទារ​ឱ្យ​លោក Mohamed Morsi ចុះចេញ​ពី​តំណែង

ក្រុមបាតុករ​នៅទីក្រុង Caire ទាមទារឱ្យលោក​ Morsi ចុះចេញពីតំណែង ថ្ងៃទី៣០ មិថុនា ២០១៣
ក្រុមបាតុករ​នៅទីក្រុង Caire ទាមទារឱ្យលោក​ Morsi ចុះចេញពីតំណែង ថ្ងៃទី៣០ មិថុនា ២០១៣ REUTERS/Mohamed Abd El Ghany

ប្រជាជន​អេហ្ស៊ីប នៅ​តែ​បន្ត​ធ្វើ​បាតុកម្ម ដើម្បី​ទាមទារ​ឱ្យ ប្រធានាធិបតី Mohamed Morsi ចុះ​ចេញ​ពី​តំណែង។ ដោយ​ចលនា​ប្រជាជន​ប្រឆាំង​កាន់​តែ​ខ្លាំង​ឡើងៗ​នៅ​លើ​ទីលាន ដែល​ឱ្យ​ឈ្មោះ​ថា​តារៀរ (Tahrir)។ ក្រុម​បាតុករ​បាន​ស្រែក​ថា​ថ្នាក់​ដឹក​នាំ​រូប​នេះ មិន​បាន​ជួយ​ស្ថារសេដ្ឋកិច្ច​ជាតិ ដែល​កំពុង​តែ​មាន​វិបត្តិ​នោះ​ទេ។

ផ្សាយពាណិជ្ជកម្ម

មនុស្ស​រាប់ពាន់​នាក់​បាន​ស្រែក​យ៉ាង​ទ្រហឹង​អឹងកង ខ្លះ​កាន់​​បដា​មាន​សរសេរ​អក្សរ និង​ខ្លះ​ទៀត​គូររូប​ខ្វែង​ព័ត៌​ក្រហម​លើ​រួបថត​របស់​លោក​ Mohamed Morsi ដែល​ជា​ប្រធានាធិបតី​បច្ចុប្បន្ន។ ពួក​គេ​ទាមទារ​ឱ្យ​រូប​លោក ត្រូវ​តែ​ចុះចេញ​ពីរ​តំណែង​ជា​ដាច់ខាត។​

 
ក្រុម​បាតុក​ដែល​ដឹក​នាំ​ដោយ​គណបក្សប្រឆាំងនេះ បាន​ស្រែកថា សូម Morsi ចេញ​ទៅ​។ ពួក​គេ​ក៏​បាន​ស្រែក​ផង​ដែរ​ថា នេះ​ជា​បដិវត្តន៍ លើក​ទីពីរ ដែល​មាន​ទីលាន Tahrir នេះ​ហើយ ជា​និមិត្តរូប​នៃ​បដិវត្តន៍​របស់​អេហ្ស៊ីប។

គួរ​រម្លឹក​ថា​នៅ​ឆ្នាំ​២០១១ កន្លង​ទៅ​ប្រជាជន​អេហ្ស៊ីប​បាន​នាំ​គ្នា​ចុះ​ផ្លូវ ធ្វើ​បាតុកម្ម​ម្តង​រួច​ទៅ ហើយ ដើម្បី​ទាមទារ​ឱ្យ​អតីត​ប្រធានាធិបតី​អេហ្ស៊ីប Hosni Moubarak ចុះ​ចេញ​ពី​តំណែង។ ពេល​នោះ​ក្រុមបាតុករ​បាន​គួររូប​សញ្ញាខ្វែង​ជើងក្អែក​ព័ណ៌ក្រហម ពាស់ពេញ​លើ​រូបថត​លោក។ នៅ​ពេល​នេះ​រូបភាព​ដដែល​នេះ ពួក​គេ​បាន​ធ្វើ​ឡើង​ចំពោះ​លោក ប្រធានាធិបតី​ថ្មី។

នា​ឆ្នាំ​២០១២ បន្ទាប់​ពី​បដិវត្តន៍​លើក​ទីមួយ លោក Mohamed Morsi មក​គណបក្ស ភាតរឥស្លាម ត្រូវ​បាន​ប្រជាជន​អេហ្ស៊ីបជ្រើសរើស ជា​ប្រធានាធិបតី តាម​រយៈ​ការ​បោះឆ្នោត​ដោយ​លទ្ធិ​ប្រជាធិបតេយ្យ​សេរី ជា​ប្រវត្តិសាស្ត្រ​សម្រាប់​ប្រទេស​នេះ។

ប៉ុន្តែ​ថ្ងៃ​នេះ ប្រជាជន​អេហ្ស៊ីប​បាន​ចោទ​រូប​លោក​ថា មិន​បាន​គោរព​តាម​គោលការណ៍​នៃ​លទ្ធិប្រជាធិបតេយ្យ។ ដោយ​គេ​ចោទ​ថា​ លោក​មិន​បាន​គិត​គួរ​ដល់ ការ​ស្ថាសេដ្ឋកិច្ច​ជាតិ​ដែល​កំពុង​តែ​ជួប​នូវ​វិបត្តិ​ទេ។ ជាង​នេះ​ទៅ​ទៀត ក្រុមប្រឆាំង​ចោទ​ថា​លោក​កំពុង​តែ​រៀបចំ​ឱ្យ​មាន​ក្រុម​បាតុករ​មួយ​ផ្សេង​ទៀត ដែល​គាំទ្រ​រដ្ឋាភិបាល។ ករណី​នេះ ក្រុម​អ្នក​ប្រឆាំង​យល់​ថា លោក Morsi ​កំពុង​តែ​ធ្វើ​ឱ្យ​ប្រជាជន​អេហ្ស៊ីប​បាន​ការ​បែងចែក​គ្នា​ហើយ។
 

ក្នុង​នោះ​ដែរ អ្នក​ដឹក​នាំ​ក្រុម​បាតុករ​បាន​អះអាងថា ពួក​គេ​ប្រមូល​ហត្ថលេខា បាន​ប្រមាណ​ជាង ២២លាននាក់​ហើយ ដើម្បី​ទាមទារ​ឱ្យ​មាន​ការ​បោះឆ្នោត​ប្រធានាធិបតីមុនចប់អណត្ត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI