អានតួអត្ថបទ
កម្ពុជា

កុមារី២នាក់​ទៀត​នៅ​កំពង់ស្ពឺ និង​កំពត​ស្លាប់​ដោយ​មេរោគ​ផ្តាសាយបក្សី

ការត្រួត​ពិនិត្យ​លើ​ព័ត៌មាន​សុខភាព​ដើម្បី​ការពារ​ពី​ការឆ្លង​មេរោគ​ ផ្តាសាយ​បក្សី
ការត្រួត​ពិនិត្យ​លើ​ព័ត៌មាន​សុខភាព​ដើម្បី​ការពារ​ពី​ការឆ្លង​មេរោគ​ ផ្តាសាយ​បក្សី ©វណ្ណារ៉ា/RFI
ដោយ៖ លាង ដឺលុច
១៥ នាទី

កុមារី​២​នាក់​ទៀតបាន​ស្លាប់​ដោយ​សារ​មេរោគ H5N1នៃ​ជំងឺ​ផ្តាសាយ​បក្សី ដែល​ធ្វើ​អោយ​ករណី​ដោយសារ​មេរោគ​បាន​កើនឡើង​៤​ករណី​ គ្រាន់តែ​ក្នុង​ខែ​មករាដើម​ឆ្នាំ​២០១៣​នេះ។ រដ្ឋមន្ត្រី​ក្រសួង​សុខាភិបាល​បាន​សម្តែង​ការ​ព្រួយ​បារម្ភ​ចំពោះ​ការ​ផ្ទុះ​ឡើង​នៃ​ការឆ្លងមេរោគ​នេះ​ពី​បក្សី​មក​មនុស្ស​នៅ​ក្នុង​ប្រទេស​កម្ពុជា។

ផ្សាយពាណិជ្ជកម្ម

កុមារី​​អាយុ១៧ខែ​នៅ​ស្រុក​គងពិសីខេត្តកំពង់ស្ពឺបានស្លាប់​នៅ​ថ្ងៃ​ចន្ទ​ម្សិលមិញ បើ​ទោះ​ជាមាន​ការ​ជួយ​សង្គ្រោះ​ពី​គ្រូពេទ្យ​នៃ​មន្ទីរពេទ្យ​គន្ធបុប្ជា​ក៏​ដោយ។ កុមារី​ម្នាក់​ទៀត​អាយុ​៩​ឆ្នាំ​ក៏​បាន​ស្លាប់​នៅ​ក្នុង​មន្ទីរពេទ្យ​គន្ធបុប្ជា​នៅ​ថ្ងៃ​ចន្ទ​ម្សិលមិញ​ដូច​គ្នា។ កុមារី​ទាំង​ពីរ​ត្រូវបាន​បញ្ជាក់​ដោយ​វិទ្យាស្ថាន​ប៉ាស្ទ័រ​ថា ពួកគេ​បាន​ឆ្លង​មេរោគ​ផ្តាសាយ​បក្សីH5N1។ សេចក្តីប្រកាស​ព័ត៌មាន​រួម​របស់​ក្រសួង​សុខាភិបាល និង​អង្គការ​សុខភាព​ពិភពលោក​បាន​សរសេរ​ថា កុមារី​ទាំង​ពីរ​សុទ្ធ​បាន​រស់​នៅ​ក្នុង​ភូមិ​ដែល​មាន​បក្សី​ងាប់។ ដោយ​គិត​ទាំង​ករណី​ទាំង​ពី​ចុងក្រោយ​នេះទៀត នៅ​ក្នុង​ខែ​មករា​នេះ កម្ពុជា​បាន​រកឃើញ​ករណីផ្ទុះ​មេរោគ​ផ្តាសាយ​បក្សី​មក​លើ​មនុស្ស​មាន​៥​ករណី​ហើយ ដែល​ក្នុង​ចំណោម​ករណី​ទាំងនេះ ៤​នាក់​បាន​ស្លាប់។ ហើយ​ថា បើ​គិត​មក​ដល់​ពេល​នេះ​មាន​មនុស្ស​២៦​នាក់​ហើយដែល​បាន​ឆ្លង​មេរោគ​គ្រុន​ផ្តាសាយ​បក្សី ហើយ​​២៣​នាក់​បាន​ស្លាប់​ដោយ​សារ​មេរោគ​នេះ។

លោក ម៉ម ប៊ុនហេង រដ្ឋមន្ត្រី​ក្រសួងសុខាភិបាលបាន​អត្ថាធិប្បាយ​ថា មេរោគ​ផ្តាសាយ​បក្សី​នៅ​តែ​បន្ត​គំរាម​កំហែង​សុខភាព​ពលរដ្ឋ​កម្ពុជា ហើយ​ថា កុមារ​នៅតែមាន​ភាព​ងាយ​រងគ្រោះ​ច្រើន។ ដូច្នេះ​លោក​រដ្ឋមន្ត្រី​បាន​​រំលឹក​ដល់​ឪពុកម្តាយ និង​អាណាព្យាបាល​អោយ​ដាក់​កុមារ​នៅ​អោយ​ឆ្ងាយ​ពីបក្សី​ឈឺ ឬ​ងាប់ និង​លាង​ដៃ​កូនៗ​របស់​ពួកគេ​អោយ​បាន​ញឹកញាប់។ ហើយ​ថា​ប្រសិន​បើ​កុមារធ្លាក់​ខ្លួន​ឈឺ មាន​ដង្ហើម​ញាប់ ឬពិបាក​ដកដង្ហើម អាណាព្យាបាល​ត្រូវ​នាំ​កុមារ​ទៅ​មន្ទីរពេទ្យ​ជា​បន្ទាន់ និង​ត្រូវ​ប្រាប់​គ្រូពេទ្យ​អំពី​ប្រវត្តិ​នៃ​ការ​ប៉ះពាល់​បក្សីឈឺ ឬ​ងាប់​របស់​កូនៗ​របស់​ពួកគេ។ គួរ​បញ្ជាក់​ផងដែរ​ថា ក្រសួង​សុខាភិបាល​ទើបតែ​បាន​ប្រកាស​អំពី​ករណី​ស្លាប់​ដោយសារ​ជំងឺ​ផ្តាសាយ​បក្សី​ចំនួន​២​ករណី​កាល​សប្តាហ៍​មុន​នេះ។

សេចក្តី​ប្រកាស​ព័ត៌មាន​រួម​របស់​ក្រសួ​ង​សុខាភិបាល និង​អង្គការ​សុខភាព​ពិភពលោក​បាន​សរសេរ​​ថា ក្រុម​ឆ្លើយ​តប​បន្ទាន់​របស់​ក្រសួង​សុខាភិបាល​កំពុង​អង្កេត​ស្រាវជ្រាវ​ដល់​ទី​កកន្លែង​កើតហេតុនៅ​ឯ​មូលដ្ឋាន និង​នៅ​មន្ទីរពេទ្យ​ដើម្បីស្វែងរក​អ្នក​ប៉ះពាល់​ជិតស្និទ្ធ ជាមួយ​អ្នក​ជំងឺទាំង​៥​ករណី​ដែល​ត្រូវបាន​រកឃើញ​នៅក្នុង​ខែ​មករា​នេះ។ គិត​ចាប់តាំងពី​ឆ្នាំ២០០៣មក នៅ​ក្នុង​ពិភពលោក មាន​ករណី​ផ្តាសាយ​បក្សី​សរុប​ទាំង​អស់ ៦១៥ករណី​ដែល​ត្រូវ​បាន​បញ្ជាក់​ដោយ​មន្ទីរ​ពិសោធន៍ ហើយ​​ក្នុង​នោះ ៣៦៤នាក់បាន​ស្លាប់៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ