អានតួអត្ថបទ
កម្ពុជា

​លោក​ហ៊ុន​ សែន៖ ​មន្ត្រី​សុខា​ភិបាល ​និង​កម្មករ ​នឹង​ត្រូវ​ដំឡើង​ប្រាក់​ខែ

កម្មករ​រោងចក្រ​អូសេអង់​តវ៉ា​នា​ពេល​កន្លង​មក​។
កម្មករ​រោងចក្រ​អូសេអង់​តវ៉ា​នា​ពេល​កន្លង​មក​។ RFI/Siv Channa
ដោយ៖ ស៊ុន មេសា
១៥ នាទី

ក្នុង​​ពិធី​​ចែក​​សញ្ញា​បត្រ​​ដល់​​និស្សិត​​សកល​វិទ្យា​​ល័យ នៅ​​មជ្ឈ​មណ្ឌល​​កោះ​​ពេ​ជ្យ​ លោក​នាយក​​រដ្ឋ​មន្ត្រី​​ហ៊ុន​ សែន​ នៅ​​ថ្ងៃ​​ព្រហស្ប​ត្តិ៍​​ទី​ ២៥​ កញ្ញា​​​នេះ ​​បាន​​ប្រកាស​​ថា​​​រដ្ឋា​ភិ​បាល​​​នឹង​​​ដំ​​ឡើង​​ប្រាក់​​​បៀ​​​​វត្ស​​​ដល់​​​មន្ត្រី​​​ក្រ​សួង​​សុ​ខា​​ភិបាល​ នៅ​​​ខែ​​​ខាង​​មុខ​​នេះ​​ដោយ​​ឡែក​​​វិស័យ​​​កាត​​​ដេ​​វិញ​​ក៏​​នឹង​​ត្រូវ​​​ឡើង​​​ផង​​ដែរ​។

ផ្សាយពាណិជ្ជកម្ម

នៅ​ខែតុលា​ខាងមុខនេះ មន្ត្រី​ថ្នាក់​តាម​បំផុត​របស់​ក្រសួង​សុខ​ភិ​បាល(ពេទ្យ) គឺ​នឹងត្រូវ​ដំឡើង​ប្រាក់ខែ​ពី​ចំនួន៤៤ម៉ឺន​ទៅ៥៥ម៉ឺន​រៀល​ក្នុង​មួយខែ។ នេះ ជាកា​បញ្ជាក់​ពី​លោកនាយក​រដ្ឋ​​មន្ត្រី។​ ថ្លែង​ទៅកាន់​សិស្ស​និស្សិត​ប្រមាណ​ជាង២ពាន់​នាក់ លោក​ហ៊ុន សែន​បាន​លើកឡើងថា ការ​ដំឡើ​ង​ប្រាក់ខែ​ដល់​មន្ត្រី​ក្រសួងសុខាភិបាល គឺ​នឹង​ចាប់ផ្តើម​អនុវត្ត​នៅ​ខែតុលា​នេះ​តែម្តង ដោយ​លោក​នឹង​អាច​ហុះ​ហត្ថលេខា​លើ​អនុក្រឹត្យ​នេះ នៅ​ថ្ងៃ​ព្រ​ស្ប​តិ៍​ឬ​ថ្ងៃ​សុក្រ​ទី២៦ កញ្ញា​ស្អែក​នេះ។ ក្រៅពី​ការដំឡើង​ប្រាក់បៀវត្ស​ដល់​មន្ត្រី​ក្រសួងសុខាភិបាល​នោះ រដ្ឋាភិបាល​ក៏បាន​ដំឡើង​រួចរាល់​ហើយ​ដែរ​ចំពោះ​មន្ត្រី​គ្រូបង្រៀន​សម្រាប់​ខែកញ្ញា​នេះ។ មន្ត្រី​គ្រូបង្រៀន​ថ្នាក់​បឋម​ដែល​ទទួលបាន​ប្រមាណ​ពី៤៨ម៉ឺន​រៀល ទៅ៥៥ម៉ឺន​រៀល។ បើតាម​ប្រសាសន៍​លោកនាយក​រដ្ឋមន្ត្រី​ប្រាក់​បៀរ​វត្ស​ទាំងនេះ នឹង​បន្ត​កើន​ឡើងជា​បន្តទៀត​ជាដំណាក់។

 
លោកនាយក​រដ្ឋមន្ត្រី​បាន​លើកឡើងថា ការដំឡើង​ប្រាក់បៀវត្ស​ដល់​មន្ត្រី​ក្រសួង​ទាំងពីរ​ដែលមាន​ចំនួន​ប្រមាណ​ជាង១៣ម៉ឺន​នាក់​នោះ គឺជា​អាទិភាព។ សូមបញ្ជាក់ថា បញ្ហា​ប្រាក់​បៀរ​វត្ស​នៅ​ទាប​នៃ​មន្ត្រី​គ្រូបង្រៀន និង​គ្រូពេទ្យ ដែលជា​អ្នកបម្រើ​សេវាកម្ម​ដល់​ប្រជាពលរដ្ឋ​ដោយផ្ទាល់​នោះ បាន​បណ្តាលឱ្យ​វិស័យ​ទាំងពីរ​នេះ ធ្លាក់ចុះ​គុណភាព​របស់ខ្លួន​យ៉ាងខ្លាំង។ មិនតែប៉ុណ្ណោះ​បញ្ហា​អំពើពុករលួយ​ក៏ត្រូវ​បាន​គេ​រកឃើញ​ក្នុង​វិស័យ​អប់រំ និង​នៅក្នុង​វិស័យ​សុខាភិបាល​ផងដែរ។

ក្នុង​សន្ទរកថា ប្រមាណ​ជាង១ម៉ោង​របស់ខ្លួន ប្រមុខ​រដ្ឋាភិបាល ក៏បាន​ថ្លែងថា ក្រសួង​ការងារ សហជីព និង​អង្គការ​អន្តរជាតិ​ខាង​ការងារ បាន​នឹង​កំពុង​ពិភាក្សាគ្នា​ជា​បន្តទៀត​ដើម្បី​ស្វែងរក​ផ្លូវ​​បង្កើត​​ប្រាក់​ឈ្នួល​ដល់​វិស័យ​ឯកជន-ផ្នែក​កាត់ដេរ។ បញ្ហា​ដំឡើង​ប្រាក់​ឈ្នួល​ដល់​វិស័យ​កាត់​ដេរ​នេះ​ ក្រសួង​ការងារ សហជីព​កម្មករ និង​សមាគម​និយោជក​នឹង​បើក​កិច្ចប្រជុំ​ត្រីភាគី​ជា​​បន្ត​ទៀត​​នៅ​ថ្ងៃទី២៦ កញ្ញា​ស្អែក​នេះ​ជា​បន្តទៀត បន្ទាប់ពី​ការជជែក​គ្នា​កាលពី​ពាក់​កណ្តាល​​ខែ​កន្លងទៅ​មិនទាន់​ដាច់​ស្រាច់​នៅឡើយ។

សូមបញ្ជាក់ថា ការប្រកាស​ដំឡើង​ប្រាក់ខែ​ដល់​មន្ត្រី​ក្រសួងសុខាភិបាល​ពី៤៤ម៉ឺន ដល់​៥៥​ម៉ឺន​​ពី​លោកនាយក​រដ្ឋមន្ត្រី​នេះ។ គណបក្ស​សង្គ្រោះ​ជាតិ​ដែលជា​គណបក្សប្រឆាំង​វិញ បាន​ប្រ​កាស​​ក្នុង​យុទ្ធនាការ​បោះឆ្នោត​របស់​ខ្លួន​ថា​នឹង​ដំឡើង​ប្រាក់​បៀរ​វត្ស​ដល់​មន្ត្រីរាជការ​ទាប​បំ​ផុត​ គឺ១​លាន​​រៀល៕​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ