កម្ពុជា

Human Rights Watch ជំរុញឲ្យរដ្ឋាភិបាលកម្ពុជា និងម៉ាឡេស៊ី ការពារស្ត្រីពលករកម្ពុជា

តំណាង​អង្គការ Human Rights Watch និង​អង្គការ​សិទ្ធិ​មនុស្ស​ក្នុងស្រុក នៅក្នុង​សន្និសីទ​កាសែត​ផ្សព្វផ្សាយ​របាយការណ៍​ស្តីពី​ពលករ​ធ្វើការ​តាមផ្ទះ​ប្រឈម​នឹង​ការរំលោភបំពាន
តំណាង​អង្គការ Human Rights Watch និង​អង្គការ​សិទ្ធិ​មនុស្ស​ក្នុងស្រុក នៅក្នុង​សន្និសីទ​កាសែត​ផ្សព្វផ្សាយ​របាយការណ៍​ស្តីពី​ពលករ​ធ្វើការ​តាមផ្ទះ​ប្រឈម​នឹង​ការរំលោភបំពាន ©RFI/ លី ម៉េងហួរ

អង្គការ​ឃ្លាំមើល​សិទ្ធិមនុស្ស Human Rights Watch បាន​ជំរុញ​ឲ្យ​រដ្ឋាភិបាល​ប្រទេស​កម្ពុជា និង​ប្រទេស​ម៉ាឡេស៊ី ផ្តល់​សច្ចាប័ន លើ​អនុសញ្ញា​របស់​អង្គការ​ពលកម្ម​អន្តរជាតិ ស្តីពី ការងារ​តាម​ផ្ទះ។ សន្ធិសញ្ញា​នោះ តម្រូវ​ឲ្យ​រដ្ឋាភិបាល​កម្ពុជា និង​ម៉ាឡេស៊ី ធានា​ឲ្យមាន​លក្ខខណ្ឌ​ការងារ​សមស្រប កំណត់​អាយុ​អប្បបរមា សម្រាប់​ពលករ​ធ្វើ​ការងារ​តាម​ផ្ទះ និង​ការពារ​ពលករ​ធ្វើការ​តាម​ផ្ទះ​ពី​អំពើហិង្សា និង​ការអនុវត្តន៍​ការជ្រើសរើស​បែប​កេងប្រវ័ញ្ច។

ផ្សាយពាណិជ្ជកម្ម

ការលើកឡើង​របស់​អង្គការ​ឃ្លាំមើល​សិទ្ធិមនុស្ស Human Rights Watch ដូច្នេះ បាន​ធ្វើឡើង នៅក្នុង​ពិធី​ផ្សព្វផ្សាយ​របាយការណ៍ ដែលមាន ១០៥ ទំព័រ ដែល​មាន​ចំណងជើង​ថា “ពួកគេ​បោកប្រាស់​យើង​គ្រប់​ជំហាន”។ របាយការណ៍​នេះ​ផ្តោត​សំខាន់​លើ​ការរំលោភ​លើ​អ្នកធ្វើការ​តាម​ផ្ទះ​ជាតិ​កម្ពុជា ដែល​បានធ្វើ​ចំណាកស្រុក​ទៅកាន់​ប្រទេស​ម៉ាឡេស៊ី។

 
អង្គការ​ឃ្លាំមើល​សិទ្ធិមនុស្ស Human Rights Watch ដែល​មាន​មូលដ្ឋាន​នៅ​ទីក្រុង​ញូវយ៉ក បាន​ចុះផ្សាយ​ក្នុង​របាយការណ៍​នៅ​ថ្ងៃទី​១​វិច្ឆិកា​ថា ការខកខាន​របស់​រដ្ឋាភិបាល​កម្ពុជា និង​រដ្ឋាភិបាល​ម៉ាឡេស៊ី ដើម្បី​ដាក់​បទបញ្ញត្តិ​គ្រប់គ្រង​លើ​អ្នក​ជ្រើសរើស និង​និយោជក ធ្វើឲ្យ​ពលករ​ចំណាកស្រុក ធ្វើការ​តាម​ផ្ទះ​ជាតិ​កម្ពុជា ទទួល​រង​នូវ​ការរំលោភ​ដ៏​រីករាលដាល។

អ្នកស្រី យូណា ពូយ៉ាល់ ( Jyotsna Poudyal ) អ្នកស្រាវជ្រាវ​អំពី​សិទ្ធិ​ស្ត្រី នៅ​អង្គការ​ឃ្លាំមើល​សិទ្ធិមនុស្ស Human Rights Watch បាន​លើកឡើង​ក្នុង​សន្និសីទ​កាសែត​ថា រដ្ឋាភិបាល​កម្ពុជា​បាន​យកចិត្តទុកដាក់​ក្នុង​ការជំរុញ​ឲ្យមាន​ការ​ធ្វើ​ចំណាកស្រុក​ពលករ ប៉ុន្តែ​ប្រទេស​កម្ពុជា បាន​ខកខាន​ផ្តល់​កិច្ច​ការពារ​ជា​មូលដ្ឋាន​ដល់​ស្ត្រី និង​កុមារី​ចំណាកស្រុក​ទាំងនោះ។ រដ្ឋាភិបាល គួរតែបញ្ឈប់​ការប្រគល់​ការទទួលខុសត្រូវ​គ្រប់យ៉ាង​ទៅឲ្យ​ទីភ្នាក់ងារ​ជ្រើសរើស​ពលករ ដែល​មិន​ស្មោះត្រង់ និង​ត្រូវ​តែ​បោសសម្អាត​ឲ្យអស់​នូវ​អំពើ​កេងប្រវ័ញ្ច និង​អំពើ​រំលោភបំពាន។

ចាប់តាំងពី​ឆ្នាំ​២០០៨ អង្គការ Human Rights Watch បាន​លើកឡើង​ថា ស្ត្រី និង​កុមារី​កម្ពុជា ចំនួន ៤០.០០០ ទៅ ៥០.០០០ នាក់ បាន​ធ្វើ​ចំណាកស្រុក ទៅកាន់​ប្រទេស​ម៉ាឡេស៊ី ជា​អ្នកធ្វើការ​តាម​ផ្ទះ។

Human Rights Watch បាន​លើកឡើង​ថា ភ្នាក់ងារ​ជ្រើសរើស​ពលករ​មួយចំនួន នៅក្នុង​ប្រទេស​កម្ពុជា បាន​ក្លែង​បន្លំ​​ឯកសារ​អត្តសញ្ញាណ​ក្លែងក្លាយ ដើម្បី​ជ្រើសរើស​កុមារ និង​ផ្តល់​គ្រឿង​ទាក់ទាញ​ទឹកចិត្ត ជា​ប្រាក់កាស និង​ជា​អាហារ ដែល​នាំឲ្យ​ពលករ​ចំណាកស្រុក និង​គ្រួសារ​របស់​ពួកគេ​ជាប់បំណុល​យ៉ាងធ្ងន់ធ្ងរ ចំពោះ​ការចេញ​ទៅ​ធ្វើការ នៅ​ប្រទេស​ម៉ាឡេស៊ី។ នៅ​ប្រទេស​ម៉ាឡេស៊ី ស្ត្រី និង​កុមារី​កម្ពុជា ជា​ញឹកញយ ត្រូវ​គេ​ដកហូត​លិខិត​ឆ្លងដែន ធ្វើការ​ច្រើន​ម៉ោង គ្មាន​ពេល​សម្រាក ទទួលទាន​អាហារ​មិន​គ្រប់គ្រាន់ និង​ទទួល​រង​នូវ​ការរំលោភ​លើ​រាងកាយ និង​រំលោភ​ដោយ​ពាក្យ​សម្តី ជាដើម។

អង្គការ​ឃ្លាំមើល​សិទ្ធិមនុស្ស Human Rights Watch បាន​ជំរុញ​ឲ្យ​រដ្ឋាភិបាល​កម្ពុជា ត្រូវ​បង្កើត​ច្បាប់​ទូលំទូលាយ​មួយ ស្តីពី ចំណាកស្រុក ត្រូវ​ពង្រឹង​ការឃ្លាំមើល​ទីភ្នាក់ងារ​ជ្រើសរើស​ពលករ និង​ដាក់ទោស​ជា​ចាំបាច់ ខណៈពេល​ដែល​មាន​ការ​រំលោភ​កើតឡើង។ រដ្ឋាភិបាល​ប្រទេស​កម្ពុជា និង​ប្រទេស​ម៉ាឡេស៊ី ក៏​ផ្តល់​សច្ចាប័ន លើ​អនុសញ្ញា​របស់​អង្គការ​ពលកម្ម​អន្តរជាតិ ស្តីពី ការងារ​តាម​ផ្ទះ ដើម្បី​ការពារ​ដល់​ស្ត្រី​ពលករ​កម្ពុជា។

ការផ្សព្វផ្សាយ​របាយការណ៍​របស់​អង្គការ​ឃ្លាំមើល​សិទ្ធិមនុស្ស Human Rights Watch នៅ​ថ្ងៃ​អង្គារ​នេះ បាន​ធ្វើឡើង បន្ទាប់​ពី​រដ្ឋាភិបាល​កម្ពុជា បាន​ចេញ​សារាចរ កាលពី​ថ្ងៃ​ទី​១៥​តុលា ឆ្នាំ​២០១១ សម្រេច​ផ្អាក​ជា​បណ្តោះអាសន្ន​នូវ​ការបញ្ជូន​ស្ត្រី​ពលករ​កម្ពុជា ទៅ​បម្រើការ នៅតាម​ផ្ទះ ក្នុង​ប្រទេស​ម៉ាឡេស៊ី។
ក៏​ប៉ុន្តែ ចំពោះ​ស្ត្រី​ពលករ​កម្ពុជា​ប្រមាណ ៣០.០០០ នាក់ ដែល​កំពុង​បម្រើការ​តាម​ផ្ទះ នៅ​ប្រទេស​ម៉ាឡេស៊ី នាពេលនេះ ត្រូវបាន​លោក អន ប៊ុន​ហាក់ ប្រធាន​សមាគម​ភ្នាក់ងារ​ជ្រើសរើស​ពលករ​កម្ពុជា ដែល​បង្កើតឡើង​ដោយ​ក្រុមហ៊ុន​ជ្រើសរើស​ពលករ​ទៅ​ធ្វើការ​នៅ​ក្រៅប្រទេស អះអាងថា ​ស្ត្រី​ទាំងនោះ នឹង​បន្ត​ធ្វើការ​នៅ​ប្រទេស​ម៉ាឡេស៊ី រហូត​ដល់​បញ្ចប់​កិច្ចសន្យា ដែល​មាន​រយៈពេល ២ ឆ្នាំ និង​អាច​បន្ត​រយៈពេល ២ ឆ្នាំ​បន្ថែមទៀត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI