អានតួអត្ថបទ
ឥណ្ឌា

ឥណ្ឌា​ចង់​អូសទាញ​ក្រុម​អ្នកវិនិយោគបរទេស​បន្ថែមទៀត​ដើម្បី​ផ្តល់​សន្ទុះ​កំណើនសេដ្ឋកិច្ច

លោក​នាយករដ្ឋមន្រ្តី​ឥណ្ឌា ម៉ាន់ម៉ូហាន់ ស៊ីន
លោក​នាយករដ្ឋមន្រ្តី​ឥណ្ឌា ម៉ាន់ម៉ូហាន់ ស៊ីន Reuters/Press Information Bureau of India
១២ នាទី

នៅ​ក្នុង​ប្រទេស​ឥណ្ឌា លោក​រដ្ឋមន្រ្តី​ក្រសួងពាណិជ្ជកម្ម​បាន​ប្រាប់​ឲ្យ​ដឹង​ថា រដ្ឋាភិបាល​មាន​បំណង​ចង់​អូសទាញ​ក្រុមអ្នកវិនិយោគ​បរទេស​បន្ថែម​ទៀត​ឲ្យ​ចូល​មក​រកស៊ី​នៅ​ក្នុង​ប្រទេស​ឥណ្ឌា។ គោលដៅ​របស់​រដ្ឋាភិបាល គឺ​ដើម្បី​ជួយ​ផ្តល់​សន្ទុះ​សេដ្ឋកិច្ច​របស់​ប្រទេស មុន​នឹង​គម្រោង​រៀបចំ​បោះឆ្នោតជាតិ​នៅ​មុន​ខែ​ឧសភា​ឆ្នំា ២០១៤ នេះ។

ផ្សាយពាណិជ្ជកម្ម

កន្លង​មក និង​ដើម្បី​ទាក់ទាញ​អ្នកវិនិយោគបរទេស​បន្ថែម​ទៀត រដ្ឋាភិបាល​បាន​ជួយសម្រួល និង​ការ​បន្ថយ​ភាព​សំាញុំា​ផ្នែក​រដ្ឋបាល​នៅ​ក្នុង​វិស័យ​មួយ​ចំនួន​រួម​មាន អាកាសនាវាវិជ្ជា​ស៊ីវិល ការ​ចែកចាយ ផ្នែក​ទូរគមនាគមន៍ វិស័យ​ការពារ និង​សេវា​សម្រិតសម្រាង​ជា​ដើម។ តែ​ចាប់​ពី​សប្តាហ៍​ខាង​មុខៗ​ទៅ រដ្ឋាភិបាល​នឹង​ផ្តើម​រៀបចំ​កម្មវិធី​បន្ធូរបន្ធយ​ក្បួន​ច្បាប់​មួយ​ចំនួន​ទៀត​សម្រាប់​ក្រុមអ្នកវិនិយោគបរទេស​ដែល​ចង់​មក​បោះទុន​រកស៊ី​នៅ​ក្នុង​ប្រទេស​ឥណ្ឌា នេះ​ជា​ការ​បញ្ជាក់​របស់​លោក​រដ្ឋមន្រ្តី​ក្រសួង​ពាណិជ្ជកម្ម​នៅ​ក្នុង​ឱកាស​ជូនពរ​ឆ្នំាសកល ២០១៤។ ការ​ព្យាយាម​អូសទាញ​ក្រុមអ្នវិនិយោគ​បរទេស​បន្ថែម​នា​ពេល​នេះ គឺ​ដើម្បី​ទប់ស្កាត់​ការ​ធ្លាក់​ថ្លៃ​តម្លៃ​ប្រាក់​រូពី និង​ចូលរួម​ជួយ​ផ្តល់សន្ទុះ​សេចដ្ឋកិច្ច មុន​នឹង​គម្រោង​រៀបចំ​បោះឆ្នោតជាតិ​នៅ​មុន​ខែ​ឧសភា​ឆ្នំា ២០១៤ នេះ។

គួរ​ជម្រាប​ជូន​ថា កំណើន​សេដ្ឋកិច្ច​ដែល​ឥណ្ឌា​ទទួល​បាន​ជា​មធ្យម​មាន​ប្រមាណ ៥% ក្នុង​មួយ​ឆ្នំា គឺ​ជា​អត្រា​មួយ​ដ៏​ទាប​ខ្លំាង​គិត​ក្នុង​រយៈពេល ១០ឆ្នំា​ចុង​ក្រោយ​នេះ។ អំពើ​ពុករលួយ និង​ការិយាល័យធិបតេយ្យ​ស្មុគស្មាញ​ដែល​បាន​អូសបន្លាយ​គម្រោង​វិនិយោគ គឺ​ជា​មូលហេតុ​ដែល​បាន​ជម្រុញ​ក្រុមអ្នកវិនិយោគ​មិន​មាន​ចិត្ត​ចូល​ទៅ​បោះទុន​រកស៊ី​ក្នុង​ប្រទេស​ឥណ្ឌា។ កាល​ពី​ដើម​សប្តាហ៍​នេះ មន្ទីរ​ទទួល​បន្ទុក​កិច្ចការ​វិនិយោគ​បរទេស​បាន​ផ្តល់​អាជ្ញាប័ណ្ណ​ឲ្យ​ក្រុមហ៊ុន​អង់គ្លេស​ចំនួន​ពីរ គឺ​ក្រុមហ៊ុន Tesco ផ្នែក​ចែកចាយ និង​ក្រុមហ៊ុន​ទូរគមនាគមន៍ Vadafone ដែល​មាន​ទឹកប្រាក់​វិនិយោគ​សរុប​ប្រមាណ ១ ៥០០លានដុល្លារ។ ឥឡូវ​នេះ និង​បើ​យោង​តាម​លោក​រដ្ឋមន្រ្តី​ក្រសួងពាណិជ្ជកម្ម រដ្ឋាភិបាល​មាន​គម្រោង​ដាក់​វិស័យ​ដឹកជញ្ជូនសាធារណៈ​ឲ្យ​ក្រុមហ៊ុន​បរទេស​រកស៊ី​ទៀត។

គួរ​ជម្រាប​ជូន​ថា ក្នុង​ចន្លោះ​ខែ​មេសា និង​តុលា​ឆ្នំា ២០១៣ ទឹកប្រាក់​វិនិយោគ​បរទេស​មាន​ចំនួន ១២ ៦០០លានដុល្លារ ពោល​បាន​ធ្លាក់​ចុះ​ចំនួន ១៥%។ អ្វី​ជា​ការ​កត់សម្គាល់ គម្រោង​បើក​ចំហ​សេដ្ឋកិច្ច​សម្រាប់​អ្នកវិនិយោគបរទេស​ដើម្បី​ផ្តល់​សន្ទុះ​សេដ្ឋកិច្ច​បាន​ធ្វើ​ឡើង ក្រោយ​ពី​គណបក្សសមាជ​ដែល​កំពុង​ដឹកនំា​រដ្ឋាភិបាល​សព្វថ្ងៃ​​បាន​ទទួល​បរាជ័យ​នៅ​ក្នុង​ការ​បោះឆ្នោត​តំបន់​ចំនួន ៤ដង​បន្តបន្ទាប់​គ្នា៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ