ម៉ាឡេស៊ី-ឥណ្ឌូណេស៊ី

ឥណ្ឌូណេស៊ី​ផ្ទុះកំហឹង​នឹង​ការ​ផ្សាយ​ពាណិជ្ជកម្ម "លក់​ចុះថ្លៃ​ស្រ្តី​បម្រើ​តាមផ្ទះ" នៅ​ម៉ាឡេស៊ី

ក្រដាស​ផ្សព្វផ្សាយ​ពាណិជ្ជកម្ម "លក់បញ្ចុះថ្លៃពិសេស​ស្រ្តីបម្រើតាមផ្ទះជនជាតិ​ឥណ្ឌូណេស៊ី" នៅ​ម៉ាឡេស៊ី
ក្រដាស​ផ្សព្វផ្សាយ​ពាណិជ្ជកម្ម "លក់បញ្ចុះថ្លៃពិសេស​ស្រ្តីបម្រើតាមផ្ទះជនជាតិ​ឥណ្ឌូណេស៊ី" នៅ​ម៉ាឡេស៊ី Photo: Migrant Care
ដោយ៖ សេង ឌីណា
១៩ នាទី

ការផ្សព្វផ្សាយ​ពាណិជ្ជកម្ម នៅ​ប្រទេស​ម៉ាឡេស៊ី ស្តីពី​ការ​បញ្ចុះតម្លៃ​ពិសេស​ ចំពោះការ​ជួល​ស្រ្តី​បម្រើតាមផ្ទះ​ជនជាតិ​ឥណ្ឌូណេស៊ី កំពុងតែ​ធ្វើ​ឲ្យ​ប្រជាជន និង​រដ្ឋាភិបាល​ឥណ្ឌូណេស៊ី​ផ្ទុះកំហឹង។ បញ្ហា​ស្រ្តីបម្រើ​តាមផ្ទះនេះ គឺ​ជា​រឿង​ចម្រូងចម្រាស​យូរ​ណាស់​មកហើយ រវាង​ឥណ្ឌូណេស៊ី និង​ម៉ាឡេស៊ី។

ផ្សាយពាណិជ្ជកម្ម

 

រឿងរ៉ាវ​បាន​ចាប់ផ្ទុះឡើង កាល​ពី​ចុងសប្តាហ៍​កន្លងទៅ នៅ​ក្រោយ​​ពេល​ដែល​រូបភាព​នៃ​ការ​ផ្សព្វផ្សាយ​ពាណិជ្ជកម្ម​ អំពី​​​អ្នកបម្រើ​តាមផ្ទះ​ជាជន​ជាតិ​ឥណ្ឌូណេស៊ី​នេះ ត្រូវបាន​សកម្មជន​ការពារសិទ្ធិ​ពលករ​ចំណាកស្រុកឥណ្ឌូណេស៊ី​យក​ទៅ​ចុះផ្សាយ​តាម​វិបសៃត៍។ ក្រដាសផ្សាយ​ពាណិជ្ជកម្ម ដែល​ត្រូវបាន​គេ​យក​ទៅបិទផ្សាយ នៅតាម​ដើមឈើ ក្នុង​ទីក្រុង​គូឡាឡាំពួ បាន​សរសេរ​ថា “​​ពេលនេះ​មាន​លក់​​ស្រ្តីអ្នកបម្រើ​តាមផ្ទះ​ជនជាតិ​ឥណ្ឌូណេស៊ី ដោយ​ចុះ​ថ្លៃ​ពិសេស!"។

លោក​ម៉ារទី ​ណាតាឡេហ្កាវ៉ា (Marty Natalegawa) រដ្ឋមន្រ្តី​ក្រសួង​ការបរទេស​ឥណ្ឌូណេស៊ី​ បាន​ទូរស័ព្ទ​ទៅកាន់​រដ្ឋមន្រ្តី​ក្រសួង​ការបរទេស​ម៉ាឡេស៊ី ដើម្បីតវ៉ា​​ជាផ្លូវការ​ ហើយ​​​​ឯកអគ្គរដ្ឋទូត​ឥណ្ឌូណេស៊ី​ប្រចាំ​ទីក្រុង​គូឡាឡាំពួ​បាន​ជួប​មន្រ្តី​ក្រសួងការបរទេស​ម៉ាឡេស៊ី ដើម្បី​ទាមទារ​ឲ្យ​មាន​ការ​ស៊ើបអង្កេត ស្វែងរក​​មុខ​អ្នក​ធ្វើការ​​ផ្សព្វផ្សាយ​ពាណិជ្ជកម្ម​នេះ។

អ្នកនាំពាក្យ​ក្រសួង​ការងារ​ឥណ្ឌូណេស៊ី​​បាន​ប្រាប់​ទីភ្នាក់ងារ​សារព័ត៌មាន​បារាំង AFP ថា ការផ្សព្វផ្សាយ​ពាណិជ្ជកម្ម​បញ្ចុះតម្លៃពិសេស ចំពោះ​ស្រ្តីអ្នកបម្រើ​តាមផ្ទះ​ឥណ្ឌូណេស៊ី​បែបនេះ គឺ​ជាការ​ប្រៀបប្រដូច​មនុស្ស​ទៅនឹង​ទំនិញ ដែល​ជា​រឿង​មិន​អាច​ទទួល​យក​បាន​ជា​ដាច់ខាត។

ចំណែក​ឯ​ប្រជាជន​ឥណ្ឌូណេស៊ី​វិញ​បាន​នាំគ្នា​បញ្ចេញកំហឹង​របស់​ពួកគេ ទៅតាម​បណ្តាញ​អ៊ីនធ័រនែត ដោយ​អ្នក​ខ្លះ​បាន​អំពាវនាវ​ឲ្យ​ធ្វើ​ពហិការ​ ឈប់​ធ្វើ​ដំណើរ​ទៅកាន់​ប្រទេស​ម៉ាឡេស៊ី។

ប្រឈមមុខ​នឹង​ការ​តវ៉ា​ប្រឆាំង​យ៉ាងខ្លាំងក្លា​បែបនេះ ក្រសួង​ការងារ​ម៉ាឡេស៊ី​បាន​ប្រកាស​ថ្កោលទោស​​ចំពោះ​ការ​ផ្សព្វផ្សាយ​ពាណិជ្ជកម្ម​ខាងលើ ហើយ​បាន​សន្យាថា អាជ្ញាធរ​ម៉ាឡេស៊ី​នឹង​ប្រើ​គ្រប់មធ្យោបាយ ដើម្បី​វែកមុខ​រក​ជន​ដែល​ទទួលខុសត្រូវ ក្នុង​ការ​បិទផ្សាយ​ពាណិជ្ជកម្ម​នេះ។

គួរបញ្ជាក់ថា ការ​រំលោភសិទ្ធិ​ស្រ្តី​​ឥណ្ឌូណេស៊ី ដែល​ធ្វើការ​​ជា​អ្នក​បម្រើ​តាមផ្ទះ​ នៅ​ម៉ាឡេស៊ី គឺ​ជា​សំណុំរឿង​ចាស់ ដែល​​ជា​ចំណុច​ចម្រូងចម្រាស ក្នុង​ទំនាក់ទំនង​ការទូត​រវាង​ប្រទេស​ទាំងពីរ រហូតដល់​​មាន​ការ​ចេញ​បម្រាម ដោយ​រដ្ឋាភិបាល​ឥណ្ឌូណេស៊ី​ ​លែង​ឲ្យ​មាន​ការ​បញ្ជូន​​ពលករ​ឥណ្ឌូណេស៊ី ទៅ​ម៉ាឡេស៊ី កាល​​ពី​ខែមិថុនា ឆ្នាំ​២០០៩។ បម្រាម​នេះ ត្រូវ​បាន​រដ្ឋាភិបាល​ឥណ្ឌូណេស៊ី ដកចេញ​វិញ កាល​ពី​​ខែ​ធ្នូ ឆ្នាំ​២០១១​កន្លងទៅនេះ ក្រោយ​ពីបាន​ការ​​ព្រមព្រៀង​ជាមួយ​​​រដ្ឋាភិបាល​ម៉ាឡេស៊ី​ ជុំវិញ​ការ​ដំឡើង​ប្រាក់​ឈ្នួល​សមរម្យ និង​ការចាត់​​វិធានការសមស្រប ក្នុងការ​​ទប់ស្កាត់​ការ​​ធ្វើបាប​ពលករ​ចំណាកស្រុក។ ក៏ប៉ុន្តែ ការផ្សព្វផ្សាយ​ពាណិជ្ជកម្ម​លក់​បញ្ចុះថ្លៃ​ស្រ្តីអ្នកបម្រើ​តាមផ្ទះ ប្រៀបបាន​នឹង​ទំនិញ​នេះ បញ្ជាក់​កាន់តែ​ច្បាស់ថា បញ្ហា​ពលករ​ចំណាកស្រុក​នៅ​ម៉ាឡេស៊ី នៅតែ​ជា​ចំណោទ​ដ៏​ធំ​ ក្នុង​ទំនាក់ទំនង​ជាមួយ​នឹង​ឥណ្ឌូណេស៊ី។

កេរ្តិ៍ឈ្មោះ​របស់​ម៉ាឡេស៊ី ទាក់ទង​នឹង​ការ​ធ្វើ​បាប និង​រំលោភសិទ្ធិ​​ពលករ​ចំណាកស្រុក​នេះ ត្រូវបាន​គេ​ស្គាល់ មិនត្រឹមតែ​នៅ​ឥណ្ឌូណេស៊ី​មួយទេ គឺ​នៅ​ស្ទើរតែ​គ្រប់​ប្រទេស​ជិតខាង ដែល​មានពលករ​ចំណាកស្រុក​ ទៅម៉ាឡេស៊ី ក្នុងនោះ​ក៏​មាន​កម្ពុជា​មួយផងដែរ។

កាលពីខែមិថុនា ឆ្នាំ​២០១១​កន្លងទៅនេះ​ អង្គការ​ពលកម្ម​ពិភពលោក​បាន​អនុម័ត​អនុសញ្ញា​មួយ ​ស្តីពី​ការការពារសិទ្ធិ​អ្នកបម្រើការ​តាមផ្ទះ នៅទូទាំង​ពិភពលោក ហើយ​អនុសញ្ញា​នេះ​​ ​នឹង​ត្រូវ​​ចូល​ជាធរមាន នៅ​ក្នុងរយៈពេល​យ៉ាងយូរ​បំផុត ១២ខែ​ទៀត៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI