ឥណ្ឌូណេស៊ី

កោះបាលី​កំពុង​ប្រឈម​នឹង​អំពើភេរវកម្ម​ជាថ្មី​ក្នុង​ឱកាស​ខួបទី១០ឆ្នំា​នៃ​ភេរវកម្ម​ឆ្នំា ២០០២

កោះបាលី​កំពុង​ប្រឈម​នឹង​អំពើភេរវកម្ម​ជាថ្មី​ក្នុង​ឱកាស​ខួបទី១០ឆ្នំា​នៃ​ភេរវកម្ម​ឆ្នំា ២០០២
កោះបាលី​កំពុង​ប្រឈម​នឹង​អំពើភេរវកម្ម​ជាថ្មី​ក្នុង​ឱកាស​ខួបទី១០ឆ្នំា​នៃ​ភេរវកម្ម​ឆ្នំា ២០០២
១៨ នាទី

នៅ​ថ្ងៃពុធ ទី១០ តុលា​នេះ ប៉ូលិស​ឥណ្ឌូនេស៊ី​បាន​ប្រកាស​ឲ្យ​ដឹង​អំពី​ព័ត៌មាន​ដែល​គួរ​ឲ្យ​ទុកចិត្ត​មួយ​ដែល​ថា ក្រុមភេរវជន​គ្រោង​នឹង​រៀបចំ​អំពើភេរវកម្ម​ជា​ថ្មី​នៅ​លើ​កោះបាលី ក្នុង​ឱកាស​ខួបទី ១០ឆ្នំា​នៃ​អំពើភេរវកម្ម​កាល​ពី​ឆ្នំា ២០០២។ ភេរវកម្ម​ដែល​កាលណោះ​បាន​សម្លាប់​មនុស្ស ២០២នាក់ ក្នុង​នោះ​មាន​ជនជាតិ​អូស្រ្តាលី ៨៨នាក់ និង​បារំាង​ចំនួន ៤នាក់។

ផ្សាយពាណិជ្ជកម្ម

ជាផ្លូវការ ពិធី​រំលឹក​ខួប​លើកទី១០ឆ្នំា​នៃ​អំពើភេរវកម្ម​លើ​កោះបាលី​នឹង​ត្រូវ​រៀបចំ​ធ្វើ​នៅ​ថ្ងៃសុក្រ ទី១២ តុលា​ចុង​សប្តាហ៍​នេះ។ ប៉ុន្តែ​នៅ​មួយ​ថ្ងៃ មុន​ថ្ងៃ​រៀបចំ​ពិធី​ឈាន​មក​ដល់ ប៉ូលិស​នៅ​កោះបាលី​បាន​ប្រកាស​ឲ្យ​ដឹង​នូវ​ព័ត៌មាន​មួយ​ដែល​ថា ក្រុម​ភេរវជន​ក៏​បាន​គ្រោង​បង្ក​ភេរវកម្ម​ជាថ្មី​នៅ​ថ្ងៃ​រៀបចំ​ពិធី​នោះ​ដែរ។ ប្រភព​ប៉ូលិស​បាន​បន្ថែម​ថា នេះ​ជា​ព័ត៌មាន​មួយ​គួរ​ឲ្យ​ជឿទុកចិត្ត និង​ដែល​ក្នុង​ខណៈ​នេះ រដ្ឋអំណាច​បាន​ផ្តើម​ចាត់​វិធានការ​ពង្រឹង​សន្តិសុខ​កម្រិត​ខ្ពស់​បំផុត​នៅ​គ្រប់​ច្រក​ចេញ ចូល​ក្នុង​កោះបាលី​ទំាងមូល ពិសេស​នៅ​អាកាសយានដ្ឋាន។ ថ្លែង​នៅ​ក្នុង​សន្និសីទកាសែត​មួយ លោក​នាយករង​ប៉ូលិស​កោះបាលី​បាន​បញ្ជាក់​ថា ប៉ូលិស​បាន​រក​ឃើញ​អត្តសញ្ញាណ​របស់​ចលនា​មួយ​ចំនួន​ដែល​មាន​គម្រោង​បង្ក​អំពើភេរវកម្ម​វាយប្រហារ​លើ​ផ្ទំាងស៊ីប​មួយ​ចំនួន ពិសេស​សំដៅ​លើ​ឥស្សរជន​សំខាន់ៗ​ដែល​នឹង​ចូល​រួម​នៅ​ក្នុង​ព្រឹត្កិការណ៍​នោះ។

យ៉ាង​ណា​ក៏​ដោយ នាយករង​ប៉ូលិស​កោះបាលី​រូប​នេះ​ដដែល​មិន​បាន​បញ្ជាក់​លម្អិត​អំពី​ការ​គំរាមកំហែង ឬ​មួយ​ឥស្សរជន​ដែល​ជា​គោលដៅ​វាយប្រហារ​របស់​ក្រុមភេរវជន​ទេ។ អ្វី​ដែល​គេ​ដឹង ពិធី​រំលឹក​ខួប​លើកទី១០ឆ្នំា​នៃ​អំពើភេរវកម្ម​លើ​កោះបាលី​កាល​ពី​ឆ្នំា ២០០២ នឹង​ត្រូវ​ចូលរួម​ដោយ​លោកស្រី​នាយករដ្ឋមន្រ្តី​នៃ​ប្រទេស​អូស្រ្តាលី Julia Gillard និង​ដែល​លោកស្រី​ត្រូវ​ថ្លែង​សុន្ទរកថា​មួយ​នា​ឱកាស​នោះ។ ក្រៅ​ពី​មាន​ជំនួយ​សន្តិសុខ​ពី​កម្លំាង​អូស្រា្តលី រដ្ឋអំណាច​ឥណ្ឌូនេស៊ី​បាន​ដាក់​ពង្រាយ​កម្លំាង​ទាហាន និង​ប៉ូលិស​ជាង ២ ០០០នាក់​ដើម្បី​ការពារ​សន្តិសុខ​នៅ​ក្នុង​ពិធី​នោះ។

សូម​រលឹក​ជូន​ថា អំពើ​ភេរវកម្ម​នៅ​កោះបាលី​កាល​ពី​ថ្ងៃទី១២ តុលា ឆ្នំា ២០០២ គឺ​ជា​អំពើភេរវកម្ម​យ៉ាង​បង្ហូរ​ឈាម​មួយ​ដែល​ឥណ្ឌូនេស៊ី​មិន​ធ្លាប់​ជួប​ប្រទះ និង​ដែល​បាន​ផ្តាច់​ជីវិត​មនុស្ស ២០២នាក់ ក្នុង​នោះ​មាន​ជនជាតិ​អូស្រ្តាលី ៨៨នាក់ និង​ជនជាតិ​បារំាង ៤នាក់។ ក្រុម​ភេរវជន​ដែល​បាន​រៀបចំ​ភេរវកម្ម​កាលណោះ គឺ​ជា​សកម្មជន​របស់​ចលនា Jemaah Islamiyah ដែល​ជា​បណ្តាញ​អ៊ីស្លាមនិយមជ្រុល​ស្និទ្ធ​នឹង​អង្គការ​ភេរវនិយម​អាល់កៃដា។ ជនដៃដល់​ទំាង​នោះ មាន​ខ្លះ​បាន​ស្លាប់​នៅ​ក្នុង​ប្រតិបត្តិការ​ប៉ូលិស ឬ​មួយ​ក៏​កំពុង​ជាប់​គុក​ជាមួយ​នឹង​ជនជាប់សង្ស័យ​ប្រមាណ​ជា ៧០០នាក់​ផ្សេង​ទៀត​របស់​ចលនា Jemaah Islamiyah។

តំាង​ពី​ពេល​នោះ​មក ចលនា Jemaah Islamiyah ហាក់​ដូច​ជា​បាន​ចុះ​ថយ​ឥទ្ធិពល​របស់​ខ្លួន តែ​ក្រុមអ្នកវិភាគ​បាន​មើល​ឃើញ​ថា បណ្តាញ​របស់​ចលនា​មួយ​នេះ​នៅ​តែ​ត្រៀម​ខ្លួន​ដើម្បី​វាយប្រហារ​ឥណ្ឌូនេស៊ី​ជា​ថ្មី​ទៀត។ ក្នុង​រយៈពេល​ប៉ុន្មាន​ខែ​ចុងក្រោយ​នេះ មាន​បណ្តាញ​មួយ​ចំនួន​របស់​ចលនា​នេះ​ត្រូវ​បាន​កម្លំាង​ប៉ូលិស​វាយបង្រ្កាប។ ជាក់ស្តែង​កាល​ពី​ខែ​មីនា​កន្លង​ទៅ ប៉ូលីស​បាន​បាញ់​សម្លាប់​ភេរវជន ៥នាក់​ដែល​ត្រៀម​បង្ក​ភេរវកម្ម​របស់​ខ្លួន​នៅ​លើ​កោះបាលី។ នៅ​ដើម​ខែ​កញ្ញា គម្រោង​បើក​ការ​វាយប្រហារ​លើ​សភា​ឥណ្ឌូនេស៊ី​ក្នុង​ទីក្រុង​ហ្សាការតា​ក៏​ត្រូវ​បាន​ប៉ូលីស​បង្រ្កាប​ទាន់​ពេល៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI