ជប៉ុន

ក្រុម​សង្រ្គោះ​អន្តរជាតិ​បាន​ទៅដល់​ប្រទេស​ជប៉ុន

ក្រុមសង្រ្គោះ​ចិន​ពេល​មក​ដល់​ព្រលាន​យន្តហោះ​ជប៉ុន
ក្រុមសង្រ្គោះ​ចិន​ពេល​មក​ដល់​ព្រលាន​យន្តហោះ​ជប៉ុន ©Reuters

នៅថ្ងៃ​អាទិត្យ​នេះ លោក​ណាអូតូ កាន់ នាយករដ្ឋ​មន្រ្តី​ជប៉ុន​បាន​ថ្លែង​ថា ជប៉ុន​កំពុង​តែ​ប្រឈមមុខ​នឹង​វិបត្តិ​ដ៏​ធំមិនធ្លាប់​មាន​​ចាប់តាំង​ពី​សង្រ្គាម​លោក​លើក​ទី២​មក។ ការ​រញ្ជួយ​ដី និង​ស៊ូណាមី បាន​បង្ក​ការ​ខូតខាត​ដ៏​ធ្ងន់ធ្ងរ​។ បន្ថែម​ពីលើ​នេះ​ទៀត ជប៉ុន​កំពុង​ប្រឈមមុខ​នឹង​គ្រោះ​មហន្តរាយ​នុយក្លេអ៊ែរ​មួយទៀត។ ស្ថិត​ក្នុង​វិបត្តិ​ដ៏​ធ្ងន់ធ្ងរ​បែបនេះ ប្រទេស​ជាច្រើន​បាន​បញ្ជូន​ជំនួយ​​​ទៅ​កាន់​ប្រទេស​ជប៉ុន ជាពិសេស គឺ​ក្រុម​សង្រ្គោះ ដើម្បី​ជួយ​ស្វែងរក​ជនរងគ្រោះ ដែល​អាច​នៅ​រស់រាន​មាន​ជីវិត។

ផ្សាយពាណិជ្ជកម្ម

ខាងក្រោម​នេះ គឺ​ជា​ជំនួយ​អន្តរជាតិ ដែល​ត្រូវ​បាន​បញ្ជូន​ទៅ​ជួយ​ជប៉ុន៖

សហរដ្ឋ​អាមេរិក

យន្តហោះ​ផ្ទុក​យន្តហោះ​មួយ​គ្រឿង​ ឈ្មោះ USS Ronald Reagan បាន​ធ្វើ​ដំណើរ​ទៅ​ដល់​ជប៉ុន​ហើយ។ នៅ​លើ​នាវា​នេះ​មាន​ផ្ទុក​យន្តហោះ​​ជាង​៨០​គ្រឿង។ យន្តហោះ​ទាំងនេះ​នឹង​ចូល​រួម​ក្នុង​ប្រតិបត្តិការ​សង្រ្គោះ។ ម្យ៉ាងទៀត អាមេរិក​នឹង​នាវាផ្ទុក​យន្តហោះ​នេះ​ ធ្វើ​ជា​ទីតាំង​សម្រាប់​ឲ្យ​ឧទ្ធម្ភាចក្រ​របស់​ជប៉ុន​ចុះចត ដើម្បី​ចាក់​ប្រេង។ នាវា​ចម្បាំង​ជិត ១០​គ្រឿង ផ្សេង​ទៀត កំពុង​ធ្វើ​ដំណើរ​ឆ្ពោះ​ទៅ​កាន់​ប្រទេស​ជប៉ុន។

ក្រុមសង្រ្គោះ​ពិសេស ចំនួន​ពីរក្រុម​ ដែល​មាន​គ្នា ១៥០​នាក់ និង​ឆ្កែ ១២​ក្បាល ដែល​មាន​ជំនាញ​ខាង​ស្វែងរក​​អ្នក​នៅ​រស់រាន​មានជីវិត ត្រូវ​បាន​បញ្ជូន​ទៅ​ដល់​ប្រទេស​ជប៉ុន​ហើយ។
អ្នក​ជំនាញ​ខាង​នុយក្លេអ៊ែរ​ពីរ​រូប​​ត្រូវ​បាន​បញ្ជូន​ទៅ​ជួយ​អាជ្ញាធរ​ជប៉ុន ដែល​កំពុង​ប្រឈមមុខ​នឹង​​វិបត្តិ​ដ៏​ធ្ងន់ធ្ងរ​ក្នុង​​មជ្ឈមណ្ឌល​នុយក្លេអ៊ែរ នៅ Fukushima។

កូរ៉េ​ខាង​ត្បូង

​ក្រុម​សង្រ្គោះ ៥រូប និង​ឆ្កែ ២​ក្បាល បាន​ទៅ​ដល់​ប្រទេស​ជប៉ុន​ហើយ។ រដ្ឋាភិបាល​កូរ៉េ​ខាង​ត្បូង​បាន​ត្រៀម​ក្រុម​សង្រ្គោះ​ចំនួន ២០០​នាក់​ផ្សេង​ទៀត ដើម្បី​បម្រុង​ទុក ក្នុង​ករណី​រដ្ឋាភិបាល​ជប៉ុន​ត្រូវការ។

ចិន

នៅថ្ងៃ​អាទិត្យ​នេះ រដ្ឋាភិបាល​ចិន​បាន​បញ្ជូន​ក្រុមសង្រ្គោះ​ពិសេស ចំនួន ១៥​នាក់ ​ទៅ​កាន់តំបន់​រញ្ជួយដី។

បារាំង

បារាំង​បញ្ជូន​ក្រុមសង្រ្គោះ​ពិសេស ចំនួន ១០០​នាក់ ឆ្កែ ១២ក្បាល ព្រម​ទាំង​ឧបករណ៍​ចំនួន ៤៩​តោន ដើម្បី​ប្រើប្រាស់​ក្នុង​ប្រតិបត្តិការ​សង្រ្គោះ។

អង់គ្លេស

ក្រុមសង្រ្គោះ​ចំនួន ៦៣​នាក់ ឆ្កែ​២ក្បាល និង​ឧបករណ៍​សង្រ្គោះ​ ១១​តោន។ រដ្ឋាភិបាល​អង់គ្លេស​បាន​ឲ្យដឹង​ថា អង់គ្លេស​បាន​ត្រៀមក្រុម​ជំនាញ​ខាង​នុយក្លេអ៊ែរ ដើម្បី​ចាំជួយ​ជប៉ុន​ក្នុងករណី​ចាំបាច់។

ស្វ៊ីស

ក្រុមសង្រ្គោះ​ និង​គ្រូពេទ្យ​មួយក្រុម មាន​គ្នា ២៥នាក់ និង​ឆ្កែ ៩ក្បាល។

អូស្រ្តាលី​

ក្រុមសង្រ្គោះ​បាន​ទៅ​ដល់​ប្រទេស​ជប៉ុន​ហើយ។ រដ្ឋាភិបាល​អូស្រ្តាលី​បាន​សន្យា​ថា​នឹង​ត្រៀម​ខ្លួន​​ជានិច្ច ដើម្បី​បញ្ជូនជំនួយ​បន្ថែម ក្នុង​ករណី ដែល​មាន​ការ​ស្នើសុំ​ពី​រដ្ឋាភិបាល​ជប៉ុន។

រុស្ស៊ី

នាយករដ្ឋមន្រ្តី​រុស្ស៊ី​បាន​ប្រកាស​សន្យា​ជួយ​ផ្តល់​ថាមពល​ទៅ​ផ្គត់ផ្គង់​ដល់​ប្រទេស​ជប៉ុន ដែល​កំពុង​តែ​ប្រឈមមុខ​នឹង​ការ​ខ្វះខាត​ថាមពល​ធ្ងន់ធ្ងរ។

សិង្ហបុរី

ក្រុម​ជំនាញ​​សង្រ្គោះ​មួយក្រុម។

អង្គការ​សហប្រជាជាតិ

ក្រុម​អ្នក​ជំនាញ​ខាង​សម្របសម្រួល​ប្រតិបត្តិការ​សង្រ្គោះ និង​អ្នក​ជំនាញ​ខាង​ផ្នែក​បរិស្ថាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI