កម្ពុជា

សហចៅក្រម​ស៊ើប​អង្កេត​ទាត់ចោល​ការចោទ​ប្រកាន់​នានា

ចៅក្រម​ស៊ើប​អង្កេត​យូ ប៉ុនឡេង (ខ្មែរ) និង​សហចៅក្រម​ស៊ើបអង្គេត​អន្តរជាតិ
ចៅក្រម​ស៊ើប​អង្កេត​យូ ប៉ុនឡេង (ខ្មែរ) និង​សហចៅក្រម​ស៊ើបអង្គេត​អន្តរជាតិ ©RFI

សហ​ចៅក្រម​ស៊ើបអង្កេត​សាលាក្តី​ខ្មែរក្រហម​បានចេញ​សេចក្តី​ថ្លែងការណ៍​មួយ​ច្រានចោល​ការចោទ ប្រកាន់​នានា​ដែល​ធ្វើឡើង​ប្រឆាំង​នឹងតុលាការ​ចម្រុះនេះ។​ សហ​ចៅក្រម​ស៊ើបអង្កេត​បានថ្លែងថា​ គ្មាន​ការគំរាម​កំហែង​ព្រះរាជ​អាជ្ញា​អន្តរជាតិ​ គ្មាន​ការបែកបាក់​មួយដែល​មិនអាច​ស្រោចស្រង់​បាន​ និង​ថា​ការលើក​ឡើងថា អនាគត​របស់​តុលាការ​មិន​ច្បាស់លាស់​គឺមិនត្រឹម​ត្រូវឡើយ។

ផ្សាយពាណិជ្ជកម្ម

សហ​ចៅក្រម​ស៊ើបអង្កេត​ លោក​យូ ​ប៊ុនឡេង ​និង​សហសេវិក​អន្តរជាតិ​គឺលោក ​Siegfried​ Blunk​ បាន​បញ្ចញ​ប្រតិកម្ម​ខ្លាំងៗ​ទៅនឹង​អត្ថបទ​មួយ​របស់​កាសែត ​International​ Justice​ Tribune ​តាមរយៈ​សេចក្តី​ថ្លែងការណ៍​មួយ​ចេញ​ផ្សាយ កាលពីថ្ងៃ​ម្សិលមិញ ដោយច្រានចោល​ការចោទ​ប្រកាន់​ទាំងឡាយ​ដែលមាន​ចំពោះ​តុលាការ​ចម្រុះនេះ។​ការចោទ​ប្រកាន់​ ដែលមាន​បីចំណុចធំ។

សហ​ចៅក្រមស៊ើប​អង្កេត ​បានទាត់ចោល​ការចោទ​ប្រកាន់ថា ​ខ្លួនកំពុង​គំរាម​សហ​ព្រះរាជអាជ្ញា​អន្តរជាតិ​ជាមួយនឹង​បទល្មើស​នៃការ​ប្រមាថ​តុលាការ។ សហចៅក្រម​បានពន្យល់​ថា ​ខ្លួន​មិនធ្លាប់​បានធ្វើ​ការគំរាម​យ៉ាង​ដូច្នេះឡើយ​ ហើយ​ក៏មិនធ្លាប់​មានសកម្មភាព​បង្ហាញ​ថា ​សហចៅក្រម​ស៊ើបអង្កេត​កំពុង​ពិចារណា​បញ្ហា​ នេះដែរ។ ការចោទ​ប្រកាន់​ខាងលើនេះ​ គ្រាន់តែ​ជាពាក្យ​ចចាម​អារ៉ាម​ដែលមាន​គំនិត​ព្យាបាទ​ធ្វើឡើង​ក្នុង​គោលបំណង​រំខាន​ដល់ការ​សហការ​ នៅក្នុង​តុលាការ​តែប៉ុណ្ណោះ។

ចំពោះ​ការលើក​ឡើងដែល​ថា ​តុលាការ​ខ្មែរក្រហម​កំពុងធ្វើ​ដំណើរឆ្ពោះ​ទៅរកការ​បែកបាក់មួយ​ដែលមិនអាច​ស្រោចស្រង់​បាន​ ត្រូវបាន​សហចៅក្រម​ស៊ើបអង្កេត​ថ្លែងថា​ គឺជាការ​លើកឡើង​ដែល​មិន​មានមូលដ្ឋាន​ត្រឹមត្រូវ​ឡើយ ​ដោយបាន​លើកឡើង​ពីការិយា​ល័យ​សហព្រះរាជ​អាជ្ញា ​និងការិយាល័យ​សហ​ចៅក្រម​ស៊ើប​អង្កេត​កំពុង​បន្តការងារ​ជាធម្មតា ​បើទោះបី​ជាខ្វែង​យោបល់គ្នា​លើទិដ្ឋភាពមួ​យចំនួន​ក៏ដោយ។

រីឯការលើក​ឡើងថា ​តុលាការ​ខ្មែរក្រហម​កំពុងស្ថិត​នៅក្នុង​ស្ថានភាព​គ្រោះថ្នាក់​ជិតដួលរលំ ​និង​ អនាគត​របស់​តុលាការ​នេះកំពុង​ស្ថិតនៅ​ក្នុងស្ថានភាព​មិនច្បាស់លាស់។ សហចៅក្រម​ស៊ើប​អង្កេត ​បានថ្លែង​ ថា ​មិនមាន​លក្ខណៈ​ត្រឹមត្រូវ​ និងសមស្រប​នឹងស្ថានភាព​ពិតឡើយ។​ សហចៅក្រម​ បាន​សង្កត់ធ្ងន់​ថា ​ខ្លួន​ពុង​បំពេញ​ការងារ​របស់​ខ្លួន​ ដោយ​ឯករាជ្យ ​ដោយ​មិន​មានការជ្រៀតជ្រែក​ពីមជ្ឈដ្ឋាន​ខាងក្រៅ ​ឡើយ ​ហើយ​សហចៅក្រម​ស៊ើប​អង្កេត​ នឹង​បន្តប្រឆាំង​នឹងរាល់​ការប៉ុនប៉ង ជ្រៀតជ្រែក​នានា ​ក៏ដូចជា​ប្តេជ្ញា ​ចិត្តការពារ​ឯករាជភាព​តុលាការ​ ប្រឆាំង​រាល់ការជ្រៀតជ្រែកពី​សំណាក់​ខាងក្រៅ ​ទោះបីជា​មជ្ឈដ្ឋាន​ណាក៏ ដោយ។

លោក​ឌឹម ​សុវណ្ណារុំ​ មន្ត្រីទទួល​បន្ទុក​កិច្ចការ​សាធារណៈ​សាលាក្តី​ខ្មែរក្រហម​បានគូស​បញ្ជាក់បន្ថែម​ នៅថ្ងៃនេះ​ថា ​តុលាការ​មិនអាច​ទទួលយក​បានទេ​ចំពោះការចោទ​ប្រកាន់​ដែល​ប្រាស់ចាក​ពី​ការពិត​នេះ ​និង​ បាន​ធានា​អះអាងថា ​តុលាការ​មាន​ដំណើរការ​ល្អ​ និង​ធ្វើការងារ​ដោយ​ឯករាជ្យ​មិនមាន​ការជ្រៀតជ្រែក​នយោ​បាយ​ដូចការ​ចោទ​ប្រកាន់​ឡើយ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI