អ៊ីរ៉ង់

អ៊ីរ៉ង់​ឆេះដុំ​ក្រោយ​ទទួល​ការ​ស្តីបន្ទោស​ពី​ទីភ្នាក់ងារ​ថាមពល​បរមាណូ​អន្តរជាតិ

ឯកអគ្គរដ្ឋទូត​អ៊ីរ៉ង់​គំរាម​ប្តឹង​ទីភ្នាក់ងារ AIEA ទៅតុលាការ
ឯកអគ្គរដ្ឋទូត​អ៊ីរ៉ង់​គំរាម​ប្តឹង​ទីភ្នាក់ងារ AIEA ទៅតុលាការ Reuters/Herwig Prammer

កាលពីថ្ងៃ​សុក្រ ម្សិលមិញ​នេះ ទីភ្នាក់ងារ​ថាមពល​បរមាណូ​អន្តរជាតិ (AIEA) បាន​អនុម័ត​សេចក្តីសម្រេច​មួយ ដើម្បី​ស្តីបន្ទោស​អ៊ីរ៉ង់ ជុំវិញ​កម្មវិធី​នុយក្លេអ៊ែរ ដែល​គេ​សង្ស័យ​ថា ធ្វើ​ឡើង​ក្នុង​គោលដៅ​យោធា។ ឆ្លើយតបមកវិញ អ៊ីរ៉ង់​បាន​គំរាម​ប្តឹង​ AIEA ជុំវិញ​ការ​ផ្សព្វផ្សាយ​ឈ្មោះ​អ្នកវិទ្យាសាស្រ្ត​អ៊ីរ៉ង់ ក្នុង​របាយការណ៍​នុយក្លេអ៊ែរ កាលពី​ថ្ងៃ​ទី៨ វិច្ឆិកា កន្លងទៅ។

ផ្សាយពាណិជ្ជកម្ម

ក្នុងចំណោម​សមាជិក​ក្រុមប្រឹក្សា​ភិបាល AIEA ទាំង ៣៥​ប្រទេស មាន​ប្រទេស​ចំនួន ៣២ ដែល​បាន​បោះឆ្នោត​គាំទ្រ​សេចក្តីសម្រេច​ស្តីបន្ទោស​អ៊ីរ៉ង់ កាលពីថ្ងៃ​សុក្រ ម្សិលមិញ។ ចិន និង​រុស្ស៊ី ក៏​ស្ថិត​ក្នុង​ចំណោម​ប្រទេស​ដែល​បោះឆ្នោត​គាំទ្រ​​សេចក្តីសម្រេច​នេះ​ដែរ។

ក្រៅ​ពីបាន​ស្តីបន្ទោស​អ៊ីរ៉ង់ AIEA ក៏​បាន​ទាមទារ​ផងដែរ​ឲ្យ​អ៊ីរ៉ង់​ឆ្លើយបំភ្លឺ ចំពោះ​ចំណុច​សង្ស័យ ជុំវិញ​កម្មវិធី​នុយក្លេអ៊ែរ ដែល​គេ​សង្ស័យ​ថា​​ធ្វើឡើង​ក្នុងគោលដៅ​យោធា។ ក៏ប៉ុន្តែ ដោយសារ​តែ​មាន​ការ​ជំទាស់​ពី​រុស្ស៊ី និង​ចិន ទីភ្នាក់ងារ​ AIEA មិនបាន​កំណត់ពេលវេលា​ច្បាស់លាស់​ថា អ៊ីរ៉ង់​ត្រូវ​ឆ្លើយបំភ្លឺ​ចំណុច​នេះ​ឲ្យ​បាន​ក្នុង​រយៈពេល​ប៉ុន្មាន​នោះទេ។ ម្យ៉ាងទៀត AIEA ក៏​មិនបាន​សម្រេច​បញ្ជូន​សំណុំរឿង​អ៊ីរ៉ង់​នេះ ទៅ​ឲ្យ​ក្រុមប្រឹក្សា​សន្តិសុខ​​នោះដែរ។

គួរ​រំឭកឡើងវិញ​ថា កាលពីថ្ងៃ​ទី៨ វិច្ឆិកា ២០១១ កន្លងទៅនេះ ទីភ្នាក់ងារ AIEA បាន​ចេញផ្សាយ​របាយការណ៍​មួយ បង្ហាញ​ថា អ៊ីរ៉ង់​​បាន​អភិវឌ្ឍ ព្រមទាំង​ធ្វើការ​សាកល្បង​លើ​បច្ចេកវិទ្យា​មួយចំនួន ដែល​ជា​បច្ចេកវិទ្យា​នុយក្លេអ៊ែរ​យោធា​សុទ្ធសាធ ដូចជា ការ​សាកល្បង​ផលិត​​ឆ្នួន​បំផ្ទុះ​ក្បាល​គ្រាប់​នុយក្លេអ៊ែរ ជាដើម។

ឆ្លើយតប​នឹង​ការ​ស្តីបន្ទោស​នេះ អ៊ីរ៉ង់​បាន​វាយប្រហារ​តបវិញ ដោយចោទប្រកាន់​អគ្គនាយក​ AIEA គឺ​លោក​យូគីយ៉ា អាម៉ាណូ (Yukia Amano) ថា បាន​ផ្សព្វផ្សាយ​ឈ្មោះ​អ្នកវិទ្យាសាស្រ្ត​នុយក្លេអ៊ែរ​អ៊ីរ៉ង់ នៅ​ក្នុង​របាយការណ៍ កាលពីថ្ងៃ​ទី៨ វិច្ឆិកា។ អ៊ីរ៉ង់​បាន​រំឭក​ថា កន្លងមក មាន​អ្នក​វិទ្យាសាស្រ្ត​នុយក្លេអ៊ែរ​អ៊ីរ៉ង់​ចំនួន ៣នាក់​ហើយ ដែល​ត្រូវ​គេ​លបធ្វើឃាត។ ដូច្នេះ ទីភ្នាក់ងារ AIEA នឹង​ជា​អ្នក​ទទួលខុសត្រូវ ប្រសិន​បើ​មាន​បញ្ហា​អ្វី​កើតឡើង​ចំពោះ​បុគ្គល ឬ​ទៅលើ​ក្រុមគ្រួសារ​​អ្នកវិទ្យាសាស្រ្ត​អ៊ីរ៉ង់ ដែល​​មាន​ឈ្មោះ​ក្នុង​របាយការណ៍​នេះ។

គួរបញ្ជាក់ថា នៅ​ឯទីក្រុង​ញូវយ៉ក​ឯណោះ​វិញ មហាសន្និបាត​អ.ស.ប.​ក៏​បាន​អនុម័ត​សេចក្តីសម្រេច​មួយដែរ កាលពីថ្ងៃ​សុក្រ ម្សិលមិញ​នេះ ទាក់ទង​នឹង​សំណុំរឿង​អ៊ីរ៉ង់ ក៏ប៉ុន្តែ លើកនេះ គឺ​ទាក់ទង​នឹង​បទសង្ស័យថា អ៊ីរ៉ង់​គ្រោង​លប​ធ្វើឃាត​មន្រ្តី​ទូត​អារ៉ាប៊ី​សាអ៊ូឌីត ប្រចាំ​សហរដ្ឋ​អាមេរិក។ មហាសន្និបាត​អ.ស.ប.​​ទាមទារ​ឲ្យ​អាជ្ញាធរ​អ៊ីរ៉ង់​សហការ​​បើក​ការ​ស៊ើបអង្កេត​លើ​ករណី​សង្ស័យ​នេះ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI