អានតួអត្ថបទ
អ៊ីរ៉ង់-AIEA

អ៊ីរ៉ង់​សង្ឃឹម​ថា​នឹង​រកឃើញ​កិច្ចព្រមព្រៀងមួយ​ជាមួយ AIEA ស្តីពី​កម្មវិធី​នុយក្លេអ៊ែរ

លោក Mahmoud Ahmadinejad ប្រធានាធិបតី​អ៊ីរ៉ង់
លោក Mahmoud Ahmadinejad ប្រធានាធិបតី​អ៊ីរ៉ង់
១៨ នាទី

នៅ​ថ្ងៃ​អង្គារ ទី១៥ មករា​នេះ ក្រសួង​​ការបរទេស​អ៊ីរ៉ង់​បាន​បញ្ជាក់​ដោយ​ក្តីសង្ឃឹម​ថា នឹង​រក​ឃើញ​កិច្ចព្រមព្រៀង​រួម​មួយ​ជាមួយ​ទីភ្នាក់ងារ​ថាមពលបរមាណូ​អន្តរជាតិ ហៅ​កាត់​ថា AIEA នៅ​ក្នុង​កិច្ចប្រជុំ​នា​ថ្ងៃ​ពុធ ទី១៦ មករា​ស្អែក។ គោលដៅ​នៃ​កិច្ចប្រជុំ គឺ​ដើម្បី​បិទបញ្ចប់​គ្រប់​ភាព​មន្ទិលសង្ស័យ​ជុំវិញ​កម្មវិធី​នុយក្លេអ៊ែរ​របស់​ប្រទេស​អ៊ីរ៉ង់។

ផ្សាយពាណិជ្ជកម្ម

គឺ​អាដ៍កំបំាង​ជុំវិញ​កម្មវិធី​នុយក្លេអ៊ែរ​របស់​អ៊ីរ៉ង់​នេះ​ហើយ ដែល​បាន​ធ្វើ​ឲ្យ​សំណុំរឿង​ដ៏ចម្រូងចម្រាស​មួយ​នេះ​បន្ត​អូសបន្លាយ​រហូត​មក​ដល់​ពេល​បច្ចុប្បន្ន។ តែ​នៅ​ក្នុង​កិច្ចប្រជុំ​រវាង​អ៊ីរ៉ង់ និង​ទីភ្នាក់ងារ​ថាមពលបរមាណូ​អន្តរជាតិ ហៅ​កាត់​ថា AIEA ក្នុង​ទីក្រុង​តេអេរ៉ង់​នា​ថ្ងៃ​ពុធ​ស្អែក ទីក្រុង​តេអេរ៉ង់​សង្ឃឹម​ថា​នឹង​រក​ឃើញ​កិច្ចព្រមព្រៀង​រួម​មួយ នេះ​ជា​ការ​ថ្លែង​របស់​លោក Ramin Mehmanparast អ្នកនំាពាក្យ​របស់​ក្រសួង​ការបរទេស​អ៊ីរ៉ង់។ នៅ​ក្នុង​កិច្ចប្រជុំ​នោះ ក្រុមអធិការ​របស់ AIEA នឹង​បន្ត​ព្យាយាម​និយាយ​បញ្ចុះបញ្ចូល​ភាគី​អ៊ីរ៉ង់​ឲ្យ​ចុះ​ហត្ថលេខា​លើ​កិច្ចព្រមព្រៀង​រួម​មួយ ដែល​អនុញ្ញាត​ឲ្យ AIEA អាច​បន្ត​ការងារ​ស៊ើបអង្កេត​របស់​ខ្លួន​ជុំវិញ​ភាព​មន្ទិលសង្ស័យ​មួយ​ចំនួន​ទាក់ទង​នឹង​កម្មវិធី​នុយក្លេអ៊ែរ​របស់​ប្រទេស​អ៊ីរ៉ង់ ពិសេស​ចង់​ដឹង​អំពី​គោលដៅ​ពិត​ប្រាកដ​របស់​របប​ទីក្រុង​តេអេរ៉ង់។ សូម​ជម្រាប​ជូន​ថា រហូត​មក​ទល់​ពេល​នេះ ទីក្រុង​តេអេរ៉ង់​បាន​បដិសេធ​នូវ​សំណើ​មួយ​ចំនួន​របស់ AIEA ដោយ​យល់​ឃើញ​ថា មាន​សំណើ​ខ្លះ​បាន​ឃ្លាត​ឆ្ងាយ​ពី​កាតព្វកិច្ច​របស់ AIEA នៅ​ក្នុង​ក្របខ័ណ្ឌ​នៃ​សន្ធិសញ្ញា​មិន​សាយភាយ​នុយក្លេអ៊ែរ។

នៅ​លើក​នេះ​ទៀត អ្នកនំាពាក្យ​ក្រសួង​ការបទេស​អ៊ីរ៉ង់ លោក Ramin Mehmanparast បាន​បញ្ជាក់​ជា​ថ្មី​ដោយ​ដាក់​លក្ខខណ្ឌ​ថា ទីក្រុង​តេអេរ៉ង់​អាច​នឹង​ចុះ​ហត្ថលេខា​លើ​កិច្ចព្រមព្រៀង​មួយ​អនុញ្ញាត​ឲ្យ AIEA អាច​បន្ត​ស៊ើបអង្កេត​ជុំវិញ​ភាពមន្ទិលសង្ស័យ​របស់​ខ្លួន​ពាក់ព័ន្ធ​នឹង​កម្មវិធី​នុយក្លេអ៊ែរ​អ៊ីរ៉ង់​បាន លុះត្រា​ណា​តែ AIEA ទទួល​ស្គាល់​ពី​សិទ្ធិ​របស់​អ៊ីរ៉ង់​ក្នុង​ការ​បំពាក់​នុយក្លេអ៊ែរ។ ទន្ទឹម​គ្នា​នេះ លោក Ramin Mehmanparast ក៏​បាន​បញ្ជាក់​ផង​ដែរ​ថា ទីក្រុង​តេអេរ៉ង់​នឹង​មិន​អនុញ្ញាត​ឲ្យ​ក្រុមអធិការ AIEA ចូល​ទៅ​ពិនិត្យ​មូលដ្ឋាន​យោធា Parchin ទេ ព្រោះ​បើ​តាម​លោក Ramin មូលដ្ឋាន​យោធា Parchin គ្មាន​ជាប់ពាកព័ន្ធ​នឹង​កម្មវិធី​នុយក្លេអ៊ែរ​ទេ។ តែ​បញ្ហា​នៅ​ត្រង់​ថា AIEA បាន​សង្ស័យ​លើ​អ៊ីរ៉ង់​ពី​បទ​បាន​លួច​ធ្វើ​ការ​សាកល្បង​ជាតិផ្ទុះ​នៅ​មូលដ្ឋាន Parchin ទុក​សម្រាប់​ប្រើប្រាស់​ក្នុង​ការ​បំផ្ទុះ​អាវុធនុយក្លេអ៊ែរ។

គួរ​រម្លឹកជូន​ឡើង​វិញ​ថា សហគមន៍​អន្តរជាតិ និង AIEA នៅ​បន្ត​មិន​ទុកចិត្ត​អ៊ីរ៉ង់ និង​សង្ស័យ​ថា អ៊ីរ៉ង់​បាន​យក​កម្មវិធី​នុយក្លេអ៊ែរ​ស៊ីវិល​មក​បិទបំាង​ដើម្បី​បំពាក់​អាវុធ​បរមាណូ។ យ៉ាង​ណា​ក៏​ដោយ លោក​នាយក AIEA Yukiya Amano បាន​អះអាង​កាល​ពី​ថ្ងៃ​សុក្រ​កន្លង​ទៅ​ថា លោក​ហាក់​ដូច​ជា​មិន​សូវ​មាន​សុទិដ្ឋិនិយម​ប៉ុន្មាន​ទេ​ថា កិច្ចចរចា​នៅ​ថ្ងៃ​ពុធ​ស្អែក​នឹង​ទទួល​បាន​កិច្ចព្រមព្រៀង​ណា​មួយ​នោះ។ ភាព​មិន​សូវ​មាន​សុទិដ្ឋិនិយម​នេះ​ក៏​ជា​ការ​យល់​ឃើញ​របស់​អ្នកការទូត​បស្ចិមលោក​ម្នាក់​ដែរ កាល​ពី​ថ្ងៃ​អាទិត្យ​កន្លង​ទៅ ព្រោះ​បើ​យោង​តាម​រូបអ្នកការទូតបស្ចិមលោក​ដែល​មិន​ព្រម​បញ្ចេញ​ឈ្មោះ នៅ​មាន​បញ្ហា​ខ្វែង​គ្នា​ជា​ច្រើន​ទៀត​ដែល​នៅ​មិនទាន់​ដោះស្រាយ​បាន៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ