រ៉ូកែតជាច្រើនគ្រាប់ធ្លាក់ក្បែរស្ថានទូតអាមេរិក នៅអ៊ីរ៉ាក់
ថ្ងៃអាទិត្យ ទី១៦កុម្ភៈ យ៉ាងហោចមានរ៉ូកែត ចំនួនបីគ្រាប់ បានធ្លាក់ក្បែរស្ថានទូតអាមេរិក នៅអ៊ីរ៉ាក់។ នេះជាការបញ្ជាក់របស់មេបញ្ជាការអ៊ីរ៉ាក់ ដោយឱ្យដឹងទៀតថា ឃ្លាំងរក្សាបរិក្ខារៈយោធាមួយកន្លែងផ្សេងទៀត ក៏ត្រូវរងការខូចខាតដែរ។ តុល្យការបឋម គ្មានមនុស្សរងគ្រោះនោះទេ តែព្រឹត្តិការណ៍នេះ ត្រូវគេសន្និដ្ឋានថា ជាការសងសឹកបន្ថែមទៀតទៅលើទ័ពអាមេរិក ដែលបានសម្លាប់ឧត្តមសេនីយយោធាអ៊ីរ៉ង់។
ចុះផ្សាយនៅថ្ងៃ៖
ម៉ោង១២កន្លះ រំលងអធ្រាត្រម៉ោងនៅអ៊ីរ៉ាក់ គេបានឮសន្ធឹកផ្ទុះជាច្រើន និងសូរសំឡេងកងរំពងចេញពីស៊ីរ៉ែនប្រកាសអាសន្ន របស់ស្ថានទូតអាមេរិក ក្នុងរដ្ឋធានីបាកដាដ។ ពេលដំណាលគ្នា ក៏មានយន្តហោះហើរឆ្វែលស្ថានទូតទៀតផង។ នេះបើតាមការរៀបរាប់របស់អ្នកកាសែតរបស់ទីភ្នាក់ងារបារាំង AFP ដែលឈរជើងនៅនោះ។
លុះព្រឹកភ្លឺច្បាស់ មេបញ្ជាការអ៊ីរ៉ាក់ បានបញ្ជាក់លម្អិតថា មានគ្រាប់រ៉ូកែតចំនួនបីគ្រាប់ បាញ់ចេញក្នុងពេលដំណាលៗគ្នា និងមានមួយគ្រាប់ផ្ទុះនៅចម្ងាយពីគ្នា ជាច្រើនគីឡូម៉ែត្រ ហើយបានបំផ្លាញសម្ភារៈបរិក្ខារយោធា នៃក្រុម Hachd al-Chaabi។ តាមមេបញ្ជាការអ៊ីរ៉ាក់ដដែល គិតត្រឹមតែប្រមាណ៤ខែចុងក្រោយ នេះជាលើកទី១៩ហើយ ដែលមានការវាយប្រហារគ្រាប់រ៉ូកែតទៅលើស្ថានទូតអាមេរិក ឬមូលដ្ឋានយោធាអាមេរិក។
គ្មានក្រុមណាមួយ ចេញមុខធានាអះអាងថាជាស្នាដៃរបស់ខ្លួននៅឡើយទេ រហូតមកដល់គ្រានេះ។ ក៏ប៉ុន្តែ ចំពោះសហរដ្ឋអាមេរិក អ្នកដែលនៅក្រោយការវាយប្រហារទាំងឡាយទាំងពួងនេះ គឺ អ៊ីរ៉ង់ និងដៃជើងបក្សពួកឧទ្ទាមដែលនិន្នាការគាំទ្រអ៊ីរ៉ង នៅក្នុងទឹកដៃអ៊ីរ៉ាក់។
ចំពោះអ៊ីរ៉ាក់ ជាការលំបាកជ្រើសរើស ដ្បិតថា ទាំងអាមេរិកនិងទាំងអ៊ីរ៉ង់ គឺសុទ្ធតែជាសម្ព័ន្ធមិត្ត។ យ៉ាងណាក៏ដោយ នៅក្នុងជួរថ្នាក់ដឹកនាំរដ្ឋាភិបាលអ៊ីរ៉ាក់និងអ្នកតំណាងរាស្ត្រមួយចំនួនដែលគាំទ្រអ៊ីរ៉ង់ ចង់ធ្វើច្បាប់ថ្មីបណ្តេញទ័ពបរទេសចេញពីអ៊ីរ៉ាក់។ នៅអ៊ីរ៉ាក់មានទ័ពអាមេរិកជាង៥ពាន់២រយនាក់ សហការកម្ទេចក្រុមភេរវនិយមអង្គការរដ្ឋអ៊ីស្លាមជីហាត។
នៅខែឧសភា២០១៨ អាមេរិករបស់លោក ដូណាល់ ត្រាំ បានសម្រេចចិត្តដោយឯកតោភាគីដកខ្លួន ចេញពីកិច្ចព្រមព្រៀងនុយក្លេអ៊ែរអ៊ីរ៉ង់។ តាំងពីពេលនោះមក ទំនាក់ទំនងអ៊ីរ៉ង់និងអាមេរិកដុបដាបខ្លាំង ហើយអ៊ីរ៉ាក់ជាទីលានដែលមហាអំណាចទាំងពីរបញ្ចេញសាច់ដុំដាក់គ្នា។ ដើមខែមករា អាមេរិកប្រើយន្តហោះដ្រូនបាញ់ធ្វើឃាតឧត្តមសេនីយយោធាអ៊ីរ៉ង Qassem Soleimani ហើយជាការសងសឹក អ៊ីរ៉ង់និងបក្សពួក បានបាញ់មូលដ្ឋានយោធាអាមេរិក ធ្វើឱ្យរបួសកងទ័ពមួយចំនួនដែរ ភាគច្រើនគឺមានបញ្ហាក្បាល និងស្មារតី។ នេះបើតាមរបាយការណ៍របស់មន្ទីរបញ្ចកោណអាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ