អ៊ីរ៉ង់

ប្រមុខដឹកនាំ​សាសនា​អ៊ីរ៉ង់​ប្រកាស​គាំទ្រ​នយោបាយ​បើកចំហ​របស់​ប្រធានាធិបតី​រ៉ូហានី

លោក​ហាសាន់ រ៉ូហានី (ស្តាំ) និង​ប្រមុខដឹកនាំ​សាសនា អាលី ខាមេណី កាល​ពី​ខែ​មិថុនា ឆ្នាំ​២០១៣ (រូបថតឯកសារ)
លោក​ហាសាន់ រ៉ូហានី (ស្តាំ) និង​ប្រមុខដឹកនាំ​សាសនា អាលី ខាមេណី កាល​ពី​ខែ​មិថុនា ឆ្នាំ​២០១៣ (រូបថតឯកសារ) REUTERS/Leader.ir/Handout via Reuters

សកម្មភាព​របស់​លោក​ប្រធានាធិបតី​អ៊ីរ៉ង់ ហាសាន់ រ៉ូហានី (Hassan Rohani) នៅ​ក្នុង​ទីក្រុង​ញូវយ៉ក កាល​ពីពេល​ថ្មីៗ​នេះ បាន​នាំ​ឲ្យ​មាន​ប្រតិកម្ម​​​ជា​បន្តបន្ទាប់ នៅ​ក្នុង​ប្រទេស​ទីអ៊ីរ៉ង់។ នៅ​ថ្ងៃ​សៅរ៍​នេះ គឺ​ប្រមុខដឹកនាំ​សាសនា​ អាលី ខាមេណី (Ayatollah Ali Khamenei) ដែល​បានចេញមុខ​​ធ្វើ​អត្ថាធិប្បាយ​ជុំវិញ​រឿងនេះ។ លោក​ អាលី ខាមេណី​ បានបង្ហាញ​នូវ​ការ​​គាំទ្រ​នូវ​នយោបាយ​បើក​ចំហ​របស់​លោក​រ៉ូហានី ក៏ប៉ុន្តែ បាន​រិះគន់​​ផ្នែក​ខ្លះ​នៃដំណើរ​ទស្សនកិច្ច​របស់​លោក​នៅញូវយ៉ក។

ផ្សាយពាណិជ្ជកម្ម

ប្រមុខដឹកនាំ​សាសនា អាយ៉ាតូឡា អាលី ខាមេណី ដែល​ជា​អ្នក​មាន​អំណាច​កំពូល​ខាង​នយោបាយ​ការបរទេស​អ៊ីរ៉ង់ បាន​ថ្លែង​គាំទ្រ​នយោបាយ​ការបរទេស និង​សកម្មភាព​ការទូត​របស់​​​លោក​ប្រធានាធិបតី​ហាសាន់ រ៉ូហានី នៅ​ក្នុង​អំឡុង​ដំណើរទស្សនកិច្ច ក្នុង​ទីក្រុង​ញូវយ៉ក កាលពី​ខែ​កញ្ញា ដើម្បី​ចូលរួម​ក្នុង​មហាសន្និបាត​របស់​អ.ស.ប។

ក៏ប៉ុន្តែ អាយ៉ាតូឡា ខាមេណី ក៏​បាន​រិះគន់​ផងដែរ ចំពោះ​ “ផ្នែកខ្លះ​នៃ​ដំណើរទស្សនកិច្ច​នៅ​ញូវយ៉ក” របស់​លោក​រ៉ូហានី ដោយ​លោក​ចាត់ទុក​ថា ជា​សកម្មភាព​ដែល​មិន​សមរម្យ។ ប្រមុខដឹកនាំ​សាសនា​អ៊ីរ៉ង់​ទំនង​ជា​ចង់​សំដៅ​លើ​កិច្ចសន្ទនា​តាមទូរស័ព្ទ រវាង​លោក​រ៉ូហានី និង​លោក​អូបាម៉ា។

គួររំឭកឡើងវិញ​ថា លោក​អូបាម៉ា និង​លោក​រ៉ូហានី បាន​ជួប​សន្ទនាគ្នា​តាមទូរស័ព្ទ កាល​ពីថ្ងៃ​ទី២៧​កញ្ញា នៅ​ក្នុង​ពេល​ដែល​លោក​រ៉ូហានីកំពុង​ស្ថិត​ក្នុង​ទីក្រុង​ញូវយ៉ក។ នេះ​គឺ​ជា​កិច្ចសន្ទនា​ជា​ប្រវត្តិសាស្រ្ត​មិន​ធ្លាប់​មាន​ រវាង​ប្រធានាធិបតី​អាមេរិក និង​ប្រធានាធិបតី​អ៊ីរ៉ង់ ចាប់តាំង​ពី​ប្រទេស​ទាំងពីរ​ផ្តាច់ទំនាក់ទំនង​ការទូត​ជាមួយគ្នា ក្រោយ​បដិវត្តន៍​អ៊ីរ៉ង់ ឆ្នាំ​១៩៧៩។

ក៏ប៉ុន្តែ ការណ៍​ដែល​លោក​រ៉ូហានី​យល់​ព្រម​ជួប​ជជែក​តាម​ទូរស័ព្ទ​ជាមួយ​នឹង​លោក​អូបាម៉ា​នេះ បាន​នាំ​ឲ្យ​មាន​ការ​រិះគន់​យ៉ាង​ខ្លាំង ពី​សំណាក់​ក្រុម​អ្នក​ប្រកាន់​តឹង នៅ​ក្នុង​ប្រទេស​អ៊ីរ៉ង់។ មន្រ្តី​ជាន់ខ្ពស់​មួយចំនួន នៃ​កង​ឆ្មាំ​បដិវត្តន៍អ៊ីរ៉ង់ បាន​នាំគ្នា​រិះគន់​កិច្ចសន្ទនា​តាមទូរស័ព្ទ​នេះ​ថា​ជា​ “កំហុស​ខាង​តាក់ទិក” មួយ​ របស់​លោក​ប្រធានាធិបតី​រ៉ូហានី។

នៅថ្ងៃ​សៅរ៍​ម្សិលមិញ​នេះ អាយ៉ាតូឡា ខាមេណី បាន​លើកឡើង​ថា “រដ្ឋាភិបាល​អាមេរិក គឺ​ជា​រដ្ឋាភិបាល ដែល​មិន​គួរ​ឲ្យ​ជឿទុកចិត្ត មាន​ភាព​ក្រអឺតក្រទម គ្មាន​ហេតុផល ហើយ​តែងតែ​ក្បត់​ពាក្យ​សន្យា”។ លោក​ក៏​បាន​បន្ថែម​ផងដែរ​​ថា អាមេរិក​ស្ថិត​ក្រោម​ការ​​ដឹកច្រមុះ ដោយ​អ៊ីស្រាអែល។

គួររំឭក​ផងដែរ​ថា កាល​ពី​ថ្ងៃ​ចន្ទ​ដើមសប្តាហ៍​នេះ ប៉ុន្មាន​ថ្ងៃ​ក្រោយ​ពី​បាន​ជួប​សន្ទនា​តាម​ទូរស័ព្ទ​ជាមួយ​ប្រធានាធិបតី​អ៊ីរ៉ង់ លោក​អូបាម៉ា​បាន​ទទួល​ជួប​នាយករដ្ឋមន្រ្តី​អ៊ីស្រាអែល ហើយ​ក្រោយ​ជំនួប​នេះ លោក​អូបាម៉ា​បាន​លើកឡើង​ថា ការប្រើ​កម្លាំង​ទ័ព​នៅតែ​ជាជម្រើស​មួយ ដើម្បី​ទប់ស្កាត់​អ៊ីរ៉ង់​កុំ​ឲ្យ​ផលិត​អាវុធ​នុយក្លេអ៊ែរ។ ការថ្លែង​បែបនេះ​បាន​នាំ​ឲ្យ​មាន​ការ​រិះគន់ភ្លាមៗ​ ពី​សំណាក់​រដ្ឋាភិបាល​អ៊ីរ៉ង់​ ដោយ​បាន​ចោទ​លោកប្រធានាធិបតី​អាមេរិក​ថា “និយាយ​បាតដៃ​ជា​ខ្នងដៃ”៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI