អានតួអត្ថបទ
អ៊ីរ៉ង់

លោកហាសាន រ៉ូហានី៖« អ៊ីរ៉ង់​នឹង​មិន​បោះបង់ចោល​បច្ចេកវិទ្យា​នុយក្លេអ៊ែរ​របស់​ខ្លួន​ទេ »

លោក​ប្រធានាធិបតី​អ៊ីរ៉ង់ហាសាន រ៉ូហានី
លោក​ប្រធានាធិបតី​អ៊ីរ៉ង់ហាសាន រ៉ូហានី AFP PHOTO/ATTA KENARE
១៦ នាទី

លោក​ប្រធានាធិបតី​អ៊ីរ៉ង់​ហាសាន រ៉ូហានី​បាន​គូសបញ្ជាក់​នៅ​ថ្ងៃ​ពុធ ទី១៩ មីនា​ថា អ៊ីរ៉ង់​នឹង​មិន​បោះបង់​ចោល​បច្ចេកវិទ្យា​នុយក្លេអ៊ែរ​របស់​ខ្លួន​ចា​ដាច់​ខាត ពិសេស​បច្ចេកវិទ្យា​ចម្រើន​ធាតុអ៊ុយរ៉ាញ៉ូម។ នេះ​ជា​ប្រតិកម្ម​ដែល​លោក​ប្រធានាធីបតី​អ៊ីរ៉ង់​បាន​​ឆ្លើយ​ទៅ​កាន់​ក្រុម​សមាជិក​ព្រឹទ្ធសភា​អាមេរិកំាង​ដែល​បាន​បញ្ជាក់​ថា អ៊ីរ៉ង់​គ្មាន​សិទ្ធិ​ក្នុង​ការ​ចម្រើន​ធាតុអ៊ុយរ៉ាញ៉ូម​ដោយ​ខ្លួន​ឯង​ទេ។ សង្រ្គាម​ពាក្យ​សម្តី​ពេល​នេះ​បាន​ផ្ទុះ​ឡើង ចំ​ពេល​ដែល​កិច្ចប្រជុំ ៥ភាគី បូក១ ស្តីពី​នុយក្លេអ៊ែរ​អ៊ីរ៉ង់​បាន​ជួប​ប្រជុំ​គ្នា​រយៈពេល ២ថ្ងៃ គឺ​ពី​ថ្ងៃទី១៨ ដល់​ថ្ងៃទី១៩ មីនា​ក្នុង​ទីក្រុង​វីយែន ប្រទេស​អូទ្រីស។

ផ្សាយពាណិជ្ជកម្ម

« អ៊ីរ៉ង់​ជា​ប្រទេស​មួយ​ក្នុង​ចំណោម​ប្រទេស​ដទៃ​ផ្សេង​ទៀត​ដែល​មាន​បច្ចេកវិទ្យា​នុយក្លេអ៊ែរ ពិសេស​បច្ចេកវិទ្យា​ចម្រើន​ធាតុអ៊ុយរ៉ាញ៉ូម។ គេ​មិន​គួរ​នំា​គ្នា​មាន​មន្ទិល​សង្ស័យ និង​ភ្ញាក់ផ្អើល​ឡើយ។ ប្រទេស​មួយ​ចំនួន និង​ពលរដ្ឋ​អាមេរិកំាង​អាច​និយាយ​អ្វី និង​ចង់​និយាយ​អ្វី ក៏​និយាយ​ទៅ » នេះ​ជា​ការ​ថ្លែង​របស់​លោក​ប្រធានាធិបតី​អ៊ីរ៉ង់​ហាសាន រ៉ូហានី​នា​ឱកាស​កិច្ចប្រជុំ​គណៈរដ្ឋមន្រ្តី​នៅ​ថ្ងៃ​ពុធ ទី១៩ មីនា។ ការ​ថ្លែង​របស់​លោក​រ៉ូហានី​យ៉ាង​ដូច​នេះ គឺ​ជា​ប្រតិកម្ម​ឆ្លើយ​តប​នឹង​ក្រុម​សមាជិកព្រឹទ្ធសភា​អាមេរិកំាង​ចំនួន ៨៣រូប​ដែល​បាន​សរសេរ​លិខិត​ទៅ​ឲ្យ​លោក​ប្រធានាធិបតី​អាមេរិក​អូបាម៉ា ដោយ​បាន​ស្នើ​លោក​អូបាម៉ា​ឲ្យ​ទទួល​យក​នូវ​លក្ខខណ្ឌ​មួយ​ចំនួន​របស់​ពួក​គេ​សម្រាប់​ដាក់​បញ្ចូល​នៅ​ក្នុង​គ្រប់​កិច្ចព្រមព្រៀង​ចុង​ក្រោយ​ទំាង​អស់​ស្តីពី​សំណុំរឿង​នុយក្លេអ៊ែរ​អ៊ីរ៉ង់។

នៅ​ក្នុង​លិខិត​នោះ ក្រុមសមាជិក​ព្រឹទ្ធសភា​អាមេរិកំាង​បាន​បញ្ជាក់​ថា ដោយ​អនុលោម​តាម​សន្ធិសញ្ញា​មិន​សាយភាយ​នុយក្លេអ៊ែរ អ៊ីរ៉ង់​គ្មាន​សិទ្ធិ​ណា​មួយ​ក្នុង​ការ​ចម្រើន​ធាតុអ៊ុយរ៉ាញ៉ូម​ដោយ​ខ្លួន​ឯង​ទេ។ ទន្ទឹម​គ្នា​នេះ ក្រុមសមាជិក​ព្រឹទ្ធសភា​អាមេរិកំាង​ទំាង ៨៣នាក់​ក៏​បាន​ទាមទារ​ឲ្យ​មាន​ការ​ដាក់​ពង្រាយ​ក្រុមអធិការ​អន្តរជាតិ​រយៈពេល​យូរ​ដើម្បី​តាមដាន​សកម្មភាព​របស់​អ៊ីរ៉ង់ ពិសេស​បាន​ឲ្យ​អ៊ីរ៉ង់​បិទ​ម៉ាស៊ីនប្រតិកម្ម​ដើរ​ដោយ​ទឹកធ្ងន់​នៅ​មជ្ឈមណ្ឌល​នុយក្លេអ៊ែរ​អារ៉ាក​ដែល​អាច​ផលិត​ចេញ​នូវ​សារធាតុ​ភ្លុយតូនីញ៉ូម​ក្នុង​គោលដៅ​ផលិត​អាវុធ​បរមាណូ។

អ្វី​ជា​ការ​កត់សម្គាល់ សង្រ្គាម​ប៉ាកកា​រវាង​ក្រុម​សមាជិក​ព្រឹទ្ធសភា​អាមេរិកំាង និង​អ៊ីរ៉ង់​ពេល​នេះ​បាន​កើត​មាន​ឡើង ចំ​ពេល​ដែល​កិច្ចប្រជុំ ៥ភាគី បូក១ ស្តីពី​នុយក្លេអ៊ែរ​អ៊ីរ៉ង់​បាន​រៀបចំ​ធ្វើ​រយៈពេល ២ថ្ងៃ គឺ​ពី​ថ្ងៃទី១៨ ដល់​ថ្ងៃទី១៩ មីនា​ក្នុង​ទីក្រុង​វីយែន ប្រទេស​អូទ្រីស។ កិច្ចប្រជុំ​ដែល​បាន​និយាយ​ពី​ខ្លឹមសារ​លំអិត​ជុំវិញ​កិច្ចព្រមព្រៀង​ចុង​ក្រោយ​នា​ពេល​ខាង​មុខ។ គួរ​រម្លឹក​ជូន​ថា កិច្ចព្រមព្រៀង​លើ​ទីមួយ​មាន​សុពលភាព​រយៈពេល ៦ខែ និង​ដែល​ទើប​បាន​ចូល​ជា​ធរមាន​នៅ​ខែ​មករា​ឆ្នំា ២០១៤ នេះ បាន​តម្រូវ​ឲ្យ​អ៊ីរ៉ង់​បញ្ឈប់​នូវ​សកម្មភាព​នុយក្លេអ៊ែរ​រសើប​មួយ​ចំនួន ជា​ថ្នូរ​នឹង​ការ​សម្រាល​ទណ្ឌកម្ម​មួយ​មួយ​ចំនួន​ពី​បស្ចិមលោក។ កិច្ចព្រមព្រៀង​ចុងក្រោយ​គ្រោង​នឹង​អនុម័ត​នៅ​មុន​ខែ​កក្កដា​ខាងមុខ៕

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ