សហរដ្ឋអាមេរិក-អៀរ៉ង់

អាមេរិក​និង​អៀរ៉ង់​ប៉ះ​ពាក្យសម្តីគ្នា​នៅ​អ.ស.ប.

លោក​ម៉ះមូដ អះម៉ាឌីនចាត (Mahmoud Ahmadinejad) ប្រធានាធិបតី​អៀរ៉ង់
លោក​ម៉ះមូដ អះម៉ាឌីនចាត (Mahmoud Ahmadinejad) ប្រធានាធិបតី​អៀរ៉ង់ ©Reuters

សន្និសីទ​នុយក្លេអ៊ែរ បាន​ចាប់​បើក​ កាល​ពីថ្ងៃ​ចន្ទ ទី៣ ឧសភា ២០១០ ជាមួយ​នឹង​ការ​ប៉ះទង្គិច​ពាក្យ​សម្តីគ្នា​រវាង​សហរដ្ឋ​អាមេរិក និង​អៀរ៉ង់។ ប្រធានាធិបតី​អៀរ៉ង់​ទាមទារ​ឲ្យ​ដាក់ទណ្ឌកម្ម​លើ​អាមេរិក ដែល​យក​អាវុធ​នុយក្លេអ៊ែរ​ ទៅគំរាម​ប្រទេស​ដទៃ។ ចំណែក​អាមេរិក​បាន​រិះគន់​អៀរ៉ង់​ថា មាន​មហិច្ឆតា​ចង់​ក្លាយ​ជា​មហាអំណាច​នុយក្លេអ៊ែរ ដែល​ធ្វើ​ឲ្យ​ប៉ះពាល់​ដល់​សន្តិសុខ​អន្តរជាតិ។

ផ្សាយពាណិជ្ជកម្ម

 

សេចក្តីរាយការណ៍​របស់ សេង ឌីណា

នៅក្នុង​សុន្ទរកថា​ ពេល​បើក​សន្និសីទ​អ.ស.ប. ស្តីពី​​សន្ធិសញ្ញា​មិន​រីក​សាយភាយ​​អាវុធ​​នុយក្លេអ៊ែរ លោក​ម៉ះមូដ អះម៉ាឌីនចាត (Mahmoud Ahmadinejad) ប្រធានាធិបតី​អៀរ៉ង់ បាន​ទាមទារ​ឲ្យ​អ.ស.ប.​ដាក់​ទណ្ឌកម្ម​ដល់​ប្រទេស ដូចជា សហរដ្ឋ​អាមេរិក ដែល​គំរាម​ប្រើ​អាវុធ​នុយក្លេអ៊ែរ​វាយប្រហារ​លើ​ប្រទេស​ដទៃ។ លោក​អះម៉ាឌីនចាត ក៏បាន​រំឭក​ផងដែរ​ថា សហរដ្ឋ​អាមេរិក​គឺជាប្រទេស​តែមួយ​គត់ ក្នុងប្រវត្តិសាស្រ្ត ដែល​បាន​ប្រើ​អាវុធ​នុយក្លេអ៊ែរ។

ដូចដែល​ធ្លាប់​ធ្វើ​ជាទម្លាប់ គណៈប្រតិភូ​​មកពី​សហរដ្ឋអាមេរិក អង់គ្លេស បារាំង អាឡឺម៉ង់ និង​ប្រទេស​មួយចំនួន​ទៀត បាន​ដើរចេញ​ពី​សាលប្រជុំ ដើម្បីជាការ​តវ៉ាប្រឆាំង​នឹង​សុន្ទរកថា​របស់​ប្រធានាធិបតី​អៀរ៉ង់។

ដល់​វេន​សហរដ្ឋអាមេរិក​ត្រូវ​ថ្លែង​សុន្ទរកថា លោកស្រី​គ្លីនតុន រដ្ឋមន្រ្តី​ការបរទេស​អាមេរិក បាន​លើកឡើង​ថា សុន្ទរកថា​របស់​ប្រធានាធិបតី​អៀរ៉ង់ គឺ​ជា​ការ​ចោទប្រកាន់​ដដែលៗ គួរ​ឲ្យ​ធុញទ្រាន់នឹង​ស្តាប់ ហើយ​ជាការ​ចោទប្រកាន់​ផ្តេសផ្តាស ដោយ​គ្មាន​មូលដ្ឋាន។ លោកស្រី​គ្លីនតុន​បាន​បន្ថែមទៀត​ថា ការណ៍​ដែល​​លោក​អះម៉ាឌីនចាត​​ខំប្រឹង​ដើរ​ចោទគេ​ឯងបែបនេះ គឺ​ក្នុង​គោលដៅ​ពង្វាង​ចំណាប់​អារម្មណ៍​សហគមន៍​អន្តរជាតិ ពី​កម្មវិធី​នុយក្លេអ៊ែរ ដ៏គួរ​ឲ្យ​សង្ស័យ​របស់​​អៀរ៉ង់។

ក៏ប៉ុន្តែ បណ្តា​ប្រទេស​មិនចូលបក្ស​សម្ព័ន្ធ​ទំនង​ជា​​ពេញចិត្ត​នឹង​ផ្នែក​ខ្លះ នៃ​សុន្ទរកថា​របស់​ប្រធានាធិបតី​អៀរ៉ង់។ ប្រទេស​ទាំងនេះ​យល់ថា មហាអំណាច​នុយក្លេអ៊ែរ​មិនបាន​ខិតខំ​ប្រឹងប្រែង ក្នុងការ​កាត់បន្ថយ​សព្វាវុធ​នុយក្លេអ៊ែរ​របស់​ខ្លួន​នោះទេ។ បើ​ទោះជា​មាន​ការកាត់បន្ថយ​ខ្លះ ក៏​​ជា​ការកាត់បន្ថយ​តិចតួចដែរ។

ដើម្បីបង្ហាញ​ពី​តម្លាភាព ក្រសួងការពារជាតិ​​អាមេរិក​បាន​ផ្សព្វផ្សាយ​ជាសាធារណៈ​ នូវ​ចំនួន​ក្បាល​គ្រាប់​នុយក្លេអ៊ែរ​របស់ខ្លួន។ គិតមកត្រឹម​ឆ្នាំ​២០០៩ អាមេរិក​មាន​ក្បាលគ្រាប់​នុយក្លេអ៊ែរ​សរុបចំនួន ៥ ១១៣​គ្រាប់ ពោល​គឺ​ កាត់បន្ថយ​ ៨៧% បើ​ធៀប​នឹង​ឆ្នាំ​១៩៦៧ នៅពេល ដែល​ពិភពលោក​កំពុង​ស្ថិត​ក្នុង​សង្រ្គាម​ត្រជាក់។ យោងតាម​សន្ធិសញ្ញាថ្មី ដែល​ចុះ​ជាមួយ​រុស្ស៊ី អាមេរិក​ត្រូវ​កាត់បន្ថយ​ចំនួន​ក្បាល​គ្រាប់​នុយក្លេអ៊ែ​រ​របស់​ខ្លួន​ មកនៅ​យ៉ាងច្រើន​បំផុត ត្រឹមតែ ១ ៥៥០​គ្រាប់​តែប៉ុណ្ណោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI