អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

មេ​ក្រុមប្រឆាំង​​ប៉ាគីស្ថាន​ចង់​បញ្ឆេះភ្លើង​បាតុកម្ម​ដណ្តើម​អំណាច​ ពី​នាយក​រដ្ឋមន្ត្រី?​

សំឡេង ០៥:៤៤
ប៉ូលិស​រាយគ្នា​នៅ​ក្រុង​រ៉ាវ៉ាល់ពិនឌី ថ្ងៃ​ព្រហស្បតិ៍​១៤សីហា ​បិទផ្លូវ​មិនអោយ​បាតុករ​ធ្វើដំណើរ​ទៅរដ្ឋធានី​អ៊ីស្លាម៉ាបាត។
ប៉ូលិស​រាយគ្នា​នៅ​ក្រុង​រ៉ាវ៉ាល់ពិនឌី ថ្ងៃ​ព្រហស្បតិ៍​១៤សីហា ​បិទផ្លូវ​មិនអោយ​បាតុករ​ធ្វើដំណើរ​ទៅរដ្ឋធានី​អ៊ីស្លាម៉ាបាត។ REUTERS/Faisal Mahmood
ដោយ៖ ព្រំ សឿន សូលីណា
៣៨ នាទី

ភាព​តានតឹង​បាន​ផ្ទុះ​ជាថ្មី​នៅ​ប៉ាគីស្ថាន។ ​តាំង​ពី​ថ្ងៃ​ពុធ​ម្សិលមិញ ​អាជ្ញាធរ​​​បាន​ពង្រាយ​​ប៉ូលិស​​ប្រឆាំង​​កុប្បកម្ម​រាប់ពាន់នាក់ នៅ​ក្រុង​អ៊ីស្លាម៉ាបាត និង​ទីកន្លែង​សំខាន់​នានា ​ដើម្បី​ហាមឃាត់​មិន​អោយ​មាន​ចលនា​បាតុកម្ម​ប្រឆាំង​រដ្ឋាភិបាល។ ​សកម្មជន​ក្រុម​ប្រឆាំង​​​​បាន​រើស​យក​ថ្ងៃ​ព្រហស្បតិ៍​ទី១៤​នេះ ​ចំ​ថ្ងៃ​​ខួប​ឯករាជ្យ​ជាតិ​​ទី​៦៧ ដើម្បី​ដង្ហែ​ក្បួនតាម​បែប​សន្តិវិធី​ក្នុង​ក្រុង​អ៊ីស្លាម៉ាបាត​ ​​ទាមទារ​​​​​​នាយក​រដ្ឋមន្ត្រី​ណាវ៉ា ស្ហារីហ្វ អោយ​ចុះ​​ពី​តំណែង។ មេក្រុម​ប្រឆាំង​២រូប ជា​អ្នក​អំពាវនាវ​និង​ដឹកនាំ​ចលនា​បាតុកម្ម​នេះ៖ ​គឺ​ លោក ​អ៊ីមរ៉ាន់ ខាន់ ជា​តារា​វាយកូនគោល​​ធ្លាប់​មាន​ឈ្មោះ​ល្បី មកពី​​បក្ស​​យុត្តិធម៌ និង​លោក​​តាហៀ អ៊ុល កាឌ្រី ​ជា​មេក្រុម​សាសនា​មកពី​បក្ស​ចលនា​ប្រជាជន​ប៉ាគីស្ថាន​។ ថ្ងៃពុធ​ម្សិលមិញ ​​តុលាការ​​​ជាន់ខ្ពស់​ក្រុង​Lahor ភាគខាងកើត ​បាន​ហាមឃាត់​មិន​អោយធ្វើ​​បាតុកម្ម​នេះ ​ដោយ​ចាត់ទុក​ថា ជា​បាតុកម្ម​​ខុសច្បាប់។ ​

ផ្សាយពាណិជ្ជកម្ម

មេក្រុម​ប្រឆាំង​មិនបាន​សុំការ​អនុញ្ញាត​ធ្វើ​បាតុកម្ម​ពី​អាជ្ញាធរ​ជាមុន

តុលាការប៉ាគីស្ថាន​​​វាយតម្លៃ​ថា មេក្រុម​ប្រឆាំង​ទាំង២រូប គឺ​លោក​ ​អ៊ីមរ៉ាន់​ ខាន់ មកពី​បក្ស​យុត្តិធម៌​ប៉ាគីស្ថាន និង​លោក​​តាហៀ អ៊ុល កាឌ្រី ​មកពីបក្ស​ចលនា​ប្រជាជន​ប៉ាគីស្ថាន ​​មិនបាន​សុំការ​អនុញ្ញាត​​ធ្វើបាតុកម្ម​ជាមុនទេ។ ​បើ​មិនសុំ​អាជ្ញាធរ​ធ្វើ​បាតុកម្មជាមុន​ នោះ​អាជ្ញាធរ​ក៏​មិនអាច​អនុញ្ញាត​អោយ​ធ្វើបាតុកម្ម​បាន​ដែរ។ ហើយ​បើ​មាន​បាតុកម្ម នេះ​ជា​បាតុកម្ម​ផ្ទុយ​ពី​ច្បាប់​សុទ្ធសាធ។ ​ប៉ុន្តែ មើលអោយ​ដិតដល់ ​នេះ​មិនមែន​ជា​បញ្ហា​ចោទ​ទេ។ អ្វីដែល​សំខាន់​គឺ​ រដ្ឋអំណាច​ប៉ាគីស្ថាន​ខ្លាច​ថា បាតុកម្ម​​​ថ្ងៃ​នេះ​​​ បង្ក​​​ផលវិបាក​​ធ្ងន់ធ្ងរ​ដល់​រដ្ឋាភិបាល​របស់​នាយករដ្ឋមន្ត្រី​ ណាវ៉ា ស្ហារីហ្វ​ ឯណោះទេ ​ព្រោះថា ​ទិសដៅ​នៃ​បាតុកម្ម​ដែល​ចង់​ធ្វើនៅ​ថ្ងៃ​ព្រហស្បតិ៍​នេះ គឺ​ទាមទារ​នាយករដ្ឋមន្ត្រី​ណាវ៉ា ស្ហារីហ្វ អោយ​ចុះពីតំណែង។

គួរ​រំលឹក​ថា ​បក្ស​យុត្តិធម៌​ ដែល​​ជា​បក្ស​ប្រឆាំង​បច្ចុប្បន្ន ​របស់​លោក​អ៊ីមរ៉ាន់​ ខាន់ ​​បានចាញ់​ឆ្នោត​សភា កាលពី​ខែ​ឧសភា​ឆ្នាំ២០១៣ ចាញ់​បក្ស​របស់​លោក​ណាវ៉ា ស្ហារីហ្វ។ សម្លេងឆ្នោត​​ដែល​បក្សយុត្តិធម៌​​ទទួលបាន​ ឆ្នាំមុន សរុប​ទៅ​ ធ្វើអោយ​បក្ស​​នេះ​ទទួលបាន​​ត្រឹម​​ចំណាត់​ថ្នាក់​ទី៣​​ប៉ុណ្ណោះ។ ប៉ុន្តែ ​​​បក្ស​ប្រឆាំង​មិន​សុខចិត្ត​ទេ បាន​បរិហារ​ថា ​មាន​ការ​បន្លំ​សន្លឹកឆ្នោត ​ក្នុង​ពេល​បោះឆ្នោត។ រី​ឯ​បក្សចលនា​ប្រជាជន​របស់​លោក​អ៊ុល កាឌ្រី ជា​អ្នកអំពាវនាវ​អោយ​មាន​​​​បាតុកម្ម​​ថ្ងៃនេះ ​ ធ្លាប់​​​ធ្វើ​ពហិការ​មិនចូលរួម​បោះឆ្នោត​សភា​កាលពី​ឆ្នាំមុន។ មេក្រុម​ប្រឆាំង​ទាំង២នាក់​​ បាន​ទាមទារ​​អោយ​នាយករដ្ឋមន្ត្រី​ស្ហារីហ្វ ​ចុះពី​អំណាច ដើម្បី​​​បង្កើត​​​រដ្ឋាភិបាល​ថ្មី​មួយទៀត ​មាន​សមាជិក​ជាអ្នក​មាន​វណ្ណៈ​អភិជន។ 

លោក Imran Khan មេ​ក្រុម​ប្រឆាំង​មកពី​បក្ស​យុត្តិធម៌​​ ​(PTI)
លោក Imran Khan មេ​ក្រុម​ប្រឆាំង​មកពី​បក្ស​យុត្តិធម៌​​ ​(PTI) Reuters/Saad Arsalan

 
និយាយរួម ​យើងឃើញ​ថា មេប្រឆាំង​ដែល​ដឹកនាំ​ចលនា បាតុកម្ម​​ទាំង២​រូប សុទ្ធតែ​​មាន​កំហឹង​​គុំ​នាយករដ្ឋមន្ត្រី​ណាវ៉ា ស្ហារីហ្វ ដូច្នេះ​ បាតុកម្ម​ថ្ងៃ​ព្រហស្បតិ៍​នេះ បើ​ធ្វើឡើង ដូច​ការ​​គ្រោង​ទុក គឺ​អាច​នឹង​រាលដាល​ជា​បាតុកម្ម​ហិង្សា​បង្ហូរ​ឈាមបាន។ ​​ម្យ៉ាងទៀត ប៉ាគីស្ថានកំពុង​​រងភាព​តានតឹង​ក្នុង​ប៉ុន្មាន​ថ្ងៃ​ចុងក្រោយ​នេះផង។ ​​

ប៉ូលិស​និង​សកម្មជនបាតុកម្ម​ក្រុម​​ប្រឆាំង​បាន​​ប៉ះទង្គិចគ្នា ​ធ្វើអោយ​មាន​មនុស្ស​ស្លាប់​ម្នាក់ នៅក្រុង​ឡាហរ។ ​ហើយ​អាជ្ញាធរ​បាន​ចាប់ខ្លួន​សកម្មជន​​ក្រុមប្រឆាំង​ដល់​ទៅ​​​ជាង​១ពាន់​នាក់។ ​​​​ហេតុនេះ​ហើយ​ ខ្លាច​​​មាន​បាតុកម្ម​បង្ក​ជាអំពើ​​ហិង្សា ​​​ទើប​អាជ្ញាធរ​​ពង្រាយ​កង​កម្លាំង​សន្តិសុខ​​​ ​​ហាមឃាត់​​​​​បាតុកម្ម។

លោក​ស្ហារីហ្វ ​ស្នើ​បង្កើត​គណៈកម្មការ​​ឯករាជ្យ​ដើម្បីអង្កេត​​ភាព​មិនប្រក្រតី​នៃ​ការ​បោះឆ្នោត​​សភា

ដើម្បីដោះស្រាយ​វិបត្តិ​នយោបាយ ​លោក​ស្ហារីហ្វ ដែល​ទើប​ជាប់ឆ្នោត​សភា ឆ្នាំ​២០១៣​ កន្លង​ទៅ​ ទើប​បានបន្ទន់​ជំហរ​ជាមួយ​ក្រុម​ប្រឆាំង ​​​ដោយ​សន្យា​ នៅ​ថ្ងៃ​អង្គារ​១២សីហាសប្តាហ៍​នេះ​​​​ ថា​នឹង​បង្កើត​អោយ​មាន​គណៈកម្មការ​ឯករាជ្យ​មួយ មាន​សមាជិក​ជាចៅក្រម​មកពីតុលាការ​កំពូល​ ​ដើម្បីស៊ើប​​អង្កេត​លើភាព​​​មិនប្រក្រតី​​ក្នុង​ពេល​បោះឆ្នោត​​សភា​ ឆ្នាំមុន។ ​លោក​អ៊ីមរ៉ាន់​​ ខាន់ ជា​មេប្រឆាំង​ទៀតសោត ក៏​ធ្លាប់​ប្រកាស​ថា ផ្តល់​ទំនុកចិត្ត​​លើ​តុលាការ​​កំពូលដែរ។ ​ប៉ុន្តែ ​បើលោក​ខាន់ ​​មិន​ព្រមទទួល​យក​សំណើ​​​គណៈ​កម្មការ​​អង្កេត​ភាព​មិនប្រក្រតី​នៃ​ការបោះឆ្នោត​​​ស្នើដោយ​លោក​ស្ហារីហ្វទេ ​​នាយករដ្ឋមន្ត្រី​ស្ហារីហ្វ​​​ក៏​គ្មាន​ជម្រើស​ច្រើន​ដែរ។ មានតែ​​ពង្រាយ​​កង​សន្តិសុខ​ហាមឃាត់​​បាតុកម្ម។ ​ម្យ៉ាងទៀត​​ ​ការហាមឃាត់​នេះ​ក៏ស្រប​តាម​​បទបញ្ជា​តុលាការ​ដែរ។

បាតុកម្ម​ថ្ងៃ​ព្រហស្បតិ៍ បើ​រៀបចំដូច​ការគ្រោងទុក អាច​ជា​ភ្លើង​បញ្ឆេះ​​ទំនាស់​រវាង​កងទ័ព​​និង​​រដ្ឋាភិបាល

​​អ្វី​ដែល​រដ្ឋាភិបាល​លោក​ស្ហារីហ្វ បារម្ភ​ខ្លាំង​​ គឺ​ខ្លាចថា ​មេដឹកនាំ​បាតុកម្មទាំង២រូប គឺ​លោក​​ខាន់ និង​លោក​កាឌ្រី បញ្ឆេះ​អោយ​បាតុកម្ម​​ប្រែ​ជា​អំពើ​ហិង្សា​ បញ្ឆេះ​កងទ័ព​អោយ​ងាកមក​​ប្រឆាំង​​​រដ្ឋាភិបាល​វិញ។ គ្រប់គ្នា​សុទ្ធ​​តែ​​ដឹង​ថា កងទ័ព​និង​នាយករដ្ឋមន្ត្រី​​ស្ហារីហ្វ​មិនសូវ​ជា​ត្រូវរ៉ូវគ្នា​ទេ។ រឿងរ៉ាវ​គឺ​ដោយសារ​តែ លោក​ស្ហារីហ្វ អនុញ្ញាត​អោយ​​​តុលាការ​បើក​សវនាការ​​​​​​កាត់ទោស​​​អតីត​ប្រធានាធិបតី​​​ពែរវេ មូស្ហារ៉ាហ្វ។ ​​អតីត​ប្រធានាធិបតី​មូស្ហារ៉ាហ្វ​ធ្លាប់​ធ្វើ​ជា​​​មេយោធា​ជាន់ខ្ពស់​។ ​​កងទ័ព​ប៉ាគីស្ថាន​ចាត់ទុក​លោក​មូស្ហារ៉ាហ្វ ដូច​​​​វីរបុរស​។ ដូច្នេះ ការ​កាត់ទោស​​​ប្រឆាំង​​លោក​មូស្ហារ៉ាហ្វ ប្រៀបបាន​ទៅ​នឹង​បទ​ឧក្រិដ្ឋ​​​ប្រមាថ​ព្រះរាជា​​​​ដែរ។​ ​​​តុលាការ​​ប៉ាគីស្ថាន​​​បាន​បើកសវនាការ​​កាត់ទោស​​​លោក​មូស្ហារ៉ាហ្វ ពីបទ​​បាន​ព្យួររដ្ឋធម្មនុញ្ញ​ ​និង​បាន​​ដាក់​ប្រទេស​អោយ​ស្ថិត​ក្នុង​ភាពអាសន្ន​ កាលពី​​ឆ្នាំ​២០០៧។ បទ​ចោទ​ប្រកាន់​នេះ អាច​អោយ​លោក​មូស្ហារ៉ាហ្វ ទទួល​ទោស​ប្រហារជីវិត​បាន។

គួរបញ្ជាក់​ដែរថា ​​អតីត​ឧត្តមសេនីយ៍​មូស្ហារ៉ាហ្វ ​ធ្លាប់​​ធ្វើ​រដ្ឋប្រហារ​យោធា​​ទំលាក់​នាយក​រដ្ឋមន្ត្រី​ណាវ៉ា ​ស្ហារីហ្វ កាលពី​ឆ្នាំ​១៩៩៩។ គ្មានអ្វី​គួរ​ឆ្ងល់ទេ ប្រសិន​បើ​​លោក​ស្ហារីហ្វ​ ​មិន​ព្រម​​អត់អោន​អតីត​ប្រធានាធិបតី​មូស្ហារ៉ាហ្វ​នោះ។​ ដោយឡែក កងទ័ព​ប៉ាគីស្ថាន​មិនបាន​ជំទាស់​នឹង​ការ​ត្រលប់​ចូលកាន់​អំណាច​របស់​លោក​ណាវ៉ា ស្ហារីហ្វ​ទេ ព្រោះ​ថា ក្រោម​របប​ដឹកនាំ​របស់​នាយករដ្ឋមន្ត្រីស្ហារីហ្វ កងទ័ព​និង​រដ្ឋាភិបាល​​លោក​ស្ហារីហ្វ​ អាច​ចែក​អំណាច​ដឹកនាំ​ជាមួយ​គ្នា។ ​រដ្ឋាភិបាល​​​​កាន់កាប់​សេដ្ឋកិច្ច​ជាតិ ​រីឯ​កងទ័ព​​កាន់កាប់​សន្តិសុខ​ផ្ទៃក្នុង។ ​​

ប៉ុន្តែ សវនាការ​កាត់ទោស​អតីត​ប្រធានាធិបតី​មូស្ហារ៉ាហ្វ បាន​ធ្វើអោយ​ទំនាក់ទំនង​រវាង​​កងទ័ព​និង​នាយក​រដ្ឋមន្ត្រី​​ល្អក់កករ​នឹង​គ្នា។ ប្រាកដ​ណាស់​ថា នេះជា​ប្រយោជន៍​សម្រាប់​​គណបក្ស​ប្រឆាំង​ទៅវិញ​ទេ។ មេក្រុម​ប្រឆាំង​​គឺលោក​​អ៊ីមរ៉ាន់ ខាន់ និង​លោក​តាហៀ អ៊ុល​ កាឌ្រី ​ពិត​ជា​អាច​ឆ្លៀត​​យក​បាតុកម្ម​ថ្ងៃ​ព្រហស្បតិ៍​នេះ ធ្វើជា​សម្ពាធ​​ បញ្ឆេះ​អោយ​កងទ័ព​​​និង​រដ្ឋាភិបាល​កាន់តែ​​​មើលមុខ​គ្នា​មិនចំ។ តែ​មេក្រុម​ប្រឆាំង​ប្រាប់ថា មិនបាន​ទទួល​ការ​គាំទ្រ​​ពី​កងទ័ព​ទេ។ ផ្ទុយ​ទៅវិញ ​ពាក្យ​ពេចន៍​​នេះ ​អាច​ធ្វើ​អោយ​​​រដ្ឋាភិបាល​សង្ស័យ​ទៅវិញ​ទេ​​ថា​ កងទ័ព​អាច​ធ្វើ​​​សកម្មភាព​អ្វីមួយ​ ក្នុង​ពេល​បាតុកម្ម​។ ​​បើ​កងទ័ព​​ធ្វើ​ដូច្នេះ​មែន ​វា​​គឺ​ជា​បញ្ហា​​សង្កត់​ក​​​រដ្ឋាភិបាល​​​​តែម្តង៕ ​

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ