អានតួអត្ថបទ
ព្រឹត្តិការណ៍អន្តរជាតិប្រចាំថ្ងៃ

ជម្លោះ​ជប៉ុន-ចិន-កូរ៉េ​ខាង​ត្បូង​រាលដាល​ទៅដល់​ក្រុមប្រឹក្សា​សន្តិសុខ​អ.ស.ប

សំឡេង ០៤:០៧
លោក​ស្ហ៊ីនហ្សូ អាបេ (Shinzo Abe) នាយករដ្ឋមន្រ្តី​ជប៉ុន​ពេល​ទៅ​វិហារ​យ៉ាស៊ូគូនី កាល​ពី​ថ្ងៃ​ទី២៦ ខែធ្នូ ឆ្នាំ​២០១៣
លោក​ស្ហ៊ីនហ្សូ អាបេ (Shinzo Abe) នាយករដ្ឋមន្រ្តី​ជប៉ុន​ពេល​ទៅ​វិហារ​យ៉ាស៊ូគូនី កាល​ពី​ថ្ងៃ​ទី២៦ ខែធ្នូ ឆ្នាំ​២០១៣ REUTERS/Toru Hanai
ដោយ៖ សេង ឌីណា
២៥ នាទី

ជប៉ុន ចិន និង​កូរ៉េ​ខាង​ត្បូង​បាន​ប៉ះទង្គិចគ្នា​ដោយ​ពាក្យ​សម្តី​យ៉ាង​ធ្ងន់ៗ នៅ​ក្នុង​ក្រុមប្រឹក្សា​សន្តិសុខ​អ.ស.ប ​ ជុំវិញ​រឿង​លោក​ស្ហ៊ីនហ្សូ អាបេ ធ្វើ​ដំណើរ​ទៅ​គោរព​វិញ្ញានក្ខន្ធ នៅ​​វិហារ​យ៉ាស៊ូគូនី កាល​ពី​ចុងឆ្នាំ​ទៅមិញ។ ចិន និង​កូរ៉េ​ខាង​ត្បូង​បាន​ចោទ​មេដឹកនាំ​ជប៉ុន​ថា​បាន​ព្យាយាម​បំភ្លៃ​ប្រវត្តិសាស្រ្ត។

ផ្សាយពាណិជ្ជកម្ម

 

កិច្ចប្រជុំ​របស់​ក្រុមប្រឹក្សា​សន្តិសុខ កាល​ពី​ថ្ងៃ​ពុធ​ ត្រូវ​បាន​ធ្វើឡើង ដើម្បី​ជជែក​ អំពី​មេរៀន​ដែល​គេ​ត្រូវ​រៀនសូត្រ​ពី​សង្រ្គាម​​កាល​ពី​អតីតកាល។

ឯកអគ្គរដ្ឋ​ទូត​ចិន​​ប្រចាំ​អ.ស.ប​ក៏​បាន​​ឆ្លៀតក្នុង​ឱកាស​នេះ​ធ្វើការ​វាយប្រហារ​ទៅលើ​ជប៉ុន ដោយ​បានរិះគន់​ថា ការណ៍​ដែល​លោក​ស្ហ៊ីនហ្សូ អាបេ ធ្វើ​ដំណើរទៅ​គោរព​វិញ្ញានក្ខន្ធនៅ​វិហារ​យ៉ាស៊ូគូនី ​​មានន័យ​ស្មើ​នឹង​ការ​គោរព​ និង​លើក​តម្កើង​ដល់​ឧក្រិដ្ឋជន​ ដែល​ជា​អ្នក​​ បាន​ដុតបញ្ឆេះ​សង្រ្គាម ហើយថា​ការ​ព្យាយាម​របស់​ជប៉ុន​ក្នុងការ​​សរសេរ​ប្រវត្តិសាស្រ្ត​ឡើងវិញ​នេះ វាធ្វើ​ឲ្យ​ប៉ះពាល់ទៅដល់​សន្តិភាព​ក្នុង​តំបន់។

ឯកអគ្គរដ្ឋទូត​កូរ៉េ​ខាង​ត្បូង​ប្រចាំ​អ.ស.ប​ក៏​បាន​លើកឡើង​​ក្នុង​អង្គប្រជុំ​ម្សិលមិញ​នេះ​ដែរ​ថា ភាពតានតឹង​នៅ​ក្នុង​តំបន់​អាស៊ីបូព៌ា​នៅពេលនេះ​កំពុងតែ​រាលដាល​ខ្លាំង​មិន​ធ្លាប់​មាន​ពីមុន ហើយ​វា​បណ្តាល​មក​ពី​ការ​មិនទុកចិត្ត​គ្នា រវាង​ប្រទេស​ក្នុង​តំបន់ ហើយ​ថា ការ​មិនទុកចិត្ត​គ្នា​នេះ​វាកើតឡើង ដោយសារ​តែ​មេដឹកនាំ​ជប៉ុន​មិន​ព្រម​ទទួលស្គាល់​​ការពិត​នៃ​អ្វី​ដែល​បានកើតឡើង នៅ​ក្នុង​សម័យសង្រ្គាម​ឈ្លានពាន​របស់​ជប៉ុន។

ឯកអគ្គរាជទូត​រង​របស់​ជប៉ុន ប្រចាំ​អ.ស.ប. ​បាន​ឆ្លើយតប​មកវិញ​ថា ជប៉ុន​មិនបាន​បំភ្លៃ​ប្រវត្តិសាស្រ្ត​ដូចការ​ចោទប្រកាន់​របស់​​ចិន និង​កូរ៉េ​ខាង​ត្បូង​នោះទេ “ជប៉ុន​តែងតែ​ទទួលស្គាល់​ហេតុការណ៍ប្រវត្តិសាស្រ្ត ហើយ​តែងតែ​បាន​បង្ហាញ​អំពី​ការ​សោកស្តាយ និង​បាន​សុំទោស ចំពោះ​សកម្មភាព​​របស់​ជប៉ុន​នៅ​ក្នុង​សម័យសង្រ្គាម”

មន្រ្តីទូត​ជប៉ុនក៏​​​បាន​រិះគន់​តបទៅ​ចិន និង​កូរ៉េ​ខាង​ត្បូង​វិញ​ផងដែរ​ថា ការនាំ​យក​បញ្ហា​ជម្លោះ​​​អតីតកាល​​មក​ជជែក​ក្នុង​កិច្ចប្រជុំ​ក្រុមប្រឹក្សា​សន្តិសុខ​បែបនេះ ​មិនមែន​ជា​មធ្យោបាយ​ក្នុងការ​បន្ធូរបន្ថយ​ភាព​តានតឹង និង​ពង្រឹង​ស្ថិរភាព​នៅ​ក្នុង​តំបន់​ទេ។

គួររំឭកឡើងវិញ​ថា លោក​ស្ហ៊ីនហ្សូ អាបេ បាន​ធ្វើ​ដំណើរ​ទៅ​គោរពវិញ្ញានក្ខន្ធ​នៅ​វិហារ​យ៉ាស៊ូគូនី កាល​ពី​ខែ​ធ្នូ ឆ្នាំ​២០១៣។ វិហារ​យ៉ាស៊ូគូនី គឺ​ទី​សក្ការៈ សម្រាប់​គោរព​ដល់​ប្រជាជន​ជប៉ុន​ជាង ២លាននាក់ ដែល​បាន​បូជា​ជីវិត​ ដើម្បី​បុព្វហេតុ​ជាតិ។ ក៏ប៉ុន្តែ នៅក្នុង​ចំណោម​នោះ មាន​ទាហាន​ជប៉ុន ១៤រូប ដែល​ធ្លាប់​ត្រូវ​បាន​តុលាការ​អន្តរជាតិ​កាត់ឲ្យ​ជាប់ទោស​ពី​បទ​ឧក្រិដ្ឋកម្ម​សង្រ្គាម។ ហេតុដូច្នេះ​ហើយ​បានជា​ប្រទេស​ជិត​ខាង​របស់​ជប៉ុន គឺ​ចិន និង​កូរ៉េ ដែល​ធ្លាប់​ជា​ជនរងគ្រោះ ដោយសារ​នយោបាយ​ឈ្លានពាន​របស់​ជប៉ុន កាល​ពី​ក្នុង​សម័យសង្រ្គាម តែងតែ​ផ្ទុះកំហឹង នៅ​ពេលណា​ដែល​មាន​មេដឹកនាំ​ជប៉ុន​ធ្វើ​ដំណើរ​ទៅ​គោរព​វិញ្ញានក្ខន្ធ នៅ​វិហារ​យ៉ាស៊ូគូនី​នេះ។

នៅ​ក្នុង​កិច្ចប្រជុំ​របស់​ក្រុមប្រឹក្សា​សន្តិសុខ​អ.ស.ប. កាល​ពីថ្ងៃ​ពុធ ឯកអគ្គរដ្ឋទូត​កូរ៉េ​ខាង​ត្បូង​ប្រចាំ​អ.ស.ប. ក៏​បាន​រំឭក​ផងដែរ អំពី​ស្រ្តី​កូរ៉េ ដែល​ត្រូវ​បាន​ទាហាន​ជប៉ុន​បង្ខំ​ឲ្យ​ធ្វើ​ជា​ទាសករ​បម្រើ​ផ្លូវភេទ នៅ​ក្នុង​សម័យ​សង្រ្គាម។
 
កាលពីថ្ងៃ​អង្គារ លោក លោក កាត់ស៊ូតូ ម៉ូមីអ៊ី (Katsuto Momii) នាយកទូរទស្សន៍​ NHK ​ដែល​ជា​ទូរទស្សន៍​រដ្ឋ​របស់​ជប៉ុន បាន​លើកឡើង​ថា ការយក​ស្រ្តី​ជា​ទាសករ​បម្រើ​ផ្លូវភេទ នៅ​ក្នុង​សម័យសង្រ្គាម មិនមែន​កើតមាន​តែ​ចំពោះ​ទាហាន​ជប៉ុន​ទេ។ គ្រប់ប្រទេស​​​ផ្សេងៗ​ទៀត​ដែល​ជាប់​សង្រ្គាម​នៅ​ពេលនោះ ​ក៏​សុទ្ធតែ​​ធ្វើ​ដូចគ្នា​នេះ​ដែរ។

មន្រ្តី​ទូត​អាមេរិក​ប្រចាំ​ទីក្រុង​តូក្យូ​​បាន​ចេញ​មុខ​បដិសេធ​ថា អាមេរិក​មិនដែល​មាន​នយោបាយ​​យក​ស្រ្តី​មក​ធ្វើ​ជា​ទាសករ​បម្រើ​ផ្លូវភេទ​ដល់​ទាហាននោះទេ ទាំង​នៅ​ក្នុងសម័យ​សង្រ្គាមលោក និង​ក្រោយៗ​មក​ទៀត។ ចំណែក​ក្រសួង​ការបរទេស​កូរ៉េ​ខាង​ត្បូង​វិញ​​បាន​ទាមទារ​ឲ្យ​ជប៉ុន​ដក​លោក​កាត់ស៊ូតូ ម៉ូមីអ៊ី ចេញ​ពី​តំណែង។

ក៏ប៉ុន្តែ ក្រោយ​មក​ លោកកាត់ស៊ូតូ ​ម៉ូមីអ៊ី ​បានចេញ​មុខ​បកស្រាយ​ថា អ្វី​ដែលលោក​បាន​​លើកឡើង គ្រាន់តែ​ជា​ទស្សនៈ​ផ្ទាល់ខ្លួន​ប៉ុណ្ណោះ មិនមែន​ធ្វើ​ក្នុងនាម​នាយក​ទូរទស្សន៍ NHK នោះទេ។ ​លោក​បាន​សម្តែង​នូវការ​សោកស្តាយ និង​សុំដកពាក្យសម្តី​​របស់​លោក​ទាំង​ប៉ុន្មាន​នោះ​មកវិញ។

ការថ្លែង​ដ៏ចម្រូងចម្រាស​របស់​លោក​ម៉ូមីអ៊ី​បានមក​បន្ថែម​លើ​ភាព​តានតឹង ដែល​កំពុង​តែ​កើតឡើង​ខ្លាំង​ស្រាប់ រវាង​ជប៉ុន និង​ប្រទេស​ជិតខាង ហើយ​លោក​ស្ហ៊ីនហ្សូ អាបេ កំពុងតែ​ព្យាយាម​ស្នើសុំ​ដោយ​ទទូច ម្តងហើយ​ម្តងទៀត ឲ្យ​មាន​ជំនួបកំពូល​ ជាមួយ​ចិន និង​កូរ៉េ​ខាង​ត្បូង ដើម្បី​ជជែក​គ្នា ស្វែងរក​មធ្យោបាយ​ដោះស្រាយ​ជម្លោះ៕

 

ព្រឹត្តិបត្រ​ព័ត៌មានព្រឹត្តិបត្រ​ព័ត៌មាន​ប្រចាំថ្ងៃ​នឹង​អាច​ឲ្យ​លោក​អ្នក​ទទួល​បាន​នូវ​ព័ត៌មាន​សំខាន់ៗ​ប្រចាំថ្ងៃ​ក្នុង​អ៊ីមែល​របស់​លោក​អ្នក​ផ្ទាល់៖

តាមដានព័ត៌មានកម្ពុជានិងអន្តរជាតិដោយទាញយកកម្មវិធីទូរស័ព្ទដៃ RFI

រកមិនឃើញអត្ថបទដែលស្វែងរកទេ

មិនមាន​អត្ថបទ​ដែលអ្នកព្យាយាមចូលមើលទេ